OODEZHECHEGAWINEWAH 9 - Ottawa New Testament Penteteuch and Psalms 1874

¹ Saul dush, kepahbahsagemaud kuhya kepahbahnesaud enewh ookekenooähmahgunun owh Tabaningad, oogehahnun enewh keche‐sahsahgewejega‐wenenewun,

² Oogenundooduhmoowaun dush enewh mahjebeëgunun weëzhaud ewede Damascusing duhzhe ahnuhmeä‐weguhmigoong, kishpin mekahwaud ahweyah oo‐oo azheähnuhmeähnejin, enenewun gamuh equawun, chepeenaud minjemahpezoonid emuh Jerusaleming.

³ Magwah dush uhnebemoosad, pashoo dush uhneähyaud emuh Damascusing: chasekah oogewahsashkahgoon kezhegoong oonje wahsayahzewin:

⁴ Kepungeshin dush emuh metushkuhkummig, oogenoondaun dush inwawin oo‐oo keëgood, Saul, Saul, ahneeshwin kooduggeëyun?

⁵ Oo‐oo dush keëkedoo, Ahwanan keen, Tabaningayun? Tabaningad dush oo‐oo keëkedoo, Nindow Jesus quaduggeëyun: sunnuhgud suh chedungishkuhmun enewh kahnaugin.

⁶ Ween dush kenahningishkah kuhya kemahmahkahdandum oo‐oo keëkedood, Tabaningayun, wagoonan nunduhwanemeyun cheëzhechegayaun? Owh dush Tabaningad oo‐oo oogeënaun, Puhsegween, ezhaun dush ewede keche‐oodanaung, ewede dush kegahweenduhmahgoo ewh kaëzhechegayun.

⁷ Egewh dush enenewug kahweejewahjig kenebahwewug kuhnuhga kekedoosigwah, kenoonduhmoowaud inwawin, kewahbuhmahsigwah ahweyah.

⁸ Saul dush kepuhsegwe oonje metushkuhkummig, uhpe dush kahdooshkahbid, kahween oogewahbuhmahseen ahweyah: oogeühnesuhgeneenjeöosahahwaun dush keëzheweenahwaud dush ewede Damascusing.

⁹ Nesoogoon dush kahween kewahbese, kah dush kewesenese, kah kuhya kemenequase.

¹⁰ Keähyah dush pazhik kekenooähmahgun ewede Damascusing, Ananias azhenekahzood; mesuh enewh owh Tabaningad kahguhnoonahjin emuh enahbunduhmoowining oo‐oo keënaud, Ananias. Oo‐oo dush oogeëgoon, Benuh, oomah nindahyah, Tabaningayun.

¹¹ Owh dush Tabaningad oo‐oo oogeënaun, Puhsegween, ezhaun ewede anenuhmook oodanah‐meekun quuhyukquahmook aduhming, kuhgwadwan emuh oowegewauming owh Judas, kishpin ahyahgwan pazhik enene Saul azhenekahzood, Tarsusing duhzhe enene: ahnuhmeäh gooshah,

¹² Oogebahwahnaun suh pazhik enenewun Ananias azhenekahzoonejin pepeendegahgood, taungenegood dush, cheöonjewahbeïnd.

¹³ Ananias dush oogenuhquatuhwaun, Tabaningayun, ningenoonduhwaug nebewah enahjemahwaud oonoo enenewun, menik kahmujje‐doodahwahnid anuhmeätookig ewede Jerusaleming:

¹⁴ Oomah dush peëzhaud oomeenegoon enewh keche‐sahsahgewejega‐wenenewun ewh kushkeäwezewin cheminjemahpenaud kuhkenuh wuhyahweenduhmenejin kedezhenekahzoowin.

¹⁵ Owh dush Tabaningad oo‐oo oogeënaun, Mahjaun; ningewuhwanahbuhmah suh, cheëzhewetood nindezhenekahzoowin emuh anduhzhe ahyahnid enewh mayuggezenejin, kuhya enewh keche‐oogemaun, kuhya oonejahnesun owh Israel:

¹⁶ Ningahwahbundahah gooshah menik kakeche‐kooduggetood oonje ewh nindezhenekahzoowin.

¹⁷ Kemahjah dush owh Ananias, keühnepeendega dush emuh wegewauming; keähtahwaud dush enewh ooneenjeen emuh weyowening, oo‐oo oogeënaun, Nejekewa Saul, owh Tabaningad, Jesus, kahwahbuhmud emuh meekunaung kepebemoosayun, ningepeähnoonik, cheoonjewahbeëgooyun, chemooshkenashkook owh Keche‐Oojechaug.

¹⁸ Kazhetena dush keöonjepungesinoon emuh ooshkinzhegoong debishkoo oonuhgahuhyun: bahbega dush kewahbeäh, kepuhsegwe, kuhya kebaptizooäh.

¹⁹ Uhpe dush kahwesenid, kemushkahweze. Nebewah duhsuhgoon owh Saul oogeweejewaun enewh kekenooähmahgunun emuh Damascusing kahahyahnejin.

²⁰ Bahbega dush kekuhgequa emuh ahnuhmeä‐weguhmigoong, keënahjemaud enewh Christun, ahwenid Kesha‐Muhnedoo Oogwissun.

²¹ Kuhkenuh dush kahnoondahwahjig kemahmahkahdanduhmoog, oo‐oo dush keëkedoowaud, Kahnuh ween mahbuh ahwese owh kahbahnahjeäud kuhkenuh enewh wuhyahweenduhmenejin maunduh ezhenekahzoowin ewede Jerusaleming, oo‐oo dush kahpeöonzekaud oomah peëzhaud, cheoonjeminjemahpenaud kuhya cheëzheweenaud ewede ahyahnid enewh sahsahgewejega‐wenenewun?

²² Ashkum dush kemushkahweze owh Saul, oogewahwuneäun dush enewh Jewyun ewede Damascusing kahahyahnejin, kewahbunduhewad ewh kagate ahwenid Christ.

²³ Bahnemah dush kahdebishkoosag nebewah kezhegudoon, kekahkekedoowug egewh Jewyug wenesahwaud:

²⁴ Saul dush oogekekanemaun wenesegood enewh. Keähkahwahbewug kahzhegudenegin kuhya tabekudenegin ashquaundamewung oodanah wenesahwaud.

²⁵ Egewh dush kekenooähmahgunug oogeöodahpenahwaun nebah‐tebik, kuhya oogenesahbeginahwaun wahkaheguning oonje emuh kookoobenahguning.

²⁶ Uhpe dush kahtuhgwishing owh Saul ewede Jerusaleming, keënandum cheweejewaud enewh kekenooähmahgunun: kuhkenuh dush oogekoosahwaun, kah dush kedabwatunsewug chekekenooähmahgunewenid.

²⁷ Barnabas dush oogeöodahpenaun, oogeëzheweenaun dush emuh ahyahnid enewh apostleün, keweenduhmahwaud dush ewh kewahbuhmahnid enewh Tabaninganejin emuh meekunaung, kuhya keguhnoonegood, kekeche‐kuhgequanid dush emuh Damascusing oodezhenekahzoowining owh Jesus.

²⁸ Oogeweejewaun dush enewh kekenooähmahgunun kepuhpeendegad kuhya kesuhsahguhung ewede Jerusaleming.

²⁹ Kekuhgequa dush emuh oodezhenekahzoowining owh Tabaningad Jesus, oogekeche‐guhnoonaun enewh Hellenistun: oogepahbahnundahnesahwaun dush.

³⁰ Egewh dush kekenooähmahgunug uhpe kahkekanduhmoowaud ewh, oogeëzhewenahwaun ewede Cesareaïng, kuhya oogeëzhenahzhahwahwaun ewede Tarsusing.

³¹ Me dush keäunwabewaud kuhkenuh egewh anuhmeähjig anegookookummegaug Judæä kuhya Galilee kuhya Samaria, ashkum dush kemushkahwanduhmoog; kebemoosawug emuh ookoosegoowining owh Tabaningad, kuhya emuh oomenoodaäshkahgawining owh Kache‐penezid‐Oojechaug, ashkum dush kemeshenoowug.

³² Kepuhgumme‐ahyahmahgud dush, uhpe minze pahbahmoosad owh Peter, oogenaunzekahwaun enewh anuhmeähnejin Lyddaïng ayahnejin.

³³ Me emuh kemekahwaud pazhik enenewun Æneas azhenekahzoonejin, kahshingeshinenejin emuh nebahguning nishwauswe kekenoonoowinun kahneboowahpenanejin.

³⁴ Peter dush oo‐oo oogeënaun, Æneas, kenoojemooïk suh owh Jesus Christ; puhsegween, oozhetoon kenebahgun. Kazhetena dush kepuhsegwe.

³⁵ Kuhkenuh dush kahduhnuhkeejig ewede Lyddaïng kuhya Saroning oogewahbuhmahwaun, keëzhequakeewug dush chewebuhmeetahwahwaud enewh Tabaninganejin.

³⁶ Keähyah dush ewede Joppaïng pazhik kekenooähmahgun Tabitha azhenekahzood, mesuh ahnekenootuhming Dorcas: owh dush equa oogemooshkenashkahgoonun enewh menoo‐ahnookewinun kuhya shahwanjegawinun kahezhechegad.

³⁷ Kepuhgumme‐ahyahmahgud dush uhpe oonoo kezhegudoon, keähkoose, kuhya dush keneboo; uhpe dush kahkesebeeginahwaud, oogeähsahwaun emuh ish pemesuh-goong duhzhe uhbenahsoowining.

³⁸ Kepashoowud suh Lydda emuh Joppaïng, kahnoonduhmoowaud egewh kekenooähmahgunug ewede ahyahnid Peterun, oogeëzhenahzhahwahwaun neezh enewh enenewun, chenundoomahnid waweeb chepeëzhahnid.

³⁹ Me dush kepuhsegweed owh Peter keühneweejewaud dush. Uhpe dush tagwishing, oogeëzheweenahwaun ewede ishpemesuhgoong duhzhe uhbenahsoowining; kuhkenuh dush egewh shagahwejig oogeweejekahbahwetahwahwaun mahwewaud, kuhya wahbunduhewawaud keche‐nebewah puhpeensekahwahgunun kuhya enewh ahgwewinun kahoozhetahmahgoowaud enewh Dorcasun, magwah weejahyahwahwaud.

⁴⁰ Peter dush uhpe kahsahgechenahzhahwaud kuhkenuh, keöojecheengwunetum, keähnuhmeäh dush; kequakekahbahwetahwaud dush enewh chebuyun oo‐oo keëkedoo, Tabitha, oonishkaun. Kedooskahbe dush ween: uhpe dush kahwahbuhmaud enewh Peterun, kenuhmuhduhbe.

⁴¹ Keshebenekatahwaud dush, oogeöonishkahbenaun, uhpe dush kahnundoomaud enewh anuhmeähnejin, kuhya enewh shagahwenejin, oogepuhgedenaun emuh ooneenjening bemahdezenid.

⁴² Kekekandahgwud dush maunduh emuh anegookwaug Joppa; nebewah dush oogedabwayanemahwaun enewh Tabaninganejin.

⁴³ Kepugguhme‐ahyahmahgud, keduhneze nebewah kezhegudoon ewede Joppaïng keweedegamaud enewh Simonun ahsaka‐wenenewun.