NUMBERS 22 - Ottawa New Testament Penteteuch and Psalms 1874

¹ Israel dush oonejahnesun keühnemahjahwun, kekuhbashewun dush emuh mushkoodawunenig ewh Moab oondausenuhguhkagaum Jordaning debishkoo goo Jerichoïng.

² ¶ Balak dush Zippor oogwissun oogewahbundaun kuhkenuh Israelun kahdooduhwahnid enewh Amoritun.

³ Moab dush oogekeche‐koosaun enewh ahnishenahban, kebahtuhyenoowun mah: Moab dush kemegooshkahdandum Israel oonejahnesun oonje.

⁴ Moab dush oo‐oo oogeënaun enewh kacheähnishenahbawenejin Midianing, Me suh oogoo muhyahmuhwenoojig chejahgekeeshkuhmahwaud kuhkenuh enewh ayahnejin-kewetahuhyeëe uhyahyung, debishkoo owh uhnooke‐pezheke azhejahgekeeshkundung enewh mushkoosewun ketegauning ayahgin. Balak dush Zippor oogwissun oodoogemahkunduhwahbuneen enewh Moabitun ewh uhpe.

⁵ Oogeühnoonaun suh dush minzhenuhwan cheëzhahnid enewh Balaamun Beor oogwissnnewede Pethoring, cheegsebe ayaug emuh ooduhkeemening oodahnishenahbamene, chenundoomahnid dush, oo‐oo cheënahnid, Benuh, Egypting oonjebahwug ahnishenahbag: benuh, oomooshkenashkahnahwah uhke, debishkoo kuhya emuh uhyahyaun uhyahwug:

⁶ Umba suh dush, kepuhgoosanemin, benahneboonduhmuhweshin oogoo ahnishenahbag; oonzaum gooshuh mushkuhwezewug: koonemah suh nindahmuhmaunzhewah, chepuhketawungwahbun dush, kuhya chesahgejenaunzhuhwugwahbun emuh uhkeeng: ningekekandaun suh ewh shahwandahgoozid owh keshahwandahgoozeüd, kuhya kuhgwahnesuhgandahgoozid owh nuhyahneboomud.

⁷ Egewh dush kache‐ähnishenahbawejig Moabing kuhya egewh kache‐ahnishenahbawejig Midianing kemahjahwug ewh wahbunoo‐tebuhuhmahgawin tuhkoonuhmoowaud; oogeöodissahwaun dush Balaamun, oogeweenduhmuhwahwaun dush enewh Balak oodekedoowinun.

⁸ Oo‐oo dush oogeëgoowaun, Oomah uhyahyook noongoom tebekuk, menuhwah dush kegahbedahjemootoonim, Jehovah kaëzhekuhnoonzhid: egewh dush Moab duhzhe oogemaug oogenebanduhwahwaun enewh Balaamun.

⁹ Kesha‐Muhnedoo dush oogeöodissaun Balaamun, oo‐oo dush keëkedoo, Ahwananug enenewug oogoo ayahjig emuh uhyahyun?

¹⁰ Balaam dush oo‐oo oogeënaun Kesha‐Muhnedoon, Balak oogwissun owh Zippor, wagemahkundung Moab, oogeühnoonaun minzhenuhwan oo‐oo cheëzhekuhnoonzhenid,

¹¹ Benuh ahnishenahbag Egypting oonjebahwug, mwaushkenashkungig uhke: umba suh, benahneboonduhmuhweshin; koonemah suh ningahkushketoon chemuhmaunzheühgwah, kuhya chesahgejenaunzhuhwugwah.

¹² Kesha‐Muhnedoo dush oo‐oo oogeënaun Balaamun, Kahween kegahweejewahseeg; kahween kegahnahneboomahseeg egewh ahnishenahbag: shahwandahgoozewug mah.

¹³ Balaam dush keöonishkah uhpe kakezhabahwuhguk, oo‐oo dush oogeënaun Balak oodoogemahmun, Keduhkeemewaung ezhemahjaug: kah mah Jehovah nimpuhgedenegoose-cheweejewenuhgoog.

¹⁴ Egewh dush Moab duhzhe oogemaug kepuhsegwewug, oogeëzhahnahwaun dush Balakun, oo‐oo dush oogeënahwaun, Balaam ahgoonwatum cheweejeweyungid.

¹⁵ ¶ Balak dush menuhwah oogeühnoonaun oogemaun nuhwuj buhyahtuhyenoonid, kuhya nuhwuj kacheühpetandahgoozenid enewh dush ween.

¹⁶ Oogeöodissahwaun dush Balaamun, oo‐oo dush oogeënahwaun, Me suh oo‐oo akedood Balak, Zippor oogwissun, Kagoo, kepuhgoosanemin, kegahoonduhmeëgooseen gagoo cheöodesheyun:

¹⁷ Kegahkechetwahweïn gooshuh, ahpeje dush egoo chekechetwahwandahgoozeyun, ningahezhechega kuhya wagoodoogwanedoog kaëzhewunan: umba suh dush, kepuhgoosanemin, benahneboonduhmuhweshin oogoo ahnishenahbag.

¹⁸ Balaam dush kenuhquatum, oo‐oo dush keënaud Balak oobuhmetagunun, Kishpin Balak wemeenzhepun oowegewaum mooshkenagebun dush emuh shooneyah kuhya oozahweshooneyah, kahween nindahkushketooseen chebahzheduhuhmaumbaun oodekedoowin owh Jehovah ninKesha‐Muhnedoom, noond cheëzhechegayaumbaun gamuh kuhya uhwuhshema.

¹⁹ Umba suhnoo, kepuhgoosanemenim, kenuhwah uhyahyook oomah noongoom tebekuk, chekekanduhmaun dush ewh menuhwah Jehovah kaëzhegwan.

²⁰ Kesha‐Muhnedoo dush oogeöodissaun Balaamun uhpe tabekudenig, oo‐oo dush oogeënaun, Kishpin egewh enenewug benundoomikwah, ooniskaun, weejewh edush; ewh dush ween egoo ekedoowin kaënenaun, me ewh kaëzhechegayun.

²¹ Balaam dush keöonishkah uhpe kakezhabahwuhgudenig, oogeühtuhwaun dush uhpuhbewin enewh oomuhmaungeshayemun, oogeweejewaun dush enewh Moab duhzhe oogemaun.

²² ¶ Ewh dush keëzhaud, Kesha‐Muhnedoo oonishkahdezewin kebishkuhnane: Jehovah dush oodangenemun kekebegahbuhwewun emuh meekunaung wemegahnegood. Oobemoomegoobuneen dush oomuhmaungeshayemun, kuhya oowejewegoobuneen enewh neenzh oobuhmetahgunun.

²³ Owh dush mamaungesha oogewahbuhmaun Jehovah oodangenemun kebegahbuhwenid emuh meekunaung, kuhya tahkoonuhmenid ooduhshuhwashkoomene kahkejebedoonid: owh dush mamaungesha puhkakuhnah keühpuhgezoo, ketegauning dush keëzhah: Balaam dush oogepuhketawaun enewh mamaungeshayun, naysaub cheëzhahnid emuh meekunaung.

²⁴ Jehovah dush oodangenemun kenebuhwewun shoowemine‐ketegaune‐meekaunsing, wahkahkenegun dush oondaus enuhka uhyahmuhgudoobun, kuhya wahkahkenegun uhwus enuhka.

²⁵ Uhpe dush owh mamaungesha wuhyahbuhmaud Jehovah oodangenemun, wahkahkeneguning enuhkuhkayah keühpuhgezoo, oogezhahshahgooshkuhmuhwaun dush Balaam oosidahne emuh wahkahkeneguning: oosepuhketaöogoon dush menuhwah.

²⁶ Jehovah dush oodangenemun nuhwuj wahsuh keëzhahwun, kenebuhwewun emuh ahgahsuhdamonig emuh goo chedahpuhkaseengebun ookechenekaung enuhkuhkayah gamuh kuhya oonuhmunjenekaung enuhkuhkayah.

²⁷ Uhpe dush owh mamaunesha wuhyahbuhmaud Jehovah oodangenemun, kepungeshin uhnaumuhyeëe emuh uhyahnid Balaamun: Balaam dush oonishkahdezewin kebishkuhnane, oogepuhketawaun dush enewh mamaungeshayun suhkuhoon uhyood.

²⁸ Jehovah dush oogebahkedoonanaun enewh mamaungeshayun, oo‐oo dush oogeënahne enewh Balaamun, Wagoonan suh kahdoodoonaun, ewh zhegwuh nesing kepuhketaöoyun?

²⁹ Balaam dush oo‐oo oogeënaun enewh mamaungeshayun, Kegeneshebahpenoodowh suh pagizh uhshuhwashk tuhkoonuhmaumbaun, me goo noongoom chenesenaumbaun.

³⁰ Owh dush mamaungesha oogeënaun Balaamun, Kah nuh ween nindahwese kemamaungeshayim, owh kahbemoomik uhpe netum tabanemeyun nuhnaunzh egoo nooongoom? wekah nuh koo oo‐oo keduhyindoodoonenahbun? Oo‐oo dush oogeëgoon, Kah.

³¹ Me dush Jehovah kebahkishkeenzhegwanaud Balaamun, oogewahbuhmahne dush Jehovah oodangenemun nebuhwenid emuh meekunaung, kuhya tuhkoonuhmenid ooduhshuhwashkoomene kahkejebedoonid: kenuhwuhgequanewun dush, keühjejeengwasawun kuhya.

³² Jehovah dush oodangenemun oo‐oo oogeënaun, Wagoonan suh zhegwuh nesing kahoonjepuhketahwud kemamaungeshayim? benuh, kegebemegahnin, oonje kemeekun wuhwushkuhmoog emuh anahsuhmeyaun:

³³ Owh dush mamaungesha ningewahbuhmik, ningegwa-kegahbuhwetaug dush nesing: kwakegahbuhwetuhwesegoobun suh, ahbedakummig ahzhe noongoom kedahgenesin, nindahgebemahjeäh dush ween.

³⁴ Balaam dush oo‐oo oogeënaun Jehovah oodangedemun, Ningemujjeëzhechega; kah suh ningekekandunseen ewh nebuhwewumbunan emuh meekunaung wemegahsheyun: noongoom suh dush nayaub ningahkewa, kishpin ewh minwahbundunsewun.

³⁵ Jehovah dush oodangenemun oo‐oo oogeënaun Balaamun, Weejewh egewh enenewug: ewh suh goo atuh ekedoowin kaënenaun, me ewh kaëkedooyun. Balaam suh dush oogeweejewaun Balak oodoogemaumun.

³⁶ ¶ Uhpe dush Balak nwaundung Balaamun ketuhgweshenenid, oogeühwenuhquashkuhwaun pazhig Moab duhzhe oodanaung, cheeguhyeëe Arnoning anduhgoonig, ahpeje goo emuh ishquaühyeëewung ewh uhke.

³⁷ Balak dush oo‐oo oogeënaun Balaamun, Kah nuh ween keche wawane ningeühnookese chenundoomegooyun? wagoonan suh kahöonjenaunzekuhwesewun? kah nuh ween kagate ningushketooseen chekechetwahweënaun?

³⁸ Balaam dush oo‐oo oogeënaun Balakun, Benuh, kebenaunzekoon: nekushketoon nuh noongoom gagoo cheëkedooyaun? ewh ekedoowin Kesha‐Muhnedoo atood nindooning; me ewh kaëkedooyaun.

³⁹ Balaam dush oogeweejewaun Balakun, Kirjath‐huzothing dush dush keduhgweshinoog.

⁴⁰ Balak dush oogesahsahgewejeganun uhnooke‐pezhekewun kuhya mahnishtahnishun, keühnooke dush chenundoomemind Balaamun, kuhya enewh oogemaun kahweejewahnejin.

⁴¹ Kepuhgummeühyahmuhgud dush uhpe wuhyahbunenig, Balak keöoodahpenaud Balaamun, keëzhewenaud dush emuh ishpuhdenahnig Baal koo ahnuhmeätuhwind, emuh dush cheöonzahbuhmaud enewh ahnishenahban ahpeje goo ishquaühyeëe ayahnejin.