I. TIMOTHEUSUN 6 - Ottawa New Testament Penteteuch and Psalms 1874

¹ Kuhkenuh menik anduhshewaud buhmeetahgunug dabandahgoozejig oogahkechetwahwanemahwaun enewh tebenuhwa oodoogemahmewaun, cheöonje‐mujje‐duhzhinchegahdasenook Kesha‐Muhnedoo oodoonoozoowin kuhya ookekenooähmahgawin.

² Egewh ayahwahjig enewh duhyabwayanduhmenejin oogemaun, kahween oogahdahbussanemahsewaun, oonje wejekewaëmind; ahwahshema dush oogahbuhmeetahwahwaun, oonje ahyaungwahmezewaud kuhya sahgeïndwah egewh wadahpenungig ewh menoo‐doodahgoowin. Oonoo ezhekekenooähmahgan kuhya ezhekuhgequan.

³ Kishpin ahweyah pukkaun ezhekenooähmahgad, kuhya bezinduhsig enewh wanesheshingin ekedoowinun, enewh oodekedoowinun Tabanemenung Jesus Christ, kuhya ewh kekenooähmahgoowin emuh ahnuhmeähwining anduhgoomahguk;

⁴ Minwahdanemoo suh owh, ahnahween goo kekanduhsig gagoo, kukkebahdezid wanje‐nunduhkekandung enewh kuhgwadwawinun, kuhya ekedoowine ahgoonwatahdewinun, emuh wanjebahmahguk ewh keshahwanindewin, ahgoonwatahdewin, mujje‐kezhwawinun, mujje‐enanindewinun,

⁵ Ookukkebahje‐ahgoonwatahdewinewaun egewh kakebahdezejig enenewug, kuhnuhga ayausigoog ewh dabwawin, anandungig cheöondenuhmahzoowaud gagoo tebenuhwawezewin emuh ahnuhmeähwining. Nuhguzh oogoo doowug.

⁶ Ewh suh quuhyuk ahnuhmeähwin mahmahwe ewh nuhanduhmoowin, keche oondezewin ahwun.

⁷ Kah muh gagoo kegepeetoosemin oomah uhkeeng, kuhya quuhyukwandahgwud ewh kuhnuhga gagoo chekushketoosewung cheühnemahjetoosewung.

⁸ Ahyahyung meejim kuhya ahgwewinun umba nuhandundah.

⁹ Egewh mahween nanduhwandungig nebewah tebenuhwawezewinun, ezhepungeshinoog emuh kuhgwatebanemegoowining kuhya nuhgwahguning kuhya emuh nebewah kakebahdandahgwukkin mujje‐nunduhwanduhmoowinun, enewh wanje‐ahpuggenindwah enenewug emuh nishewuhnahdezewining kuhya bahnahdezewining.

¹⁰ Ewh suh oonzaumanemind shooneyah me suh wajeebikahwung kuhkenuh mujje‐ahyeewish: magwah ahnind kenunduhwanemahwaud, keöonje‐pukkawug emuh dabwayanduhmoowining, kuhya kepuhjebuhooëdezoowug enewh nebewah kookuggetoowinun.

¹¹ Keen dush ween enene bameetuhwud Kesha‐Muhnedoo, oozhindun oonoo uhyeëen; noopenuhdun dush ewh menoo‐ezhewabezewin, quuhyuk‐ahnuhmeähwin, dabwayanduhmoowin, sahgeëdewin, shuhsheebanduhmoowin, bakahdezewin.

¹² Ezhemegahzoon ewh dabwayanduhmoowine megahzoowin, apeecheweyun minjimenun ewh kahgega‐bemahdezewin, me suh ewh kahoonje‐nundoomegooyun, kuhya kahoonje‐wahweenduhmun ewh wanesheshing wahweendahmahgawin emuh anahsuhmewaud nebewah wahyahbunjegajig.

¹³ Kedahyaungwahmemin anahsuhmid Kesha‐Muhnedoo, owh wanje‐bemahduk kuhkenuh uhyeëen, kuhya Christ Jesus, kahwahweendung ewh wanesheshing wahweenduhmoowin anahsuhmuhbid Pontius Pilate;

¹⁴ Cheguhnuhwanduhmun ewh kuhgequawin kuhnuhga ningood cheëzheweenussenook, kuhya kuhnuhga ningood chemujje‐duhzhinchegahdasenook nahnauzh uhpe penahgoozid Tabanemenung Jesus Christ:

¹⁵ Ewh kawahbunduhewad uhpe kedebishkoosanig anandung owh shawandahgoozid kuhya nazheka‐neegaun-andahgoozid, owh wadoogemahwemegood enewh keche‐oogemaun, kuhya dabanemaud enewh dabaninganejin;

¹⁶ Owh atuh dabandung kahgega‐bemahdezewin, andaud emuh wahsayahzewining ewh ahweyah kataöodittunsegoobun, wekah kahwahbuhmegoosig ahweyah enenewun, kah dush oogahtawahbuhmegooseen; owh mahyahmahwe‐kechetwahwandahgoozid, kuhya mahyahmahwe‐mushkahwezid kahgenig. Amen.

¹⁷ Ahyaungwahmim egewh kachetwahwezejig oomah uhkeeng duhzhe kechetwahwezewin, cheïshpanindezoosigwah, kuhya cheähpanemoosigwah ewh netuh‐wuhyazhingamahguk tebenuhwawezewin, cheähpanemoowaud atuh Bamahdezid Kesha‐Muhnedoo owh mahnenung gwaushkuhwud ahnooj gagoo meegewawinun wawane cheähyooyung;

¹⁸ Chemenoo‐doodahgawaud, chebahtuhyeënuddenig oomenoo‐doodumoowinewaun, chenetuh‐meegewawaud, chekeshawahdezewaud;

¹⁹ Cheähsunjegoowaud wanesheshing minjemoosechegun ewh kaduhgoomahguk peenish tuhgwishenoomahguk ewh kezhegud, cheminjemenuhmoowaud ewh kahgega‐bemahdezewin.

²⁰ O Timotheus, guhnuhwandun ewh kahpuggedenuhmahgooyun cheguhnuhwanduhmun, meewetooyun maje‐ezhewabukkin kuhya ningood anahbuttussenoogin kekedoowinishun, kuhya ahgoonwatahdewinun enewh ahneshah kekandahsoowin azhenekahdagin:

²¹ Enewh ahnind kahmeekindungig keöonje‐pukkawug emuh dabwayanduhmoowining. Shahwandahgoozewin mahnoo kegahahyaun. Amen.