ST. JOHN 14 - Ottawa New Testament Penteteuch and Psalms 1874

¹ Kagoo megooshkahjedaäkagoon: dabwayanemik Kesha‐Muhnedoo: kuhya neen dabwayanemeshig.

² Emuh Noos oowegewauming nebewah ahyahwun ahbenahsoowinun: kishpin oo‐oo ezheähyahsenoogebun, kedahgeweenduhmoonenim: Kedahwewahwazhetuhmoonenim cheähyahyag.

³ Kishpin dush ahwewahwazhetuhmoonenuhgoog cheahyahyag, menuhwah ningahpeëzhah cheöodahpenenuhgoog; neen anduhzhe‐ahyahyaun, kuhya kenuhwah cheähyahyag.

⁴ Azhahyaun kekekandahnahwah, kuhya dush ewh meekun kekekandahnahwah.

⁵ Thomas dush oo‐oo oodenaun, Tabaningayun kahween nekekanduhsemin tebe azhahwunan, ahneen dush kaëzhekekanduhmaungebun ewh meekun?

⁶ Jesus dush oo‐oo oodenaun, Neen nindow ewh meekun, ewh dabwawin, kuhya dush ewh bemahdezewin, kahween ahweyah oopenaunzekahwahseen enewh Wayooseminjin, oonje atuh neen.

⁷ Kishpin kekekanemeyagoobun kedahgekekanemahwah kuhya owh Noos; noongoom dush oonje kekekanemahwah kuhya kegewahbuhmahwah.

⁸ Philip dush oo‐oo oodenaun, Tabaningayun wahbundaheshenaum owh Wayoosemind, medush chetabuhganemooyaung.

⁹ Jesus dush oo‐oo oodenaun, Maweshah zhuhyegwah akooweejewenenuhgoog, kah nuh dush kegekekanemese, Philip? Owh suh kahwahbuhmid oogewahbuhmaun enewh Wayooseminjin; Wagoonan dush wanjeëkedooyun, Wahbunduheshenaum owh Wayoosemind.

¹⁰ Kah nuh ween kedabwayanduhse ewh kekishkahwug owh Wayoosemind, kuhya dush owh Wayoosemind kekishkahwid? Enewh ekedoowinun anenuhgoog kahween neen nezheka nekekedoosenun: owh dush Wayoosemind kakishkahwid, mesuh owh anuhnookeed enewh ahnookewinun.

¹¹ Dabwayanemeshig chekekishkahwug owh Wayoosemind, kuhya owh Wayoosemind chekekishkahwid, gamuh kuhya enewh ahnookewinun oonjedabwayanemeshig.

¹² Kagate, kagate, kedenenim, Owh duhyabwayanemid, enewh ahnookewinun anuhnookeyaun kuhya ween tahenuhnooke: ahwahshema dush tahkeche‐ahnookee; nindezhahnun muh owh Noos.

¹³ Wagoodoogwan dush kanundoodahmoowagwan emuh nindezhenekahzoowining, mesuh ewh kaëzhechegayaun, chepeshegandahgoöïnd owh Wayoosemind oonje owh Wagwissemind.

¹⁴ Kishpin gagoo nundooduhmag emuh nindezhenekahzoowining mesuh kaëzhechegayaun.

¹⁵ Kishpin sahgeëyag, guhnuhwanduhmook nekuhgequawinun.

¹⁶ Ningahnundooduhmahwah dush Wayoosemind, kegahmeenegoowah dush bakahnezid Manoodaäshkahgad, kahgenig dush cheweejewenag;

¹⁷ Owh suh goo dabwawine‐oojechaug, kaöodahpenahsigoog egewh akeewejig; kah muh oowahbuhmahsewaun, kah kuhya ookekanemahsewaun, kenuhwah dush ween kekekanemahwah; keweejeweegoowah muh, kuhya kegahkekishkahwahwah.

¹⁸ Kahween chekewezeyag kegahezhenuhguhnesenoonim, kegahpenaunzekoonenim suh goo.

¹⁹ Nahguj kahween kayahbe ningahwahbuhmegooseeg egewh akeewejig; kenuhwah dush kewahbuhmim: ninbemahdiz muh, mesuh dush kuhya kenuhwah kaöonjebemahdezeyag.

²⁰ Ewh uhpe kezheguk kegahkekandahnahwah neen chekekishkahwug owh Noos, kuhya kenuhwah chekekishkahweyag, kuhya ewh chekekishkoonenuhgoog.

²¹ Owh ayaung enewh nekuhgequawinun, kuhya ganuhwandung, mesuh owh suhyahgeïd: owh suh suhyahgeïd oogahsahgeëgoon enewh Noosun, kuhya neen ningahsahgeäh kuhya ningahwahbunduhah nindezhetwahwin.

²² Judas dush oo‐oo oodenaun, (kahween owh Iscariot,) Tabaningayun ahneen kaëzhewahbundaheyaung nenuhwind ewh kedezhetwahwin, kah dush egewh akeewejig?

²³ Jesus dush oogenuhquatuhwaun, oo‐oo dush keënaud, Kishpin ahweyah sahgeïd, oogahguhnuhwandaunun nindekedoowinun: Owh dush Noos oogahsahgeäun: ningahbenaunzekahwahnaun kuhya ningahweej‐ahyahwahnaun.

²⁴ Owh dush suhyahgeësig kahween ooguhnuhwanduhsenun enewh nindekedoowinun: ewh suh ekedoowin nwaunduhmag kahween neen nindekedoowin ahwunsenoon, Noos atuh kahpeëzhenahzhahood oodekedoowin.

²⁵ Oonoo suh dush kegeënenim, magwah kayahbe weejewenenuhgoog.

²⁶ Owh dush Manoodaäshkahgad mesuh owh Keche‐Oojechaug, enewh owh Wayoosemind emuh nindezhenekahzoowining kaöonjepuhgedenaud, ahnooj gagoo kegahkekenooahmahgoowah, kuhya ahnooj gagoo kegahmequanduhmooëgoowah, menik kahuhyenenuhgoog.

²⁷ Pezaunewawin kenuhguhduhmoonenim, nepezaun-ewawin kemeenenim: kahween azhemeegewamahguk ewh uhkee, kedezhemeenesenoonim. Kagoo megooshkahjedaäkagoon, kagoo kuhya sagandunkagoon.

²⁸ Kegenoondahnahwah kahenenuhgoog, Nemahjah, kuhya menuhwah kepenaunzekoonenim. Kishpin suh sahgeëyagoobun, kedahgeminwandaunahwah ewh kahekedooyaun, Nindezhaunun owh Wayoosemind; Noos muh nahwuj ahpeetandahgooze dush ween neen.

²⁹ Noongoom dush kezhah kegewahweenduhmoonenim chepwah ewh puhgummesag, bahmah dush kepuhgummesag chedabwayanduhmag.

³⁰ Kahween kayahbe nebewah kegahguhnoonesenoonim: tuhgwishin muh owh uhkee‐oogemah, kah dush kuhnuhga gagoo oodahyaunseen emuh neyowing.

³¹ Egewh dush akeewejig chekekanemewaud ewh sahgeüg owh Wayoosemind; kahezhekahgaunzoomid dush owh Wayoosemind, me suh azhechegayaun. Puhsegweeg, oomah oonjemahjahdah.