ROMANUN 6 - Ottawa New Testament Penteteuch and Psalms 1874

¹ Ahneen dush kaëkedooyung? Kegahmeekindahmin nuh ewh mujje‐ezhewabezewin, cheoonje‐bahtuhyeenuk ewh shahwanjegawin?

² Kahween pahbish tahezhewabussenoon. Ahneen kenuhwind, kahnebootuhmung ewh mujje‐ezhewabezewin, kaëzhebemahdezeyungoobun kayahbe emuh mujjeëzhewabezewining?

³ Kah nuh kekekanduhsenahwah, ewh menik kahbaptizooëgooyung emuh Jesus Christing mesuh emuh ooneboowining kegebaptizooëgoomin?

⁴ Mesuh dush kahningwahegahzooyung emuh ooneboowining uhpe kebaptizooëgooyung: nahsaub dush owh Christ kahezheähbejebahegood oopeshegandahgoozewin owh Wayoosemind, mesuh kuhya kenuhwind kaëzhebemoosayungoobun emuh aunje‐bemahdezewining.

⁵ Kishpin mahween mahmahwe kepuhduhkeshemegoowungan emuh azhenahgwudenig ooneboowin, kuhya dush kegahezheähyahmin emuh azhenahgwudenig oodahbejebahwin.

⁶ Kekanduhmung oo‐oo, owh kekata‐wenenemenaun keduhgoo‐ahgwahquahwah, chebahnahduk ewh mujje‐ezhewabezewine weyowemah, kayahbe chebuhmeetuhsewung mujje‐ezhewabezewin.

⁷ Owh muh kahnebood ekoonuhmoowah mujjeëzhewabezewin.

⁸ Kishpin gooshah keweeje‐nebooomung owh Christ, kedabwayandahmin ewh cheweeje‐bemahdezemung:

⁹ Kekanduhmung Christ keähbejebaud kahween menuhwah neboose; kahween kayahbe oodebanemegooseen ewh neboowin.

¹⁰ Ewh muh kenebood, mujje‐ezhewabezewin keöonjena ahbeting: ewh suh bemahdezid, oobemahdezetahwaun enewh Kesha‐Muhnedoon.

¹¹ Me suh dush enanindezooyook, kenuhwah kagate chenebootuhmag ewh mujje‐ezhewabezewin, chebemahdezetuhwag suh dush owh Kesha‐Muhnedoo oonje owh Jesus Christ Tabanemenung.

¹² Mesuh kaöonjeöogemahkundahgamahgussenook ewh mujje‐ezhewabezewin emuh keyowewaung natuh‐neboomahgukkin, cheöonjebuhmeetuhmagoobun emuh oomujjeenan-duhmoowining.

¹³ Kah kuhya kegahpuggedenunsenahwah kepuhkawezewinewah debishkoo mujje‐ezhewabezewine‐ushwewinun chemujjeëzhewabezingebun: puhgedenedezooyook suh goo emuh Kesha‐Muhnedoong, debishkoo egewh kahneboopuneeg nayaub bamahdezejig, kuhya kepukkawezewinewah debishkoo quuhyuk‐ezhewabezewine‐ushwewinun emuh Kesha‐Muhnedoong.

¹⁴ Kah muh kegahdebanemegoosenahwah ewh mujje‐ezhewabezewin: kah muh kedebandahgoozeseem emuh tebahkoonegawining, emuh suh atuh shahwanjegawining.

¹⁵ Ahneesh dush? kegahmujjeëzhechegamin nuh, ewh oonje debandahgoozesewung emuh tebahkoonegawining, emuh suh atuh shahwanjegawining? Kah bahpish tahezhewabussenoon.

¹⁶ Kah nuh ween kekekanduhsenahwah ewh, ahwagwan pagedenuhmoowagwan keyowewaun buhmeetahguning cheëzhedabwatahwag, kedoobuhmeetahgunemegoowah owh duhyabwatuhwag; kishpin mujje‐ezhewabezewin chenebooyag, kishpin dush ewh nuhittahgawin, chequuhyuk‐ezhewabezeëgooyag?

¹⁷ Tahmahmooyahwandahgooze owh Kesha‐Muhnedoo ewh ahnoo goo kebuhmeetuhmagoobun ewh mujje‐ezhewabezewin, kegedabwatahnahwah emuh kedaëwaung ewh doowah kuhgequawin kahpuggedenuhmahgooyag.

¹⁸ Emuh mujjeëzhewabezewining dush keöonje‐puggedenegooyag, kegeöobuhmetahgunemegoonahwah ewh quuhyuk‐ezhewabezewin.

¹⁹ Eneneeng nindezhekekid oonje keweyahsewewah nuhnenuhmezemahguk: nahsaub egoo kahezhepuggedenuhmag kepukkawezewinewah chebuhmeetuhmag weenezewin kuhya mujje‐ezhewabezewin chemujjeëzhewabezeyag; me suh kuhya noongoom kaëzhepuhgedenuhmag kepuhkawezewinewah chebuhmetuhmag quuhyuk‐ezhewabezewin cheöonje‐menoo‐ezhewabezeyag.

²⁰ Magwah muh buhmeetuhmagoobun ewh mujje‐ezhewabezewin, kahween kegedebandahgoozeseem emuh quuhyuk‐ezhewabezewining.

²¹ Ahneen dush ewh uhpe kahoondezeyag enewh noongoom agujetuhmagoon? uhnewuhyaquahsag mahween oonoo uhyeëen, neboowin duhgoomahgud.

²² Noogoom dush akoo‐debandahgoozesewag emuh mujje‐ezhewabezewining, kuhya oobuhmeetahgunemenag owh Kesha‐Muhnedoo, kedahyahnahwah kedoondezewinewah emuh peenahdezewining, kuhya uhnewuhyaquahsag, mesuh ewh kahgega‐bemahdezewin.

²³ Mujje‐ezhewabezewine‐tebahahmahgoowin me suh neboowin; ewh dush ween oomeegewawin owh Kesha‐Muhnedoo me suh ewh kahgega‐bemahdezewin oonje owh Tabanemenung Jesus Christ.