ST. JOHN 21 - Ottawa New Testament Penteteuch and Psalms 1874

¹ Kahishquah‐kummeguk oonoo, menuhwah oogewahbundahaun enewh ookekenooähmahgunun ewh tebenuhwa ooweyow ewede Tiberias azhenekahdag kechegummeeng; oo‐oo suh dush keëzhewahbunduhewa.

² Mahmahwe keähyahwug owh Simon Peter, kuhya Thomas Didymus azhenekahzood, kuhya owh Nathaniel Canaïng Galilee duhzhe oodanaung kahoonjebaud, kuhya Zebedee oogwissun, kuhya neezh pakaunezenejin ookekenooähmahgunun.

³ Simon Peter oo‐oo oodenaun enewh, Nindahweke-goongeka. Oo‐oo dush oodegoon enewh, Kegahweejewegoo kuhya nenuhwind. Keühnesahguhumoog dush, kazhetena kepoozewug emuh nahbequauning, ewh dush tebikuk kah gagoo oogenetoosenahwah.

⁴ Uhpe dush zhuhyegwah kahwahbunenig, Jesus kenebahwe ewede chegebeeg: egewh dush kekenooähmahgunug kahween oogekekanemahsewaun ewh ahwenid Jesusun.

⁵ Jesus dush oo‐oo oodenann, Ahbenoojewedoog, kedahyahnahwah nuh meejim? Oo‐oo dush oogeënahwaun, Kah.

⁶ Oo‐oo dush oogeënaun, Kechenikaung enuhkayah pahkoobe‐wabenik ahgwahbenahgun kegahmekahnahwah dush. Oogepahkoobe‐wabenahwaun dush, kah dush kekushkeöosewug chewekoobenahwaud, apeech bahtuhyeënid enewh gegooyun.

⁷ Me dush owh kekenooähmahgun enewh kahsahgeähjin owh Jesus oo‐oo oogeënaun enewh Peterun, Mesuh owh Tabaningad: uhpe dush Simon Peter kahnoondung Tabaningad cheähwid, oogekechepezoon ewh gegoongeka pesekoowahgun, (pinguhshahgedegoobun muh), keähpuggezoo dush emuh kechegummeeng.

⁸ Egewh dush ahnind kekenooähmahgunug ketuhgwishenoog emuh nahbequaunansing; (kah muh wahsuh nahwij keähyahsewug, koonemah neezhwauk duhsoonik), geweekoobenahwaud enewh ahgwahbenahgunun kuhya enewh gegooyun.

⁹ Uhpe dush kahkuhbahwaud, oogewahbundahnahwah ewede ewh ahkuhkunzha‐ishkoota, kuhya oogeje‐shkoota gegooyun ahyahnid, kuhya buhquazhegun.

¹⁰ Jesus dush oo‐oo oodenaun, Peezh ahnind gegooyug noongoom kahnesagoog.

¹¹ Simon Peter dush kekoope keähgwahbenaud dush enewh ahgwahbenahgun mooshkenanid enewh keche gegooyun, ningoodwauk ahshe nahnemeduhnuh ahshe neswe: ahnooween‐goo oo‐oo keëshenoowaud, kahween kepegooshkahse owh ahgwahbenahgun.

¹² Jesus dush oo‐oo oodenaun, Umba peweseneyook. Kah dush ahweyah anduhchewaud egewh kekenooähmahgunug keënanduhse oo‐oo cheëzhekuhgwajemaud, Ahwanan keen? kekekanemahwaud ewh ahwid owh Tabaningad.

¹³ Me dush kepeëzhaud owh Jesus, keöodahpenaud enewh buhquazhegunun kemeenaud dush, kuhya enewh gegooyun.

¹⁴ Mesuh noongoom nesing kewahbundahaud owh Jesus enewh kekenooähmahgunun ewh tebenuhwa weyow uhpe kahahbejebaud.

¹⁵ Uhpe dush kahishquah‐wesenewaud, Jesus oo‐oo oodenaun enewh Simon Peterun, Simon, wagwissemik owh Jonas, ahwahshema nah kesahgeh dush ween oogoo? Oo‐oo dush oogeënaun, Aahe, Tabaningayun; kekekanim ewh sahgeënaun. Jesus dush oogeënaun enewh, Ahshum egewh nemahnishtahnisheensemug.

¹⁶ Oo‐oo dush menuhwah oodenaun, me goo neezhing, Simon, wagwissemik owh Jonas, kesahgeh nuh? Peter dush oo‐oo oodenaun, Aahe, Tabaningayun; kekekanim ewh sahgeënaun. Oo‐oo dush oodenaun, Ahshum egewh nemahnishtahnishemug.

¹⁷ Medush menuhwah oo‐oo keënaud, me goo nesing, Simon, wagwissemik owh Jonas, kesahgeh nuh? Kekushkandum dush owh Peter nesing keëgood. Kesahgeh nuh? Oo‐oo dush oogeënaun, Tabaningayun kekekandaunun kuhkenuh enewh uhyeëen; kekekanim ewh sahgeënaun. Jesus dush oo‐oo oodenaun, Ahshum nemahnishtahnishemug.

¹⁸ Kagate, kagate, kedenin, Uhpe washke‐bemahdezeyunbun, kekeche‐penedezoonahbun, kuhya ananduhmun kegepahbahmoosa: uhpe dush kekekahyun, kegahshebenikan, pakahnezid dush kegahkechepenik, kegahezhewenik dush emuh kaënanduhsewun.

¹⁹ Mesuh kahoonjeëkedood, kedebahdoodung ewh kaënahpenad cheöonjepeshegandahgooäud Kesha‐Muhnedoon. Uhpe dush oo‐oo kahekedood, oodenaun Peterun, Noopenuhzheshin.

²⁰ Peter dush, uhnequakekahbahwid, oogewahbuhmaun enewh kekenooähmahgunun kahsahgeähjin owh Jesus chenoopenuhnegoowaud; me owh kahahsooshing emuh ookahkegunauning magwah oonahgooshe‐wesening, oo‐oo dush kahekedood, Tabaningayun, ahwanan owh bahyahtahik?

²¹ Peter dush wuhyahbuhmaud enewh, oogeënaun Jesusun, Tabaningayun, ahneen dush kaëzhechegad mahbuh?

²² Jesus dush oodenaun, Kishpin enanemug cheduhnezid nahnauzh chetuhgwishenaun, wagoonan keen kaöonjepahbahmanduhmunbun? Noopenuhzheshin keen.

²³ Me uhpe kahsuhswashkahmahguk maunduh ekedoowin emuh kahahyahwaud egewh wawejekewaïndejig, ewh cheneboosig owh kekenooahmahgun: kah suh Jesus oogeënahseen, kahween tahneboose; ewh atuh, Kishpin enanemug cheduhnezid nahnauzh goo tuhgwishenaun, wagoonan keen kaöonjepahbahmanduhmunbun?

²⁴ Me owh kekenooahmahgun dabahdoodung oonoo uhyeëen, kuhya kahoozhebeüng oonoo uhyeëen: kekekandahmin edush ewh dabwamahgudenig oodebahjemoowin.

²⁵ Keche‐nebewah pakahnukkin Jesus kahezhechegajin, kishpin oozhebeëgahdagebun kuhkenuh auduhching, kahween tahgetabushkenasenoon maunduh uhkee enewh muhzeneëgunun kageöozhebeëgahdagebuneen. Amen.