St Matthew 13 - Ottawa New Testament Penteteuch and Psalms 1874

¹ Me dush goo ewh kezheguk kesahguhung Jesus emuh wegewauming, kewuhwanuhbid emuh tetebawh kechegumme.

² Kepemahwunjedewun dush keche‐nebewah ahneshenahban emuh ayaud, nindahwauj dush kepooze emuh nahbequauning, kewuhwanuhbid dush; kuhkenuh dush mahyahmahwenoonejin kenebuhwewun emuh cheguhbeeg.

³ Nebewah dush gagoo oogeënaun emuh ahwajeguning, oo‐oo keëkedood, Benuh, kesahgahum pazhik ketega‐wenene weähwesuhswawabenung ewh menekaun.

⁴ Magwah dush suhswawabenengad, ahnind kepungesenene emuh mahyahwekunah, kepeëzhahwug dush egewh penasewug, kemoozhahgunduhmoowaud dush:

⁵ Ahnind dush kepungesenene emuh ahsinekaung, gwach ahyahsenook ewh uhkee; bahbega dush kesahguhkewun, kah muh kepuhgukkummegahsenoon:

⁶ Uhpe dush kahmookuhung owh kezis kechahgetawun; kah muh keöojebekahwunsenoon, medush kahezheneboodag.

⁷ Ahnind dush kepungesenene emuh menasuhgahwunzhekaug; kepesahguhkewaud edush egewh menasahgahwunzheeg, oogenewoogindahnahwah dush.

⁸ Ahnind dush kepungesenene emuh wanesheshing ewh uhkee, kemenewung dush, ahnind ningoodwauk menik ahwahshema keduhchin, ahnind ningoodwahswe‐meduhnuh, ahnind kuhya nesemeduhnuh.

⁹ Ahwagwan watahwugahgwan chebezindung, mahnoo tahbezindum.

¹⁰ Kepenaunzekahgood dush ookekenooahmahgunun, oo‐oo keëgood, Ahneshwin guhnoonudwah emuh ahwajeguning?

¹¹ Oogenuhquatuhwaun dush, oo‐oo keënaud, Kenuhwah gooshah, kemeenegoom chekekanduhmag enewh kechetwah‐kekanjegawinun emuh keche‐kezhegoong oonje oogemahwewining, wenuhwah dush kahween meenahsewug.

¹² Ahwagwan muh ayahmoogwan, mesuh owh kameenind, nahwuj dush nebewah oogahahyaun; ahwagwan dush ayaunsenegwan tahmuhkummah pooch ewh ahyaud.

¹³ Mesuh wanjeguhnoonugwah emuh ahwajeguning: ahnoo muh enahbewaud kahween wahbesewug; kuhya ahnoo noonduhmoowaud kahween noonduhsewug, kah kuhya nesittootunsewug.

¹⁴ Me dush oogoo azhewabezewaud wanjedebishkoosag ewh kahekedoopun owh Esaias aunwahjega‐wenene, oo‐oo keëkedood, Emuh noonduhmowining kegahnoondaum, kah dush kegahnesittootunseem; kuhya emuh enahbing kegahenahbem, kah dush kegahwahbeseem.

¹⁵ Oogoo muh ahneshenahbag oodaëwaun keche‐wenenoomahgudenewun, ahgahwah noonduhmoog emuh ootahwuggahwaung, kuhya kebuhsungwahbewug, chewahbesigwah dush emuh ooshkinzhegoowaung, kuhya chenoonduhsigwah emuh ootahwuggahwaung, kuhya chenesettootunsigwah emuh oodaëwaung, chegeäunjeïndwahpun, neen dush chegenoojemooügwahpun.

¹⁶ Shahwandahgwudoon suh kenuhwah keshkinzhegoowaun, ewh enahbemahguk, kuhya ketahwuggahwaun ewh noonduhmoomahguk.

¹⁷ Kagate gooshah kedenenim, Nebewah aunwahjega‐wenenewug kuhya manoo‐ezhewabezejig oogenundahwandahnahwah chewahbunduhmoowaud enewh wuhyahbunduhmagoon, kah dush oogewahbundahsenahwaun; kuhya chenoonduhmoowaud enewh nwaunduhmagoon, kah dush oogenoonduhsenahwaun.

¹⁸ Noonduhmook suh ewh ahwajegang owh suhswa‐wabenega‐wenene.

¹⁹ Uhpe ahweyah nwaundung ewh oogemahwewine ekedoowin, nesettootunsig edush, medush peëzhahnid enewh mujjeähyuhahweshun, muhkuhmegood dush enewh kahketegahdanegebun emuh oodaïng. Mesuh owh kahsuhswawabenegahzood emuh mahyahwekunah.

²⁰ Owh dush kahsuhswawabenegahzood emuh ahsinekaung, mesuh owh nwaundung ewh ekedoowin, bahbega dush moojegandung oodoodahpenaun;

²¹ Kah dush goo oojebekahwese, wanebik atuh aunwahje; uhpe dush puhgummeähyahnig ewh ketemahgezewin kuhya kooduggeëgoowin ewh ekedoowin oonje, bahbega pukkittashin.

²² Owh dush kahsuhswawabenegahzood emuh magwa‐menasahgahwunzhekaug mesuh owh nwaundung ewh ekedoowin, oonzaumandung maunduh uhkee, kuhya ewh azhewuhyazhingamahguk ewh wahnuhdezewin oonje bahquanishkoojechegahda ewh ekedoowin, kah dush menewese.

²³ Owh suh dush kahsuhswawabenegahzood emuh oonesheshing ewh uhkee, mesuh owh nwaundung ewh ekedoowin, nesittootung edush; mahnewid dush, kuhya natahwuggetood, ahnind ningoodwauk ahwahshema keduhchin, ahnind kuhya ningoodwahswe‐meduhnah, ahnind kuhya nesemeduhnuh.

²⁴ Menuhwah pazhik ahwajegun oogepuggedenahmahwaun, oo‐oo këekedood, Ewh suh keche‐kezhegoong oonje-oogemahwewin enandahgwud debishkoo pazhik enene, kahsuhswawabenung ewh waneshing menekaun emuh ooketegauning:

²⁵ Magwah dush nebahwaud egewh enenewug, enewh shaunganemegoojin kepeëzhahwun, kesuhswawabenuhmenid enewh mujje‐mezhushkoon emuh magwa‐buhquazhegunushk, medush kemahjahnid.

²⁶ Uhpe dush suhyahguhkemahguk ewh buhquazhegunushk, kuhya anemenewewung, kepeënahgwudoon dush kuhya enewh mujje‐mezhushkoon.

²⁷ Egewh dush bameetahwahjig enewh wawegewaumenejin oogepeënahwaun, Oogemah, kah nuh ween wanesheshing menekaun kegesuhswawabenunsenahbun emuh keketegauning? Ahneshwin dush mujje‐mezhushkookaug?

²⁸ Oo‐oo dush oogeënaun, Shaunganingad suh oo‐oo kedoodum. Egewh dush buhmetahgunug oo‐oo oogeënahwaun, Kedenanememin nuh cheähwemahwundoonahmaung?

²⁹ Oo‐oo dush keëkedoo, Kah! koonemah magwah mahwundoonuhmag enewh mujje‐mezhushkoon, kedahgebahquahkoobetoonahwah ewh buhquazhegunushk.

³⁰ Mahnoo nuhyazh mahmahwe tahmahjegenoon nahnauzh egoo chepuhgwushkezhegang; uhpe dush dabishkoosag chepuhgwushkezhegang ningahenaug egewh puhgwushkezhega‐wenenewug, Mahwundenuhmook netum enewh mujje‐mezhushkoon, ahyookebetooyook dush chechahgezuhmag: suhguhkenuhmook dush ween ewh buhquazhegunushk emuh nepuhgunduhega‐weguhmigoong.

³¹ Menuhwah dush pazhik ahwajegun oogepuggedenuhmahwaun, oo‐oo keëkedood, Enandahgwud suh keche‐kezhegoong oonje oogemahwewin debishkoo pazhigoominug ewh oozahwuhnushk menekaun, kahoodapenung owh enene keketegahdung dush emuh ooduhkeeming.

³² Mahyahmahwe‐ahgahsemenahguk anduhching enewh menekaunun; uhpe dush ween kahnetahwegingin, mahmahwe mechahkooze anduhswahkoosewaud metikoonsug, keche‐metikoowun suh, medush emuh wahtekwahnewung pedahwaud egewh kezhegoong duhzhe penaseyug.

³³ Menuhwah dush ahwajeguning oogeëzheguhnoonaun; Enandahgwud suh ewh keche‐kezhegoong oonje oogemahwewin debishkoo ewh oombejeshkewugesechegun, kahoodahpenung equa, kekahdood dush emuh nesoo‐tebaheguning ewh peseboojegun, nahnauzh kuhkenuh keöombejeshkewuggesing.

³⁴ Kuhkenuh oonoo oogeëzheguhnoonaun Jesus enewh ahneshenahban emuh ahwajeguning; kuhya dush ahwajegasig kahween oogeguhnoonahseen.

³⁵ Chedebishkoosag ewh kahekedoopun owh aunwahjega‐wenene, oo‐oo keëkedood, Ningahpahkedoonun emuh ahwajeguning; ningahkekedoonun enewh uhyeëen kahkahjegahdagin pahahkoo‐uhkeewung.

³⁶ Me dush kepuhgedenaud enewh ahneshenahban owh Jesus, kepeendega dush emuh wegewauming; oogepenaunzekahgoon dush ookekenooähmahgunun, oo‐oo keëgood, Weenduhmooweshenaum azhenesettootahgwuk ewh ahwajegun kahdebahduhdoomun enewh mujje‐mezhushkoon emuh ketegauning.

³⁷ Oogenuhquatuhwaun dush, oo‐oo keënaud, Owh suh kahsuhswawabenung ewh wanesheshing menekaun, mesuh owh Enene oogwissun;

³⁸ Ewh dush ketegaun, mesuh maunduh uhkee; ewh dush wanesheshing menekaun mesuh oogoo wanejahneseminjig emuh oogemahwewining; enewh dush mujjemezhushkoon, mesuh enewh oonejahnesun owh mujje‐ahyahahweesh.

³⁹ Owh Shaunganingad kahketegahdung enewh mesuh owh mujje‐muhnedoo; ewh dush pahgwuhshkezhegang mesuh ewh wuhyakwah‐uhkewung; egewh dush puhgwuhsh-kezhega‐wenenewug, mesuh egewh angenug.

⁴⁰ Debishkoo dush azhemahwunjechegahdag enewh mujje‐mezhushkoon, chahgezegahdag dush emuh ishkootang; mesuh kaëzhewabuk uhpe eshquah‐uhkeewung.

⁴¹ Owh suh Enene oogwissun oogahmahjenahzhahwaun enewh oodangenemun, cheoonjemahwunjeähnid emuh oodoogemahwewining kuhkenuh enewh kabesengin, kuhya enewh mahkinduhmenejin mujje‐ezhewabezewin;

⁴² Cheähpuhgenahnid dush eshkootawine‐ningezegawining: me emuh kaduhzhe‐ahyahshequang kuhya mahmuhtwayahbettasang.

⁴³ Me dush uhpe egewh manooëzhewabezejig kezisoong kaëzhewahsayahzewaud emuh oodoogemahwewinening oosewaun. Ahwagwan watahwugahgahgwan chebezindung, mahnoo tahbezindum.

⁴⁴ Menuhwah dush enandahgwud keche‐kezhegoong oonje oogemahwewin debishkoo shooneyah kahkahjegahdag emuh ketegauning; uhpe dush enene makung, ookahdoon apeech dush moojegandung, oodahwe‐ahtahwanun kuhkenuh enewh ooduhyeemun, kuhya ookeshpinuhtoon ewh ketegaun.

⁴⁵ Menuhwah dush enandahgwud ewh keche‐kezhegoong oonje oogemahwewin debishkoo pazhik ahtahwa‐wenene pabahnunduhwahbuhmaud manwahbuhmenahgoozenejin pearlun.

⁴⁶ Uhpe dush makung pazhik kache‐ahpetandahgoozenejin, oodahweähtahwanun kuhkenuh ooduhyeemun, kishpenuhtood dush ewh.

⁴⁷ Menuhwah dush, enandahgwud keche‐kezhegoong oonje oogemahwewin debishkoo ahquahbenahgun, kahpahkoobe‐wabenegahzoonejin emuh kechegumeeng, ahnooj dush mahwunjeïndwah;

⁴⁸ Uhpe dush kahmooshkenanid, oogeähgwahbenahwaun kewahwanuhbewaud dush, oogemahwunjeähwaun dush enewh wanesheshenejin emuh uhtahsoowining, oogewabenahwaun dush enewh mahyahnahdezenejin,

⁴⁹ Me suh kaëzhewahbuk uhpe eshquah‐uhkeewung; tahpeëzhahwug egewh angenug, pühkayeëe cheähsahwaud enewh maje‐ëzhewabezenejin emuh dush ween ahyahnid enewh manoo‐ezhewabezenejin.

⁵⁰ Oogahahpuggenahwaun dush emuh ishkootawine ningezegawining: emuh kaduhzhe‐ahyahshequang kuhya kaduhzhe‐mahmuhtwayahbittasang.

⁵¹ Jesus dush oo‐oo oodenaun, Kenesittootahnahwah nuh kuhkenuh oonoo uhyeëen? Oo‐oo oogeëgoon, Aahe, Tabaningayun!

⁵² Oo‐oo dush oogeënaun, Ahnesh kuhkenuh anduhchid oozhebeëga‐wenene kakenooahmahwind ewh anandahgwuk keche‐kezhegoong oonje oogemahwewin ezheähyah debishkoo enene wawegewaumid, wandenung emuh oodahsunjeguning ooshke‐uhyeëen kuhya kata‐uhyeëen.

⁵³ Kepuhguhmeähyah dush, uhpe Jesus kahkezhetood oonoo ahwajegunun, ewede keöonjemahjah.

⁵⁴ Uhpe dush tagweshing emuh tebenuhwa oodinduhnuhkewining, oogekekenooähmahwaun oodahnuhmeä‐weguhmigooning; kemahmahkahdanduhmoon dush, oo‐oo keëkedoonid, Ahneende wandenung wah‐owh oo‐oo menik nebwahkahwin, kuhya oonoo kushkeäwezewinun?

⁵⁵ Kah nuh ween oodoogwissemegooseen enewh mookoodahzoo‐wenenewun? Kah nuh ween kuhya Mary ezhenekahzoosewun enewh oogeen? kuhya enewh wejekewayun James, kuhya Joses, kuhya Simon, kuhya Judas?

⁵⁶ Kuhya enewh oodahwamaun, kahnuhween keweej-oodatoomegoosenahnig kuhkenuh? Ahneende dush wahowh wandenung kuhkenuh oonoo?

⁵⁷ Oogeöosittahwanemahwaun dush; Jesus dush oo‐oo oogeënaun, Kahween pwah‐kechetwahwanemahse aunwahjega‐wenene, emuh atuh tebenuhwa oodindenuhkewining, kuhya emuh tebenuhwa oowegewauming.

⁵⁸ Kah dush nebewah mahmaundahwejegunun keëzhechegasenun ewede, oodahgoonwayanduhmoowinene oonje.