OODEZHECHEGAWINEWAH 14 - Ottawa New Testament Penteteuch and Psalms 1874

¹ Kepuggumme‐ahyahmahgud dush emuh Iconiuming, nuhyazh keühneweejindewug keëzhahwaud emuh oodahnuhmeä‐weguhmigoowaung egewh Jewyug, kekekedoowug dush, keche‐nebewah egewh Jewyug kuhya Greekug kahoonjedabwayanduhmoowaud.

² Egewh dush duhyabwayanduhsigoog Jewyug oogewekoojeähwaun enewh mayuggezenejin chewuhsittah-wanemahnid enewh wejekewaëmaun.

³ Kenooäzh dush keduhnezewug mezheshuh kekedoowaud Täbaningad oonje, me suh owh kahweedookung ooshahwandahgoozewine‐oodekedoowin, kuhya dush kahmeegewad kekenoowahjechegunun kuhya mahmaundahwechegunun cheëzhechegahdag oonje ooneenjewaung egewh apostleüg.

⁴ Egewh dush bamahdezejig kahoodatoojig papukkaun keühyenanduhmoog: ahnind dush oogeweedookahwahwaun enewh Jewyun, menuhwah dush ahnind oogeweedookahwahwaun enewh apostleün.

⁵ Uhpe dush egewh mayuggezejig kuhya egewh Jewyug kahweedookahwahwaud enewh oodoogemahmewaun chemujje‐doodahwahwaud kuhya wepemwuhsinnuhahwaud enewh,

⁶ Kezhah oogekekanduhmene, keëzhenezhemoowun dush emuh Lystraïng kuhya Derbeïng, Lycaoniaïng duhzhe oodanahwun, kuhya emuh uhkeeng kewetuhyeëe anduhgoog:

⁷ Ewede dush oogepahbahtebahdoodahnahwah ewh minwahjemoowin.

⁸ Kenuhmuhduhbe dush pazhik enene ewede Lystraïng, kahmahmaunjekoozid emuh oosittaung, kahnuhneepenezid pahahkoo‐negid, kah dush wekah kebemoosase:

⁹ Wah‐owh dush kahnoondahwaud enewh Paulun kekedoonid: kahguhnuhwahbuhmegood dush enewh, kuhya kekekanemegood cheähyaud dabwayanduhmoowin chenoojemooïndebun,

¹⁰ Oo‐oo oogeëgoon kekezhewanid, Quuhyukookahbahwin emuh kesittaung. Ween dush kepussegwinjesa kuhya dush kepahbahmoosa.

¹¹ Uhpe dush egewh waqueenoojig wuhyahbunduhmoowaud ewh kahezhecheganid Paulun, kekeche‐pepahgewug, oo‐oo keëkedoowaud Lycaoniaïng duhzhe inwawining keïnwawaud, Kegepenesenahmahgoonahnig egewh muhnedoog emuh oodezhenahgoozewinewaung egewh enenewug.

¹² Enewh dush Barnabasun oogeëzhenekahnahwaun Jupiter; enewh dush Paulun oogeëzhenekahnahwaun Mercurius, me muh owh kahkekedoo‐wenenewid.

¹³ Oosahsahgewejega‐wenenemun owh Jupiter, owh kahahyaud anahsuhme‐ahyahnig oodoodanahwewaun, oogepeenaun enewh ahyahba‐pezhekewun kuhya wahwahsuhkoona‐suhsagahjegunun emuh ishquaundaming, keënanduhmoog dush wesahsahgewejegawaud mahmahwe egewh waqueenoojig.

¹⁴ Uhpe dush kahnoonduhmoowaud egewh apostleüg, Barnabas kuhya Paul, oogepegoobetoonahwah oodahgwewinewah, kuhya keähpahedewaud emuh ahyahnid enewh waqueenoonejin, keühnepepahgewaud,

¹⁵ Oo‐oo keëkedoowaud, Enenewedoog, wagoonash wanjeëzhechegayag oonoo uhyeëen? Kuhya nenuhwind nindenenewemin debishkoo goo kenuhwah anahdezeyag nindenahdezemin, kedezhekuhgekemenenim dush chewabenuhmag oonoo kuhkebahdezewinun chequakekahbahwetuhwag dush owh bamahdezid Kesha‐Muhnedoo, owh kahoozhetood kezhik, kuhya uhkee, kuhya kechegummee, kuhya kuhkenuh emuh ayaugin:

¹⁶ Me suh owh mawezhah kahpuggedenuhmahwaud kuhkenuh enewh bamahdezenejin chebemoosanid emuh tebenuhwa oomeekunahwaung.

¹⁷ Ahneesh kahween oogepuggedenunseen ween chedebahjemahsewind, kewahbunduhewa suh goo ewh kemenoo‐doodahgad, kuhya kemeegewad kemewun‐ahboo kezhegoong oonje, kuhya chemekoogemahguk enewh ketegaunun, kemooshkenatood enewh kedaënahnin ewh wesenewin kuhya moojegezewin.

¹⁸ Oonoo keënaud, ahgahwah oogenugahahwaun enewh waqueenoonejin, chesahsahgewetuhmahgoosigwah.

¹⁹ Kepeëzhahwug dush ahnind Jewyug Antioching kuhya Iconiuming kahpeöonjebahwaud, mesuh egewh kah kuhgaunzoomahjig enewh waqueenoonejin, oogepemwuhsinahahwaun dush enewh Paulun kuhya oogeoonjesahgeje‐tahbahnahwaun emuh keche‐oodanaung, keneboodoog keënannemahwaud.

²⁰ Ahneesh dush, magwah egewh kekenooähmahgunug kewetahkahbahwetahwahwaud, kepuhsegwe, kepeëzhaud dush emuh keche‐oodanaung: wuhyahbunenig dush keëzhemahjah emuh Derbeïng keweejewaud enewh Barnabasun.

²¹ Uhpe dush kahpahbahdebahdooduhmoowaud ewh minwahjemoowin ewede keche‐oodanaung, kahkushkeähwaud nebewah kekenooahmahgunun, nayaub keëzhekewawug emuh Lystraïng, kuhya Iconiuming, kuhya Antioching,

²² Keäunwahjeähwaud enewh kekenooähmahgunun, kuhya kekuhgekemahwaud cheminjemanduhmenid ewh dabwayanduhmoowin, chenundahwandahgoozeyung emuh nebewah kooduggegezewining cheöonjepeendegayung emuh oodogemahwewining owh Kesha‐Muhnedoo.

²³ Uhpe dush kahoozheähwaud enewh katezenejin anduhzhe‐ahyahwahgwan mahyahwunjeëdejig anuhmeähjig, emuh kuhya kahahnuhmeähwaud mahmahwe kekeëquishemoowaud, oogeähnuhmeätuhmahwahwaun enewh cheweedookahgoowaud enewh Tabaninganejin, me enewh kahdabwayanemahwahjin.

²⁴ Uhpe dush kahshahbooshkummoowaud Pisidia, ketuhgwishenoog emuh Pamphyliaïng.

²⁵ Uhpe dush kahdebahdooduhmoowaud ewh ekedoowin emuh Pergaïng, keëzhahwug emuh Attaliaïng:

²⁶ Ewede dush keöonjemahjeyahshewug keënahshewaud emuh Antioching, me ewede wahyashkud kahduhzhe-ahnuhmeätuhmahwindwah cheweedookahgoowaud enewh shawanjeganejin Kesha‐Muhnedoon emuh ahnookewining kahdebishkoosetoowaud.

²⁷ Uhpe dush kahtuhgwishenoowaud, kahmahwunjeahwaud enewh anuhmeähnejin, oogewahweenduhmahwahwaun kuhkenuh kahezhechegawaud keweedookahgoowaud enewh Kesha‐Muhnedoon, kuhya Kesha‐Muhnedoo kahezhepahkahkoonuhmoowaud ewh dabwayanduhmoowine‐ishquaundam enewh mayuggezenejin.

²⁸ Kuhpayeëe dush keduhnezewug emuh, keweejewahwaud enewh kekenooähmahgunun.