2 Peturu 1 - Wayampi

Peturu ojikuwa ijupe kõ

¹ Simão Peturu tè ije. Jesu Kiristu epyteporo wemĩgwai rõmõ taiko, wemimonokwerà rõmõ. Aã kareta ije tè akusiwa pejẽ, Janejare'e koty rewarà kõ rõmõ. Janejare'e ikatuay wete janerereko ipi. Jesu Kiristu ve a'evo ekoi. Janereko katuarà rõmõ ekoi. Okatuaya wyi ojirovijaoka janeupe. Epy wete mã'ẽ vo Jesu Kiristu rè jajirovija mã'ẽ jane. A'e rewarà tè akusiwa pejẽ ajupa.

² Janejare'e yveve pekuwa katu. Janerõvijã Jesu ve pekuwa katu. Janejare'e ikõ tapenereko katu okatuaya rupi nẽ, a'e pejẽ. Tapepy'amopiryvypy katu jẽ ikõ teve penereko nẽ, a'e pejẽ. Age'e ywesõ ta'evo penereko.

“Kee Janejare'e opota tijaiko wemĩgwai kõ rõmõ”, e'i mã'ẽ

³ Janejare'e ikatuay wete. A'e ywesõ ivo katu mã'ẽ. Janepyteporopa opyri tijaiko. Ãmõ, janepyteporopa weruparà mõ tijaiko. A'evoa rõmõ janemokasia kõ iteetejẽ ome'ẽ jane, okasia rupi. Mã jẽ rõwã naikoi emime'ẽgwerà kõ janeupe ãmẽ.

⁴ Ajawyi janemokasi ipi. “Kee ame'ẽtà pejẽ pemokasia rõmõ”, e'ipa remẽ, ome'ẽ jane ipi. Ivo jaikoa rè janemokasi teve ipi. Ivo e'ãa wyi jajireko katua rè janemokasi teve ipi. Ikatuay wete emime'ẽgwerà kõ. Epy wete mã'ẽ vo e'ete jane. A'e rupi Janejare'e janerereko katu nivoi mãe kõ reko aiwerà wyi, emimota aiwerà wyi, nivoi ekoi mãe kõ vo tijaiko tite e'ã. Ãmẽ tè janepy'a kõ nijai'ãi. A'evo Janejare'e janemokatu janerereko, oterẽ jẽ weruparà mõ kõrijõ tijaiko.

⁵ A'evo Kiristu janerereko katuay wete ipi. Ajawyi tapejimokasi ikõ ee pejirovija ywete jẽ nẽ, a'e pejẽ. Kee tapeiko teve. Ivo ikõ tapeiko ipi nẽ. Ãmõ, tapejimotekokuwa ikõ Janejare'e ayvu rè peiko nẽ, upi tapeiko.

⁶ Ãmõ, nivoi mã'ẽ wyi ikõ tapejireko katu peiko ipi nẽ. Upi ikõ tapeiko ywe'e tite e'ã peiko nẽ. Pejimomorijau ipe Jesu rewarà mõ remẽ ikõ, tapejirovija jẽ ee pejimomãatã ipi nẽ. Tapenerekoiva ywe'e tite e'ã ikõ ee pejirovijaa nẽ. Janejare'e reruparà mõ kõrijõ ikõ tapeiko ipi nẽ. Kee tapeiko. Ãwitõ Janejare'e ivoaya rupi ekoi, ivo ve tapeiko. Kee teve tapeiko. Ãwitõ Janejare'e napenerekoivai penaua rè ipi, ivo ve tapeiko.

⁷ Tapepota katu pevo jẽ Jesu Kiristu koty rewarà kõ pirujẽ. Toporoauvay teve poroereko ipi. A'evo 'evoa rupi tapejimokasi Janerõvijã Jesu Kiristu koty rewarà kõ rõmõ.

⁸ A'evo peiko remẽ ywesõ ikatutà pejẽ. Aje ywete pekuwa katu Janerõvijã Jesu Kiristu remẽ, a'evo peikotà teãmã. Pejikuwatà ikoty rewarà kõ rõmõ, eruparà mõ peiko mã'ẽ rupi.

⁹ Ava mõ sõ na'evoi remẽ, nojimokasi ojirovija ee remẽ, naeapyoi mã'ẽ vo 'ejẽ apijarà ekoi ipi. Janejare'e wereko katua wyi earaipa mã'ẽ vo 'ejẽ ekoi. Janejare'e omoje'opa ijaiwererà iwyi Jesu mãnõa rupi mã'ẽ wyi earaipa.

¹⁰ Ajawyi kee a'e pejẽ, eretãrãgwerà kõ. Janejare'e remipyteporokwerà kõ tè jane. “Ejo erupi eremĩgwai rõmõ eiko ky'y”, e'ipa jane. Ajawyi age'e ywesõ tapejimokasiay Jesu Kiristu remimota rupi peiko, a'e pejẽ. A'evo peiko remẽ, napeity ywe'e tite'ãi pejirovija ee mã'ẽ ãmẽ. Upi peiko jẽtà ãmẽ peiko.

¹¹ A'evo remẽ jẽ sõsi Janejare'e kee e'ità pejẽ: “Eike erena pè epyri eiko karuaru rõmõ”, e'ità pejẽ ãmẽ ky'y. A'e pè Janerõvijã Jesu Kiristu janerereko karuarutà Janerõvijã wasu rõmõ janerereko. Janerereko katuarà rõmõ janererekotà. Janemoigeokatà opyri tijaiko karuaru.

¹² A'evoa pekuwapa. Ajamã'ẽ poromoja'aoka jẽtà a'evoa rè penereko, eremikusiwarerà rupi, ãwisõ tapejimokasi jẽ Jesu rè pejirovija jẽ peiko. Pekuwa katupa aje ywete mã'ẽ Janejare'e rewarà, pejimotekokuwapa ee rewarà mõ.

^13-14 A'evo peikopa ipe remẽ, poromoja'aoka jẽtà ajamã'ẽ ee penereko. I'ete a'evo aiko remẽ. Akuwa naiko puku'ãi ky'y. Janerõvijã Jesu Kiristu a'evoa omojikuwaokapa ije. Ajawyi amãnõ e'ãve poromoja'aoka jẽtà aepo rè.

¹⁵ Ãmẽ tè erenawery pè peja'a jẽtà eayvukwerà rè peiko. Pejimokasi jẽtà Jesu rè pejirovija mã'ẽ rè ãmẽ. A'evoa rõmõ ajimokasiay wete amãtejẽ ajupa.

“Jesu Kiristu ojikuwa Janejare'e Ra'yry rõmõ remẽwarà rè oromã'ẽ mãe kõ tè ore”, e'i mã'ẽ

¹⁶ Kee oro'epa itõkõ pejẽ: “Kãramõ Janerõvijã Jesu Kiristu uu tarà mijẽ. Ikasiaytà uu mijẽ remẽ”, oro'epa pejẽ. Teywete rõwã oroporegeta aepo jaa rè pejẽ. Aje ywete oro'e ãmẽ ipi. Ore ywete oromã'ẽ ywete ee, okasia revejẽ ojisa orerovake remẽ.

¹⁷ Janejare'e omoe'e imojikuwaoka Wa'yry rõmõ remẽ, oromã'ẽ ee. Oroenu teve kee e'i remẽ: “Era'yre'e tè ãwĩ. Eremiauvay tè. Eroryvay ee mã'ẽ tè”, e'i imojikuwaoka remẽ. Ikasia renya rè tẽ tesõ oromã'ẽ, a'evo ekoi remẽ.

¹⁸ Ore ywete oroenu aepo e'i oporegeta imuu wena pe wyi remẽ. Yvytyrapyte 'aryvo Jesu Kiristu reve oroiko remẽ a'evo ekoi, Janejare'e rena katuay pè tè.

Janejare'e ayvukwerà mojenuarà kõ rewarà

¹⁹ Ajawyi aepo jaa oroenu remẽ, kee oro'e ijupewarà mõ ipi: “Janejare'e ayvu mojenuarerà kõ karamoe remẽwarà remimojenuwerà rupi katu tè ãwĩvo ekoi”, oro'e. “Aje ywete emimojenuwerà kõ e'i amãtejẽ maekwerà”, oro'e ojiupe. Ãmẽ ywesõ, “Aje ywete Janejare'e ayvu remimojenuarerà kõ remimojenuawerà”, oro'e. Ajawyi ikõ tapeja'a jẽ ijayvukwerà kõ rè nẽ, a'e pejẽ. Ijayvukwerà kõ a'evo ve raparina eny kõ'ẽ mã'ẽ vo 'ejẽ. Ojisa ke'ĩatu tè rã'ĩ pãtõnà pè, ajaate ikõ'ẽma remẽ. Ajaate kwaray oẽ uu ky'y. Ãwĩvo ve tijaja'a jẽ Janejare'e ayvu mojenuarerà kõ ayvukwerà kõ rè, ajaate Jesu vãea rè. Ãmẽ tè Jesu aje ywete mã'ẽ rè janemotekokuwapatà ky'y. Jesu ywesõ raparina eny kõ'ẽ mã'ẽ vo 'ejẽ ekoi, ijayvu pepy'a pupe pereko remẽ.

²⁰ Kee jaa ywesõ tapekuwa. Janejare'e ayvu mojenuarà kõ okusiwa ijayvukwerà kareta rè remẽ, ovote rõwã a'evo ekoi kupa.

²¹ Otekokuwaa rupi rõwã teve okusiwa kupa. Wemimota rupi rõwã teve okusiwa kupa. Aje ywete Janejare'e 'Ãg tè omotekokuwa kõ. Omojikuwaoka wayvukwerà ijupe kõ tomojenu amãtejẽ kupa ipi. Tokusiwa amãtejẽ teve kupa. I'Ãg tè omokasi kõ a'evo toiko kupa.