ዋሐንሳ ቆንጭ 5 - ኦይዳ አዲስ ኪዳን

ዱርዛን ጻጽንትደ ማጻፍዛ

¹ ይንፓ ሱባ፥ አራትዘላ አፋ በትዳይ ምዛቅ ኩሸራ ጋንጨራን ካታራ ጻፍንትደ ላፑን ማታመራ ጎርዱንትደ ጻጽንትደ ማጻፈ ብእዳ።

² ፈቲ ምን ኪታንችዘ ፋ ቃልቶ ቅ ዪዚ፥ «ማህታምዛ ብሎደስን ማጻፍዛ ቡጎደስ ዳንዳእዘ ኦደ?» ያጋእ አዋጆደራ ብእዳ።

³ የዝን ሳሎ ማቅን ሳአ ዎይ ሳአፓ ኦሞራ ማቅን የ ጻጽንትደ ማጻፍዛ ብሎደስን ጋንጭቶ በአደስ ዳንዳእዘ ኦደን በንትካያ።

⁴ ጻ ማጻፍዛ ብሎደስን ኤ ጋንጭቶ በአደስ ቤዝዘ አስ በንትካይዘ ግሾ ታ ጋማ ዬክዳ።

⁵ ዬዝን፥ ጭሙንፓ ፈታይ ታጎ፥ «ዬክፐ! ይኬ፥ ይሁዳ ባጋ ማቅደ ጋሞ፥ ዳዉተ ኮች፥ ላፑን ማህታምቶ ብሎደስን ማጻፍዛ ቡጎደስ ዳንዳአነ» ጋይዳ።

⁶ ይንፓ ሱባ፥ ሹክንትደ ዱርዛይ አራትዘላ፥ ኦይዲ ሸምፖራ የዘ መቱንስን ጭሙንስ ግዳ፥ ኤቅዳያ ብእዳ። ኤስ ላፑን ጉሙርን ላፑን አፉን የነ። የንስ አላመ ኡባስ ኪትንትደ ጾዘ ላፑን አያኑና።

⁷ የ ዱርዛይ Ꮉንግ፥ አራትዘላ አፋ በትዳይ ምዛቅ ኩሸፓ ጻጽንትደ ማጻፍዛ ኤክዳ።

⁸ ኤ የ ጻጽንትደ ማጻፍዛ ኤክደ ዎደ ኦይዲ ሸምፖራ የዘ መቱንስን ላምእታም ኦይዲ ጭሙን ዱርዘ ቲኖ ጎልእዳ። ኡን ፈተ ፈተ ዲን ጌሹን ዎሳ ማቅደ እጻነ ኩምደ ዎርቃ ሻተ አይክዳ።

⁹ ኡን፥ «ጻጽንትደ ማጻፍዛ ኤኮደስ፥ ማህታምዛ ብሎደስ ኔስ ቤዛነ። አኮስ ጋይኮ፥ ኔኒ ሹክንትዳ፤ ኮች ኡባፓ፥ ዱማ ዱማ ዶናፓ፥ ኮቹንፓ ካእቱሞ ኡባፓ ነ ሱተ ጾዝስ ዎዝዳ።

¹⁰ ኡን ኑ ጾዘ አደስ ኦቾደ ፋና ኡንታና ካህኑን ካእቱሞ ማህዳ። ኡንትን ሳአ ኡባ ካእቶዳ» ያጋእ ክለ ማዝሙረ የጽዳ።

¹¹ ታ ብእደ ዎደ ሙኩል ቶሄ ሙኩልን ታጶ ሙኩል ቶሄ ታጶ ሙኩል ማቃደ ኪታንቹን ኦ ስእዳ። ኡንትን አራትዘስ፥ ኦይዲ ሸምፖራ የዘ መቱንን፥ ጭሙን ካንቶ ዉትዳ።

¹² የን ኪታንቹን ቅ ጋይደ ቃላራ፥ «ሹክንትደ ዱርዛይ ዎልቃ፥ ዱርቱሞ፥ ጭንጫትን ምንትሞ፥ ቦንቾ፥ ሳባን ጋላታ ኤኮደስ ቤዛነ» ጋይዳ።

¹³ ይንፓ ሱባ፥ ሳአን፥ ሳሎ፥ ሳአፓ ኦሞራ አባ ግዳ የዘ መት ኡባ፥ «አራትዘላ አፋ በትዳይስን ዱርዘስ፥ ጋላታ፥ ቦንቾ፥ ሳባን ዎልቃ መ መናስ ማቀ» ጋእ የጾደራ ስእዳ።

¹⁴ ኦይዲ ሸምፖራ የዘ መቱን፥ «አምንኤ» ያጋይዳ፤ ማህ ጭሙን ስኖራ ዙጊ ጎይንዳ።