Maatoosa 1 - Oyda New Testament

Yesuusa yelintte xussii

¹ Yinnippa kaallii xaafinttide Dawute na7a Abrahama na7a maaqqide Yesuus Kiristtoosa yelintto.

² Abrahama Yisaaqa yelida; Yisaaqa Yayqooba yelida; Yayqooba Yihudan E ishuntsana yelida;

³ Yihuda Ti7imarippa Faaresenen Zaaran yelida; Faaresa Asroome yelida; Asroome Raame yelida;

⁴ Raame Aminaadabe yelida; Aminaadabe Na7asoona yelida; Na7asoona Salmoone yelida;

⁵ Salmoone Re7aabippa Boo7eza yelida; Boo7eza Uruutippa Iyobeede yelida; Iyobeede Issey yelida;

⁶ Isseyen kaati Dawute yelida; Dawute Ooriyo machchitippa Solomone yelida;

⁷ Solomone Robi7aama yelida; Robi7aama Abiya yelida; Abiye Asaafa yelida;

⁸ Asaappa Iyosaafixe yelida; Iyosaafixe Iyoraame yelida; Iyoraame Ooziyane yelida;

⁹ Ooziyane Iyo7ataama yelida; Iyo7ataama Akkaza yelida; Akkaza Hiziqiyasa yelida;

¹⁰ Hiziqiyasa Minaase yelida; Minaase Amoona yelida; Amoona Iyosiyaasa yelida;

¹¹ Isra7eele asuntsi di7intti Baabiloone gaaze sa7a hyanggide wode Iyosiyaasa Ikoniyaanan E ishuntsana yelida.

¹² Baabiloone sa7a Isra7eele asuntsi di7inttii hyanggideppa maaqqii Ikoniyaana Salatiyaale yelida. Salatiyaale Zerubaabela yelida;

¹³ Zerubaabela Abdiyu yelida; Abdiyu Eliyaaqeme yelida; Eliyaaqeme Azaara yelida;

¹⁴ Azaara Sadooqe yelida; Sadooqe Akime yelida; Akime Eliyuuda yelida;

¹⁵ Eliyuuda Alaazare yelida; Alaazare Maatane yelida; Maatane Yayqooba yelida;

¹⁶ Yayqooba Yoosefa yelida; Yoosefa Kiristtoosa gaaze Yesuusa yelide Mayrami azini.

¹⁷ Yikke, yelintta Abrahameppa Dawute yellodes taphpho oyddii. Dawuteppa hyanggi Baabiloone di7e yellodes taphpho oyddii. Baabiloone di7eppa hyanggi Kiristtoosa yellodes taphpho oyddii yelintte maaqqane.

Yesuus Kiristtoosa yelintto

¹⁸ Yesuus Kiristtoosa yelintta taarike hyannippa kaallizanno. E intta Mayrama Yoosefas oocintti yezite Yoosefa ekkikaayzin Geeshi Ayyaanappa wodaxida.

¹⁹ Yoosefa xillo as maaqqide gisho izo as gidda kessodes koykaaya. Yinnii gisho aachchii izo ashshodes qoppida.

²⁰ E yinna qofite yezin Xoozze kiitanchcho abukkora qonccii, «Dawute na7ay, Yoosefa, ne oocide Mayrama wodaxide Geeshi Ayyaanappa maaqqide gisho izo ekkodes zhashtippe» yagayda.

²¹ Iza dhiiratsi na7a yeloda, E fa worzhito un nagarttippa ashshize gisho E suntsito ne Yesuusa ga7i xeegoda.

²² Laatstse nabe Isayaasa doona.

²³ «Yikke wudurtta wodaxoda; dhiiratsi na7an yeloda; E suntsita Ammanu7eela ga7inttoda» ga7inttidanna folinttode fana hyanna ubbanna hyanida. Ammanu7eela gaazannis bilitsita «Xoozii nuura yene» ga7e.

²⁴ Yoosefa genttoppa barkki Laatstse kiitanchchuntsi kiittidanni fana Mayramo fa kara kanggida.

²⁵ Yezin fa anggis na7aya yelode wontsis izo girmmikaaya; Yelinttide na7aya Yesuusa ga7i xeegida.