PSALMS 86 - Ottawa New Testament Penteteuch and Psalms 1874

¹ Puhgedenun ketuhwugoon, O Jehovah, chebezindahweyun: neketemahgiz mah kuhya newuhwahniz.

² Guhnuhwanim ninjechaug, neen mah nindow pazhig kashahwanemeyun: O neKesha‐Muhnedoom bemahjew kebuhmeetahgun apanemik.

³ Shahwanemeshin, O Tabaningayun: kedahnuhmeätoon mah kuhpa kezhig.

⁴ Mahnoo puggedenuhmow kebuhmeetahgun chemoojegezid emuh oojechaugoong: keen mah anekuhkayah nindoombenah ninjechaug.

⁵ Keen mah Kesha‐Muhnedoo kekeshawahdiz kuhya kenetah‐shahwanjega: kuhya kekeche‐shahwanemaug egewh anuhmeätookig.

⁶ Bezindun nindahnuhmeäwin, O Jehovah: kuhya nahnahgahdahwandun nindahnuhmeätahgoozewinun.

⁷ Uhpe katemahge‐kezheguk kegahnuhnaundoomin: kegahnuhquatow mah.

⁸ Anduhchewaud muhnedoog kahween ahweyah ezhewabezese debishkoo keen azhewabezeyun Tabaningayun: kah kuhya ahweyah oodahnookewinun ezhewabussenene debishkoo keen kedahnookeewinun.

⁹ Kuhkenuh ahnishenahbag kahoozheüdjig kegahpeshahgushketahgoog, O Tabaningayun: kuhya oogahwahwezhandahnahwah kedezhenekahzoowin.

¹⁰ Kekeche‐ahpetandahgooz mah kuhya kenetuh‐mahmaundahwejega: keen mah atuh keKesha‐Muhnedow.

¹¹ Suhgahbegeneshin, O Jehovah, emuh kemeekunaung, ningahbemoosa emuh kedabwawining: soongedaäëshin chekootuhmaun kedezhenekahzoowin.

¹² Kegahwahwezhanemin, O Tabaningayun, anegookoodaäyaun: kuhya ningahkechetwahwandaun kedezhenekahzoowin kahgenig.

¹³ Kagate mah kegekeche‐shahwanim: kuhya kegebemahjeäh ninjechaug cheëzhahsewaun emuh ahpeche ahnahmuhkummig.

¹⁴ O Kesha‐Muhnedoo, kepuhsegwewug egewh mamenahdezejig wemujje‐doodahwewaud: kuhya buhyahpenuhdahgajig kemahwunjeëdewug chemujje‐doodahwahwaud ninjechaugwun, kah dush kebahmanemegooseeg.

¹⁵ Keen, O Tabaningayun, kashawahdezid kuhya shawanjegad muhnedoo kedow: keshuhshebandum, kuhya bahtuheïnudoon keshahwanjegawin kuhya kedabwawin.

¹⁶ O nayaub penaunzekahweshin, kuhya shahwanemeshin: meezh kebuhmeetahgun kemushkahwezewin, kuhya bemahjewh enewh oogwissun owh kebuhmeetahgun‐equam.

¹⁷ Wahbundaheshin kekenoowahjechegun chekekanduhmaun wemenoo‐doodahweyun, cheöonje‐wahbunduhmoowaud egewh shaunganemejig, cheähgujjewaud edush: keen gooshah Jehovah kegeweedookow kuhya kegemenoodaäewh.