St Matthew 18 - Ottawa New Testament Penteteuch and Psalms 1874

¹ Medush goo ewh uhpe kepenaunzekahwahwaud egewh kekenooahmahgunug enewh Jesusun oo‐oo ekedoowaud, Ahwanan owh kache‐ahpetandahgoozid emuh keche‐kezhegoong oonje oogemahwewining.

² Jesus dush oogenundoomaun pazhig agahsheënejin ahbenoojeün, keähsaud emuh ahyahnid.

³ Oo‐oo dush keëkedoo, Kagate kedenenim, Keshpin aunjeëgoosewag, kuhya ahbenoojeëeng ezhewabezesewag, kahween kegahpeendegaseem emuh keche‐kezhegoong oonje oogemahwewining.

⁴ Ahwagwan dush kaëzhedahbussanemoogwan azhedahbusanemood wah‐owh ahbenooje, me suh owh kache‐ahpetandahgoozid emuh keche‐kezhegoong oonje oogemahwewining.

⁵ Ahwagwan dush wadapenahgwan pazhik oonoo denoowun ahbenoojeün emuh nindezhenekahzoowining nindoodahpenik suh.

⁶ Ahwagwan dush kamujje‐doodahwahgwan pazhik oonoo agahsheënejin duhyabwayanemenejin, ahwahshema tahgeöonesheshinene pootahgune‐ahsineen cheähgoonemindebun, cheähpuggenind dush emuh akoo‐demeeg ewh kechegummee.

⁷ Kahgwahnesuhguhkumig suh ewh uhkee oonje mujje‐doodahgawinun! pooch mahween tahtuhgwishenoomahgudoon mujje‐doodahgawinun; kahgwahnesuggeze suh owh enene kaöonjeemahgudenegwan ewh mujje‐doodahgawin!

⁸ Benuh suh, keshpin ewh keneenj gamuh ewh kesit mujje‐doodahgooyun, kishkezhun suh enewh, ningooje dush ahpuggedun; ahwahshema suh tahoonesheshin chemahkiskahyunbun, gamuh chemahmaunjegooseyunbun, emuh bemahdezewining chepeendegayunbun, dush ween mesuhwah neezhenoomahguk enewh keninjeen gamuh neezhenoomahguk kekaudun cheähpuggenegooyunbun emuh kahgega‐ishkootang.

⁹ Keshpin suh mujje‐doodahgooyun ewh keshkinzhik, kejepetoon suh, ningooje dush ahpuggedun; ahwahshema tahoonesheshin chepazhikwungebun ewh keshkinzhik, emuh dush bemahdezewining chepeendegayunbun, mesuhwah neezhenoomahguk enewh keshkinzhegoon emuh dush mujje‐ishkootang ahpuggenegooyunbun.

¹⁰ Aungwahmezeyook suh cheneshebahpenoodahwahsewag pazhik oogoo agahsheëjig; oo‐oo muh kedenenim, Ewede keche‐kezhegoong oodangenemewaun ahpena oowahbundahnahwah oodangwy owh Noos keche‐kezhegoong ayaud.

¹¹ Ewh muh kepeoönjeëzhah owh Enene oogwissun chebemajetood ewh kahwuhnishingebun.

¹² Ahneen ananduhmag? keshpin ahweyah enene tebanemaud ningoodwauk enewh mahneshtahneshun, pashik dush wuhneshenenid, kah nuh ween oonuhguhnahseen enewh shaunguhswe‐meduhnuh ahshe shaunguhswe, cheähwe‐oondoonawahpun dush emuh wahjewing enewh kahwuhneshenejin?

¹³ Keshpin dush mekahwaud, kagate kedenenim, ahwahshema suh moojegeze oonje enewh pazhik, enewh dush ween shaunguhswemeduhnuh ahshe shaunguhswe kahwuhneshinsenegoon.

¹⁴ Mesuh ewh nahsaub, kahween enanduhse owh Koosewah keche‐kezhegoong ayaud, pazhik oonoo agahsheënejin chebahnahdezenid.

¹⁵ Keshpin dush kejekewa mujje‐doodook, ezhaun ahweweenduhmow oomujje‐doodahgawin, kenuhwah atuh nezheyag: keshpin bezindook, mesuh kekushkeüd owh kejekewa.

¹⁶ Keshpin dush webezindoosenook, kegahweejewah pazhik gamuh neezhpakahnezejig, emuh oodoonewaung neezh gamuh neswe dabahjemoojig kuhkenuh enewh ekedoowinun cheoohjeminjemoosechegahdag.

¹⁷ Keshpin dush webezindahwahsig, weenduhmow egewh anuhmeähjig mahyahwunjeëdejig; keshpin webezindahwahsig enewh anuhmeähnejin mahyahwunjeëdenejin, Gentile‐weneneeng kuhya mahwunjechega‐weneneeng kegahuhyenanemah.

¹⁸ Kagate kedenenim, Wagoodoogwan kaminjemah-pedoowagwan edush oomuh uhkeeng tahminjemahpejegahda ewede keche‐kezhegoong; Wagoodoogwan edush kaähbahahmoowagwan oomuh uhkeeng tahahbahegahda ewede keche‐kezhegoong.

¹⁹ Menuhwah kedenenim, Keshpin neezheyag, nuhyanzh dush goo mahmahwe enanduhmag oomuh uhkeeng wagoodoogwan kanundooduhmoowagwan, mesuh kadoodoonag ewh Noos keche‐kezhegoong ayaud.

²⁰ Tebe muh anduhzhe‐mahoonjeëdewahgwan neezh gamuh neswe emuh nindezhenekahzoowining, mesuh goo emuh nanahwuhyuheëe ahyahyaun.

²¹ Medush kepenaunzekahwaud owh Peter, oo‐oo keënaud, Tabaningayun, ahneen duhcheeng maje‐doodahwejin nejekewa kaähbwayanemugebun? nahnauzh nuh goo neezhwahching?

²² Jesus oo‐oo oodenaun, Kahween kedenesenoon, Nahnauzh neezhwahcheeng; Nahnauzh suh goo neshwahswe meduhnuh duhcheeng neshwahswe.

²³ Mesuh dush wanje‐enandahgwuk ewh keche‐kezhegoong oogemahwewin debishkoo pazhik keche‐oogemah, nanduhwanemaud enewh oobuhmeetuhgunun chetebahahmahgood.

²⁴ Uhpe dush mahyahje‐ahgindahsood, kepetuhmahwah pazhik, metahching metauswauk talentun mazenuhahmahgoojin.

²⁵ Kuhnuhga gagoo ahyaunsig ewh chekezhekahwahpun, keëkedoowun suh oodoogemahmun cheähtahwamind ewh weyow, kuhya wewun, kuhya oonejahnesun, kuhya kuhkenuh ooduhyeemun, chekezhekahzoopun.

²⁶ Owh dush buhmeetahgun keähpuggezood, kuhya keshahgushketahwaud, oo‐oo keëkedood, Nindoogemaum, mahnoo peäwuhganemeshin, kuhkenuh dush kegahtakezhekoon.

²⁷ Medush owh buhmeetahgun keketemahganemegood enewh oodoogemahmun, kepuggedenegood dush, kuhya kewabenemahgood oomuhzenuhegawin.

²⁸ Kesahgahum dush owh buhmeetahgun, kemekahwaud pazhik weejebuhmeetahgunun, ningoodwauk shooneäunsun mazinuhahmahgoojin: oogetuhkoonaun dush enewh, kuhya kesuggegoondahgunanaud, oo‐oo dush keëkedood, Tebahahmahweshin keshpin kagoo muhzenuhahmahweyun.

²⁹ Weejebuhmeetuhgunun keäpuggezoowun emuh oosittaung, oogepahgoosanemegoon dush, oo‐oo keëkedoonid, Peäwuhganemeshin, kuhkenuh dush kegahtakezhekoon.

³⁰ Kahween dush oogedabwatahwahseen: oogeähwepeendega‐wabenaun emuh kebahquahoode‐weguhmigoong, nahnauzh suh chekezhekung ewh muhzenuhahmahgawin.

³¹ Uhpe dush weejebuhmeetahgunun kahwahbunduhmenid ewh kahezhechegad, kekeche‐kushkanduhmoon, keëzhahwaud dush oodoogemahmewaun, keweenduhmahwahwaud dush kuhkenuh uhyezhecheganid.

³² Medush oodoogemahmun uhpe kahnundoomegood, oo‐oo keëgood, Kakebahdezeyun bameetahguneweyun, kegewabenuhmoon suh kuhkenuh ewh muzzeneëgawin, oonje kepahgoosanemeyun:

³³ Kah nuh dush kuhya keen kedahgeëzheketemahganemahse keejebuhmeetahgun, debishkoo kuhya neen kahezheketemahganemenaun?

³⁴ Kenishkahdezewun dush oodoogemahmun, keähpuggenegood dush emuh ahyahnid enewh quatuggeëwanejin, nahnauzh chekezhekahgood kuhkenuh ewh menik mazenuhahmahgood.

³⁵ Mesuh kuhya nahsaub kadoodoonag owh Noos kezhe‐kezhegoong ayaud, kishpin suh emuh kedaëwaung kuhkenuh wabenuhmahwahsewagwah egewh kejekewaëwaug ewh menik kemujje‐doodoonagwah.