THESSALONIANUN 2 - Ottawa New Testament Penteteuch and Psalms 1874

¹ Kenuhwah dush wejekewaëmahdoog kekekandahnahwah kahezhepeendegayaung emuh anduhzhe ahyahyag, kahween peenesekah ningepeendegasemin.

² Kahishquah‐kooduggetooyaung, kuhya kahishquah-kuhgwahnesugge‐mujje‐doodahgooyaung ewede Philippiïng, azhekekanduhmag, ningekeche‐soongedaämin oonje Kekesha‐Muhnedoomenaun cheweenduhmahgooyag oominwahjemoowin Kesha‐Muhnedoo ahnoo ween goo kekeche‐megahnegooyaung.

³ Kahween ningeëzhekuhgaundwasemin emuh wuhyazhingawining, gamuh weenezewining, gamuh kuhkuhyanezewining:

⁴ Kahezheminwanemeyungid Kesha‐Muhnedoo kemeezheyungid ewh minwahjemoowin cheguhnuhwanduhmaung, me suh azhedebahdoodahmaung ewh; kahween egoo kazheminwandummeüngidwah enenewug, owh suh ween Kesha‐Muhnedoo, owh kakandung enewh kedaënahnin.

⁵ Kahween kegewekahgezoomegooseem emuh nindekedoowinenaung azhekekanduhmag, kahween kuhya keemooj ningeshoobeëgoosemin gagoo, nekekanemegoonaun Kesha‐Muhnedoo:

⁶ Kahween kuhya ningenunduhwanduhsemin enenewug chekechetwahwanemeyungidwah, gamuh kenuhwah chekechetwahwanemeyag, kah kuhya pakahnezejig ningenunduhwanemahsenahnig chekechetwahwanemeyungidwah ahnahween goo ahpeetandahgoozeyaung chegekuhgaunzoomegooyagoobun, oodahpostleëmun muh Christ nindahwemin.

⁷ Ningebakahdezemin anduhzhe ahyahyag, debishkoo nwahnahwuhsood azheguhnuhwanemaud enewh oodahbenoojeëmun.

⁸ Apeech kekeche‐sahgeëgooyag, ningeënandahmin chegemeenegooyagoobun kahween atuh oominwahjemoowin Kesha‐Muhnedoo, kuhya mahmahwe tebenuhwa nindoojechaugoonahnin, oonje ewh kesahgeëgooyag.

⁹ Kemequandahnahwah suh, wejekewaëmahdoog, nindahnookewinenaun kuhya nekooduggetoowinenaun: keähnookeeyaung tabekuk kuhya kahzheguk, cheöondenuhmahweseyungid ahweyah gagoo, kegedebahjemootahmahgoom Kesha‐Muhnedoo oominwahjemoowin.

¹⁰ Kenuhwah kekekandahnahwah, kuhya Kesha‐Muhnedoo ookekandaun kahezhemenoo‐ezhewabezeyaung kuhya kahezhequuhyukwahdezeyaung, kah kuhya ahweyah ningemujje‐enanemegoosenaun magwah keduzzhekayaung anduhzhe ahyahyag kenuhwah duhyabwayanduhmag:

¹¹ Debishkoo azhekekanduhmag ewh kahezhekuhgekemegooyag, kuhya kahezhemenoodaäëgooyag, kuhya kahezhekuhgaunzemegooyag kuhkenuh anduhsheyag, debishkoo owh wanejahnesid enene andooduhwaud enewh tebenuhwa oonejahnesun,

¹² Cheëzhebemoosayag azhenunduhwanemenag Kesha‐Muhnedoo, owh kahnundoomenag emuh oodoogemahwewining kuhya oopeshegandahgoozewining.

¹³ Me suh wanje‐mahmooyahwahmungid Kesha‐Muhnedoo wekah poonetahsewaung, ewh kahoodahpenuhmag Kesha‐Muhnedoo oodekedoowin kahwahweenduhmahgooyag, kahween enene oodekedoowining kegeëzheöodahpenunsenahwah, ewh atuh, kagate anandahgwuk, Kesha‐Muhnedoo oodekedoowining kegeëzheöodahpenahnahwah, wahweenga‐anookeemahguk emuh keyowewaung kenuhwah duhyabwayanduhmag.

¹⁴ Kenuhwah dush, wejekewaëmahdoog, keweedookahwahwaug egewh anuhmeätahwahjig Kesha‐Muhnedoon ayahjig emuh Judeaïng dabandahgoozejig emuh Christ Jesusing; nahsaub suh kenuhwah kegeëzhekooduggeëgoowaug keeje‐duhnuhkeewamahgunewaug, debishkoo wenuhwah kahezhekooduggeëgoowaud enewh Jewyun:

¹⁵ Mesuh egewh kahnesahjig enewh Tabaninganejin Jesusun, kuhya tebenuhwa oodaunwahjega‐wenenemewaun, kuhya kahkooduggeëyummingedjig; kah dush oominwanemegoosewaun enewh Kesha‐Muhnedoon, kuhya oosheenganemahwaun kuhkenuh enenewun:

¹⁶ Kenahahmahweyungidwah cheguhnoonemungidwah egewh mayuggezejig chebemahjeïndwahpun: oomooshkenuhtoonahwah ewh tebahegun wanje‐tebahegahdanig oomujje‐ezhewabezewinewaun: magwah dush oopeöodisse-goonahwah keche nebewah ewh nishkahdezewin.

¹⁷ Nenuhwind dush, wejekewaëmahdoog, keöonje‐mahjewenegooyaung emuh anduhzhe‐ahyahyag ahjinuh emuh weyowemaung, kahween emuh oodaëmaung, nenkeche‐wekoojetoomin chewahbundahmaung kishkinzhegoowah emuh keche‐nunduhwanduhmoowing.

¹⁸ Benuh dush nenuhwind (neen suh Paul) ningeënandahmin ningooding kuhya menuhwah chepenaunzekahgooyun; owh dush Satan ningenuhgahnegoonaun.

¹⁹ Wagoonan kaähwung nindahpanemoowinenaun, gamuh nemoojegezewinenaun, gamuh nemoojegeze‐wewuhquaunenaun? Kah‐nuh ween kenuhwah kedahweseem emuh enahsuhmuhbid owh Tabanemenung Jesus Christ uhpe tagwishing?

²⁰ Kagate mahween kenuhwah kedahwim nepeshegandahgoozewinenaun kuhya nemoojegezewinenaun.