ዋሐንሳ ቆንጭ 4 - Oyda New Testament

Salo yeze goyno

¹ Yinnippa suuba, taanii salo be7ize wode bugunttide furtsi bi7ida. Mahi ta tiino si7ide moyze oolle gaarze ootsi taago, «Hyankka kezo; hyannippa suuba, yi7ades yeze baz ta nena beessada» gayda.

² Ye wode ta Ayyaana qofara yene. Yikke, salo araata bi7ida; araatizella afa fete bettidaya bi7ida.

³ Ye bettiday bishshita iyaspheden sarddiyoone gaaze al77o shuchchi fana. E araatize kantto wutii al77o shuchchi aazize zuulla yene.

⁴ Ye araatize kantto wutii lam7itam oyddii araatuntsi yene; unttalla afa bootsi ma7o ma77i, ommite worqqa zawude gaddide lam7itam oyddii cimuntsi bettida.

⁵ Araatizeppa dada, zelintsin dhoge kezane. Araatize tiintte laappun foo7ize xomppuntsi yene; un laappun Xoozze ayyaanutsana.

⁶ Araatize tiino birille aazize foo7ize burccuqo aazze abba yene. Tiinoran suubara aafe kumide oyddii xoots medhetuntsi araatize kantte yene.

⁷ Tiino xootsize bishshita gaammo aazane; lam7antsize bora aazane; hyaydzantsize as sino aazize sino yene; mahi oydantsize firize ankko aazane.

⁸ Oyddii xootsuntsi ubbuntsis izipun qefe yene; un galtta ubban qefitis kattaran ommita ubba aafera kumida.Un qamman awaran ashshikaayzara, «Geeshshayo, geeshshayo, geeshshayo, Laatstsayo, Ubbappa Wolqqaama Xoozayo, zagan, hyatten yezayo, tiinos yo7odayo» yagaane.

⁹ Ye xootsuntsi araatizella bettidaysin medhina yezes nashsho, bonchchon galata inggide wode

¹⁰ lam7itam oyddii cimuntsi araatizella bettidays medhina yezays tiintte zuggii goynida; fa worqqa zawuduntsana tiintte gaddii,

¹¹ «Nu Laatstsayo, nu Xoozayo, neenii bonchcho, nashshon wolqqa ekkodes beezane. Ne ubba medhdhida; ubba bazi ne qoftti gaar hyanida, medhinttida» yagayda.