OODEZHECHEGAWINEWAH 2 - Ottawa New Testament Penteteuch and Psalms 1874

¹ Uhpe dush kahtapuhgummeähyahmahguk Pentecost kezhik, pazhikwunoong keduhzhemahwunjeëdewug kuhkenuh.

² Chasekah dush keöondwawamahgud ewede Kezhegoong debishkoo kache‐muhtwayahnemukin, kuhkenuh dush kemooshkenamahgud ewh wegewaum emuh kenuhmuhduhbewaud.

³ Oogewahbundahnahwah dush nesuhwahkoodanuhnewemaun ishkootang enahbuhmenahgwukkin, keähbahpish-kahgoowaud kuhkenuh anduhchewaud.

⁴ Kuhkenuh dush oogemooshkenashkahgoowaun enewh Keche‐Oojechaugwun, kemahje‐kekedoowaud pakaunnukkin inwawinun, ewh egoo kahezhepuhgedenahmahgoowaud enewh Oojechaugwun chekekedoowaud.

⁵ Keähyahwug suh andahjig emuh Jerusaleming, Jewyug manoo‐ahnuhmeähjig enenewug, kahoonjebahjig menik ahnahmekezhik papukkaun azheweenzoojig ahnishenahbag.

⁶ Uhpe dush kahsuhswayahjemootahming, kepemahwunjeëdewug egewh bamahdezejig kekeche‐mahmahkahdanduhmoog dush, anduhchewaud muh enenewug oogeënetahwahwaun inwanid ewh anwawaud.

⁷ Kemahmahkahdanduhmoog kuhya kewahwuhnan-duhmoog kuhkenuh, oo‐oo dush keëdewaud, Benuh, kah nuh ween Galileeng duhzhe wenenewesewug kuhkenuh oogoo kakedoojig?

⁸ Ahneen dush wanjeënetuhwungwah kuhkenuh anduhcheyung inwawaud, ewh anwayung kahoonjenegeyung?

⁹ Parthia‐wenenewug, kuhya Medug, kuhya Elamitug, kuhya egewh anduhnuhkeejig emuh Mesopotamiaïng, kuhya emuh Judæaïng, kuhya Capadociaïng, kuhya Pontusing, kuhya Asiaïng.

¹⁰ Phrygiaïng, kuhya Pamphyliaïng, Egypting, kuhya Lybiaïng anuhkakummig Cyrene, Roming wanjejig mayugezejig, Jewyug kuhya kahquakeejig.

¹¹ Cretug kuhya Arabianug, kenoondahwahnahnig ewh anwayung inwawaud, debahduhduhmoowaud oomahmaundah‐ahnookewinun owh Kesha‐Muhnedoo.

¹² Kuhkenuh dush kemahmahkahdanduhmoog, kuhya kequenuhweenanduhmoog, oo‐oo dush keëdewaud, Wagoodoogwanedoog maunduh?

¹³ Ahnind dush oogebahpenoodahwahwaun, oo‐oo keëkedoowaud, Oogoo enenewug oomooshkenashkahgoonahwah ewh washke‐oozhechegahdag shooweminahboo.

¹⁴ Peter dush keweejekahbahwetahwaud enewh metauswe‐ahshe‐pazhik, kekechekezhewa, oo‐oo dush keënaud, Judæaing duhzhe‐enenewedoog, kuhya kuhkenuh kenuhwah wahdatooyag emuh Jerusaleming, oo‐oo kekanduhmoog, kuhya bezindahweshig akedooyaun:

¹⁵ Kah gooshah oogoo kewushquabesewug, ewh ween uhyenanemagwah, pejenug muh ween nesoo‐tebahegunag noongoom kezheguk.

¹⁶ Mesuh maunduh kahekedoogoobunan owh aunwahjega‐wenene Joel:

¹⁷ Tahpuhgumme‐ahyahmahgud suh uhpe ishquah‐kezheguk, ekedoo owh Kesha‐Muhnedoo, ningahsegenuhmahwaug owh Ninjechaug kuhkenuh wahyahsewejig; tahaunwahjegawug dush egewh kegwissewaug kuhya kedahnisewaug, kedooshkenegemewaug oogahwahbundahnahwah enewh wazhebahbundahmoowinun, kuhya keduhkewanzeëmewaug tahenahbunduhmoog enewh enahbunduhmoowinun:

¹⁸ Uhpe dush oonoo kezhegudoon ningahsegenuhmahwaug ninjechaug egewh nebuhmeetahgunemug kuhya egewh nebuhmeetahgun‐equamug, tahaunwahjegawug dush:

¹⁹ Ningahwahbunduhewanun enewh mahmaundahwejegawinun ewede kezhegoong ishpeming, kuhya kekenoowahjechegunun oomah uhkeeng duhbusheesh, misqueem, kuhya ishkoota, kuhya paquanag butta:

²⁰ Tahtebikkahbuhmenahgoozeäh owh kezhike‐keezis, kuhya owh tebike‐keezis misqueeng tahezhenahgoozeäh, chepwah oojechesag ewh kache‐ahpeetandahgwuk kuhya quatahmegwuk ookezhegudoom owh Jehovah:

²¹ Tahezhewabud dush, ahwagwan kawahweenduhmoogwan oodezhenekahzoowin owh Tabaningad me owh kabemahjeïnd.

²² Israel duhzhe‐enenewedoog bezinduhmook oonoo ekedoowinun; Jesus owh Nazarething duhzhe enene, owh kahwahbundahëgooyag Kesha‐Muhnedoong cheöonjebaud, oonje mahmaundahwejegunun kuhya kekenoowahjechegunun, enewh kahezhechegad keweedookahgood enewh Kesha‐Muhnedoon emuh anduhzhe‐ahyahyag, ewh egoo azhekekanduhmag:

²³ Wah‐owh, pagedenegahzood oonje oodenanduhmoowin kuhya kezhah kahenahkoonegagoobunan owh Kesha‐Muhnedoo, kegetuhkoonahwah, kuhya anuhmeähsigoog ooneenjewaun ahyooyag kegeähgwahquahwahwah kuhya kegenesahwah:

²⁴ Enewh Kesha‐Muhnedoo kahahbejebahahjin, kahahbahung kahezhetuhkoobenegood ewh wahsuhgandahgwuk neboowin, kah muh ween keënandahgoozese cheminjemenegoopun.

²⁵ Owh muh David oo‐oo ekedoo duhzhemaud enewh, Negewahbuhmah owh Tabaningad kahgenig anahsuhme-kahbahweyaun, nekechenikaung muh ahyah, chemahmauzheëgoosewaun:

²⁶ Mesuh kahoonjemoojegedaäyaun, kuhya nindanuhnewh keöonjeöonahnegoozemahguk; emuh dush ahpanemoowining tahezheäunwabemahgud neweyaus:

²⁷ Kah muh kegahnuhguhnahse owh ninjechaug ewede ahnahmuhkummig, kah dush kegahpuhgedenuhmahwahse owh Pahnezid Kegwis chewahbundung ewh bahnahdezewin.

²⁸ Kegekekanduhmooh enewh bemahdezewine‐meekunun; wahbuhmenaun kaöonjemooshkenashkahgooyaun ewh moojegezewin.

²⁹ Enenewedoog nejekewaëdoog puggedenahmahweshig wawane cheguhnoonenuhgoog duhzhemug owh koosenaun David, ahzhuh suh keneboo kuhya kepuggedanemah, ahtamahgud dush oochebaguhmig oomah anduhnuhkeeyung nahnauzh egoo noongoom kezheguk.

³⁰ Keäunwahjega‐wenenewe suh, kekekandung dush kewahweendahmahgood enewh Kesha‐Muhnedoon kemushkuhwah‐kezhewanid, emuh suh kaëzheöonejahnesid kaöondenaud azheähyahmahguk weyahsemah, enewh Christun chenuhmuhduhbenid emuh oodoogemah‐wuhbewining;

³¹ Kezhah dush kewahbundung oo‐oo oogeöonjeduhzhindaun oodahbejebahwin owh Christ, ween oojechaugwun kahween kenuhguhduhmuhwahse ewede ahnahmuhkummig, kah kuhya ooweyow kebahnahdezemahgussene.

³² Me suh enewh Jesusun kahahbejebahahjin owh Kesha‐Muhnedoo, kahezhewahbunjegayaung nenuhwind kuhkenuh.

³³ Ookechenekahning dush enewh Kesha‐Muhnedoon keëzheoombenegahzood, kemeenegood dush enewh Wayoosemindjin enewh Keche‐Oojechaugwun, kahezhewahweenduhmahwindebun, mesuh wanje‐segenuhmahweyummingid oo‐oo noongoom wuhyahbunduhmag kuhya nwaunduhmag.

³⁴ Kah muh keche‐kezhegoong keëzheoombishkahse owh David: ween dush ween goo oo‐oo ekedoo, Owh Tabaningad oogeënaun enewh Tabanemejin, Nuhmuhduhbin keen emuh nekechenikaung,

³⁵ Peenish chepuggedenuhmoonaun, chetuhtuhkookahnudwah egewh shaunganemikig.

³⁶ Me suh kaöonjequuhyukwanduhnemid kuhkenuh enewh oonejahnesun owh Israel, owh Kesha‐Muhnedoo kepuggedenuhmahwaud enewh Jesusun kahahgwahkwahag kenuhwah, chetebaninganid kuhya Christ cheähwenid.

³⁷ Uhpe dush kahnoonduhmoowaud oonoo, kekeche‐megooshkahjedaäwug, oo‐oo dush keënahwaud enewh Peterun kuhya ahnind enewh apostleün, Enenewedoog kuhya wejekewaëmahdoog, Ahneen kaëzhechegayaung?

³⁸ Peter dush oo‐oo oogeënaun, Aunwanindezooyook, kuhya baptizooëgoozeyook kuhkenuh anduhcheyag emuh oodezhenekahzoowining owh Jesus Christ chewabenemahgooyag kemujje‐ezhewabezewinewah, kegahmeenegoom dush owh Kache peenezid‐Oojechaug.

³⁹ Kenuhwah muh kemeenegoom ewh wahweendahmahgawin, kuhya kenejahnesewaug, kuhkenuh dush egewh wahsuh ayahjig, menik kanundoomahjin owh Jehovah Kekesha‐Muhnedoomenaun.

⁴⁰ Keche‐nebewah dush pakaunukkin ekedoowinun oogedebahjemootahwaun kuhya keëzheguhgaunzoomaud, oo‐oo keënaud, Oonjebemahjeëgoozeyook oogoo noongoom bamahdezejig kakebahdezejig.

⁴¹ Me dush egewh wawane kahoodahpenungig ewh oodekedoowin kebaptizooähwug: ewh edush goo kezheguk, kenesoo‐metauswaukoosewug egewh kahtahquahnooninjig emuh ahnuhmeähwining.

⁴² Keäunwahjewug dush cheguhnuhwanduhmoowaud ookuhgequawinewah egewh apostleüg kuhya emuh weejekewaïndewining, kebuhquabenahwaud dush buhquazhegunun, kuhya keähnuhmeähwaud.

⁴³ Oogepuhgummishkahgoonahwah dush ewh sagezewin kuhkenuh bamahdezejig: nebewah dush mahmaundahwejegunun kuhya kekenoowahjechegunun oogeöozhetoonahwah egewh kekenooähmahgunug.

⁴⁴ Kuhkenuh dush egewh duhyabwayandungig keweejeendewug, mahmahwe dush oogeähyahnahwah ooduhyeemewaun;

⁴⁵ Oogeähtahwahganahwah dush ootebenuhwawezewinewah kuhya ooduhnookahjegunewah, kemuhmeenahwaud dush kuhkenuh enenewun, ewh azhemuhnazenid.

⁴⁶ Anduhsoo‐kezheguk dush kepeëzhemahwunjeëdewug emuh keche‐ahnuhmeä‐weguhmigoong, kebuhquabenahwaud dush enewh buhquazhegunun emuh oowegewaumewaung, kemeejewaud dush oomeejimemewah emuh minwanduhmoowining kuhya emuh moojegedaäwining.

⁴⁷ Wahwezhanemahwaud dush enewh Kesha‐Muhnedoon, keminwanemegoowaud dush kuhkenuh enewh bamahdezenejin. Owh dush Tabaningad anduhsoo‐kezheguk oogeduhgoo‐ahsaun emuh ahnuhmeähwining egewh bamahjeïndjig.