St Matthew 20 - Ottawa New Testament Penteteuch and Psalms 1874

¹ Ewh muh keche‐kezhegoong duhzhe oogemahwewin enandahgwud debishkoo pazhik wawegewaumid enene, kahsahgahung kekezhab, cheähweähnoonaud kaähnookeenejin emuh ooshoowemine‐ketegauning.

² Uhpe dush kahenaud enewh ahnooke‐wenenewun chetebahahmahwaud pazhik shooneyaunsun naningoo kezhik, oogeëzhenahzhahwaun emuh ooshoowemene‐ketegauning.

³ Kesahgahum dush menuhwah uhpe nasoo‐tebahegunadenig, kewahbuhmaud dush bakahnezenejin ahneshah nebuhwenid emuh anduhzhe‐ahtaunding.

⁴ Oogeguhnoonaun kuhya oonoo, Kuhya kenuhwah ezhaug emuh shoowemene‐ketegauning, quuhyuk suh kegahtebahahmoonenim. Medush keëzhahwaud.

⁵ Menuhwah dush nahyahwuhquanig keühnesahguhum kuhya kahshaunguhsoo‐tebahegunadenig, nahsaub ewh keëzhechega.

⁶ Kagah dush anepungeshemoonenig kesahgahum, kewahbuhmaud ahnind ahneshah nahbahwenid, oogeënaun dush, Ahneshwin kuhpa‐kezhik nuhnebahweyag oomah ningood ahnookesewag.

⁷ Oo‐oo dush oodegoon, Kah suh ahweyah nindahnoonegoosenaun: Oo‐oo dush oodenaun, Kuhya kenuhwah ezhahyook emuh shoowemene‐ketegauning; quuhyuk suh kegahtebahahmahgoom.

⁸ Uhpe dush wanahgooshenig, owh dabandung ewh shoowemene‐ketegaun oodenaun enewh oomezhenahwamun, Nundoom egewh anookejig, tebahahmow ewh keähnookewaud, egewh eshquauj kahpeähoonindjig oonjemahje‐tebahahmahgan nahnauzh egewh netum kahahnoonindjig.

⁹ Uhpe dush kahpeëzhahwaud gagah pangeshemoonenig kahpeähnoonindjig, anduhchewaud oogeöodahpenahnahwah papazhik shooneäuns.

¹⁰ Uhpe dush egewh netum kahpeähnoonindjig kahpeëzhahwaud, nahwuj nebewah nenuhwind ningahtebahahmahgoomin keënanduhmoog; kuhya wenuhwah oogeöodahpenahnahwah papazhik shooneäuns.

¹¹ Uhpe dush kahoodahpenuhmoowaud oogemindahwahmahwaun enewh wawegewahmenejin, oo‐oo dush keëkedoowaud.

¹² Oogoo suh eshquauj kahahnoonindjig ningoo‐tebahegunag atuh keähnookewug, nahsaub dush goo kedezhetebahahmahwaug ewh menik tebahahmahweyaung nenuhwind kahpwahwahnayaung kuhpa‐kezhik magwah kekezhahtag.

¹³ Oogenuhquatuhwaun dush pazhik oo‐oo akedoonejin, oo‐oo dush keënaud, Neeje kahween ningood kemujje‐doodoosenoon; kah nuh ween kegeëkedooseminahbun, pazhik shooneäuns chetebahmoonaun.

¹⁴ Oodahpenun suh keduhyeem, mahjaun dush: nindenandum chetebahahmahwug mahbuh eshquauj kahahnoonind menik azhetebahuhmoonaun.

¹⁵ Kah nuh ween quuhyukwussenoon uhyenanduhmaun chedooduhmaun tebenuhwa ninduhyeem? oonje-mujjeühyeëeweshewun nuh keshkinzhik, oonje neen kesha-wahdezeyaun?

¹⁶ Me suh dush ashquayandahgoozejig kanegaunandahgoozewaud, kuhya nahgaunandahgoozejig kaïshquayandahgoozewaud: bahtuhyeënwug muh egewh nandoomindjig, pungeshawuggezewug egewh kagegenindjig.

¹⁷ Jesus dush uhneëzhaud emuh Jerusaleming puhkayeëe oogeëzhewenaun enewh metahswe‐ahshe‐neezh ookekenooahmahgunun emuh meekunaung, oo‐oo oogeënaun.

¹⁸ Benuh, kedezhahmin emuh Jerusaleming; kuhya owh Enene oogwissun tahpuggedenah emuh ooeenjewaung egewh keche‐sahsahgewejega‐wenenewug kuhya egewh oozhebeëga‐wenenewug, oogahnahneboomegoon dush enewh.

¹⁹ Oogahpuhgedenahmahwahwaun enewh mayuggezenejin cheneshebahpenoodahwahnid, kuhya chepuhzhunzhawahnid, kuhya cheähgwahquahwahnid: uhnenesoogoonahgudenig dush tahahbejebah.

²⁰ Medush kepenaunzekahgood enewh oogeene Zebedee oogwissisun, kepewejewegood oogwissisun, keshahgushketahgood, dush ewh gagoo kepahgoosanemegood.

²¹ Oo‐oo dush oogeënaun, Wagoonan ewh nanduhwanduhmun? Oo‐oo dush keëgood, Enahkoonegan oogoo neezh ningwissug chenuhmuhduhbewaud, pazhik emuh kekechenikaung, kuhya pazhik emuh kenuhmunjenikaung, emuh kedoogemahwewining.

²² Jesus dush oogenuhquatuhwaun oo‐oo keënaud, Kahween kekekanduhsenahwah ewh nandoodahmahgayag. Kekushketoonahwah nuh chemenequayag emuh nemine-quahjeguning neen manequayaun, kuhya cheëzhebaptizooëgooyag ewh azhebaptizooëgooyaun? Oo‐oo oodenahwaun, Nindahkushketoomin suh.

²³ Oo‐oo dush oodenaun, Kagate suh kegahmenequam nemenequahjeguning, kuhya kegahezhebaptizooëmegoom neen azhebaptizooëgooyaun; ewh dush ween chenuhmuhduhbing emuh nekechenikaung, kuhya emuh nenuhmunjenikaung, kahween neen nindooduhyemeseen chemeenugwah egewh atuh kahwahwazhetahmahgoojig enewh Noosun.

²⁴ Uhpe dush egewh metahswe kahnoonduhmoowaud, oogenishkanemahwaun enewh neezh wawejekewaïndenejin.

²⁵ Jesus dush oogenundoomaun, oo‐oo dush keëkedoo, Kekekandahnahwah suh azheoogemahwenid egewh mayug‐ahneshenahbag oodoogemahmewaun ewh egoo ayenahkoonegoowaud, kuhya egewh nahgahnezejig oodoogemahkundahwahwaun.

²⁶ Kah suh dush kenuhwah oo‐oo kegahezhewabezeseem, Ahwagwan suh kenuhwah nanduhwanduhmoogwan chekechetwahwandahgoozid, me suh owh kabuhmeetoonag.

²⁷ Ahwagwan dush kenuhwah anduhcheyag nanduhwanduhmoogwan chenegahnandahgoozid, mesuh owh kabuhmeetoonag:

²⁸ Debishkoo goo kuhya ween Enene oogwissun azhepeöonjeëzhahsig chebuhmeetuhwind, chebuhmeetahgad suh peoonjeëzhah, kuhya chemeegewad oobemahdezewin ewh kezhekahgawin nebewah oonje.

²⁹ Uhpe dush Jerichoïng keuhneoonjemahjahwaud, nebewah ahneshenahban oogenoopenuhnegoon.

³⁰ Benuh dush, neezh kakepeengwajig kenuhmuhduhbewug emuh chegekunah, uhpe dush nwaunduhmoowaud Jesusun bemoosanid, kepepahgewug, oo‐oo keëkedoowaud, Shahwanemeshenaum, Tabaningayun, wagwissemik David.

³¹ Egewh dush ahneshenahbag oogekenahahmahwahwaun, ewh chepoone‐kekedoonid: ashkum dush goo kekeche‐pepahgewug, oo‐oo keëkedoowaud, Shahwanemeeshenaum, Tabaningayun, wagwissemik owh David.

³² Jesus dush pezaune‐kahbahwe, oogenundoomaun, oo‐oo keëkedood, Wagoonan ewh nanduhwanemeyag chedoodoonahgoog?

³³ Oo‐oo dush oogeëgoon, Tabaningayun, chepahquahbemahguk neshkinzhegoonahnin.

³⁴ Jesus dush oogeketemahganemaun, oogetaungenuhmahwaun dush ooshkinzhegoone; bahbega dush goo ooshkinzhegoowaun kewahbemahgudenig, kenoopenuhnegood dush.