OODEZHECHEGAWINEWAH 12 - Ottawa New Testament Penteteuch and Psalms 1874

¹ Me dush uhpe owh Herod keche‐oogemah keshebenekanid wekooduggeäud ahnind enewh anuhmeähwining dabandahgoozenejin.

² Oogenesaun dush Jamesun wejekewaün owh John ahzhahwashk keähyood.

³ Kahwahbundung dush keminwanduhmenid enewh Jewyun, menuhwah keähnooke chetuhkoonaud enewh Peterun. (Me dush uhpe ahyahwung enewh kezhegudoon kahmeejing wambesinsenook buhquazhegun.)

⁴ Uhpe dush kahtuhkoonaud, oogeähsaun emuh kebahquahoode‐weguhmigoong, oogepuggedenuhmahwaun metauswe‐ahshe‐ningoodwauswe shemahgunishun cheguhnuhwanemegood: keënandung ishquah‐kuhbekoosa‐wekoonding chesahgejeweenaud emuh anduhzhe ahyahnid enewh ahnishenahban.

⁵ Peter dush kekebahquahwah: egewh dush anuhmeähjig uhpuhna oogeähnuhmeätuhmahwahwaun chebemahjeëgood enewh Kesha‐Muhnedoon.

⁶ Uhpe dush enandung owh Herod chesahgecheweenaud, ewh tebekudenig kenebah owh Peter nahwuheëeng shingeshinenid neezh shemahguneshun, tahkoobezood neezh pewahbikoo‐tuhkoobejegunun oonje: kuhya egewh ganuhwanjegajig emuh ishquaundang ahgwahjeeng kenebahwewug keguhnuhwanduhmoowaud ewh kebahquahoode‐weguhmig.

⁷ Benuh dush, oogepeöodissegoon enewh oodangenemun owh Jehovah, kewahsata dush peendig kebahquahoode‐weguhmigoong: kuhya owh angen oogepuhkittawaun enewh Peterun oopemayowening, kuhya oogepuhsegwindenaun, oo‐oo keëkedood, Waweeb puhsegween. Enewh dush pewahbikoo‐tuhkoobejegunun keöonjepungesinenewun emuh ooneenjeeng.

⁸ Owh dush angen oo‐oo oogeënaun, Keche‐pesoon, kuhya tuhkoobetoon enewh kemuhkissenun. Me dush kahezhechegad. Oo‐oo dush oodenaun, Pesekun kepesekoowahgun, noopenuhzheshin dush.

⁹ Peter dush keühnesahgahum, kenoopenuhnaud; kah dush kekekanduhse chedabwamahguk ewh kahezhecheganid enewh angenun; keënandum egoo kuhnuhbuj enahbunduhmoowin maunduh kahwahbunduhmaun.

¹⁰ Uhpe dush kahuhnekuhbikahwahwaud netum ahkundoo‐wenenewun kuhya menuhwah ahnind, kepetuhgwishenoog emuh pewahbikoo‐keche‐ishquaundang oodanaung anuhmook; penesekah kenesahkooshkahne: keühnesahgahuhmoog, kahkuhbikuhmoowaud dush pazhik oodanah‐meekun; me dush uhpe bahbega kenuhguhnegood enewh angenun.

¹¹ Peter dush uhpe kahishquah‐mahmahkahdandung, oo‐oo keëkedoo, Noongoom dush kagate nequuhyukwandaun, ewh Tabaningad kepeëzhenahzhahwaud enewh oodangenemun, emuh ooneenjeeng owh Herod ningeöonje‐kediskenik, kuhya kuhkenuh oonunduhwanduhmoowinewaung egewh Jewyug.

¹² Uhpe dush kahnahnahgahdahwandung ewh kahezhewabuk, keëzhah emuh andahnid enewh Maryun enewh oogeen owh John, owh Marcus kahtuhgoo‐weenzood; kahduhzhe‐mahwunjeëdewaud nebewah, keähnuhmeähwaud dush.

¹³ Magwah dush pahpahgahquahegad emuh ishquaundaming, pazhik equazans Rhoda azhenekahzood kepeëzhah chebezindung.

¹⁴ Kahkekandung dush oodinwawine enewh Peterun, kahween oogenesahkoonunseen ewh ishquaundam kahahpeech‐moojegezid, kepeendega‐buhtoo dush, keweendahmahwaud ewh nebahwid owh Peter ahgwahjeeng chegishquaundang.

¹⁵ Oo‐oo dush oogeënahwaun, Kekewuhnahdiz. Anegook dush kayahbe keëkedoo, Kagate cheëzhewabuk. Oo‐oo dush keëkedoowug, Me suh enewh oodangenemun.

¹⁶ Peter dush kayahbe kepahpahgahquahega: uhpe dush kahnesahkoonuhmoowaud ishquaundam wuhyahbuhmahwaud dush kemahmahkahdandahmoog.

¹⁷ Kahuhyenenuhmahwaud dush ewh ooneenj chepezaunuhbenid, oodebahjemootahwaun ewh kesahgejewenegood enewh Tabaninganejin emuh kebahquahoode‐weguhmigoong. Oo‐oo dush keëkedoo, Mahjaug ahweweenduhmoowik oonoo uhyeëen owh James kuhya egewh wejekewaëmaug. Kemahjah dush, puhkaun ningooje keëzhah.

¹⁸ Uhpe dush kahwahbung, kekeche‐megooshkahjeähwug egewh shemahgunishug, kegweenuhwahbuhmahwaud enewh Peterun.

¹⁹ Uhpe dush owh Herod kahoondoonaäud, mekahwahsig dush, oogekuhgwajemaun enewh kahahkundoonejin, keëkedoo dush chenesemind. Judæaing dush keöonjemahjah keëzhah dush ewede Cæsareaïng, me emuh keduhnezid.

²⁰ Herod dush ooge‐keche‐nishkanemaun enewh Tyreing kuhya Sidoning anduhnuhkeenejin: mahmahwe dush oogepenaunzekahwaun enewh, uhpe dush kahweejekewaë-mahwaud enewh Blastusun ganuhwanduhmenejin keche‐oogemah ooduhbenahsoowin, kenundoodahmahgawug chepoonaninding; keche‐oogemah ooduhkeeming muh kahoondenegahdag meejim emuh ooduhkemewaung.

²¹ Uhpe dush kahdebishkoosanig kezhah kahwahween-jegahdag kezhik, Herod keche‐oogemaung keëzheöod, kenuhmuhduhbe emuh oodoogemah‐wuhbewining, oogekeche‐guhnoonaun dush enewh.

²² Kesahsahquawug dush egewh waqueenoojig oo‐oo keëkedoowaud, Muhnedoo oodinwawin maunduh, kahween enene oodinwawin ahwunsenoon.

²³ Bahbega oogepukkedaöogoon enewh oodangenemun owh Tabaningad, kah muh oogepeshegandahgooähseen enewh Kesha‐Muhnedoon: oogeähmoogoon dush enewh muhnetoonsun, keïshquahnahmoo dush.

²⁴ Kemahjegemahgud dush ewh oodekedoowin owh Kesha‐Muhnedoo kuhya ashkum kemeshenud.

²⁵ Barnabas kuhya Saul Jerusaleming keöonjepiskah-bewug, uhpe kahkezhetoowaud oodahnookeewinewaun, oogeühneweejewahwaun enewh Johnun Marcus kahtuhgoo‐weenzoonejin.