St Matthew 6 - Ottawa New Testament Penteteuch and Psalms 1874

¹ Aungwahmezeyook chezhechegasewag enewh kemenoo‐ezhechegawinewah enahsuhmeähyahwaud enenewug, ewh chewahbuhmenagwah, keshpin oo‐oo azhechegayag kahween kegahshahwanemegoosewah owh Koosewah keche‐kezhegoong ayaud.

² Uhpe dush keen mahgewayunin, kagoo ween ahnookeekan chenegaune‐muhtwawatoong ewh pootahjegun, azhechegawaud ween goo egewh anuhmeäkahzoojig, emuh oodahnuhmeä‐weguhmegoowaung kuhya emuh oomeekunahwaung, cheöonjekechetwahwanemegoowaud enewh enenewun: Kagate kedenenim ahzhe ketakezhekuhwahwug.

³ Uhpe dush keen mahgewayunin keshahwanjega-meegewawenun, kahween ewh kenuhmunjenik oogahkekanduhseen ewh azhechegamahguk kekechenik.

⁴ Chekemooduk enewh kemeegewawenun, owh dush Koos kemoodezewin wuhyahbundung, ween suh kegahtebahahmauk.

⁵ Uhpe dush anuhmeähyunin, kagoo ween ezheähyahkan ewh azheähyahwaud egewh anuhmeäkahzoojig, oomenwandahnahwah muh nebahwewaud emuh ahnuhmeä-weguhmegoong kuhya emuh nuhneengeduhwuhmook enewh meekunun cheduhzhe‐ahnuhmeähwaud, chewahbuhmegoowaud enewh enenewun; Kagate kedenenim, ahzhe ketakezhekahwahwug.

⁶ Keen dush uhpe anuhmeähyunin, peendegan emuh kedahbenahsoowening, uhpe dush kekebahahmun kedesh-quaundam, ahnuhmeatow owh Koos emuh kemoodezewening; owh dush Koos kemoodezewin wuhyahbundung kegahshahwanemik.

⁷ Uhpe anuhmeähyagoon, kagoo ahneshah bahbahpenwakagoon, azhechegawaud ween egewh mayuggezejig; enanduhmoog muh nebewah kekedoowaud ween cheöonjebezindahwindwah.

⁸ Kagoo kenuhwah ezhewabezekagoon ewh azhewabezewaud: ookekandahnun muh owh Koosewah enewh manazeyagoon chepwah nundoodahmahwag.

⁹ Oo‐oo suh goo ezheähnuhmeähyook kenuhwah; Wayoosemegooyun keche‐kezhegoong ayahyun; Tahkecheähpeetandahgwud kedezhenekahzoowin.

¹⁰ Kedoogemahwewin tahtuhgweshenoomahgud; azhenunduhwanduhmun tahdoodaum oomah uhkeeng, debeshkoo ewede keche‐kezhegoong.

¹¹ Meezheshenaum noongoom kezheguk buhquazhegun kaöonjebemahdezeyaung.

¹² Kuhya wabenuhmahweshenaum kahmuhzenuhah-mahgooyunin, azhewabenuhmoowungedwah egewh mazenuhahmahweyungejig.

¹³ Kagoo ezhewesheshekaunkan emuh kuhgwatebanedewining; Ekooneshenaum atuh emuh mujje‐uhyeëeweshing; Keen mahween kedebandaun oogemahwewin, kuhya mushkahwezewin, kuhya dush ewh wahwezhanduhmoowin, Kahgenig. Amen.

¹⁴ Keshpin muh wabenuhmuhwagwah egewh enenewug kahezhemujje‐doodoonagwah, kuhya ween dush owh keche‐kezhegoong Koosewah kegahwabenahmahgoowah ewh kahezhemujjedoodahwag.

¹⁵ Keshpin dush ween wabenuhmahwahsewagwah egewh enenewug kahezhemujje‐doodoonagwah, kah dush ween kegahwabenemahgoosewah Koosewah ewh kahezhemujje‐doodahwag.

¹⁶ Uhpe dush pakuddaëdezooyagoon, kagoo ween nuhneenuhweengwaëdezookagoon, azhechegawaud egewh anuhmeäkahzoojig: mahnahjengwaëdezoowug muh, pukkuhdaëdezoongin cheëzhenahgoozewaud emuh anahsuhmuhbenid enenewun: Kagate kedenenim, Ahzhe ketakezhekahwahwug.

¹⁷ Keen dush uhpe pakuddaëdezooyunin, nuhmuhkween kuhya kesebegenquan;

¹⁸ Kah dush puhkuhdaëdezoongin cheëzhenahgoozesewun anahsuhmewaud egewh enenewug, owh suh atuh Koos keemooj ayaud; Koos edush keemoodezewin wuhyahbundung kegahmenoo‐doodaug.

¹⁹ Kagoo ahtahmahdezookagoon enewh ahsunjegoowinun oomah uhkeeng, anduhzhe‐ooguhwasewung kuhya ahduhzhe‐ahgwahgwahbekesing, kuhya anduhzhe‐puhgoonabejegawaud egewh kamoodeshkejig kuhya kemoodewaud.

²⁰ Keche‐kezhegoong suh ahtahmahdezookagoon enewh ahsunjegoowinun, anduhzhe‐ooguhwasewunsenook kuhya ahduhzhe‐ahgwahgwahbekesing kuhya anduhzhe‐pahgoonabejegasegwah egewh kamoodeshkejig, kemoodesegwah dush:

²¹ Tebe muh atagwan kedahsunjegoowinewah, mesuh emuh kuhya kaähtag kedaëwah.

²² Mesuh ewh ooshkenzhegoomah wanjewahsayaug ewh weyowemah: Keshpin suh keshkenzhik kuyundahwezemahguk, kuhkenuh anegookwaug keyow tahwahsayahmahgud.

²³ Keshpin dush mahkezemahguk ewh keshkenzhik, kuhkenuh anegookwaug keyow tahpuhsugeshkahmahgud. Keshpin dush ewh wahsayahzewin peenjenah keyowing atag puhsuhgeshkaug, kagate keche‐puhsuhgesh‐tebekud!

²⁴ Kahween ahweyah ookushketooseen chebuhmeetahwaud neezh tabaninganejin: koonemah suh oogahsheenganemaun pazhik kuhya oogahsahgeäun enewh bakahnezenejin: gamuh suh kuhya oogahmenwanemaun pazhik, kuhya oogahmaunanemaun menuhwah pazhik. Kahween kekushketoosenahwah chebuhmeetuhwag owh Kesha Muhnedoo kuhya owh Mammon.

²⁵ Oo‐oo suh dush kedenenim, Gagoo oondummandunkagoon ewh kebemahdezewinewah, wagoodoogwan kameejewagwan, gamuh kamenequawagwan; kuhya keyowewah kaëzhekoonuhyamahgudoogwan; kah nuh ween ewh bemahdezewin ahwahshema enandahgussenoon ewh dush ween mejim, kuhya ewh weyowemah ewh dush ween ahgwewin?

²⁶ Guhnuhwahbuhmik egewh kezhegoong duhzhe penasewug: kahween ketegasewug kah kuhya keeshkuzhkezhegasewug, kah kuhya mahwunjechegasewug emuh puhwuhega‐weguhmegoong; owh dush Koosewah keche‐kezhegoong ayaud oodahshummaun enewh; kah nuh kenuhwah ahwahshema kedahpeetandahgoozeseem wenuhwah dush ween?

²⁷ Ahwanan owh kenuhwah menik anduhcheyag ahnoo goo oondummandung kakushketood ningoo‐tebahegun ahwahshema cheähpeetezid?

²⁸ Wagoonan dush wanjeoondummanduhmag ewh ahgwewin? nahnahgahdahwahbunduhmook enewh mushkootabenebuggoon azhemahjeging; kahween ahnookesewug, kah kuhya pemuhtaëgasewug:

²⁹ Neen suh kedenenim, Owh Solomon, ahnoo kekeche‐twahwezid, kahween keëzheöose azhekoonuhyamahguk pazhik oonoo.

³⁰ Keshpin dush owh Kesha Muhnedoo oo‐oo azhekoon-uhyawetood enewh mezhushkoon emuh ketegauning noongoom kezheguk ayaungin, kuhya wahbung kaähpuggejegahdagin emuh buhquazkegunekauning, kah nuh ween ahwahshema kegahahgweëgoosewah, Oh kenuhwah ahgahwah tuhyabwayanduhmag?

³¹ Kagoo dush oondummandunkagoon, oo‐oo cheëkedooyag, Wagoonan kameejeyung? gamuh, Wagoonan kamenequayung? gamuh wagoonan kaähgweyung?

³² Me mah kuhkenuh oonoo azhenunduhwanduhmoowaud egewh mayuggezejig: kekekanemegoowah suh ween owh keche‐kezhegoong kedenduhzhe‐Koosewah muhnazeyag kuhkenuh oonoo.

³³ Netum suh nundoonaühmook ewh oodoogemahwewin owh Kesha Muhnedoo, kuhya ewh quuhyuk oodezhewabezewin; kuhkenuh dush oonoo kegahduhgoo‐menegoom.

³⁴ Kagoo suh dush oondummandunkagoon ewh wahbung: tahnahnahgahdahwanduhmahdezoomahgud gooshah ewh wahbung wahtabezemahguk; tabesamahgud anduhsoo‐kezheguk maje‐uhyeëeweshewung.