2 Tesaronika 1 - Wayampi

Pauru ojikuwa ijupe kõ

¹ Pauru tè ije. Eayvukwerà akusiwatà pejẽ. Sirasi epyri tui akusiwa ajupa remẽ. Ãmõ, Timoteu ve epyri tui. Tesaronika taa wãnà Jesu koty rewarà kõ atyry pè akusiwa mijẽ kareta ajupa. Janeruwasu koty rewarà kõ tè pejẽ. Janerõvijã Jesu Kiristu koty rewarà kõ teve pejẽ. Ajawyi eayvu akusiwa kareta pupe peupewarà mõ ajupa.

² Janeruwasu ikõ tapenereko katu okatuaya rupi nẽ. Tapepy'amopiryvypy katu teve ikõ penereko ipi nẽ. Ãmõ, Janerõvijã Jesu Kiristu teve ikõ a'evo tapenereko nẽ.

“Janejare'e pè oroporegeta peupewarà mõ”, e'i mã'ẽ

³ Eretãrãgwerà kõ, oreroryvay pene. Aepo oromome'u Janejare'e pè ipi, orokuwa age'e ywesõ pejirovija Jesu rè rewarà mõ. Ãwĩvo ve age'e ywesõ pejiau katu ojee peiko ky'y. A'evo teãmã peiko. A'evoa orokuwa rewarà mõ orerory pene.

⁴ Ãmõ taa taa wãnà kõ pè oroporegeta remẽ, penewarà oromojenu ijupe kõ ipi. Janejare'e koty rewarà kõ atyry kõ pè oromojenu ipi. Kee oro'e imojenu ijupe kõ: “Jesu noerovijai mãe kõ omojaiwe kõ ipe ipi. Ajamã'ẽ Jesu rekoa noityi jẽ tite kupa a'evo remẽ. Mãerã ojirovija ywete jẽ ee kupa”, oro'e peupewarà mõ ipi.

⁵ Aje ywete pejirovija katu ee ipi. Noerovijai mãe kõ pemoai remẽ, a'evo jẽ peiko ãmẽ ipi ne, a'e pejẽ. A'evo peiko rewarà mõ kee e'i Janejare'e oupe pene omãjã: – Ere ojirovija mãe kõ ojimomorijau ipe remẽ, ojirovija katu jẽ ajamã'ẽ ere iko kupa. I'ete apyteporo kõ eremĩgwai kõ rõmõ toiko kupa, e'i oupe pene omãjã ipi.

^6-8 Janejare'e wekoa rupi katu ekoi ipi. Ikatuay wete Janejare'e iko ipi. Kãramõ omuu tarà mijẽ Janerõvijã Jesu. Yva pe wyi ojikuwatà owyjy uu ky'y. Tata ijãrarõwã rõwãe vo mã'ẽ rupi uutà jane kõ rovake ojisaoka. Wemĩgwai yvapewarà kõ reve uutà, ikasiay mãe kõ reve. A'evo ekoi remẽ temimojaiweawerà kõ omomoiokatà imojaiwearerà kõ po pe wyi ãmẽ ky'y. Jane ve janemomoiokatà janemoaiarà kõ po pe wyi ky'y. Ãmẽ poromoai ywete maekwerà kõ ovote ojimojaiwe ywetetà ky'y. Janemoai maekwerà kõ ve ojimomorijautà, jimomorijaua pupe. Jesu tè omomorijau kõ ywetetà ãmẽ ky'y. Janejare'e rè noja'ai maekwerà kõ a'evotà wereko, Janerõvijã Jesu rekoa noerovijai mãe kõ.

⁹ Ajawyi a'evotà kupa. Jimomorijau wasua rena pè tè sikaepo ootà kupa. Ãwĩvo awyje mãerã tè ãmẽ. Awyje mãerã omokuipe'e kõtà Janerõvijã owyi. Okatuay wetea wyi omokuipe'e kõtà. Ãmõ, okasiay wetea wyi.

¹⁰ Nãwĩvo'ãi ee oja'a katu mãe kõ, ijupewarà rã kõ. A'e kõ omoe'e ywetetà oõvijã wasu ovãe mijẽ remẽ. Oja'a ywetetà ee kupa. Oryvaytà oõvijã rè kupa. A'evoa rõmõ tè uu tarà mijẽ Janerõvijã. Pejẽ ve a'evotà, “aje” pejẽ ijayvukwerà pè oromojenu pejẽ remẽ rewarà mõ.

¹¹ Ajawyi tè kõ'ẽ jawe jawe oroporegeta Janejare'e pè peupewarà mõ ipi. Kee oro'e ijupe ipi: – Teremokasiay ikõ nekoty rewarà kõ ipi nẽ, nerekoa rupi katu toiko jẽ kupa ipi. Opota katu neremimota rupi oiko kupa. Nopotai nerekoa ojavy kupa ipi. Ajawyi emokasi kõ jẽ nekasia rupi, ãmẽ ywesõ nerekoa rupi katu toiko kupa, nere ojirovija katu kupa rewarà mõ. A'evo ekoi kupa remẽ, “I'ete apyteporo kõ”, eretà ee kõ nemãjã, oro'e ijupe. Aepo oro'e Janejare'e pè peupewarà mõ ipi.

¹² Ãmẽ Jesu rekoa rupi katu peiko ipi remẽ, ãmõ kõ omoe'età Janerõvijã Jesu penewarà mõ, penekoa rè omã'ẽ kupa remẽ. Ãmõ, Jesu Kiristu ve pemoe'earà rõmõ ekoità. Janejare'e okatuaya rupi a'evo penerekotà. Janerõvijã Jesu Kiristu ve okatuaya rupi a'evo penerekotà.