ST. LUKE 22 - Ottawa New Testament Penteteuch and Psalms 1874

¹ Zhuhyegwah gagah ewh wambejishkewuhsinsenook‐buhquazhegune‐wekoondewin weähyahbun, ewh kuhbekoosa‐wekoondewin azhenekahdag.

² Kuhya dush egewh keche‐sahsahguhwejega‐wenenewug kuhya egewh oozhebeëga‐wenenewug oogenundahwandahnahwah kaëzhechegawaud chenesahwaud; oogekoosahwaun muh enewh ahnishenahban.

³ Me dush mujje‐muhnedoon kepeendegashkahgood owh Judas Iscariot azhenekahzood, pazhik egewh metauswe‐ahshe‐neezh kekenooähmahgunug.

⁴ Me dush kahezhemahjaud, kuhya dush keguhnoonaud enewh keche‐sahsahguhwejega‐wenenewun kuhya menesenoo‐oogemaun, ewh kaëzhechegad chepuhgedenuhmahwaud Jesusun.

⁵ Keöonahnegwanduhmoog dush, kuhya keëkekoowug wemeenahwaud shooneyaun.

⁶ Kenuhquatum dush, kuhya oogenundahwahbundaun chepuggedenahmahwaud pwah‐ahyahnid mahyahmahwenoonejin enewh ahnishenahban.

⁷ Me dush uhpe kahdebishkoosag ewh wambejishkahwuhsinsenook buhquazhegune‐kezhig uhpe kuhbekoosa‐mahnishtahnesheens nesind.

⁸ Oogeëzhenahzhahwaun dush Peterun kuhya Johnun, oo‐oo dush keëkedood, Mahjaug ahwewahwazhetook ewh kuhbekoosa‐wekoondewin, ewh dush cheweseneyung.

⁹ Oo‐oo dush oogeënahwaun, Ahneende ananduhmun chewahwazhetooyaung.

¹⁰ Oo‐oo dush oogeënaun, Benuh, uhpe uhnepeendegayag emuh keche‐oodanaung, kegahpenahquashkahgoowah enene, pametuhkoonung ewh nemebahgun mwaushkenabeeg; noopenuhnik emuh wegewauming kaühnepeendegad.

¹¹ Oo‐oo dush kegahenahwah owh wawegewaumid, Kekenooähmahga‐wenene kedig, Ahneende ewh wekoondewine‐ahbenahsoowin kaduhzhemeejeyaun ewh kuhbekoosa‐wekoondewin neen kuhya nekekenooähmahgunug?

¹² Kegahwahbundahegoowah ewh manguhtag ishpemesuhgoong‐ahbenahsoowin wahwazhechegahdag, me emuh kaduhzhe‐wahwazhetooyag.

¹³ Keëzhahwug edush, kuhya oogemekahnahwah debishkoo kahegoowaud, kuhya dush oogewahwazhetoonahwah ewh kuhbekoosa‐wekoondewin.

¹⁴ Uhpe dush kahtuhgwishenoomahguk ewh tebahegun, kenuhmuhduhbe, oogeweeduhbemegoon dush metauswe‐ahshe‐neezh ookekenooähmahgunun.

¹⁵ Oo‐oo dush oogeënaun, Ahpeche ningenundahwandaun cheweedoopuhmenuhgoog, chemeejeyung maunduh kuhbekoosa‐wekoondewin chepwah kooduggetooyaun.

¹⁶ Kedenenim muh, kahween menuhwah ningahmeejese maunduh, bahnemah atuh kedebishkoosag emuh Kesha Munnedoo oodoogemahwewining.

¹⁷ Oogeöodahpenaun dush ewh menequahjegun, kuhya kahmahmooyahwad keëkedoo, Oodahpenuhmook maunduh, mahdahoonedeyook dush:

¹⁸ Kedenenim muh, Kahween menuhwah ningahmenequase ewh shooweminuhgahwunzh mahnewung, bahnemah goo atuh Kesha‐Muhnedoo oodoogemahwewin ketuhgwishenoomahguk.

¹⁹ Oogeöodahpenaun dush buhquazhegun, kemahmooyahwa, kuhya oogebuhquabetoon kuhya oogemeenaun, oo‐oo dush keëkedood, Me oo‐oo neyow pagedenegahdag kenuhwah oonje: oo‐oo ezhechegayook chemequanemeyag.

²⁰ Me dush kahezheöodahpenung ewh menequahjegun kahishquah‐wesenewaud, oo‐oo keëkedood, Maunduh menequahjegun ahwun ewh ooshke‐kekindewin emuh nemisqueeming, ewh sahgwabenegahdag kenuhwah oonje.

²¹ Benuh dush, ooneenj owh bahyahtahid neweejewegoon oomah uhdoopoowining.

²² Kagate mahjah owh Enene Oogwissun debishkoo enahkoonind: tahkeche‐sunnuggeze suh dush owh enene enewh bahyahtahegoojin.

²³ Me dush ewh uhpe kemahje‐kuhgwajindewaud, ahwagwan ahyahwegwan oo‐oo kaëzhechegagoobunan,

²⁴ Kuhya keähgoonwatahdewug ahwagwan anduhchewaud negaunandahgoozegwan.

²⁵ Oo‐oo dush ween oogeënaun, Egewh mayug‐ahnishenahbag oodoogemahmewaun oodoogemahkundahwaun mayug‐ahnishenahban; kuhya egewh wagemahkundahgajig, manoo‐doodahgajig ezhenekahnahwug.

²⁶ Kahween kenuhwah oo‐oo kegahezhewabezeseem: owh nahgaun‐andahgoozid anducheyag, debishkoo agahsheïd tahezheähyah; owh dush wagemahwandahgoozid, debishkoo owh bameetahgad tahezheähyah.

²⁷ Ahwanan nahgaunandahgoozid? owh namuhduhbid emuh uhdoopoowining, gamuh owh bameetahgad? kah nuh ween owh namuhduhbid emuh uhdoopoowining? kedezheweejewenim dush neen debishkoo owh bameetahgad.

²⁸ Kenuhwah kahwedookahweyag emuh nekuhgwatebanemegoowining.

²⁹ Kepuggedenuhmoonenim dush ewh oogemahwewin, debishkoo owh Noos azhepuggedenuhmoowid;

³⁰ Cheweseneyag kuhya chemenequayag emuh ninduhdoopoowining ewede nindoogemahwewining, kuhya chenuhmuhduhbeyag emuh oogemah‐wuhbewining tebahkoonagwah egewh metahswe‐ahshe‐neezh puhkaun azheweenzoojig Israelitug.

³¹ Oo‐oo dush keëkedoo owh Tabaningad, Simon, Simon, benuh, Satan kenunduhwandum chetebanemenag cheëzheshahbooshkahsenag debishkoo buhquazheguning:

³² Kegeähnuhmeätuhmoon gooshuh, kedabwayanduhmoowin chenoondasasenook; bahnemah dush keäunje-ëgooyun wedookow kejekewaüg.

³³ Ween dush oo‐oo oogeënaun enewh, Tabaningayun, nekezheetah cheweejewenaun, kabahquahegahzooyunin, gamuh nabooyunin.

³⁴ Oo‐oo dush keëkedoo, Keweenduhmoon suh, Peter, owh nahba‐pahkahahqua kahween tahnoondahgoozese, noongoom kezheguk, bahnemah goo nesing keähgoonwatuhmun chekekanemeyun.

³⁵ Oo‐oo dush oodenaun enewh kekenooähmahgunun, Uhpe kahahnoonenuhgoog ningooche cheëzhahyag ahyahsewag ewh shooneyah‐mushkemoodans, kuhya nuhwuhpoowine mushkemood, kuhya muhkissenun, gagoo nuh kegemuhnazenahwah? Oo‐oo dush keëkedoowug, Kah gagoo.

³⁶ Me dush oo‐oo keënaud, Noongoom dush, ahwagwan washooneyah‐mushkemoodansegwan, mahnoo oogahoodahpenaun; kuhya dush nuhwuhpoowine‐mushkemood; kuhya wadahzhewashkoosegwan mahnoo oogahahtahwagan oopesekoowahgun chekishpenuhtood.

³⁷ Oo‐oo muh kedenenim, Maunduh azhebeëgahdag tahdebishkoosamahgud emuh neyowing, Ketuhgoo‐uhgemah enewh majeëzhewabezenejin: enewh muh anahjemegooyaunin debiskoosawun.

³⁸ Oo‐oo dush keëkedoowug, Tabaningayun, benuh oomah ahtanoon neezh ahzhahwashkoon. Oo‐oo dush oodenaun, Me menik.

³⁹ Kesahguhum dush, keëzhaud ewede wahjewing ewh Olives emuh moonzhug kahezhahgoobunan; oogenoopenuhnegoon dush ookekenooähmahgunun.

⁴⁰ Uhpe dush emuh kahahyaud oo‐oo oogeënaun, Ahnuhmeäug cheëzhahsewag emuh kuhgwatebanindewining.

⁴¹ Kemahjah dush akoo tabewabenuhmahgad ahweyah ahsin, keöojecheengwasad dush, kuhya keähnuhmeäud.

⁴² Oo‐oo keëkedood, Noosa, kishpin enanduhmun, ekoonuhmahweshin maunduh menequahjegun; ninduhwauj kahween neen uhyenanduhmaun, keen atuh uhyenanduhmun, tahezhechegam.

⁴³ Kepenahgoozewun dush keche‐kezhegoong wanjebahnejin angenun, kemushkahwezeëgood.

⁴⁴ Kewesuggandung ashkum anegook kenundoodahmahga; kuhya oodahbwazoowin kepungegahne debishkoo kazhegaugin misque pangesing emuh metushkuhkummig.

⁴⁵ Uhpe dush kahpuhsegweed kahishquah‐ahnuhmeäud, kenauuzekahwaud dush enewh ookekenooähmahgunun, oogemekahwaun ewh nebahnid apeech kekeche‐nuhneenuhwanduhmenid,

⁴⁶ Oo‐oo dush keënaud, Ahneeshwin nebahyag? Puhsegweeg, kuhya ahnuhmeäug, cheëzhahsewag emuh kuhgwatebanedewining.

⁴⁷ Magwah dush kayahbe kekedood, benuh, kache‐mahmahwenoojig, kuhya owh Judas azhenekahzood, pazhik ayahwid egewh metauswe‐ahshe‐neezh, kenegahne, kuhya kepenaunzekahwaud Jesusun weöojemaud.

⁴⁸ Jesus dush oo‐oo oogeënaun, Judas, kebahtahah nuh owh Enene Oogwissun ewh oojemud?

⁴⁹ Uhpe oogoo kahweejewahjig kahwahbunduhmoowaud wahuhneëzhewabuk, oogeëenahwaun, Tabaningayun ningahpuhkiddaëgamin nuh enewh ahzhahwashkoon.

⁵⁰ Pazhik dush oogepuhkiddawaun enewh keche‐sahsahgahwejega wenene oobuhmeetahgun, kuhya oogekishketahwugahgunuhmaun ookeche‐tuhwuggahne.

⁵¹ Jesus dush oogenuhquatuhwaun oo‐oo dush keëkedood, Mahnoo maunduh menik tahezhewabud; oogetaungenuhmahwaun dush ewh ootuhwugahne, me dush kenoojemooäud.

⁵² Me dush Jesus keguhnoonaud enewh keche‐sahsahgahwejega‐wenenewun, kuhya enewh ganuhwanduhmenejin ahnuhmeä‐weguhmig, kuhya katezenejin kahpenaunzekahgoojin, Kepeëzhenaunzekahwim nuh ewh kaëzhenaunzekahwagoobun owh kamoodishkid, peähyooyag ahzhahwashkoon kuhya puhgummahgunun?

⁵³ Magwah weejewenenahgoogebun emuh ahnuhmeä‐weguhmigoong anduhsoo‐kezheguk, kahween kegetuhkooneseem: mesuh noongoom ketebahegunewah, kuhya chemushkahwezemahguk ewh puhsuhgish‐tebik.

⁵⁴ Me dush ketuhkoonahwaud, kuhya kemahjewenah waud, keëzhewenahwaud dush emuh owh keche‐sahsahgahwejega‐wenene andaud. Peter dush wahsuh oogenoopenuhnaun.

⁵⁵ Uhpe dush kahpootahwawaud nahwuhyeëeng tasekauning, chegishkoota kenuhmuhduhbewug, Peter dush oogeweeduhbemaun.

⁵⁶ Pazhik dush ooshkenegequan oogewahbuhmegoon, chegishkoota kenuhmuhbid, oogenahnahgahdah‐wahbuhmegoon oo‐oo keëgood, Kuhya mahbuh oogeweejewaun enewh.

⁵⁷ Oogeähgoonwatahwaun dush, oo‐oo keëkedood, Equa, kahween nekekanemahse.

⁵⁸ Nahguj dush menuhwah bakahnezenejin oogewahbuhmegoon, oo‐oo oogeëgoon Kuhya keen kewedookahwaug. Peter dush keëkedoo, Enene, kahween newedookahwahseeg.

⁵⁹ Nahguj dush kuhnuhbuj ningoo‐tebahegunag menuhwah bakahnezid anegook kewetabwa oo‐oo keëkedood, Kagate suh kuhya mahbuh oogeweejewaun; Galilee duhzhe‐wenenewe muh.

⁶⁰ Peter dush keëkedoo, Enene, kahween nekekanduhse ewh akedooyun. Kazhetena dush magwah kekedood kemesittahgooze owh nahba‐pahkahahqua.

⁶¹ Owh dush Tabaningad kequake‐kahbahwe, oogeguhnuhwahbuhmaun dush enewh Peterun. Peter dush oogemequandaun ewh Tabaningad oodekedoowin oo‐oo keëkedood, Chepwah messittahgoozid owh nahba‐pahkahahqua, nesing kegahahgoonwatow.

⁶² Peter dush kesahgahum, kewesuhguhdamoo edush.

⁶³ Egewh dush enenewug kahtuhkoonahjig Jesusun oogebahpenoodahwahwaun, kuhya oogepuhkittaähwahwaun.

⁶⁴ Uhpe dush kahkuhkepeengwabenahwaud, oogepuhquahkooneenjetahwahwaun emuh oodangwyening, oo‐oo dush kekuhgwajemahwaud, Aunwahjegan, ahwanan kahpuhkettaöok?

⁶⁵ Nebewah dush bakaunukkin oogekeche‐mujje‐duhzhemahwaun.

⁶⁶ Uhpe dush wuhyahbunenig, egewh ahnishenahbag ooketezemewaun kuhya egewh keche‐sahsahguhwejega‐wenenewug, kuhya egewh oozhebeëga‐wenenewug kepemahoonjeëdewug kuhya oogeëzhewenahwaun emuh kahduhzhe‐kahkekedoowaud, oo‐oo dush keëkedoowaud,

⁶⁷ Keen nuh kedow owh Christ? weenduhmooweshenaum. Oo‐oo dush oogeënaun, Kishpin weenduhmoonuhgoogebun, kahween kedahgedabwayanduhsenahwah:

⁶⁸ Kishpin dush kuhgwajemenuhgoog, kahween kedahnuhquatuhweseem, kuhya kahween kedahpuhgedeneseem.

⁶⁹ Bahnemah suh owh Enene Oogwissun tahwuhwanuhbe emuh ookechenikaug owh kache‐mushkahwezeed Kesha‐Muhnedoo.

⁷⁰ Kuhkenuh dush keëkedoowug, Keen nuh kedow owh Kesha‐Muhnedoo Oogwissun? Oo‐oo dush oogeënaun, Kenuhwah suh kedekedoom ewh ahweyaun.

⁷¹ Oo‐oo dush keëkedoowug, Wagoonan kayahbe wanjenundahwanduhmung ewh bahtahweenduhmoowin? kenuhwind muh kegenoondahwahnaun emuh tebenuhwa oodooning.