ST. MARK 11 - Ottawa New Testament Penteteuch and Psalms 1874

¹ Uhpe dush pashoo anetuhgwishenoowaud emuh Jerusaleming, emuh Bethphageïng kuhya Bethanying, emuh wahjewing Olives aduhming, oodezhenahzhahwaun neezh ookekenooahmahgunun,

² Oo‐oo dush oodenaun, Ezhaug emuh oodanaunsing debishkoo ahyahyag anduhgoog: uhpe dush peendegayag, bahbega kegahmekahwahwah mahnesheens takoobezood, wekah pamoomahsig enewh enenewun; ahbahook, peenik dush.

³ Kishpin dush ahweyah oo‐oo anenag, Ahneeshwin oo‐oo ezhechegayag? kegahekedoom, Owh Tabaningad ooweähwaun; bahbega dush oogahpuhgedenaun.

⁴ Me dush keühnemahjahwaud, oogemekahwahwaun dush enewh mahnesheensun tahkoobezoonid emuh ahgwahjeëe ishquaundaming, emuh wahwaushkuhmook meekun; oodahbahwahwaun dush.

⁵ Ahnind dush emuh kahnebahwejig oogeënahwaun, Ahneen azhechegayag, ahbahwag owh mahnesheens?

⁶ Oogeënahwaun dush debishkoo kahegoowaud enewh Jesusun; medush kahezhepuhgedenahwaud.

⁷ Oogepeetahwahwaun enewh mahnesheensun Jesusun, kuhya oogeähtoonahwah oopesuhkahwahgunewaun emuh mahnesheensing; keëzhepemoomegoo dush owh Jesus.

⁸ Nebewah dush oogesuhswagissetoonahwah oopesuhkahwahgunewaun emuh meekunaung: ahnind dush ween oogekuhkishquahnahwah enewh wahtequaunsun, emuh metikoong, oogesuhwa‐wabenahnahwaun dush emuh meekunaung.

⁹ Egewh dush kahuhnenegahnejig, egewh dush kahnoopenungig, kepepahgewug, oo‐oo keëkedoowaud, Hosannah: tahminwahjemegooze owh pahezhaud emuh oodezhenekahzoowining owh Jehovah:

¹⁰ Tahminwahjinjegahdamahgudene ewh oodoogemahwewin owh koosenaun David, ewh tagwishenoomahguk emuh oodezhenekahzoowining owh Tabaningad; Hosannah ewede keche‐ishpeming.

¹¹ Jesus dush kepeendega emuh Jerusaleming, kuhya emuh keche‐ahnuhmeä‐weguhmigoong: uhpe dush kahnahnahgahdahwahbundung kuhkenuh uhyeëen kewetuhyeëe atagin, zhuhyegwah noonda‐oonahgooshigoobun, keuhnemahjah dush, keëzhah dush ewede Bethanying weejewegood enewh metahswe‐ahshe‐neezh ookekenooähmahgunun.

¹² Wahyahbunenig dush, uhpe kahoonjemahjahwaud emuh Bethanying, kepuhkudda:

¹³ Wahsuh dush oonzahbuhmaud enewh figoomeenzheen ewh ahneebeeshewenid, kepeëzhah, wemekung gagoo menewewin ahgoodag: uhpe dush kahnaunzekung, kahween gagoo oogemekunseen, me atuh ahneebeeshun; kah muh muhshe tebishkoosasenoogoobun cheähyahwaud egewh figoominug.

¹⁴ Jesus dush oogenuhquatuhwaun oo‐oo keënaud, Kahween ahweyah menuhwah wekah oogahmeejeseen ewh azhemeneweyun. Kenoonduhmoon dush ookekenooähmahgunun.

¹⁵ Kepetuhgwishenoog dush emuh Jerusaleming: kepeendega dush owh Jesus emuh keche‐ahnuhmeä‐weguhmigoong, kuhya oogemahje‐sahgeche‐wabenaun enewh atahwanejin kuhya enewh kaushpenuhjeganejin emuh keche‐ahnuhmeä‐weguhmigoong, kuhya oogeähnemikoo‐wabenaunun oodoodoopoowinene enewh muhyashquahdoonemahganejin shooneyaun, kuhya oogweduhbewinene enewh atahwanejin keche‐oomeemeen.

¹⁶ Kah dush oogepuhgedenahmahwahse ahweyah enenewun chepemewetoonid gagoo enahbujjegun emuh ahnuhmeä‐weguhmigoong.

¹⁷ Kekekenooähmahga dush, oo‐oo oogeënaun, Kah nuh ween oozhebeëgahdasenoon, Newegewaum oodahnuhmeä‐weguhmigoowaun kuhkenuh ahnooj anwajig ahnishenahbag tahezhenekahda? kenuhwah dush, kemoodishke‐weguhmigoong kedoodahnahwah.

¹⁸ Egewh dush oozhebeëga‐wenenewug kuhya egewh keche‐sahsahgewejega‐wenenewug oogenoondahnahwah, kekuhnoonindewug dush chenesahwaud: oogekoosahwaun muh, kuhkenuh muh egewh ahnishenahbag oogemahmahkahdandahnahwah ewh ookekenooähmahgawin.

¹⁹ Uhpe dush kahoonahgooshenenig, oogenuhguhdaun oodanah.

²⁰ Kekezhab dush, magwah pabahmoosawaud, oogewahbuhmahwaun enewh figoomeezheen meshewahkoosenid oonje oojebekaung.

²¹ Peter dush mequandung oo‐oo oodenaun, Rabbi, wahbum owh figoomeezh kahnahneboomudebun, ahzhe meshewahkooze.

²² Jesus oogenuhquatuhwaun oo‐oo enaud, Tabwayanemik owh Kesha‐Muhnedoo.

²³ Kagate kedenenim, Ahwagwan kaëduhmoogwan maunduh wahjewh, Tahmahjewechegahda kuhya tahahpuggechegahda emuh kechegumeeng; ahgoonwayanduhsig dush emuh oodaïng, tabwayandung dush ween cheweëzhewabuk debishkoo ekedood; kagate oogahahyaun wagoodoogwan nandooduhmoogwan.

²⁴ Benuh kedenenim, Wagoodoogwan nandooduhmoowagwan, uhpe ahnuhmeähyagoon, dabwayanduhmook cheähyahmag, kegahmeenegoom dush.

²⁵ Uhpe dush nebahweyag ahnuhmeähyag, kishpin ningood wuhsittahwanemag ahweyah, wabenuhmahwik; cheoonje‐wabenuhmoonag enewh kemujje‐ezhewabezewinewah owh keche‐kezhegoong duhzhe‐Koosewah.

²⁶ Kishpin kenuhwah wabenuhwahgasewag, kahween kegahwabenuhmahgoosewah enewh kemujje‐ezhechegawinewah owh keche‐kezhegoong duhzhe‐Koosewah.

²⁷ Menuhwah dush petuhgwishenoog emuh Jerusaleming: magwah dush pahbahmoosad emuh keche‐ahnuhmeä‐weguhmigoong, oogepenaunzekahgoon enewh keche‐sahsahgewejega‐wenenewun, kuhya enewh oozhebeëga‐wenenewun, kuhya katezenejin,

²⁸ Oo‐oo dush oodegoon, Wagoonan ewh kushkeäwezewin wanje‐ezhechegayun oonoo? ahwanan dush kahmeenik maunduh kushkeäwezewin cheëzhechegayun oonoo?

²⁹ Jesus dush oogenuhquatuhwaun oo‐oo keënaud, Kuhya neen kegahkuhgwajemenim pazhik kuhgwadwawin, nuhquatuhweshig, kishpin nuhquatuhweyag kegahweenduhmoonenim wanjekushkeä wezeyaun cheëzhechegayaun oonoo

³⁰ Oobaptizoomewawin owh John, keche‐kezhegoong nuh keoonjebahmahgud, gamuh eneneeng? nuhquatuhmooweshig.

³¹ Keguhnoonindewug dush, oo‐oo keëkedoowaud, Kishpin ekedooyung, keche‐kezhegoong; ween tahekedoo, Wagoonan dush kahoonjedabwayanemahsewag?

³² Kishpin dush, Eneneeng, ekedooyung; oogekoosahwaun enewh ahnishenahban: kuhkenuh muh kagate aunwahjega‐wenenewe oogeühyenanemahwaun enewh Johnun.

³³ Oogenuhquatuhwahwaun dush enewh Jesusun, oo‐oo keënahwaud, Kahween nekekanduhsemin. Jesus dush oogenuhquatuhwaun oo‐oo enaud, Kah suh kuhya neen keweenduhmoosenoonim wanje‐kushkeäwezeyaun cheëzhechegayaun oonoo.