Luqasa 9 - ኦይዳ አዲስ ኪዳን

የሱሳ ታጶ ላምእ ሐዋሩንና ኪትዳ

¹ የሱሳ ታጶ ላምእ ሐዋሩንና ፋጎ ጼጊ፥ ቱና አያና ከሶደ ጋራን Ꮉርገ ኡባ ፋደ ጋር ዎልቃን አደት ዎልቃ እንግዳ።

² ጾዘ ካእቱሞ ባዝ ማርክደ ፋና Ꮉርግንትዙንና ፋደ ፋና ኪትዳ።

³ ኤ ኡንታጎ፥ «ጉፈ ማቅን ስልጰ ማቅን ካ ማቅን ብራ ማቅን ላምእ ማእዘ አፉላ ማቅን ኦገስ ጋእ አኮን አይክፐተ።

⁴ ይና ካታምትፓ ይን ኬሳደ ዎንስ ዛቆት ይን ገልደ በሳ ጋምኦተ።

⁵ ኦደን ይንታና ሞካንጽ እጽኮ ይና ካታምትፓ ከዝተራ ኡንትስ ኤርስዘ ማርካ ማቃደ ፋና ይን ቶህተ የዘ ጹርቶ ፍጺ ከዞተ።»

⁶ ኡንትን ኪትንትዳን ፋና ኬዚ ዎንገለ ኦህተራ ዱማ ዱማ ካራ ጋንጨ Ꮉርጋንቹንና ፋተራ አዳ።

ሄሮድሳ ይርግዳ

⁷ ጋልላ ሳአ አህዘ ሄሮድሳ የሱሳራ ኦችንትደባዝቶ ሙሎ ስኤዘ ዎደ ይርግዳ። አኮስ ጋይኮ፥ ፈቲ ፈቲ አሱን ዋሐንሳ Ꮉይቆፓ ደንድካይዛራ አታማ ያጋይዳ።

⁸ ባጉን፥ «ኤልያሳ በንትዳ» ጋነ፤ መሉን ማህ፥ «ዛጋ ናቡንፓ ፈተ Ꮉይቆፓ ደንድዳ» ያጋእ ኦህንታነ።

⁹ የዝን ሄሮድሳ፥ «ዋሐንሳ አፉርቶ ታ ጋችዚ ዎዳ። ዬዝን፥ Ꮉንጋራ ያጋእንት ኤ ባዝ ኦህንትዘ፥ ኤ ኦደ?» ያጋእ የሱሳ ፋ ኣፍተ በአደስ ኮያነ።

የሱሳ እችን ሙኩል አሱንና ሙዝዳ

¹⁰ ታጶ ላምእ ሐዋሩን ሱባ ማቂ ይእ፥ ኡን ኦችዳኖ ሙሎ የሱሳስ ኦህዳ። ኤ ኡንታና ኤኪ ቤተሳይዳ ካታማፓ ጋጻ ካንግዳ።

¹¹ የዝን ጋማ አሱን የሱሳ ማቅዛኖ ኤሪ ኤዛ ካልዳ። ኤ ኡንታና ሞኪ ኤኪ ጾዘ ካእቱሞ ባዝ ታማርስዳ፤ ፋጾደስ ኮይዙንና ፋዳ።

¹² ሳአ ኡጉርደ ዎደ ታጶ ላምእ ሐዋሩን ኤጎ ሺቂ፥ «ኑ የዘ አኮ ባይዘ ሳአ ማቅደ ግሾ አሱን ዱማ ዱማ ካራ ጋንጨን ካታማን ቅቲ፥ ካን አቅዘ በሲ ኮዮደ ፋና አሱንና ሞይዞ» ያጋይዳ።

¹³ የዝን ኤ፥ «ኡንትስ ሙእዘ ባዝ ይን እንጎተ» ያጋይዳ። ኡን፥ «ኑስ የዘ እችን ቦራን ላምእ ሞሎን ማቅደ ግሾ Ꮉን አሱንስ ማቅዘ ካ ኑኒ Ꮉንግ ዎንጋንጽኮ ማቆስ» ያጋይዳ።

¹⁴ ይና በስተ እችን ሙኩል ማቃደ ራን የነ። የሱሳ ፋ ታማሩንጎ፥ «እችንታም እችንታም ሻኪ ሻኪ አሱንና በትተ» ያጋይዳ።

¹⁵ ኤ ታማሩን፥ ኤ ኪትዳን ፋና አሱንና በትዳ።

¹⁶ ኤ እችን ቦርቶን ላምእ ሞልቶ ኤኪ፥ ሳሎ ብእ፥ ጾዝ ጋላቲ፥ ባጽ አሱንና ሙሎ የልደ ፋና ፋ ታማሩንስ እንግዳ።

¹⁷ ኡቡን ሙእ ምዥዳ። ኡንታፓ አትደ ታጶ ላምእ ሌማተ ኩሙ ማቅዳ።

ጴጥሮሳ፥ የሱሳ ኦደ የዛኮ ማርክዳ

¹⁸ ፈቲ ዎደ የሱሳ ፋ ጻላላ ዎሶደራ፥ ኤ ታማሩን ኤጎ ይእዳ። ኤ፥ «አሱን ታና ኦና ጋኤ?» ጋእ ኦጭዳ።

¹⁹ ኡን ማህ «ፈተ ፈተ፥ ‹ጻማቅዘ ዋሐንሳ፥ ባጉን ኤልያሳ፥ መሉን ማህ፥ ዛጋ ናቡንፓ ፈተ Ꮉይቆፓ ደንድዳ› ያጋነ» ያጋይዳ።

²⁰ ኤ ማህ፥ «ዬዝን ይን ታና ኦና ጋኤ» ያጋይዳ። ጴጥሮሳ፥ «ኔኒ ጾዛፓ ዶርንትደ ክርስቶሳ» ያጋእ ማህዳ።

²¹ የሱሳ Ꮉኖ ኦደስን ኦህፐተ ጋእ ምን ኦህዳ።

የሱሳ እጽንቶን ኤዛ ካለ ዋጋ ጭግዛኖ

²² ማህን የሱሳ፥ «አስ ናአይ ጋማ ማ ኤኮዳ። ጋደ ጭሙንስ፥ ካህኑን Ꮉላቁንስን፥ ህገ አስታማሩን ካለ እጽንቶዳ። ኡን ኤዛ ዎዳ፥ የዝን ኤ Ꮉይን ቃማ Ꮉይቆፓ ደንዶዳ» ያጋይዳ።

²³ የሱሳ አሱን ኡቡንጎ፥ «ታና ካሎደስ ኮይዘ ኦደን የዝኮ ፋና ካዶ፥ ፋ ማስቃልቶ ኡባ ቃማ ቶኪ ታና ካሎ።

²⁴ ፋ ሸምፕቶ አሾደስ ኮይዘ ኡቡን እዞ ብሳነ፥ ፋ ሸምፕቶ ታ ግሾ ጋእ ብስዘ ኦደን እዞ አሻነ።

²⁵ አስ አላመ ሙሎባዝ ደንግዛ፥ ማቅኮን ፋ ሸምፕቶ ብስዘባዝ ዎይ ቆህዘ ባዝ ማቅኮ ኤዛ አኮ ማደ?

²⁶ ኦደን ታ ግዳን ታ ቃልተን ዬልኮ አስ ናአይ ፋ ቦንቾራ ይኒ ጋራ አዳይ ቦንቾራን ጌሽ ኪታንቹን ቦንቾራ የእዘ ዎደ እዘ ዬልዳ።

²⁷ ታ ይንትስ ቱሮ ኦህነ፤ Ꮉነ ኤቅዱን ግዳፓ ጾዘ ካእቱሞ ብእካይዛራ Ꮉይቆሰ አሱን የነ» ያጋይዳ።

የሱሳ ብሽታ ላምንትዳ

²⁸ የሱሳ ይና ኦህቶ ኦህን፥ ኦስፉን ቃማፓ ሱባ ጴጥሮሳ፥ ያይቆባን ዋሐንሳን ፋራ ኤኪ ዎሶደስ ደረላ አፋ ከዝዳ።

²⁹ ኤ ዎሳላ አፋ የዝን ኤ ስንታ ላምንትዳ፤ አፉልታን አዋ ፋና ፎእ ቦጽዳ።

³⁰ ላምእ አሱን፥ ኡንትን ሙሴራን ኤልያሳራ ቦንቾራ በንቲ፥

³¹ የሩሳላመ ፎልንቶደስ የዘ ባዝ፥ ይናን፥ ኤ Ꮉና አላምትፓ ሻክንቶደ ባዝ ኤራ ኦህንታነ።

³² ጴጥሮሳን ኤራ የዙን ገንቲ አትን፥ ኡን ገንቶፓ ደንድዘ ዎደ ኤ ቦንችቶን ኤራ ኤቅደ ላምእ አሱንና ብእዳ።

³³ አሱን የሱሳፓ ሻክንት ቅቶደስ ይአደራ፥ ጴጥሮሳ የሱሳጎ፥ «ላ፥ Ꮉነ የዛና ኑስ አኮ ጋር ሎኦ! ፈታ ኔስ፥ ፈታ ሙሴስ፥ ፈታ ኤልያሳስ ማህ Ꮉይ ጋባ ጋቦዳ» ጋይዳ። የዝን ኤ ፋስ አኮ ጋኤዛኮን ኤሮስ።

³⁴ ኤ ያጋእ ኦህንቶደራ ነ ይእ ኡንታና ጎዝዳ። ታማሩን ንቲ ግዳ ገልተራ ዣሽትዳ።

³⁵ ነ ግዳፓ፥ «ታ ዶርደ ናአይ Ꮉያ ኤዛ ስኦተ» ያጋዘ ኦ ስንትዳ።

³⁶ የ ኦዘ ስንትዳንፓ ሱባ የሱሳ ፋስ የዝተ በንትዳ። የ ዎደ ኡን ብእዳኖ ኦደስን ኦህካይዛራ፥ ፋ ዎዝንተ አይኪ ስእ ጋይዳ።

የሱሳ ቱና አያና ፈቲ ናአፓ ከስዳ

³⁷ ዎንትስቶ ኡን ደርዘፓ ዎዘ ዎደ ጋማ አሱን ይእ ኤራ የልንትዳ።

³⁸ የ ዎደ አሱን ግዳፓ ፈቲ አስ፥ «አስታማርዛዮ፥ ታ ፈቲ ናአያ ይእ ቦኦያ።

³⁹ ቱና አያና ቆፕካይዝን አይኪ ዉይስዛነ፤ ጎፑንቶ ጮሽ ጉዱነ፥ አሽቶ ቆህ ኡንእ ኬሳደስ ኮዮስ።

⁴⁰ ነ ታማሩን ከሶደ ጋር ዎስዳ፥ የዝን ኡን ዳንዳእካያ» ያጋእ ዎስዳ።

⁴¹ የሱሳ፥ «አማኖ ባይዘ ዎቦ የለቱን፥ አይደ የሎደስ ታ ይንታራ የሳደ፥ ይንታና ዳንዳኦደ? ነ ናአያ Ꮉንግ Ꮉንካ ኤኪ ዮኦ» ያጋይዳ።

⁴² ናአያ ኤኪ የእዘ ዎደ ቱና አያንዘ ሳአ ኦሊ ጉዲ ጎቅዝዳ። የዝን የሱሳ ቱና አያንዛ ካጪ ናአይፓ ኬስን ፋዳ። ናአያን ናአይ አደስ እንግዳ።

ጾዘ ዳማ ኦቻ

⁴³ አሱን ኡቡን ጾዘ ዳማ ዎልቅቶ ብእ ጋማ ቆፕዳ። ኡን ኤ ኦችደ ባዝተ ጋማ ቆፖደራ፥ የሱሳ ፋ ታማሩንጎ፥

⁴⁴ «Ꮉኖ ታ ይንትስ ኦህዛኖ ሎይ ስኦተ፤ አስ ናአይ አይሁዱን ኩሽተ አ እንግንቶዳ» ያጋይዳ።

⁴⁵ የዝን ኤ ጋይዳና ኡንትስ ገልካይዘ ግሾ ኡን ቲሪካያ። ይኒ ግሾ፥ ማህ ኦጮደስ ዣሽትዳ።

ኡቡንፓ ዳማ ማቃደ ኦደ?

⁴⁶ የሱሳ ታማሩን፥ «ኑ ግዳ ዳማ ማቃደ ኦደ?» ጋእ ላለ አይክዳ።

⁴⁷ የሱሳ ኡን ዎዝና ቆፍቶ ኤሪ ዦጋ ናአ ፋ ካለ ኤስ፥

⁴⁸ «Ꮉይ ዦጋ ናአያ ታ ሱንተ ኤክዘ ኦደን ታና ኤካነ፥ ታና ኤክዘ ታና ኪተዛያ ኤካነ፥ ይን ኡቡንፓ ኤርዛይ፥ ኤ ዳማ ማቃዳ» ያጋይዳ።

እጾሰ ይን ባጋ

⁴⁹ ዋሐንሳ፥ «ላ፥ ፈቲ አስ ነ ሱንተ ቱና አያና ኬሶደራ ብእ ኤ ኑራ ማቆሰ ግሾ ካይዳ» ያጋይዳ።

⁵⁰ የሱሳ ማህ፥ «ይንታና እጾሰ፥ ኤ ይን ባጋ። ይኒ ግሾ፥ ኤዛ ካይፐተ» ያጋይዳ።

ሳማራ አሱን የሱሳ እጽዳ

⁵¹ የሱሳ ሳሎ ቅትዘ ዎደ ኡክደ ግሾ የሩሳላመ ቅቶደስ ቆፍቶ ምን ደንድዳ።

⁵² ሳማራ ሳአ የዘ ፈቲ ካራ ጋንጨ Ꮉንግተራ፥ ኡባ ባዝ ኤስ ጊግሳደ ፋና አስ የይጋ ኪትዳ።

⁵³ የዝን ኤ Ꮉንግዛና የሩሳላመ ማቅዳኖ ኡን ኤርዘ ግሾ ኡን ኤዛ ሞኪ ኤክካያ።

⁵⁴ የሱሳ ታማሩን ያይቆባራን ዋሐንሳራን ይኖ ብእ፥ «ላ፥ ሳሎፓ ታማ ዎ ኡንታና ሞኦ ጋዉደ ፋና ነ ኮያነ?» ያጋይዳ።

⁵⁵ የዝን የሱሳ ሱባ ማቂ ኡንታና ካጪ፥ [ይን ግዳ አኮ አያና የዛኮ ይን ኤሮስ። አስ ናአይ አስ አሾደስ ይእዳፕ አትን ብሶደስ ባያ] ያጋይዳ።

⁵⁶ የይጋፓ ደንዲ መለ ካራ ጋንጨ ቅትዳ።

የሱሳ ካልዛና ጭግዘ ዋጋ

⁵⁷ ኡን ኦገራ Ꮉማደራ፥ ፈቲ አስ፥ «ነ ቅትዘ በሳ ኡባ ታ ካሎዳ» ያጋይዳ።

⁵⁸ የሱሳ ማህ፥ «ዎርካናስ ዶቺ፥ ላንዳስ ኬ የነ፥ የዝን አስ ናአይ ፋ ኦምቶ ሸምፕዘ በሲ ባያ» ያጋይዳ።

⁵⁹ Ꮉንካያን፥ «ነ ታና ካሎ» ያጋይዳ። የዝን አ፥ «ላ፥ ቲኒ ታ አዳያ ሞጊ የኦዳ» ያጋይዳ።

⁶⁰ የዝን የሱሳ፥ «Ꮉይቆ የዙን Ꮉይቂዱንና ሞጎደ ፋና ኡንትስ አሺ አሾ፤ ነ Ꮉንግ ጾዘ ካእቱሞ ሳባኮ» ያጋይዳ።

⁶¹ ማህ መለ አስ፥ «ላ፥ ታ ነና ካሎዳ፥ የዝን ቲኒ ታ ካራ አሱንና ሳሮ የኦዳ» ያጋይዳ።

⁶² የሱሳ ማህ፥ «ኮፀ አይኪ ሱብ በእዘ ኦደን ጾዘ ካእቱሞስ ቤዞስ» ያጋይዳ።