ዋሐንሳ ቆንጭ 7 - ኦይዳ አዲስ ኪዳን

144,000 አሱንላ ማህታመ ጋድንትዳ

¹ ይንፓ ሱባ፥ ኦይዲ ኪታንቹን ኦይዲ ሳአ ጋጻ ኤቅዱንና ብእዳ። የን ኪታንቹን ሳአላ ዎይ አባላ ዎይ ምንጻላ አፋ አኮን ባቆ ኦይዲ ሳአ ጋጻፓ ባቃመ ጋር ተቂዳ።

² ማህ ደኦ ጾዘ ማህታመ አይክደ መለ ኪታንቾ አዋ ኬስ ዛላፓ ኬዛያ ብእዳ። የ ኪታንችዘ ፋ ቃልቶ ቅ ዪዚ፥ ሳአን አባ ቆሆደስ ዎልቃ እንግንትደ ኦይዲ ኪታንቹንና፥

³ ጼጊ፥ «ኑኒ ጾዘ አሩን ስኖላ ማታመ ጋዶደ ዎንስ ሳአ ዎይ አባ ዎይ ምንጻ ቆህፐተ» ጋይዳ።

⁴ ታኒ ጾዘ ማህታመ ስኖላ ጋድዱን ፋይድቶ ስእዳ። እስራኤለ ኮች ኡባፕ ጼት ኦይታም ኦይዲ ሙኩል አሱንስ ስንተ ማህታመ ጋድዳ።

⁵ ይሁዳ ኮቻፓ ታጶ ላምእ ሙኩል፥ ሮበላ ኮቻፓ ታጶ ላምእ ሙኩል፥ ጋደ ኮቻፓ ታጶ ላምእ ሙኩል፥

⁶ አሴረ ኮቻፓ ታጶ ላምእ ሙኩል፥ ንፍታለመ ኮቻፓ ታጶ ላምእ ሙኩል፥ ምናሰ ኮቻፓ ታጶ ላምእ ሙኩል፥

⁷ ስሞና ኮቻፓ ታጶ ላምእ ሙኩል፤ ሌወ ኮቻፓ ታጶ ላምእ ሙኩል፥ ይሳኮረ ኮቻፓ ታጶ ላምእ ሙኩል፥

⁸ ዛብሎነ ኮቻፓ ታጶ ላምእ ሙኩል፥ ዮሰፋ ኮቻፓ ታጶ ላምእ ሙኩል፥ ብንያመ ኮቻፓ ታጶ ላምእ ሙኩል፥ አሱን ስንተ ማህታመ ጋድዳ።

ቦ ማኦ ማእደ ጋማ አሱንና

⁹ ይንፓ ሱባ፥ ኮች ኡባፓ፥ ካእቱሞ ኡባፓ፥ ዎርዣ ኡባፓን ዱማ ዱማ ዶናፓ ፋይዶ ባይዘ ጋማ አሱንና ብእዳ። የን አሱን ቦ ጳርጎ ማኦ ማእ፥ ቂለ Ꮉየ ፋ ኩሽተ አይኪ፥ አራትዘ ቲኖን ዱርዘ ቲኖ ኤቅዳ።

¹⁰ ኡን ፋ ቃልቶ ቅ ዪዚ፥ «አቶት አራታላ በትደ ኑ ጾዘፓን ዱርዘፓ የእነ» ጋይዳ።

¹¹ ኪታንቹን ኡባ፥ አራትዘን፥ ጭሙንን ኦይዲ መቱን ካንቶ ዉቲ ኤቅዳ። ኡን አራትዘ ቲኖ ዙጊ ጾዝ ጎይንዳ።

¹² «አምንኤ! አንጆ፥ ቦንቾ፥ ጭንጫት፥ ጋላታ፥ ሳባ ዎልቃን፥ ምንትሞ መ መናስ ኑ ጾዘስ ማቀ። አምንኤ!» ጋይዳ።

¹³ ጭሙንፓ ፈታይ ታጎ፥ «Ꮉና ቦ ማእቶ ማእደ አሱን ኡን ኦደ የሳ? ኡን አባፓ ይእዶ?» ጋእ ኦጭዳ።

¹⁴ ታኒ ማህ፥ «ላ፥ ነ ኤራነ» ጋይዳ። ኤዝን ታጎ፥ «Ꮉንስ ጋማ ዋየ ዋይ አዱንና። ኡን ፋ ማእቶ ዱርዘ ሱተ ሜጪ ቦዳ።

¹⁵ ይኒ ግሾ፥ «ኡን ጾዘ አራትዘ ቲንተ ቃማን አዋራ ኤ ኬተ ኦቻነ። ማህ አራታላ በትደ ኡንትስ ዱንካነ ማቃዳ።

¹⁶ ይኬፓ ሱባ፥ ኡን ናይአማ፥ ባርማ። አዋ ዎይ ምቻ ኡንታና ደንጋማ።

¹⁷ አራትዘላ በትደ ዱርዘ ኡንትስ ዉደ አዳያ ማቃዳ። ደኦ Ꮉ ኣፈጎ ኡንታና ካልዳ። ጾዚ ኡን ኣፍትፓ አፉቶ ኡባ ኡጮዳ» ጋይዳ።