ST. LUKE 1 - Ottawa New Testament Penteteuch and Psalms 1874

¹ Nebewah gooshah keöozhebeëgawug we‐ahnekadebahdooduhmoowaud oonoo uhyeëen oonjedah duhyabwayanduhmungoon,

² Debishkoo kahwahweenduhmahweyummingedwah, egewh wuhyashkud kahwahbundungig, kuhya kahbuhmeetungig ewh ekedoowin;

³ Ningeënandum kuhya neen, quuhyuk kekekanduhmaun kuhkenuh gagoo wuhyashkud kahezhewabukin, cheahneka‐mahjebeühmoonaun, keen kachetwahwandahgoozeyun Theophilus.

⁴ Cheöonjepuhgukkanduhmun ewh kagate tabwamahguk oonoo ekedoowinun kahezhekenooahmahgooyun.

⁵ Magwah keche‐öogemahwid owh Herod, Judea duhzhe keche‐oogemah, keähyah pazhik sahsahgewejega‐wenene Zacharias keëzhenekahzood, kahdebandahgoozid emuh Abia oodahneka‐buhmeetahgawining: kuhya wewun enewh kahoodahnesejin owh Aaron, Elizabeth keëzhenekahzoowun.

⁶ Nuhyazh dush quuhyuk keëzhewabezewug emuh enahsuhmuhbid owh Kesha‐Muhnedoo, kebemoosawaud emuh kuhkenuh ookuhgequawinening kuhya oodenahkoonegawinening enewh Jehovahun, kah dush ningood kemahnahdahjemahsewug.

⁷ Kah dush keöonejahnesesewug, ween muh Elizabeth kah kenegeähwuhzoose, nuhyazh dush zhuhyegwah kekeche‐kekahwug.

⁸ Kepuhgummeähyah dush, magwah mekindung ewh sahsahgewejegawine‐ahnookewin emuh enahsuhmuhbid owh Kesha‐Muhnodoo.

⁹ Debishkoo kahahneka‐ezhechegawaud egewh sahsahgewejega‐wenenewug, ween enandahgoozegoobun chechahgezung ewh menoo‐mahgoojegun, uhpe goo anepeendegagoobunan emuh ookechetwah‐weguhmigoong Kesha‐Muhnedoo.

¹⁰ Kuhya dush ahgwahjeeng duhzhe‐ahnuhmeähgwahpun egewh mahyahwunjeëdejig ahnishenahbag magwah chahgezuhming ewh menoo‐mahgoojegun.

¹¹ Oogewahbuhmaun dush enewh oodangenemun owh Tabaningad, nebahwenid emuh ookechenikahwung ewh sahsahgewejegun‐ahbik kah‐duhzhe‐chahgedag ewh menoo‐mahgoojegun.

¹² Kekeche‐wahwuhnandum dush owh Zacharias, uhpe wuhyahbuhmaud, kuhya kekeche‐sageze.

¹³ Owh dush angen oo‐oo oogeënaun, Kagoo sagezekan, Zacharias: kegebezindahgoo muh azhepahgoosanjegayun; kuhya dush owh kewedegamahgun Elizabeth oogahnegeäun enewh kaöogwisseyun, John dush kegahezhenekahnah.

¹⁴ Kegahahyaun dush ewh moojegezewin kuhya bahpenanduhmoowin; kuhya nebewah bamahdezejig tahmoojegezewug oonegewin oonje.

¹⁵ Tahkeche‐ahpetandahgooze dush emuh enahsuhmuhbid owh Tabaningad; kah dush oogahmenequaseen ewh shooweminahboo kuhya mashkahwahgummig menequawin: oogahmooshkenashkahgoon enewh Keche‐Oojechaugwun, pooch kekishkahgood enewh oogeen.

¹⁶ Oogahquakeäun dush nebewah oonejahnesun owh Israel chebuhmeetuhwahnid enewh Jehovahun Ookesha‐Muhnedoomewaun.

¹⁷ Tahneegahnee dush emuh enahsuhmenid emuh oodezhewabezewining kuhya oomushkahwezewining owh Elias, chequakenahmahwaud wanejahnesememindjin enewh wanejahnesemegoowahjin oodaëne, kuhya enewh kagaunzetuhmenejin emuh oonebwahkahwenewaung egewh quuhyuk azhewabezejig; cheoozhetahaud enewh ahnishenahban chewebuhmeetahwahnid enewh Jehovahun.

¹⁸ Zacharias dush oogeënaun enewh angenun, Wagoonash kaöonjekekanduhmaun oonoo? Ninduhkewanzewh mahween, kuhya newedegamahgun zhuhyegwah keche-mindemooyewe.

¹⁹ Owh dush angen oogenuhquatuhwaun, oo‐oo keënaud, Neen nindow Gabriel, owh nahbahwid emuh enahsuhmuhbid owh Kesha‐Muhnedoo, ningeähnoonegoo dush cheguhnoonenaun, kuhya chewahweenduhmoonaun oonoo minwahjemoowinun.

²⁰ Benuh dush, kahween kegahkushketooseen chekekedooyun, nahnauzh ewh kezheguk uhpe ketebishkoosag oonoo, oonje ewh kedabwatuhsewun nindekedoowinun, ahbetakummig kaëzhewabuk uhpe oojechesamahguk.

²¹ Egewh dush ahnishenahbag oogenundahwanemahwaun enewh Zachariasun, kemahmahkahdanduhmoog kuhbayuhee ahyahnid emuh kechetwah‐weguhmigoong.

²² Uhpe dush kahsahgahung, kahween oogekushketooseen ewh cheguhnoonaud: me dush kekanemahwaud kagoo mamaundahwuk kewahbunduhmenid emuh keche‐ahnuhmeä‐weguhmigoong: ween dush oogechaunegquatuhwaun, kah dush oogekushketooseen chekekedood.

²³ Kepuhgummeähyah dush, uhpe kahishquahsanig enewh buhmeetahgawine‐ookezhegudoomun, keëzhekewa ewede andaud.

²⁴ Bahnemah kahishquahsag oonoo kezhegudoon, keünjekoowun Elizabethun wewun, nahnoo‐keezis dush kekahzoowun, oo‐oo keëkedoonid.

²⁵ Me suh kahdoodahwid ewh Jehovah, uhpe keguhnuhwahbuhmid, cheëkoonahmahwid ewh nindahbussandahgoozewin anduhzhe ahyahwaud egewh enenewug.

²⁶ Kahningoodwahsoo‐keeziswahguk dush, owh angen Gabriel azhenekahzood oogepeëzhenahzhahoogoon enewh Kesha‐Muhnedoon, cheëzhaud emuh Galileenaung duhzhe oodanah, Nazareth kahezhenekahdag.

²⁷ Kegaungwun kahpenaunzekahwahjin, wahwedegamahgoobuneen enenewun Joseph kahezhenekahzoonejin, owh kahooketezemaud enewh Davidun: owh dush kegaungooqua Mary keëzhenekahzoo.

²⁸ Oogepeendegahgoon dush keche‐kezhegoong duhzhe‐angenun, oo‐oo dush keëgood, Kedahnemekoon keen shawandahgoozeyun, keweedookaug sah owh Jehovah: keshahwandahgooz menik anduhchewaud egewh equawug.

²⁹ Uhpe dush wuhyahbuhmaud, kemegooshkahje‐ahyah oonje ewh kahegood, kenahnahgahdahwandum dush wagoodoogwanedoog ahnemikoodahdewin oo‐oo kahahwunoogwan.

³⁰ Oo‐oo dush keëgood enewh angenun, Kagoo sagezekan, Mary: kegemekaun suh ewh ooshahwanjegawin owh Kesha‐Muhnedoo.

³¹ Benuh dush, kegahkekishkahwah ahbenooje, kegahnegeäh dush quewezans, JESUS dush kegahezhenekahnah.

³² Tahkechetwahwandahgooze, kuhya Mahyahmahwe ishpandahgoozid oogwissun tahezheweenzoo: enewh dush Jehovahun Kesha‐Muhnedoon oogahmeenegoon ewh oodoogemah‐wuhbewinene enewh oosun Davidun.

³³ Oogahoogemahkundahwaun dush enewh Jacob oonejahnesun kahgenig; kuhya dush oodoogemahwewin kah wekah tahishquahsasenene.

³⁴ Me dush owh Mary oo‐oo keënaud enewh angenun, Ahneen kaëzhewabuk oonoo, ewh kekanemahsewug enene?

³⁵ Angenun dush oogenuhquatahgoon, oo‐oo keëgood, Owh Keche‐Oojechaug kegahoodissik, kuhya dush ewh oomushkahwezewin owh Mahyahmahwe‐ishpandahgoozid kegahahgahwahtashkahgoo: me dush owh Kache‐peenezid kanegeüd kaöonjeëzhenekahnind Oogwissun owh Kesha‐Muhnedoo.

³⁶ Benuh dush, owh kedaungoosha Elizabeth, kuhya ween ookekishkahwaun enewh quewezansun ahnoo goo kekaud: me noongoom ahzhe ningoodwahsoo‐keeziswahgud akoo‐unjekood owh wanejahnesesig anindebun.

³⁷ Kah muh gagoo oopwahnuhwetooseen owh Kesha‐Muhnedoo.

³⁸ Mary dush keëkedoo, Benuh suh, oobuhmeetahgunequamun owh Jehovah; mahnoo ningahezheähyah debishkoo ewh kahekedooyun. Kemahjahwun dush enewh angenun.

³⁹ Ewh dush uhpe kepuhsegwe owh Mary, waweeb dush keëzhah emuh akoo‐wahjewekaug, emuh Juda duhzhe oodanaung;

⁴⁰ Kepeendega dush emuh oowegewauming owh Zacharias, keähnahmekahwaud dush enewh Elizabethun.

⁴¹ Keëzhewabud dush, uhpe owh Elizabeth kahnoondung ewh ahnuhmekahgood enewh Maryun, oodahbenoojeëmun kakishkahwahjin kequaushkoonewun; oogemooshkanashkahgoon dush Keche‐Oojechaugwun.

⁴² Kekeche‐kezhewa dush oo‐oo keëkedood, Keshahwandahgooz anduhchewaud egewh equawug, kuhya shahwandahgooze owh kakishkahwud:

⁴³ Ahneeshwin dush oo‐oo andoodahgooyaun, pahnaunzekahwid oogeen owh Tabanemid?

⁴⁴ Benuh, uhpe kahnoonduhmaun ewh kedahnuhmekahgawin, owh ahbenooje kakishkahwug kequaushquahne apeech moojegezid.

⁴⁵ Shahwandahgooze dush owh kahdabwayandung, tahtebishkoosane suh oonoo kahegood enewh Tabaninganejin

⁴⁶ Oo‐oo dush keëkedoo owh Mary, Ninjechaug oowahwezhanemaun enewh Jehovahun.

⁴⁷ Kuhya ninjechaug oogemoojegezetahgoon Kesha‐Muhnedoo kahbemahjeïd.

⁴⁸ Oogeguhnuhwahbuhmaun suh enewh dabussandahgoozenejin oobuhmeetahgun‐equamun: benuh, noongoom kuhya kahgenig kuhkenuh aneähneka‐bemah‐dezejig shahwandahgooze ningahegoog.

⁴⁹ Owh muh mashkahwezid ningedoodaug keche‐uhyeëen, kuhya kechetwahwandahgwudene oodezhenekahzoowin.

⁵⁰ Kuhya ooshahwanjegawin oodoodissegoonahwah egewh quasahjig kahgenig uhpena kahgenig.

⁵¹ Oogewahbundahewan oomushkahwenikawin; oogesuhswa‐nahzhahwaun enewh manahdanemoonejin emuh ananduhmoomahgudenig oodaëwaun.

⁵² Oonuhmuhduhbewinening oogeöonje‐neswabenaun enewh mashkahwezenejin, kuhya dush oogeöombenaun enewh katemahgezenejin.

⁵³ Oogetabesineäun enewh pakuddanejin enewh wanesheshingin, kuhya dush kachetwahwezenejin pezheshig oogesahgeje‐nahzhahwaun.

⁵⁴ Ween mequandung ooshahwanjegawin, oogeweedookahwaun oobuhmeetahgun Israelun.

⁵⁵ Kahezhewahweenduhmoowaud koosenahnin, Abraham kuhya oonejahnesun kahgenig.

⁵⁶ Kagah nesoo‐keezis owh Mary oogeweejewaun enewh, medush keëzhekewad emuh tebenuhwa oowegewauming.

⁵⁷ Ahzhe dush Elizabeth ketebishkoosane ewh uhpe chenegeähwuhsood; oogenegeäun dush enewh quewezansun.

⁵⁸ Weejeduhnuhkewamahgunun kuhya oodenahwamahgunun kenoondahgawun kahezheshahwanemegood enewh Tabaninganejin; oogeweejmoojegezemegoon dush.

⁵⁹ Kepuhgummeähyahmahgud dush, neeshwausoogoonahguk kepeëzhahwug chekekenoowahje‐mahdezhwahwaud enewh ahbenoojeün; Zacharias dush oogeweëzhenekahnahwaun, debishkoo azhenekahzoonid enewh oosene.

⁶⁰ Oogeen dush oogenuhquatahgoowaun, oo‐oo keëgoowaud, Kahween ewh; John suh tahezhenekahzoo.

⁶¹ Oo‐oo dush oogeënahwaun, Kahween ahweyah anduhchewaud kedenahwamahgunug oo‐oo ezhenekahzoose.

⁶² Oogeühyenenuhmahwaun enewh oosene, ewh kaëzhenekahzoonid.

⁶³ Oogenundoodaun dush muzzeneëgauns, keoozhebeëga dush, oo‐oo keëkedood, John suh tahezhenekahzoo. Kuhkenuh dush kemahmahkahdanduhmoog.

⁶⁴ Kazhetena dush kenesahkooshkahne oodoon, kuhya oodanuhnewh kepuggissekahne, kekekedoo dush, kuhya kemahmooyahwahmaud enewh Kesha‐Muhnedoon.

⁶⁵ Sagezewin dush oogeähpuggissekahgoonahwah kuhkenuh emuh kewetuhyeëe kahdahjig: kuhkenuh dush oonoo ekedoowinun kesuhswaweenjegahdanoon emuh akoo‐ishpahdenaug emuh Judea duhzhe uhkeeng.

⁶⁶ Kuhkenuh dush kahnoondungig oogeähsunjegoonahwah emuh oodaëwaung, oo‐oo dush keëkedoowaud, Ahneen kaëzhewabezid mahbuh ahbenooje! Kuhya dush ooneenj owh Tabaningad oogeweedookahgoon.

⁶⁷ Oosun dush Zacharias oogemooshkenashkahgoon enewh Keche‐Oojechaugwun, keäunwahjega dush, oo‐oo keëkedood,

⁶⁸ Tahpeshegandahgooze owh Jehovah Israel ookesha‐Muhnedoomun; oogepenaunzekahwaun suh, kuhya oogebemahjeäun oodahnishenahbamun.

⁶⁹ Kuhya kegeöombenemahgoonaun kache‐enandahgwuk bemahjeëgoowin emuh oowegewaumening enewh Davidun oobuhmeetahgunemun;

⁷⁰ Kahezhewahweendahmahgad emuh oodoonening enewh kachetwahwezenejin oodaunwahjega‐wenenemun kahahyahnejin pahahkoo‐uhkeewung:

⁷¹ Chemeetahgwanahmahgooyung wemujje‐doodoonungwah egewh shaunganemenungoog, kuhya ooneenjewaung egewh nashkanemenungoog cheoonjebemahjeëgooyung;

⁷² Chekezhetoong ewh shahwandahgoozewin kahezhewahweenduhmoowindwah egewh keketezemenenahnig, kuhya chemequanduhming ewh kachetwahwandahgwudenig oowahweendahmahgawin.

⁷³ Ewh mushkahwe‐kezhwawin kahezhewahweenduhmoowaud enewh koosenaun Abraham,

⁷⁴ Chemeenenung, kenuhwind chebemahjeëgooyung, chebuhmeetahwung kuhnuhga chekoosahsewungwah nashkanemenungoog,

⁷⁵ Emuh menoo‐ezhewabezewining kuhya emuh quuhyuk‐wahdezewining emuh enahsuhmuhbid, kaähkoobemahdezeyung.

⁷⁶ Kuhya dush keen ahyahbenoojeeweyun, kegahezhenekahnegoo oodaunwahjega‐wenenemun owh Mahyahmahwe‐ishpandahgoozid; kegahuhnenegaun emuh enahsuhmuhbid owh Jehovah, chewahwazhesittooyun ewh kaëneëzhaud;

⁷⁷ Chekekanduhmooüdwah oodahnishenahbamun ewh bemahjeëwawin, cheöonjewabenuhmoowindwah enewh oomujjeëzhewabezewinewaun,

⁷⁸ Emuh ookeche‐shahwanjegawining owh keKesha Muhnedoomenaun kegepemoowuddisegoonaun owh keche‐kezhegoong wanjeed, wahsayahzewin pahtood.

⁷⁹ Chemeenaud ewh wahsayahzewin enewh magwah puhsuhgishtebik namuhduhbenejin, kuhya neboowine ahgahwahtashemoowining ayahnejin, kuhya cheähtood kesittahnahnin emuh pezaunewawine‐meekunaung.

⁸⁰ Owh dush ahbenooje kemahjege, kuhya ashkum kemushkahweze emuh oojechaugoong; puhgwuhduhkummig dush keähyah nahnauzh ewh kezheguk kewahbundahind owh Israel.