Ibraawe 1 - Oyda New Testament

Na7ay kiitanchchuntsappa kattara

¹ Zaga Xoozii, nu aduntsis nabunts baggara dumma dumma ogera gaama wode ohida.

² Yezin hyanna wurssutsi wodite ubbanno eza laatizide mahi alamito E baggara medhdhide fa Na7ay baggara nuus ohida.

³ Na7ay Xoozze bonchcho foo7izen kumutsi Xoozze Xoozzetitsito ekkii, fa wolqqa qaalara hyanna alamito katii aykkida. Asuntsana un nagarappa geeshidannippa suuba Ubbappa kattara Xoozze mizaqi zalara salo bettida.

⁴ Ees ingginttide suntsita kiitanchchuntsi suntsappa kattara maaqqidanni fana E unttappa kattara.

⁵ Yikke, Xoozii kiitanchchuntsappa oodego, «Neenii ta Na7a; ta hyayno nees ade maaqqida» gaydo? Woy mahi oodego, «Taanii ees ade maaqqada; ezin taas na7a maaqqada» gaydo?

⁶ Mahi Xoozii fa anggis Na7aya hyanna alamite kiittitera, «Xoozze kiitanchchuntsi ubba ees goyno» yagayda.

⁷ Xoozii kiitanchchuntsi baz ohitera, «Xoozii fa Kiitanchchuntsana ayyaana, fa aruntsana tama loxe mahine» yagayda.

⁸ Yezin fa Na7ay baz ohitera, «Xoozzayo, ne ka7itumtta medhinas yene. Ne ka7itumtto ne xillotitsara aho.

⁹ Neenii xillotitsi kadhida; iita ixxida. Xoozii, ne Laatstse, nena ne lagguntsappa aatsii doorida, ufays zayte nena tizhida» yagayda.

¹⁰ Xoozii mahi, «Laatstsayo, tiino neenii sa7a medhdhida; saluntsi ne kushe oocha.

¹¹ Yentses ubba dhaboda; yezin ne yessada. Un ubba afula fana hyal7oda.

¹² Ne magaraja fana xaaxoda; mahi un afula fana cinggoda. Yezin neenii ubba wode nena; ne beritan hyal7oos» yagayda.

¹³ Yezin Xoozii kiitanchchuntsappa oodego, «Taanii ne morkkuntsana ne tohita yedhdhize bessi mahode wontsis, hyanne taappa mizaqi zalara betto» gaydo?

¹⁴ Kiitanchchuntsi ubba atotitsi denggodes yeze asuntsana maaddodes Xoozii kiittide ayyaanuntsana baane?