LEVITICUS 10 - Ottawa New Testament Penteteuch and Psalms 1874

¹ Nadab kuhya Abihu, oogwissun owh Aaron, oogeöodahpenahnahwah papazhig puhquanasuhchegun, kuhya oogeähtoonahwah ishkooda emuh, kuhya oogeähtoonahwah menoomahgoojegun emuh, kuhya oogepeetuhwahwaun Jehovahun mahyug ishkooda, ahnahween goo kekenahahmahgoowaud Jehovahun.

² Kesahguhuhmoomahgud dush ishkoota emuh oonje ayaud Jehovah, kechahgizoowug edush, keneboowug dush anahsuhmid Jehovah.

³ Moses dush oo‐oo oogeënaun Aaronun, Mesuh oo‐oo kahekedoopun Jehovah, oo‐oo keëzhid, Ningahkechetwahweëgoog egewh puhnaunzekahwejig, kuhya ningahkechetwahweëgoo anahsuhmewaud kuhkenuh egewh ahnishenahbag. Kepezaunuhbe dush Aaron.

⁴ Moses dush oogenundoomaun Mishaelun kuhya Elzaphanun, oogwissun owh Uzziel oomishoomayun owh Aaron, oo‐oo dush oogeënann, Peëzhaug, sahgechewenik kekahnesewaug oonje ahnuhmeäweguhmigoong kuhya oonje kuhbashewining.

⁵ Kepeëzhahwug dush, kuhya oogesahgechewenahwaun oonje kuhbashewining oopuhpeensekoowahgunene oogeähyoonahwah pemewenahwaud, debishkoo Moses kahekedood.

⁶ Moses dush oo‐oo oogeënaun Aaronun, kuhya Eleazarun, kuhya Ithamarun, enewh oogwissine, Kagoo keejewewuh-quaunakagoon, kagoo kuhya pesebetookagoon kedahgwewinewah; koonemah kegahneboom, kuhya tahnishkanemahwug kuhkenuh ahnishenahbag: mahnoo atuh kekahnesewaug Israel oonejahnesun kuhkenuh oogahmahwemahwaun enewh kahchaugizwahjin owh Jehovah.

⁷ Kenuhwah dush ween kahween kegahsahguhunseem oonje oodahnuhmeä‐weguhmigoowah egewh mahyahwunjeëdejig, koonemah kedahneboom: kegenuhmuhkoonegoom mah oopemedam Jehovah. Keëzhechegawug dush debishkoo kahegoowaud Mosesun.

⁸ ¶ Jehovah dush oogeguhnoonaun Aaronun, oo‐oo keëkedood,

⁹ Kagoo menenequakagoon shoowemin‐ahboo gamuh mashkahwahgummeeg, keen, kuhya kegwissug, uhpe paundegayagoon emuh oodahnuhmeä‐weguhmigoowaung egewh mahyahwunjeëdejig, koonemah kedahneboom, mesuh uhpenu kaënahkoonegang menik kadahnekabemahdezeyag:

¹⁰ Kuhya pekinnoong cheënanduhmag enewh kachetwahwandahgwukkin kuhya kachetwahwandahgwussenoogin, enewh pahnukkin kuhya enewh pahnussenoogin;

¹¹ Chekekenooähmahwagwah kuhya Israel oonejahnesun kuhkenuh tebahkoonegawinun kahkuhgaunzoomegoowaud Jehovahun oonje ooneenjeeng owh Moses.

¹² ¶ Moses dush oogekuhnoonaun Aaronun, kuhya oogwissine Eleazar kuhya Ithamar azhenekahzoonejin kahishkooneminindjin, Oodahpenuhmook meejime‐meegewawin, ashkoonegahdag kahpuggedenuhmahwind Jehovah kahchahgizegahdanig emuh ishkootang, meejeyook dush ewh kuhya ewh wambesechegahdasenook emuh oopemayeëewung owh sahsahgewejegun‐ahbik: ahpeche mah kechetwahwandahgwud:

¹³ Emuh kechetwah‐ahnuhmeä‐weguhmigoong kegahmeejim, keen mah kedebandaun, kuhya kegwissug, menik oopuggedenuhmahgoowinun owh Jehovah pagidenegahdagin emuh ishkootang: me mah azhekuhgaunzoomegooyaun.

¹⁴ Kuhya ewh ookahgegunemah ahyahzhook kahezhewabenegahdag kuhya oodinemaungunemah kahpuggedenegahdag kegahmeejinahwah emuh akoo kechetwahwandahgwuk; keen, kuhya kegwissug, kuhya kedahnissug; kedebandahnahwah mah keen kuhya kegwissug menik pagidenegahdagin oopoonanindewine‐meegewawinewaun Israel oonejahnesun.

¹⁵ Oogahpeetoonahwah ewh pagidenegahdag oodinemaungunemah kuhya ewh ookahkegun ahyahzhook kahwabenegahdag mahmahwe meegewawinun pagidenegahdagin emuh ishkootang weenin, ahyahzhook cheuhpuhgeduhmoowaud anahsuhmid Jehovah; keen suh kegahdebandaun, kuhya kegwissug; mesuh uhpena kaënahkoonegang; debishkoo Jehovah kahekedood.

¹⁶ ¶ Moses dush oogewahweenga‐nundoonawaun enewh mesahboosoon kahpuggedenegahzoonejin oonje mujje‐ezhewabezewin, kechahgizwahbuneen edush: oogenishkanemaun dush Eleazarun kuhya Ithamarun, Aaron oogwissun kahishkoonemindjin, oo‐oo keënaud,

¹⁷ Wagoonash kahoonjemeejesewag ewh mujje‐ezhewabezewine‐meegewawin emuh akookechetwahwandahgwuk, kekanduhmag ahpech kechetwahwandahgwuk, kegemeenegoowah dush Kesha‐Muhnedoo cheöonje‐pemoonduhmag oomujje‐ezhewabezewinewah egewh mahyahwunjeëdejig, chesahsahgewetuhmoowagwah anahsuhmid Jehovah?

¹⁸ Benuh oomisqueem kahween kepeendeguhchegahdasenoon emuh kechetwah‐ahnuhmeä‐weguhmigoong: kagate kedahgemeejinahwah emuh kechetwah‐ahnuhmeä‐weguhmigoong, debishkoo kahekedooyaun.

¹⁹ Aaron dush oo‐oo ooguhnoonaun Mosesun, oo‐oo keëkedood, Benuh noongoom kezheguk oogepuggedenahnahwah oomujje‐ezhewabezewine‐meegewawinewah kuhya oochahgizega‐meegewawinewah anahsuhmid Jehovah; ningeöodessegoonun dush oonoo uhyeëen: kishpin dush kemeejeyaun ewh mujje‐ezhewabezewine‐meegewawin noongoom kagate enuh dahgeöodahpenegahda anahsuhmid Jehovah?

²⁰ Uhpe dush Moses kahnoondung oo‐oo ekedoowin kenuhandum.