LEVITICUS 25 - Ottawa New Testament Penteteuch and Psalms 1874

¹ Jehovah dush oogekuhnoonaun Mosesun emuh Sinai wahjewing oo‐oo keënaud.

² Kuhnoozh enewh Israel oonejahnesun oo‐oo kaënudwah. Uhpe ketuhgwishenag emuh uhkeeng kameenenuhgoog tahaunwabemahgud ewh uhkee oonje Jehovah.

³ Ningoo‐dwahsoo‐pepoon kegahketegahdahnahwah uhkee kuhya ningoodwahsoo‐pepoon kegahahnooketahnahwah keshoowemine‐ketegaunewah kuhya kegahsuggukkenahnahwah enewh shooweminun.

⁴ Neezhwahsoo‐pepoonahguk dush tahaunwabemahgud ewh uhkee Jehovah oodaunwabewin, kahween kegahketegahdunse keketegaun kuhya kegahahnookeetunse keshoowemine‐ketegaun.

⁵ Wanepuzh mahyahjegingin buhquazhegunushkoon kahween kegahkishkishkezhunseen, kah kuhya shooweminun emuh keshooweminegahwunzheeming wanepuzh kaähgoodagin kegahsuggukkenunseen: aunwabe‐kekenoonoowin suh ahwun cheäunwabemahguk uhkee.

⁶ Aunwabemahguk uhkee mesuh kaoonjeweseneyag, keen kuhya kebuhmeetahgun kuhya kebuhmeetahga‐equa kuhya owh anoonud kuhya owh mayuggezid wanjduhnuhkeemik.

⁷ Kuhya kedahwahkaunug kuhya ahwaseeüg emuh keduhkeeming ayahjig oogahmeejenahwah enewh wanepuzh mahyahjegingin emuh uhkeeng.

⁸ Kegahahgindaunun dush neezhwahswe aunwabe kekenoonoowinun neezhwahching neezhwahswe kekenoonoowinun, me suh nemeduhnuh ahshe shaungusswe kekenoonoowinun.

⁹ Kegahenahkoonega dush chepootahjegang uhpe matausoogoon‐uhgezid owh neezhwahsoo‐keezis uhpe keche‐sahsahgewejega‐kezheguk kegahenahkoonegam chepootahjegang anegookekummegaug keduhkeemewaug.

¹⁰ Kuhya kegahkechetwahwetoonahwah ewh uhpe naunemeduhnuh‐duhsoo pepoonuhguk kegahpepahgindahnahwah ewh chedebanindezoowaud kuhkenuh bamahdezejig anduhnuhkeejig emuh anegookookummegaug uhkee tahmoojegeguhkummegud suh: kegahezhekewam anduhcheyag emuh keduhkeemewaung kuhya emuh ayahwaud kedenuhwamahgunug.

¹¹ Kegahmoojegezeem suh ewh uhpe, kahween kegahketegahdunsenahwah keduhkemewah kah kuhya kegahkushkishkezhunsenahwah ewh wanepuzh kamahjeging, kah kuhya kegah‐suhgukkenunsenahwah enewh shooweminun wanepuzh kaähgoojingin emuh shooweminahgah‐wunzheeng.

¹² Tahmoojeguhkummegud ewh uhpe tahkechetwahwandahgwud ewh kekenoonoonoowin, kegahmeejenahwah ewh wanepuzh kamahjeging emuh ketegauning kaöondenuhmag.

¹³ Uhpe wajechesagin maunduh mwaujeguhkummeguk kekenoonoowin keëzhekewam anduhcheyag emuh waduhkeemeyagoobun.

¹⁴ Kishpin dush gagoo ahtahmud keejeduhnuh‐kewamahgun gamuh kishpin gagoo kishpenuhtuhwud keejeduhnuhkewamahgun kahween kegahmujjedoodahdesim.

¹⁵ Debishkoo anduhsing kekenoonoowinun kahishquah‐moojeguhkummeguk mesuh kaëzhekishpinetuhwud keejeduhmuhkewamahgun, kuhya debishkoo anduhsing kekenoonoowinun menik kameenewewaud metigoog mesuh kaëzheahtahmik.

¹⁶ Kishpin nebewah duhsoo‐pepoonahguk, nebewah shooneyah kegahtebahmahwah, kishpin dush ween punge duhsoo‐pepoonahguk punge kegahtebahahmahwah, debishkoo mah anduhsoopepoonuhguk kameenewewaud metigoog mesuh kaëzheahtähmik.

¹⁷ Kah suh kegahmujje‐doodahdeseem kegahkoosah mah keKesha‐Muhnedoom neen mah nindow Jehovah keKesha‐Muhnedoom.

¹⁸ Mesuh kaöonjedooduhmag nindenahkoonegawinun kuhya kaöonjeguhnuhwanduhmag netebahkoonegawinun kuhya kaöonjeëzhechegayag kuhya pezaun kegahduhnuhkeem emuh uhkeeng.

¹⁹ Tahmeekoogemahgud dush uhkee kuhya kegahtabesineem kuhya pezaun kegahduhnuhkeem emuh.

²⁰ Kishpin dush ekedooyag, Wagoonan kameejeyaung nauzhwahsoo‐pepoonahguk? benuh kahween ningahketegasemin kah kuhya ningahsuggukkenegasemin.

²¹ Kegahshahwaneminim suh nangoodwahsoo pepoonuhgukkin, tahmekoogemuhgud dush chetabesineyag neswe kekenoonoowinun.

²² Ishwahsoo‐pepoonuhguk kegahketegahdaunahwah kuhya kegahmeejinahwah kata‐meejim nahnauzh keshaungussoo‐pepoonuhguk peenish suggukenegahdag enewh mahyahjegingin, katameejim kegah‐meejinahwah.

²³ Kahween tahahpeche‐ahtahwaseem uhkee, neen mah nindebandaun uhkee keenuhwah dush kemahyuggezeem kuhya kepahbahduhnezeem emuh ninduhkeeming.

²⁴ Kuhya emuh anegookookummegaug waduhkeemeyag kegahenahkoonegam nayaub chekishpinuhchegahdag uhkee.

²⁵ Kishpin kekahnis ketemahgezid keähtahwad dush ahnind ooduhkeem kishpin ahweyah oodenuhwamahgun nayaub wekishpinuhtood, mahnoo oogahkishpinuhtoon ewh wekahnissun kahahtahwanid.

²⁶ Kishpin dush ahyahwahsig ahweyah nayaub kakishpinuhchegad, ween dush tebenuhwa kushketood chekishpinuhtood.

²⁷ Oogahahgindaunun enewh kekenoonoowinun menik kahwahweenjegahdagin uhpe kahahtahwang uhkee, menik dush ashkoonegahdag oogahtebahahmahwaun enewh kahahtahmahpuneen cheöonje‐ezhekewad emuh ooduhkeeming.

²⁸ Kishpin dush kushketoosig nayaub chemeenaud, mahnoo owh kahkishpinuhtood oogahguhnuhwaudaun peenish uhpe kachemoojeguhkummeguk, mahnoo tahishquah‐tebanjega owh dush netum kahahtahwad tahezhekewa emuh ooduhkeeming.

²⁹ Kishpin dush enene ahtahwad wahkahegun emuh keche‐oodanaung, mahnoo nayaub oogahkishpinuhtoon kishpin kushketood chepwah ishquah‐pepoonahguk ewh pepoon uhpe keähtahwad nayaub oogahkishpinuhtoon.

³⁰ Kishpin nayaub keshpinuhchegahdasenook chepwah ishquah‐pepoonahguk, mahnoo owh kahkishpinuhtood ahpena oogahdebandaun ewh wahkahegun emuh keche‐oodanaung atag menik kaahneka‐bemahdezenid oonejahnesun; kahween tahishquah‐tebanjegase uhpe kache‐moojeguhkummeguk.

³¹ Enewh dush wahkahegunun emuh oodanaunsing atagin tahezheähyahmahgudoon debishkoo enewh ketagaunun; mahnoo nayaub tahkishpinuhchegahdanoon, kuhya ahtahwawin tahishquahsane uhpe kache‐moojegukkummeguk.

³² Mahnoo egewh Levitug nayaub oogahkishpinuhtoonahwah oo‐keche‐oodanahwaun kuhya oowahkahegunewah uhpe ananduhmoowahgwan.

³³ Kishpin dush enene kishpinuhtuhwaud enewh Leviteün mahnoo ewh wahkahegun kahahtahwang kuhya ewh keche‐oodanah ewh ahtahwawin tahishquahsa uhpe kache‐moojeguhkummeguk; egewh mah Leviteug ahpeche oodebandahnahwah enewh oowahkahegunewah emuh oodoodanahwewaung emuh waduhkeemenid Israel oonejahnesun.

³⁴ Kahween oogahahtahwasenahwah ooduhkeemewah cheguheëe atag emuh oodoodanahwewaung: ahpena suh oogahdebandahnahwah.

³⁵ Kishpin dush kekahnis ketemahgezid kuhya nuhneenuhmezid emah anduhzhe ahyahyun, mahnoo kegahweedookahwah ahnahween goo mahyuggezid gamuh pahbahduhnezid cheweejdahmik.

³⁶ Kahween nahwuj nebewah kegahtebahahmahgoose kekahnis kishpin ahweüd shooneyah; kegahkoosah dush ke‐Kesha‐Muhnedoom cheweejduhnuhkeemik kekahnis.

³⁷ Kahween kegahpuggeduhnuhmahwahse keshooneyaum nahwuj nebewah chetebahuhmahgooyun kah kuhya kegahahweähse kemeejim ashkum nebewuh chetebahahmahgooyun.

³⁸ Neen suh nindow Jehovah keKesha‐Muhnedoomewah kahsahgechewenenag oonje Egypting duhzhe uhkeeng chemeenenuhgoog Canaaning duhzhe uhkee Ke‐Kesha‐Muhnedoomewah cheähweyaun.

³⁹ Kishpin dush kekahnis waujduhnuhkeemik ketemahgezid kishpenuhtooyun dush weyow, kahween ahwahkauning kegahdoodahwahse.

⁴⁰ Anoonind atuh buhmeetahguning tahdoodahwah kuhya pabahduhnezid kegahezheweejewik kuhya kegahbuhmetaug peenish kache‐moojeguhkummeguk.

⁴¹ Me uhpe kamahjaud ween kuhya oonejahnesun, tahezhekewa dush emuh tebenuhwa oowegewauming kuhya emuh ooduhkeemening oosebuneen.

⁴² Neen mah nebuhmeetahgunug ahwewug kahsahgejewenugig oonje Egypting duhzhe‐uhkeeng, kahween tahahwah-kauneähsewug.

⁴³ Kahween kegahsunnuge‐oogemahkunduhwahseeg kegahkoosah suh ke‐Kesha‐Muhnedoom.

⁴⁴ Kedahwahkaune‐enenemug kuhya kedahwahkaune‐equamug kadahyahwudjig mesuh mayug‐ahnishenahbakaung kaöondenindwah kewetuhyeëeng ayahyun ayahjig, mahnoo kegahkishpinuhnaug egewh cheähwahkaune‐enenewewaud kuhya cheähwahkaune‐equawewaud.

⁴⁵ Kuhya mayuggezejig oonejahnesun waujduhnuhkeemenagoog mahnoo kegahkishpinuhnaug egewh kuhya oonejahnesewaun kahahyahwahjin emuh keduhkeemewaung kegahdebanemaug dush.

⁴⁶ Kuhya kegahoodahpenahwahwaug chedebanenegoowaud kenejahnesewaug cheähpeche‐debanemegoowaud enewh kegahbuhmetahgoowaug kahgenig: kekahnesug atuh Israeling dabandahgoozejig kahween kegahsunnugge‐ahnookeeähseeg.

⁴⁷ Kishpin dush owh mayuggezid gamuh pabahduhnezid ashkum kechetwahwezid emuh keduhkeeming, kekahnis dush ashkum ketemahgezid kuhya ahtahmaud weyow enewh mayuggezenejin gamuh mayuggezenejin oonejahnesenene.

⁴⁸ Kahahtahmind mahnoo nayaub tahkishpenuhnah: nayaub oogahkishpenuhnegoon pazhig tebenahwa wekahnesun.

⁴⁹ Gamuh oomishoomaün gamuh oomishoomaün oogwissine gamuh pazhig pashoo oodenuhwamahgunun kishpin kushketood mahnoo nayaub oogahkishpenuhtoon tebenuhwa weyow.

⁵⁰ Oogahahginduhmoowaun dush enewh kahkishpinuhnegoojin uhpe kekishpinuhegood enewh nahnauzh uhpe mwaujegukkummeguk kekenoonoonoowin anduhsenenig dush enewh kekenoonoowinun debishkoo azhetebahahmahwind ahweyah anoonind buhmeetahgun, mesuh menik katebahahmahgad.

⁵¹ Kishpin nebewah kekenoonoonoowinun ashkoosanig, mesuh kaëzhetebahahmahgad ahnind shooneyah kahbahnahjeïnd kekishpenuhnind.

⁵² Kishpin ishkoosanig punge atuh kekenoonoowinun nahnauzh mwaujeguhkummeguk, mesuh menik kaëzhetebahahmahwaud anduhsenenig ashkoosanenig kekenoonoowinun, me menik katebahahmahwaud.

⁵³ Debishkoo buhmeetahgun anduhsoo‐pepoonenig anoonind mesuh kaëzheähyahwud kahween owh pazhig oogahsunnugge-oogemahkunduhwahseen emuh anahsuhmeyun.

⁵⁴ Kishpin nayaub kishpinuhnahsewind uhpe mwahjegukkummeguk tahsahgahum ween kuhya oonejahnesun.

⁵⁵ Neen mah nebuhmeetahgoog Israel oonejahnesun, nebuhmeetahgunemug ahwewug egewh kahsahgechewenugig oonje Egypting duhzhe uhkeeng: Neen suh nindow Jehovah keKesha‐Muhnedoomewah.