ST. MARK 8 - Ottawa New Testament Penteteuch and Psalms 1874

¹ Oo‐oo dush uhpe kekezheguk, kekeche‐ooqueenoowaud egewh ahnishenahbag, kagoo dush ahyaunsegwah kameejewaud, oogenundoomaun owh Jesus enewh ookekenooahmahgunun, oo‐oo dush keënaud,

² Neketemahganemaug egewh ahnishenahbag, ahzhe muh nesoogoonahgud akoo‐weejewewaud, kah dush oodahyaunsenahwah kameejewaud:

³ Kishpin dush puhgedenugwah cheühnekewawaud pwah‐wesenewaud, tahpwahnuhwetoowug emuh muhyahwekunah: ahnind muh keche‐wahsuh keoonjebahwug.

⁴ Enewh dush ookekenooahmahgunun oo‐oo oogenuhquatahgoon, Ahneende kaoondenaud ahweyah enewh buhquazhegunun oomuh puhgwuhduhkummegaug chetabeseneäud oonoo ahnishenahban?

⁵ Oogeguhgwajemaun dush, Ahneen duhsoo‐buhquazhegunug ayahwagwah? Oo‐oo keëgood Neezhwahswe.

⁶ Oogeënaun dush enewh ahnishenahban chenuhmuhduhbenid emuh metushkuhkummig: oogeoodahpenaun dush enewh neezhwahswe buhquazhegunun, kahmahmooyahwad dush, oogebuhquabenaun, oogemeenaun enewh ookekenooahmahgunun cheënenuhmahwahnid enewh ahnishenahban: oogeähsahwaun dush emuh ahyahnid enewh ahnishenahban.

⁷ Punge dush oogeähyahwahwaun enewh gegoozansun; uhpe kahmahmooyahwad, oogeënaun kuhya enewh cheähshummahnid.

⁸ Medush kewesenewaud kuhya ketabeseneïndwah: oogesuhguhkenahwaun dush enewh pewunjegunun kahishquunduhmoowahjin neezhwahswe ookookoobenahgunun.

⁹ Kenewoo‐metauswaukoosedooganug edush egewh kahwesenejig: Oogemahjenahzhahwaun dush.

¹⁰ Bahbega dush kepooze emuh nahbequauning kuhya enewh ookekenooahmahgunun, kepeëzhahwaud dush emuh Dalmanutha azhenekahdag uhkee.

¹¹ Kepeëzhahwug dush egewh Phariseeg, kuhya kemahje‐kuhgwajemahwaud, kenundoodahmahwahwaud ewh kezhegoong oonje kekenoowahjechegun, kekuhgwatebanemahwaud.

¹² Ween dush kekeche‐oodunnahmoo emuh oojechaugoong, oo‐oo dush ekedood, Ahnishwin oogoo noongoom bamahdezejig nunduhwanduhmoowaud kekenoowahjechegun? kagate kedenenim, Kahween tahmeenahsewug kekenoowahjechegun oogoo noongoom bamahdezejig.

¹³ Medush kenuhguhnaud, kepoozid emuh nahbequauning keähzhahwahoo dush.

¹⁴ Kewuhnekawug dush chegeöodahpenahwahpun enewh buhquazhegunun, kah dush kuhnuhga oogeähyahwahsewaun buhquazhegunun emuh nahbequauning me atuh pazhik.

¹⁵ Oogeäungwahmemaun dush, oo‐oo keëkedood, Aungwahmezeyook, chemeewetooyag ewh oodoombesechegunewaun egewh Phariseeg, kuhya oodoombesechegun owh Herod.

¹⁶ Medush keguhnoonendewaud, oo‐oo dush keëkedoowaud, Me suh ewh oobuhquazhegunemesewung.

¹⁷ Uhpe dush Jesus kekekandung, oo‐oo oodenaun, Wagoonash wanje‐edeyag, me suh ewh oobuhquazhegunemesewung? kah nuh ween muhshe kekekanjegaseem, kah nuh kuhya kenessittootunseem? kayahba nuh mushkahwahnoon kedaëwah?

¹⁸ Ahnuhween ooshkinzhegooyag, kah nuh kewahbeseem? kuhya ootahwuggahyag, kahnuh kenoonduhseem? kah nuh kuhya kemequanduhseem?

¹⁹ Uhpe kepuhquabenugwah egewh nahnun buhquazhegunug keähshummugwah egewh nahnun‐metauswaukoosejig, ahneen menik ookookoobenahgunun kemooshkenag enewh pewunjegunun kahmahmooyag? oodenahwaun dush, Metahswe‐ahshe‐neezh.

²⁰ Uhpe dush enewh neezhwahswe kahahshummindwah egewh nawoo‐metauswaukoosejig, ahneen menik ookookoobenahgunun kahmooshkenag enewh pewunjegunun kahmahmooyag? Keëkedoowun dush, Neezhwahswe.

²¹ Oo‐oo dush oogeënaun, Ahnishwin nesittootunsewag?

²² Peëzhah dush emuh Bethsaidaïng; kepeetahmahwah dush kakepeengwanejin enenewun, kepahgoosanemah dush chetaungenaud.

²³ Oogesuggeneenjenaun dush enewh kakepeengwanejin enenewun, oogeoonjesahgejewenaun emuh oodanaung; uhpe dush kahsikkood emuh ooshkinzhegooning, kahahtahwaud ooneenjeen, oogekuhgwajemaun Gagoo nuh kewahbundaun.

²⁴ Ketahtuhgahbe dush, oo‐oo keëkedood, Newahbuhmaug enenewug pabahmoosajig debishkoo metigoog.

²⁵ Menuhwah dush oogeähtahwaun enewh ooneenjeen emuh ooshkinzhegooning, oogeënaun dush, chetahtuhgahbenid; me dush kahezhenoojemood, kuhya kepuhguk‐kahbuhmaud kuhkenuh enewh enenewun.

²⁶ Oogekewa‐nahzhahwaun dush, oo‐oo keënaud, Kagoo ezhahkan emuh oodanaung, kagoo kuhya weenduhmoowahkan ahweyah emuh oodanaung.

²⁷ Keëzhah dush owh Jesus, kuhya ookekenooahmahgunun enewh Cæsarea‐Philippi duhzhe oodanaunsun: ewh dush magwah uhnebemoosawaud, oogeguhgwajemaun enewh ookekenooahmahgunun, oo‐oo dush keënaud, Ahneen azhewaud egewh ahnishenahbag cheähweyaun?

²⁸ Oo‐oo dush oogeguhnoonahwaun, keëkedoowaud, John owh Baptizooewa‐wenene: ahnind dush ween ekedoowug, Elias; ahnind dush. Pazhik aunwahjega‐wenene.

²⁹ Oo‐oo dush oodenaun, Kenuhwah dush ween, ahneen ahzeyag cheähweyaun? Peter dush oonuhquatuhwaun, oo‐oo enaud, Keen suh kedow owh Christ.

³⁰ Ooogeäungwahmemaun cheweendahmahwahsigwah enewh enenewun, ewh ween enandahgoozid.

³¹ Kuhya dush oogemahje‐kuhgekemaun, owh enene oogwissun nundahwandahgoozid nebewah chekooduggandung, kuhya chewabenegood enewh katezenejin, kuhya enewh keche‐sahsahgewejega‐wenewun, kuhya oozhebeëga‐wenenewun, kuhya chenesind, nesoogoonahguddenig dush cheähbejebaud.

³² Mezheshuh suh dush oo‐oo keëkedoo. Peter dush puhkayeëe oogeëzhewenaun kuhya kemahje‐nuhneebekemaud.

³³ Uhpe dush kahquake‐kahbahwid, keguhnuhwahbuhmaud enewh ookekenooahmahgunun, oogenuhneebekemaun enewh Peterun, oo‐oo keëkedood, Ahwus nepequunaung ezhaun Satan: kahween keduhyenanduhsenun ooduhyeemun owh Kesha‐Muhnedoo, me atuh ooduhyeemewaun egewh enenewug.

³⁴ Uhpe dush kahnundoomaud enewh ahnishenahban kuhya enewh ookekenooahmahgunun, oo‐oo oogeënaun, Ahwagwan kawenoopenuhzhegwan mahnoo suh oogahahgoonwayandaun tebenuhwa weyow, kuhya oogahoodahpenaun oodahzhekayahtikoom, ningahnuhnoopenik dush.

³⁵ Ahwagwan muh kabemahjetoogwan ewh oobemahdezewin, oogahwuhnahjetoon suh; ahwagwan kawuhnahjetoogwan ewh oobemahdezewin neen oonje, kuhya oonje ewh menwahjemoowin, mesuh owh kabemahjetood.

³⁶ Wagoonan muh kaöondezepun owh enene, kishpin ahnoo debandung anegookwaug ewh uhkee, wuhneäud dush tebenuhwa oojechaugwun?

³⁷ Wagoonan dush owh enene kameegewad ewh dush nayaub chewekishpenuhnaud enewh oojechaugwun?

³⁸ Ahwagwan muh kaähguddanemegwan kuhya enewh nindekedoowinun noongoom magwah bemahdezewaud oogoo pazhigwahdezejig kuhya majeëzhewabezejig, mesuh enewh kaähguddanemahjin owh Enene oogwissun, uhpe petuhgwishing emuh oopeshegandahgoozewinening enewh Oosun, weejewegood dush enewh kachetwahwezenejin oodangenemun.