ST. JOHN 6 - Ottawa New Testament Penteteuch and Psalms 1874

¹ Kahishquah‐ahyaug oonoo uhyeëen, Jesus oogeähzhahwuhaun ewh Galilee duhzhe kechegummee, me suh ewh Tiberias kechegummee aduhming.

² Oogenoopenuhnegoon dush keche‐nebewah ahnishenahban, ewh kewahbunduhmenid enewh oomahmaundahwejegunun kahdoodahwaud ayahkoozenejin.

³ Jesus dush keähmuhjewa emuh wahjewing, me dush emuh keweeduhbemaud ookekenooähmahgunun.

⁴ Ewh dush kuhbekoosa‐wekoondewin, Jewyug oowekoondewinewah, zhuhyegwah gagah kedebishkoosamahgud.

⁵ Uhpe dush Jesus tuhyahtuhgunahbid, kewahbuhmaud dush kache‐mahmahwenoonejin abnishenahban chepenaunzekahgood, oo‐oo oogeënaun enewh Philipun, Ahneende kaöonjekishpenuhtooyung buhquazhegun, oogoo chewesenewaud?

⁶ Medush oo‐oo kahoonjeëkedood chekuhgwajeäud, ween muh tebenuhwa oogekekandaun wahezhechegad.

⁷ Philip dush oo‐oo oogeënaun, Neezhwauk‐duswahbik shooneäunsun enuhgindag buhquazhegun kahween tahtabesasenoon, papunge chewesenewaud.

⁸ Pazhik dush ookekenooähmahgunun, Andrew, Simon Peter wejekewaün oo‐oo oogeëgoon.

⁹ Ahyah suh oomah quewezans, nahnun mameshahnahguk buhquazhegunun ayahwaud kuhya neezh kegoozansun: ahneen dush kaëzhetabesagoobunan ewh ashenoowaud?

¹⁰ Jesus dush oo‐oo keëkedoo, Nuhmuhduhbeïk egewh enenewug. Kemezhushkookahbun suh emuh. Kenuhmuhduhbewug dush egewh enenewug, kuhnuhbuj nahning metauswauk duhchegwahpun.

¹¹ Jesus dush oogeöodahpenaun enewh buhquazhegunun; uhpe dush kahmahmooyahwad, oogemahdahoonaun enewh kekenooähmahgunun, egewh dush kekenooähmahgunug oogemahdahoonahwaun enewh namuhduhbenejin; kuhya dush gegooyun menik wahahyahwahwaud.

¹² Uhpe dush kahtabesinewaud, oogeënaun enewh ookekenooähmahgunun, Mahwundoonuhmook enewh ishquunjegunun, gagoo chewuneshinsenook.

¹³ Oogemahwundoonahwah dush, oogemooshkenahtoonahwah dush metauswe‐ahshe‐neezh kookoobenahgunun menik kahishquunduhming enewh nahnun mameshahnahguk buhquazhegunun kahishquunduhmoowaud egewh kahwesenejig.

¹⁴ Me dush uhpe oogoo enenewug, kahwahbunduhmoowaud mahmaundahwejegun Jesus kahezhechegad, oo‐oo dush keëkedoowug, Mesuh kagate owh aunwahjega‐wenene wahpeëzhahgoobunan oomah uhkeeng.

¹⁵ Jesus dush kekanemaud wepeëzhahnid ketwa cheoogemahweëgood, kemahjah menuhwah, keëzhah dush emuh wahjewing ween nezheka.

¹⁶ Uhpe dush keöonahgooshenig, kemuhtahbewun enewh ookekenooähmahgunun emuh kechegummeeng,

¹⁷ Kepoozewaud dush emuh nahbequauning keähzhah-oowug dush ewede anuhkagaum Capernauming. Ahzhuh dush ketebikudoobun, kah dush ketuhgwishinsebun owh Jesus.

¹⁸ Kemaungaushkah dush ewede kechegummeeng, kekeche‐noodin muh.

¹⁹ Uhpe kahzhabwahyawaud koonemah nishtuhnuhahshe‐nahnun, koonemah nesemeduhnuh tebahbaun, oowahbuhmahwaun Jesusun bemoosanid emuh kechegummeeng, pashoo dush ahyahnid emuh nahbequauning, kesagezewug dush.

²⁰ Oo‐oo dush oodenaun, Neen suh nindow; gagoo sagezekagoon.

²¹ Me dush keënanduhmoowaud chepoozeähwaud emuh nahbequauning: bahbega dush kepuhguhmebeta ewh nahbequaun emuh azhahwaud.

²² Kahwahbunenig, egewh mahyahmahwenoojig kenebahwewug emuh ahgahme‐kechegummee, wuhyahbunduhmoowaud cheähgwindasenook pakahnuk nahbequaunans, me atuh pazhik, emuh kepoozewaud egewh kekenooähmahgunug; kah dush owh Jesus oogeweejewahseen enewh ookekenooähmahgunun kepoozenid emuh nahbequaunansing, wenuhwah atuh kekenooähmahgunug kepoozewug;

²³ (Pooch egoo ahnind nahbequaunansun keöonjemahjebetawun Tiberiasing, pashoo emuh kahduhzhe‐wesenewaud, kahmahmooyahwad owh Tabaningad:)

²⁴ Uhpe dush wuhyahbunduhmoowaud egewh ahnishenahbag Jesusun ahbesenid ewede, kuhya ookekenooähmahgunun, kepoozewug kuhya wenuhwah emuh nahbequauning, kepeëzhahwug dush emuh Capernauming, nunduhwahbuhmahwaud Jesusun.

²⁵ Uhpe dush kahmekahwahwaud ewede ahgahme‐kechegummee, oo‐oooogeënahwaun, Rabbi, ahneen ahpeech kepeëzhahyun oomah?

²⁶ Jesus dush oogenuhquatuhwaun, oo‐oo keënaud, Kagate, kagate, kedenenim, Kahween kedoonjenunduh-wahbuhmeseem, kewahbunduhmag enewh mahmaundahwejegunun, keäumwagwah atuh egewh buhquazhegunug, ketabeseneyag dush wanjenunduhwahbuhmeyag.

²⁷ Kagoo ahnookeetunkagoon ewh meejim kabahnahduk, ewh atuh meejim kaähtag emuh kahgega‐bemahdezewining, mesuh ewh kaähshumenag owh Enene Oogwissun: me muh enewh kahkekenoowahjeähjin owh Kesha Muhnedoo.

²⁸ Oo‐oo dush oogeënahwaun, Ahneen kaëzhechegayaung, cheähnooketuhmaung oodahnookewinun owh Kesha‐Muhnedoo?

²⁹ Jesus dush oogenuhquatuhwaun oo‐oo keënaud, Mesuh maunduh ooduhnookewin owh Kesha‐Muhnedoo, chedabwayanemag enewh kahpeëzhenahzhahwahjin.

³⁰ Oo‐oo dush oogeënahwaun, Wagoonan dush kekenoowahjechegun kaëzhechegayun, cheöonjewahbunduhmaung kuhya cheöonjedabwayanemegooyun? Ahneen anuhnookeeyun?

³¹ Egewh keketezemenahnig oogemeejenahwah ewh manna emuh buhgwuhduhkummig, debishkoo azhebeëgahdag, Oogeähshummaun owh keche‐kezhegoong oonje buhquazhegun.

³² Jesus dush oo‐oo oogeënaun, Kagate, kagate, kedenenim, Kahween owh Moses kegemeenegoosewah ewh keche‐kezhegoong oonje buhquazhegun; Noos suh kemeenegoowah ewh quuhyuk keche‐kezhegoong oonje buhquazhegun.

³³ Oobuhquazhegunemun owh Kesha‐Muhnedoo ahwe owh keche‐kezhegoong kahpeöonjeed, owh suh mahnaud ewh bemahdezewin enewh akeewenejin.

³⁴ Oo‐oo dush oogeënahwaun, Tabaningayun, ahpena meezheshenaum maunduh buhquazhegun.

³⁵ Jesus dush oo‐oo oogeënaun, Neen suh nindow ewh bemahdezewine‐buhquazhegun; owh pahnaunzekahwid kahween tahpuhkuddase; kuhya owh duhyabwayanemid kah wekah tahkishkahbahgwase.

³⁶ Oo‐oo suh kegeënenim, Kegewahbuhmim kah dush kegedabwayanduhseem.

³⁷ Kuhkenuh enewh mahzhejin owh Noos ningahbenah-zekahgoog; kah dush bahpish ningahoonjesahgeche‐wabenahse owh kapenahzekahwid.

³⁸ Kah muh keche‐kezhegoong ningepeöonjeëzhahse neen ahyenanduhmaun cheëzhechegayaunbaun, ayenandung atuh owh kahpeëzhenahzhahood.

³⁹ Mesuh oo‐oo uhyenandung owh Wayoosemind kahpeëzhenahzhahood, ewh menik kahmeezhid kuhnuhga gagoo chewuhnetoosewaun, cheöombenuhmaun atuh uhpe ashquah‐kezheguk.

⁴⁰ Mesuh oo‐oo uhyenandung owh kahpeëzhenahzhahood, ahwagwan wuhyahbuhmahgwan enewh Wagwissemindjin, duhyabwayanemaud dush, cheähyaung ewh kahgega‐bemahdezewin: cheähbejebahug dush uhpe keïshquah‐kezheguk.

⁴¹ Egewh dush Jewyug oogenahnahpahgaunzoomahwaun, oo‐oo keëkedoonid, Neen suh nindow ewh bahquazhegun keche‐kezhegoong kahpeoönjebahmahguk.

⁴² Oo‐oo dush keëkedoowug, Kah nuh ween wah‐owh ahwese Jesus, oogwissun owh Joseph? nekekanemahnahnig suh oosun kuhya oogeen: Wagoonash dush wanjeëkedood, keche‐kezhegoong ningepeöonjebah?

⁴³ Jesus dush oogenuhquatuhwaun oo‐oo keënaud, Kagoo nahnahpahgaunzetahgoozekagoon guhnoonindeyag.

⁴⁴ Kahween ahweyah oodahkushketooseen chepenaunzekahwid, kishpin atuh owh Wayoosemind kahezhenahzhahood wekoobenaud: ningahahbejebahah dush uhpe ishquah‐kezheguk.

⁴⁵ Oo‐oo suh ezhebeëgahda emuh aunwahjegawining, Kuhkenuh suh oogahkekenooähmahgoowaun enewh Kesha‐Muhnedoon. Kuhkenuh egewh nwaundahwahjig, kuhya kakenooähmahgoojig enewh Wayooseminjin, nepenaunzekahgoog.

⁴⁶ Kah suh ahweyah oogewahbuhmahseen enewh Wayooseminjin, Owh suh atuh Kesha‐Muhnedoong wandahdezid, ween suh oogewahbuhmaun enewh Wayooseminjin.

⁴⁷ Kagate, kagate, kedenenim, Owh duhyabwayanemid oodahyaun ewh kahgega‐bemahdezewin.

⁴⁸ Neen suh nindow ewh bemahdezewine‐buhquazhegun.

⁴⁹ Koosewaug suh oogemeejenahwah ewh buhquazhegun emuh buhgwuhduhkummig, keneboowug dush.

⁵⁰ Mesuh maundah ewh buhquazhegun keche‐kezhegoong kahoonzekaug, chemeejepun owh enene, cheoonjeneboosig dush.

⁵¹ Neen suh nindow ewh bemahdezewine‐buhquazhegun keche‐kezhegoong kahpeöonjebahmahguk: kishpin dush ahweyah meejid ewh buhquazhegun, kahgenig tahbemahdeze: me suh ewh buhquazhegun kameegewayaun, neyaus suh goo, ewh kameegewayaun cheöonje‐bemahdezewaud egewh akeewejig.

⁵² Egewh dush Jewyug keähyahgoonwatahdewug, oo‐oo keëkedoowaud, Ahneen dush kaëzhekushketood mahbuh cheähshummenung ewh tebenuhwa weyaus.

⁵³ Jesus dush oo‐oo oogeënaun, Kagate, kedenenim, Kishpin meejesewag ooweyaus owh enene oogwissun, menequasewag dush oomisqueem, kahween keduhyaunsenahwah ewh bemahdezewin peenjenuh.

⁵⁴ Ahwagwan suh mahjegwan ewh neweyaus, kuhya manequagwan ewh nemisqueem, oodahyaun ewh kahgega‐bemahdezewin; ningahahbejebahah dush uhpe ishquah‐kezheguk.

⁵⁵ Kagate mejeememewun ewh neweyaus, kuhya dush kuhya dush kagate menequawinewun ewh nemisqueem.

⁵⁶ Owh mahjid ewh neweyaus, kuhya manequad ewh nemisqueem, nekekishkaug, kuhya neen nekekishkahwah.

⁵⁷ Debishkoo kahezhenahzhahood owh Noos bamahdezid, kuhya neen oonje bemahdezeyaun owh Noos; Mesuh kuhya owh kaähmood, neen kaöonjebemahdezid.

⁵⁸ Mesuh maunduh ewh buhquazhegun keche‐kezhegoong kahpeöonjebahmahguk: kahween kahezhemeejewaud egewh koosewaug ewh manna, keneboowug gooshah: owh dush mahjid maunduh buhquazhegun kahgenig tahbemahdeze.

⁵⁹ Oonoo oogeëkedoonun emuh ahnuhmeä‐weguhmigoong, Capernauming keduhzhe‐kekenooahmahgad.

⁶⁰ Nebewah dush enewh ookekenooähmahgunun, uhpe kahnoonduhmoowaud oo‐oo, keëkedoowug, Sunnuggetahgwud oo‐oo ekedoowin; ahwanan kakushketood chebezindungebun?

⁶¹ Jesus dush kekanemaud peenjenuh, chenahnahpah-gaunzetahgoozenid ookekenooähmahgunun oo‐oo ekedoowin oonje, oo‐oo oogeënaun, Kedoosittahwandahnahwah nuh maunduh?

⁶² Kishpin wahbuhmag owh Enene Oogwissun cheëzheoombishkaud ewede wahyashkud kahahyaud?

⁶³ Mesuh owh Oojechaug bamahdezeëwad; ewh weyaus kahween ningood enahbuhtussenoon, enewh suh ekedowinun anenuhgoog, oojechaugwunoon kuhya bemahdezewunoon.

⁶⁴ Ahnind dush kenuhwah kahween kedabwayanduhseem. Wahyashkud muh oogeöonjekekanemaun owh Jesus enewh tuhyabwayanduhsenegoon, kuhya enewh wahbahtahegoojin.

⁶⁵ Oo‐oo dush keëkedoo, Mesuh kahoonjeënenuhgoog, kahween ahweyah ookushketooseen chepenahzahkahwid, kishpin atuh kepuhgedenahmahgood enewh Noosun.

⁶⁶ Medush uhpe nebewah enewh ookekenooähmahgunun keähzha‐mahjahnid, kah dush menuhwah oogewedoosamegooseen.

⁶⁷ Jesus dush oo‐oo oogeënaun enewh metauswe‐ahshe‐neezh, Kuhya kenuhwah nuh kewemahjaum?

⁶⁸ Simon Peter dush oogenuhquatuhwaun, Tabaningayun, ahwanan kanahzekahwungidebun? keen muh kedahyaunun enewh kahgega‐bemahdezewine‐ekedoowinun.

⁶⁹ Nindabwayandahmin suh kuhya ninkekandahmin, ahweyun owh Christ Oogwissun owh bamahdezid Kesha‐Muhnedoo.

⁷⁰ Jesus dush oogenuhquatuhwaun, Kah nuh ween kegewahwanahbuhmesenoonim kenuhwah matauswe‐ahsheneezheyag, pazhik dush ewh anduhcheyag mujje‐muhnedoowe.

⁷¹ Mesuh enewh Judas Iscariotun, Simon oogwissun kahenahjin: me muh enewh wahbahtahegoojin, ketahquahkoonah dush enewh metauswe‐ahshe‐neezh.