REVELATION 8 - Ottawa New Testament Penteteuch and Psalms 1874

¹ Uhpe dush kahpahkenung ewh akoo neezhwahcheeng ahkookeewuhsegun, kepezaunezeem ewede keche‐kezhegoong koonemah ahbetuh tebahegun menik.

² Kuhya ningewahbuhmaug egewh neezhwahswe angenug nahbahwejig anahsuhmuhbid Kesha‐Muhnedoo; kuhya kemeenahwug neezhwahswe pootahjegunun.

³ Menuhwah dush pazhik angen kepeëzhah, kuhya kepenebahwe emuh sahsahgewejegun‐ahbikoong, ketuhkoonung oozahwah‐shooneäh ooqwazegun‐ahbik; kemeenah dush nebewah ooquazegun, cheöonje‐sahsahgewetood mahmahwe oodahnuhmeäwinewaun kuhkenuh egewh manoo‐ahnuhmeähjig emuh oozahwah‐shooneäh sahsahgewejegun‐ahbikoong anahsuhme‐ahyahnig ewh oogemah‐wuhbewin atag.

⁴ Paquanag dush ewh ooquazegun chuhyahgezuhming, mahmahwe oodahnuhmeähwinewaun egewh manoo‐ahnuhmeähjig, keëzheömbahbutta emuh anuhsuhmuhbid Kesha‐Muhnedoo oonje ooneenjeeng owh angen.

⁵ Owh dush angen oogeöodahpenaun ewh ooquazegun‐ahbik, kuhya oogemooshkenuhtoon ewh ishkooda kahoondenegahdag emuh sahsahgewejegun‐ahbikoong, oogeähpuggedaun dush emuh uhkeeng: keähyahmahgudoon dush enewh inwawinun, kuhya egewh ahnemekeeg kenoondahgoozewug, kuhya kewuhwahsuhmoo, kuhya kecheengwakummegah.

⁶ Kuhya egewh neezhwahswe angenug takoonungig enewh neezhwahswe pootahjegunun keöozheetahwug chepootahjegawaud.

⁷ Kepootahjega owh netum angen, me dush kepeähyahmahguk ewh sasagun kuhya ishkoota kenikesing ewh misquee, keähpuggejegahdanoon dush emuh uhkeeng kuhya gagah ahbetah metigoog kechahgahkezoowug kuhya gagah kuhkenuh wazhahwushkaug mushkoosewin kechahgahketa.

⁸ Kuhya menuhwah pazhik angen kepootahjega, tahnahsug dush keche‐wahjew saketag keähpuggejegahda emuh kechegummeeng, kuhya dush gagah ahbetah kechegumme kemisqueewahgumme;

⁹ Kuhya gagah ahbetah egewh ayahjig emuh kechegumeeng bamahdezejig keneboowug: kuhya kagah ahbetah nahbequaunun kebahnahdudoon.

¹⁰ Owh dush akoo‐nesewaud angen kepootahjega, Keche ahnung dush kezhegoong keöonje‐pungeshin, wahsuhkoonanjeguning keënahkezood, kuhya kepungeshin emuh azhetequayaug kagah ahbetah seebeen, kuhya emuh wanjejewung enewh nebeen;

¹¹ Wesuggebug keëzhenekahzoo owh ahnung: kagah dush ahbetah enewh nebeen kewesuhgahgummewun, kuhya nebewah enenewug oogenesegoonahwaun enewh nebeen, oonje kewesuhgahgummechegahdanig.

¹² Owh dush akoo‐newewaud angen kepootahjega, kagah dush ahbetah owh kezhike‐kezis kebahnahjeäh, kuhya kagah ahbetah owh tebike‐kezis kuhya gagah ahbetah ahnungoog; Kagah ahbetah ketebikahbemenahgoozewug, kagah kuhya ahbetah kezheguk kahween kewahsayahmahgussenoon, kuhya tebekuk.

¹³ Ningeënaub edush, kuhya ningenoonduhwah pazhik angen pemesad emuh nahwuhyeëe kezhegoong, keche‐pepahgid oo‐oo keëkedood, Tahkuhgwahnesuhguhkumme‐ketemahgezewug, tahkuhgwahnesuhgukkumme‐ketemahgezewug, tahkuhgwahnesuhgukkumme‐ketemahgezewug egewh anduhnuhkeejig emuh uhkeeng oonje enewh ahnind anwawamahgudenig oopootahjegunewah egewh neswe angenug kayahbe kapootahjegajig!