OODEZHECHEGAWINEWAH 28 - Ottawa New Testament Penteteuch and Psalms 1874

¹ Uhpe dush kahbemahjeëgoozewaud, me dush kekanduhmoowaud ewh menis Melita azhenekahdag.

² Punge nunga ningemenoo‐doodahgoonahnig egewh puhgwuj‐ahnishenahbag: kepootahwawug muh, kuhya ningepeendeguhnegoonahnig kuhkenuh neenuhwind kekemewung, kuhya kekesenaug oonje.

³ Uhpe dush Paul kahmahwundoosetood nebewah metigoonsun kepuggedenung emuh oogij ishkootang, akoo kezhetag keöonjebah pazhik mujje‐kenabig, keminjemid dush emuh Paulun ooneenjeening.

⁴ Uhpe dush egewh buhgwuj‐ahnishenahbag wuhyahbuhmahwaud enewh mujje‐kenabigoon ahgoojenenig emuh oonje ooneenjeeng, oo‐oo keëdewaud, Kuhnuhbuj kagate nishewashkedoog mahbuh, ahnuhween goo keduhpenasig emuh kechegummeeng, kayahbe oonoopenuhnegoon wahahzhittah‐doodahgoojin, cheäonjebemahdezesig.

⁵ Ishkootang dush oogeëzhewabenaun enewh kenabigoon; kahween gagoo oogemoozhetooseen.

⁶ Oogeguhnuhwahbuhmahwaun chepahgeshenid, gamuh chasekah chekuhwesanid, cheneboonid dush: kuhbayeëe dush kahgunahwahbuhmahwaud, kahkekanemahwaud dush ningood desenid, kequakanduhmoog oo‐oo keëkedoowaud, muhnedoowe suh wah‐owh.

⁷ Me dush emuh keöoduhkeemid owh kache‐negahnezid enene emuh menissing, Publius azhenekahzood; mesuh owh kahpeendiguhzheyummingid, kuhya nesoo‐kezhik kahmenoo‐doodahweyummingid.

⁸ Kepuhgumme‐ahyahmahgud, enewh oosun owh Publius keähkoosewun kekezhizoonid kuhya misquahbenid, kahpeendigahwaud owh Paul keähnuhmeäud oogeëzheneenjetuhwaun kenoojemooäud dush.

⁹ Uhpe oo‐oo kahezhewabuk ahnind ayahkoozejig emuh menising kepeëzhahwug, kenoojemooähwug dush.

¹⁰ Mesuh oogoo kahkechetwahwanemeyummingidjig, uhpe mahyahjahyaung keche‐nebewah ningemeenegoonahnig enewh uhyeëen kahmuhnazeyaung.

¹¹ Kahnesoo‐keeziswahguk ningepoozemin emuh Alexandriaïng duhzhe nahbequauning kahpepoonishemahguk emuh menissing, ewh kahezhenekahdag Castor kuhya Pollux.

¹² Ningekuhbahmin dush emuh Syracuseïng, nesoogoon dush ningeähyahmin emuh.

¹³ Me dush emuh kahoonjekewetahyahsheyaung, ningetuhgwishenoomin emuh Rhegiuming: nauzhoogoonahguk dush keshahwunuhün, wuhyahbung ningetuhgwishinoomin emuh Puteoliïng:

¹⁴ Me emuh kahmekahwungidwah wejekewaëmaug, kenunduhwanemeyungidwah neezhwahsuhgoon cheduhnezeyaung emuh ahyahwaud: me dush kemahjahyaung keëzhahyaung ewede Romeïng.

¹⁵ Ewede dush uhpe kahnoonduhmoowaud egewh wejekewaëmaug ewh tuhgwishenaung ningepenuhquash-kahgoonahnig nahnauzh Appii‐forum kuhya Neswe ahshunde‐weguhmigoon: uhpe dush Paul wuhyahbuhmaud, oogemahmooyahwahmaun Kesha‐Muhnedoon, kesoongedaä dush.

¹⁶ Uhpe dush tagwishenaung ewede Romeïng, owh menesenoo‐oogemah oogepuggedenuhmoowaun enewh takoonegahzoonejin enewh keche‐menesenoo‐oogemaun: Paul dush kepuggedenah nezheka chedaud kuhya enewh shemahgunishun ganuhwanemegoojin.

¹⁷ Kepuhgumme‐ahyahmahgud dush, kahnesoogoonuhguk Paul oogenundoomaun enewh nahgaunezenejin Jewyun: uhpe dush kahmahwunjeëdenid, oo‐oo oogeënaun, Enenewedoog nejekewaëdoog, ahnoo goo ningood kemujje‐doodahwahsewugwah egewh ahnishenahbag, gamuh oodezhetwahwinewah egewh kooseminahbuneeg, ningeöonje‐puggedenegoo chekebahquahoogooyaun ewede Jerusaleming emuh ooneenjeewaung egewh Romanug.

¹⁸ Oogoo, uhpe kahkuhgwajemewaud, keënanduhmoog chepuggedenewaud, kah muh gagoo ningedoodunse kaöonjenebooyaunbaun.

¹⁹ Uhpe dush egewh Jewyug maje‐kekedoowaud ningeëkid chewetebahkoonegooyaun emuh anahsuhmuhbid owh Cæsar, kah ningood newebahtahmahseeg neej‐ahnishenahbag.

²⁰ Mesuh kahoonjenundoomenenuhgoog, chewahbuhmenuhgoog, kuhya cheguhnoonenuhgoog: me suh oodahpanemoowin owh Israel wanje‐tuhkoobezooyaun maunduh tuhkoobejegun‐ahbik.

²¹ Oo‐oo dush oogeënahwaun, Kahween ningepeöodisse-goosenahnin ewede Judæaïng oonje muzzeneëgunun keen chedebahjemegooyunbun, kah kuhya ahweyah egewh wejekewaëmaug kahpetuhgwishingig ningeweendahmahgoosenaun ningood mujje‐ezhewabezeyun.

²² Nenundahwandahmin dush chenoondahgooyun nuhmunj ananduhmoowunan; maunduh gooshah puhkatahwin, nekekandahmin mezewa mujje‐duhzhinjegahdag.

²³ Uhpe dush kezhah kahwahweenduhmoowaud kezhik, nebewah kepeëzhahwug emuh andaud; oogewahweendahmoowaun kuhya oogedebahjemootahwaun oodoogemahwewin owh Kesha‐Muhnedoo, kedebahjemaud enewh Jesusun, oonje ootebahkoonegawining owh Moses, kuhya aunwahjegawining, keekezhab kemahjetaud nahnauzh dush egoo keöonahgooshig.

²⁴ Ahnind dush oogedabwatahnahwah oonoo uhyeëen kahekedoong, ahnind dush kahween oogedabwatunsenahwah.

²⁵ Uhpe papukkaun uhyenanduhmoowaud, kemahjahwug, uhpe owh Paul kahekedood pazhik ekedoowin, Kemenoo‐kekedoo owh Keche‐Oojechaug emuh oodooning owh Esaias aunwahjega‐wenene keguhnoonaud kooseminahbuneen.

²⁶ Oo‐oo keëkedood, Ezhaun oogoo ahnishenahbag, oo‐oo dush ekedoon, Emuh noonduhmoowining kenoondahgam, kah dush kegahnesittootunseem; kuhya emuh enahbing kegahenahbeem, kah dush kegahwahbeseem:

²⁷ Oogoo muh ahnishenahbag oodaëwaun kechewenenoomahgudenewun, kuhya kuhkebeshawug emuh ootuhwuggahwaung, kuhya oogekebahquahahnahwah ooshkinzhegoowaun, chewahbesigwah emuh ooshkinzhegoowaung kuhya chenoonduhsigwah emuh ootahwuggahwaung, kuhya chenesittootunsigwah emuh oodaëwaung, chegeäunjeïndwahpun, neen dush chenoojemooügwahpun.

²⁸ Kekanduhmoog dush, chepuggedenuhmoowindwah egewh mayuggezejig oobemahjeëwawin owh Kesha‐Muhnedoo, wenuhwah dush oogahbezindahnahwah.

²⁹ Uhpe dush oo‐oo kahekedood, kemahjahwug egewh Jewyug, kekeche‐guhguhnoonindewaud dush.

³⁰ Nezhoo‐kekenoonoowinun Paul oogeähbeetaun pazhik wahkahegun kahahtahwungad, oogepeendeguhnaun dush kuhkenuh enewh paundegahgoojin.

³¹ Kedebahdoodung oodoogemahwewin owh Kesha‐Muhnedoo, kekenooähmahgad oodezhetwahwinun owh Tabaningad Jesus Christ, kah kuhnuhga keshahgwanemoose, kah kuhya ahweyah enenewun oogekenahahmahgooseen.