REVELATION 22 - Ottawa New Testament Penteteuch and Psalms 1874

¹ Ningewahbunduhik dush pahnahgummeeg bemahdezewine‐seebe, Crystaling keëzhewauskayahgummeeg, wanjejewung emuh oodoogemah‐wuhbewinewaung Kesha‐Muhnedoo kuhya Mahnishtahnisheens.

² Nahwuhyeëe dush oodanah‐meekunaung, kuhya uhyeduhwuhgaum, seebe kepuhdukkezoo owh bemahdezewine metik metauswe ahshe neezhwuhyug kahëzhemeenewid, kuhya anduhsoo‐keziswahguk keähdittawun enewh meenewinun: metigoong duhzhe ahneebeeshun keënahbududoon chenoojemooïndwah ahnooj azheweenzoojig ahnishenahbag.

³ Kahween kayahbe tahduhgoomahgussenoon nuhneebekingawin; oodoogemah‐wuhbewin atuh Kesha‐Muhnedoo kuhya Mahnishtahnisheens tahduhgoomahgudene emuh: oogahbuhmeetahgoon dush enewh oobuhmeetahgunun:

⁴ Oogahmechewahbuhmahwaun; kuhya tahoozhebeegahdane oodoonoozoowin emuh ookuttikoowaung.

⁵ Kah dush bahpish tahtebikussenoon emuh; kah dush oogahnunduhwanduhsenahwah wahsuhkoonanjegun, kuhya kezisoong oonje wahsayahzewin, owh muh Tabaningad Kesha‐Muhnedoo oomeenaun wahsayahzewin: tahoogemahwewug dush kahgenig kuhya kahgenig.

⁶ Oo‐oo dush ningeïk, Dabwamahgudoon kuhya soongekahbahwemahgudoon oonoo ekedoowinun: kuhya owh Tabaningad ooKesha‐Muhnedoomewaun egewh kachetwahwezejig aunwahjega‐wenenewug oogepeëzhenahzhahwaun enewh oodangenemun chewahbundahahnid enewh oobuhmeetahgunun enewh uhyeëen gagah zhuhyegwah wahezhewabukkin.

⁷ Benuh wuhyebah ningahtuhgwishin: shahwandahgooze suh owh ganuhwandung ekedoowinun azheäunwahjegamahguk maunduh muzzenuhegun.

⁸ Neen dush John ningewahbundaunun oonoo uhyeëen kuhya ningenoondaunun. Uhpe dush kahnoonduhmaun kuhya kahwahbunduhmaun ningeöojecheengwunesa cheöoje‐cheengwuhnetahgayaun emuh oosittaung owh angen kahwahbunduhid oonoo uhyeëen.

⁹ Medush oo‐oo keëzhid, Gagoo benuh ezhechegakan: neen muh nindow keeje‐buhmeetahgun, kuhya pazhik egewh kejekewaüg aunwahjega‐wenenewug, kuhya egewh ganuhwandungig ekedoowinun oo‐oo muzzenuheguning wazhebeëgahdagin: oojecheengwuhnetow Kesha‐Muhnedoo.

¹⁰ Oo‐oo dush ningeïk, Kagoo ahkookewussunkan enewh ekedoowinun azheäunwahjegamahguk maunduh muzzenuhegun; gagah muh zhuhyegwah tahdebishkoosamahgud uhpe oo‐oo kaëzhewabuk.

¹¹ Owh quuhyuk‐azhewabezesig mahnoo kayahbe kahween tahquuhyuk‐ezhewabezese: owh dush wahnezid mahnoo kayahbe tahweeneze: owh dush quuhyuk‐azhewabezid mahnoo tahquuhyuk‐ezhewabeze: owh dush pahnezid mahnoo kayahbe tahpeeneze.

¹² Benuh dush wuhyebah netuhgwishin; nintebahahmahgawin dush nepeetoon, chemeenugebun anduhshid enene debishkoo kaënandahgwudenig oodahnookeewin.

¹³ Nindow Alpha kuhya Omega, mahyahjesing kuhya wuhyaquahsing, netum kuhya ishquauj.

¹⁴ Shahwandahgoozewug egewh kasebegenungig oodahgwewinewah cheöonje‐debanemahwaud enewh bemahdezewine metigoon, chepeendegawaud dush emuh kache‐ishquaundamewung keche‐oodanah.

¹⁵ Ahgwahjeeng ahyahwug uhnemooshug, kuhya chahsuhkeejig, kuhya pazhigwahdezejig, kuhya nashewajig kuhya wajecheengwuhnetahwahjig muzzeneneen, kuhya ahwagwan wazhetoogwan kuhya suhyahgetoogwan kuhkenuhwishkewin.

¹⁶ Neen Jesus ningeëzhenahzhahwah nindangenim chedebahjemootuhmoonag oonoo uhyeëen emuh anuhmeähjig anduhzhe‐ahyahwaud. Nindow oodoojeebikemun kuhya oonejahnesun David, kuhya wuhyahsenungooshkaud wahbunnung.

¹⁷ Owh Oojechaugoomah kuhya owh nahaungunequa ekedoowug, Oondahshaun. Kuhya owh nwaundung Oondahshaun, tahekedoo. Kuhya Mahnoo tahpeëzhah owh kashkahbahgwad. Ahwagwan dush ananduhmoogwan, tahpeëzhah, wanepuzh dush oogahoodahpenaun ewh bemahdezewine nebee.

¹⁸ Oo‐oo muh neweenduhmoowah anduhshid enene nwaundung enewh ekedoowinun azheäunwahjegamahguk oo‐oo muzzenuhegun, Kishpin ahweyah gagoo duhgooahtood emuh atag oonoo uhyeëen, Kesha‐Muhnedoo oogahahtuhwaun enewh kooduggetoowinun wazhebeëgahdagin oomah muzzenuheguning.

¹⁹ Kishpin dush ahweyah mahmood ahnind ekedoowinun azheäunwahjegamahguk oo‐oo muzzenuhegun, Kesha‐Muhnedoo oogahmahmoon oodebandahsoowin emuh oonje bemahdezewine muzzenuheguning kuhya emuh kechetwahoodanaung, kuhya emuh oonje oonoo uhyeëen wazhebeëgahdagin emuh oo‐oo muzzenuheguning.

²⁰ Owh dush wahyahweendung oonoo uhyeëen oo‐oo ekedoo, Kagate wuhyebah netuhgwishin Amen. Me suh kadezhewabuk, peëzhahkun, Tabaningayun Jesus.

²¹ Mahnoo kuhkenuh kenuhwah kegahahyahnahwah ooshahwanjegawin owh Tabanemenung Jesus Christ. Amen.