PHILIPPIANUN 3 - Ottawa New Testament Penteteuch and Psalms 1874

¹ Ishquauj, nejekewaëdoog, moojegezetuhwik owh Tabaningad. Cheëzhebeähmoonenuhgoog nahsaub uhyeëen, kahween neen nesunnugganduhseen, kenuhwah kegahoonje‐menoo‐ahyaum.

² Mewetuhwik uhnemooshug, mewetahwik egewh mahkindungig ewh mujje‐uhyeweesh, mewetuhwik egewh kakenoowahjeïndjig.

³ Kenuhwind muh quuhyuk kekekenoowahje‐kishkezhegahzoomin, ahnuhmeätuhwung Kesha‐Muhnedoo emuh Oojechaugoomaung, moojegezetuhwung Jesus Christ, kuhya kuhnuhga ahpanemoosewung ewh weyahsemah.

⁴ Ahnahwe nindenandahgooz cheähpanemooyaunbaun ewh weyausemah. Kishpin ahweyah enanindezood cheähtanig gagoo kaöonje‐ahpanemood ewh weyahsemah, neen ahwahshema:

⁵ Nashwahsoogoonuhguk ningekekenoowahje‐kishkezhoëgoo, emuh Israeling keöondahdezeyaun, kuhya kedebandahgoozeyaun emuh Benjamining; keHebrewewewug nuhyazh neketezemug; emuh tebahkoonegawining, ningePhariseeëwh.

⁶ Apeeche‐kekeche‐weedookahzooyaun, ningeöonje‐kooduggeäug egewh anuhmeähjig; anandahgwuk dush ewh quuhyuk‐ezhewabezewin wanjeemahguk emuh tebahkoonegawining kahween ningood ningemujje‐enanemegoose.

⁷ Enewh uhyeëen, nindoondezewin ahyenanduhmaunbaunan, mesuh enewh newuhnetoowin kahenanduhmaun oonje owh Christ.

⁸ Menungakah, wuhnetoowining nindenandaunun kuhkenuh uhyeëen apeeche oonesheshing chekekanemind owh Christ Jesus Tabanemid: me suh owh kahoonje‐wuhnetooyaun kuhkenuh uhyeëen, moong dush nindahpeetandaunun, chekushkeüg owh Christ.

⁹ Chemekahgooyaun dush emuh ooweyowing, kahween neen tebenuhwa nequuhyuk‐ezhewabezewin cheähpanemooyaunbaun ewh wanjeemahguk emuh tebahkoonegawining, me suh atuh ewh wanjeemahguk emuh oodabwayanemegoowining Christ, ewh quuhyuk‐ezewabezewin mahgewad Kesha‐Muhnedoo dabwayanduhmoowin oonje:

¹⁰ Chekekanemug, kuhya ewh azhemushkahwezemahgudenig oodahbejebahwin, kuhya chewedookahzooyaun emuh ookoodugganduhmoowining, cheëzhenahgoozeëgooyaun nahsaub azhenahgwudenig ooneboowin;

¹¹ Kishpin kagate kushketooyaun chetaöodittuhmaun ewh oodahbejebahwinewah egewh naboojig.

¹² Kahween, ahzhuh ningetaöodittaun, gamuh ahzhuh ninkezheetah nindenanindezoose: nenoopenuhdaun suh kishpin kushketoowaunan chetaöodahpenuhmaun ewh wanje‐oodahpenid owh Christ Jesus.

¹³ Nejekewaëdoog, kahween, ahzhuh ningetaöodahpenaun, nindenanindezoose: me suh oo‐oo atuh andooduhmaun, wuhnanduhmaun oonoo uhyeëen ishquayaung ayaugin, weekoojetooyaun dush oonoo uhyeëen negaun ayaugin.

¹⁴ Anegook nepemebuttoo chetaöodittuhmaun ewh kekenoowahjechegun azhekekenoowahjechegahdag ewh poonegahdewin ewh wanje‐keche‐nundoomenung Kesha‐Muhnedoo oonje Christ Jesus.

¹⁵ Mahnoo kenuhwind, menik kahkezheetahyung oo‐oo enandundah: kishpin dush ningoodenoo pukkaun enanduhmag, Kesha‐Muhnedoo kegahwahbunduhegoowah oo‐oo kuhya.

¹⁶ Benuh dush, menik ahzhuh kahtakushketooyung, nahsaub enahkoonegawining enoosadah, meekindundah dush ewh nahsaub uhyeëe.

¹⁷ Nejekewaëdoog, mahmahwe kekenoowahmeshig, kuhya kekenoowahbuhmik egewh anoosajig azhekekenoowahbuhmeyag.

¹⁸ (Nebewah muh bemoosawug, nuhningim kahweenduhmoonenuhgoog, kuhya noongoom menuhwah keweenduhmoonenim mahweyaun, chesheenganduhmoowaud owh Christ oodahzhedayahtigoom:

¹⁹ Egewh kabahnahdezejig, egewh wakesha‐Muhnedoomejig oomesudahwaun, kuhya mamequahzoojig oonje enewh uhyeëen kageähguddanduhmoowahpuneen, mahkindungig dush oomah uhkeeng duhzhe uhyeëen.)

²⁰ Keduhnuhkeewinenaun keche‐kezhegoong duhgoomahgud; me kuhya ewede nanduhwahbuhmung cheöonjeed owh Bamahjeëwad, Tabaningad Jesus Christ:

²¹ Me suh owh kaäunjetood mahyahnahduk keyowenaun, cheëzhechegahdag debishkoo azhenahgwudenig pazhegandahgwudenig weyow, anandahgwuk ewh ahnookeewin wanje‐kushketood chemahmauzhetood kuhkenuh uhyeëen.