Yayqooba 1 - Oyda New Testament

¹ Xoozzen Laatstse Yesuus Kiristtoosa aro, Yayqooba, sa7a ubba lalinttide taphpho lam77i kochchuntsis kiittide kiita. Saro yinttis maaqqe.

Ammanon cinccatitsin

² Ta ishuntso, yinttana dumma dumma faatana yellize wode yin lo77o baz denggide fana kumutsi ufayssara ekkote.

³ Yin ammantto fattanizanna dandda7a yinttis inggizanno erane.

⁴ Yin wurssutsi yellodes dandda7iko akko facce baayzin folon kumutsi maaqqade fana oochchiza maaqqe.

⁵ Yinttappa oodesin cinccatitsi dhabiko Xooz woosso. Ees ingginttoda. Xoozii ooden borikaayzara ubbuntsis keehatitsara inggize Xoozii.

⁶ Yezin E woossize wode so7ikaayzara ammanora Xooz woosso. So7ize ooden baqo urqqin en7ize abba gaar.

^7-8 Lam77i qofa yezen fa ogite eqqoosse ooden Laatstsappa akkon denggoda ga7i qoppipe.

Daha asin dure asi

⁹ Ammanze dahuntsi, Xoozii unttana dhoqi oochchize wode ufaytto.

¹⁰ Mahi ammanze duruntsi Xoozii unttana ziqqii oochchize wode ufaytto. Dure asuntsi fudhe fana dhaboda.

¹¹ Awa fa mishara kezane maato melizane, fudhitan gufane; E lo77otitsitan dhabane. Yinnii fana, dure asuntsi fa oochite cer lalitera dhaboda.

As yellize faatana

¹² Madha gamii aadhidannip suuba, Xoozii fana siiqizuntsis inggoda ga7i qaala gelide de7o worqqa zawude ekkode gisho madhite genccize asi anjjinttidaya.

¹³ Ooden fattaninttize wode «Tana Xoozii fattanane» gayppe. Xoozii iitara fattaninttoos; mahi E ooden fattanoos.

¹⁴ Yezin fettii fettii asi fa iita amora gochinttize woden ciminttize wode fattaninttane.

¹⁵ Yinnippa suuba, amotitsi wodaxii nagara yelane; mahi nagara diccii hyayqo yelane.

¹⁶ Ta siiqo ishuntso, ciminttippete.

¹⁷ Lo77o imon kumutsi anjjo ubba saloppan salo foo7ito medhdhide Xoozze adeppa ye7ine. Xoozii dasho fana ubba wode laaminttoos.

¹⁸ Nuunii, E medhdhide bazis anggis maaqqade fana nuna turii qaalara qoppii yelida.

Sissin oochan

¹⁹ Ta siiqo ishuntso, hyanno qoppote. Asi ubba si7odes elliso, yezin ohodesin hyanqodes ellisippe.

²⁰ As hyanqo Xoozze koyze xillotitsi ko7oos.

²¹ Yinnii gisho, tuna oochan iita baz ubba hyaasii, Xoozii yin wozintte tukkide yin shemppito ashshodes dandda7ize qaala aadatitsara ekkote.

²² Yezin Xoozze qaala oochalla feeshotep attin yin ommite balinttitera si7izuntsana xalaala maaqqippete.

²³ Qaala si7i oochchoose asi, E fa sintto masttootera be7ize atstse fana.

²⁴ E fa sintto bi7i qitane, yezin E akko aazizako ellisii botane.

²⁵ Yezin ooden nagara arotitsappa kessize folo higge qoppii bi7i, miinggi eqqize, si7idanno botikaayzara oochalla feeshize atstsay, fa oocha ubbanne anjjinttoda.

²⁶ Fa il7antsito naagikaayzara goynane gaaze atstsay fana cimmane; E goynita hyarii.

²⁷ Xoozze Aday tiino bore baayze geeshi goyno hyanno: inddan aden baayze na7untsanan azinii baayzutsana un madhite maadden alame tunappa fana naage.