I. JOHN 2 - Ottawa New Testament Penteteuch and Psalms 1874

¹ Nindahbenoojeëmedoog, oonoo uhyeëen kedoozhebeühmoonenim cheöonje‐mujje‐ezhechegasewag. Kishpin dush ahweyah mujje‐ezhechegad, kedahyahwahnaun kuhnoodahmahga‐wenene, kakuhnooduhmoonung anahsuhmuhbid owh Wayoosemind, me suh Jesus Christ owh quuhyuk‐ezhewabezid.

² Mesuh owh kahnebootoonung oonje kemujjeëzhewabezewinenahnin; kahween atuh kenuhwind kemujje‐ezhewabezewinenahnin, oonje suh goo kuhkenuh mujje‐ezhewabezewinun oomah uhkeeng atagin.

³ Me suh dush kaöonje‐kekanindezooyung chekekanemung, kishpin guhnuhwanduhmoowung enewh ookuhgequawinun.

⁴ Owh akedood, Nekekanemah, guhnuhwanduhsig dush enewh ookuhgequawinun, kuhkenuhwishke, kah dush ookekishkunseen ewh dabwawin.

⁵ Ahwagwan dush ganuhwanduhmoogwan ewh oodekedoowin, mesuh owh manoo‐sahgeäud enewh Kesha‐Muhnedoon, me dush wanje‐kekanduhmung ewh kekishkahwung.

⁶ Owh akedood, Nekekishkuhwah, mahnoo tahezhewabeze debishkoo ween kahezhewabezid.

⁷ Nejekewaëdoog, kahween ooshke‐kuhgequawin ahwunsenoon oo‐oo azhebeühmoonenuhgoog, kata‐kuhgequawin suh goo wuhyashkud kahkuhgekemegooyagoobun. Kata‐kuhgequawin me suh ewh ekedoowin wuhyashkud kahnoonduhmag.

⁸ Menuhwah, ooshke‐kuhgequawin kedoozhebeühmoonenim, duhyabwamahguk emuh ween oodezhetwahwining kuhya emuh kenuhwah kedezhetwahwinewaung: oonje ahzhuh keïshquah‐kushke‐tebekuk, kuhya quuhyuk wahsayahzewin noongoom magwah wahsayahmahgud.

⁹ Owh dush akedood, Wahsayahzewining nindahyah, kishpin sheenganemaud enewh wejekewaün, kayahbe emuh magwa kushke‐tebekuk ahyah.

¹⁰ Owh suhyahgeaüd enewh wejekewaün duhneze emuh wahsayahzewining, kah dush gagoo ookekishkunseen kaöonje‐pukkittashingebun.

¹¹ Owh dush ween shaunganemaud enewh wejekewaün ahyah emuh magwa kushke‐tebekuk kuhya bemoosa emuh magwa kushke‐tebekuk, kah dush ookekanduhseen aneezhaud, oonje kuhkeepeengwaëgood ewh kushke‐tebekud.

¹² Kemahjebeühmoonenim kenuhwah ahbenoojeewedoog, oonje kewabenuhmahgooyag kemujje‐ezhewabezewinewah oodezhenekahzoowining oonje.

¹³ Kemahjebeühmoonenim, kenuhwah wayoosemegooyag, oonje kekekanemag owh wuhyashkud kahahyaud Kemahjebeühmoonenim, kenuhwah ooshkenuhwawedoog, oonje kemahmauzheäg owh mujje‐ahyahahwish. Kemahjebeühmoonenim, ahbenoojewedoog, oonje kekanemag owh Wayoosemind.

¹⁴ Kegemahjebeühmoonenim kenuhwah wayoosemegooyag, oonje kekanemag owh wuhyashkud kahahyaud. Kegemahjebeühmoonenim kenuhwah ooshkenuhwawedoog, oonje mushkahwezeyag kuhya kekishkuhmag ewh oodekedoowin Kesha‐Muhnedoo, kuhya kemahmauzheäg owh mujje‐ahyahahwish.

¹⁵ Kagoo sahgetookagoon ewh uhkee, gamuh enewh uhyeëen oomah uhkeeng ayaugin. Kishpin ahweyah sahgetood ewh uhkee, kahween peenjenuh oosahgeähseen enewh Wayoosemindjin.

¹⁶ Ahnooj gagoo oomah uhkeeng duhzhe ezhewabezewin, azhemujje‐nunduhwahduhmoomahguk ewh weyausemah, azhemujje‐nunduhwanduhmoomahguk ooshkinzhegoomah, kuhya ookechetwahwanemoowinewaun egewh bamahdezejig, kahween Wayoosemind oonjeemahgussenoon, uhkeeng suh debandahgwud.

¹⁷ Uhkee sah tahmahjahmahgud, kuhya uhkeeng duhzhe nunduhwanduhmoowin: owh dush ween andoodung oodenanduhmoowin Kesha‐Muhnedoo kahgenig tahbemahdeze.

¹⁸ Ahbenoojewedoog, zhuhyegwah weïshquah‐kezhegud: debishkoo dush kahnoonduhmag chewetuhgwishing anti‐Christ, noongoom bahtuhyeïnwug egewh anti‐Christug; mesuh wanje‐kekanduhmung zhuhyegwah cheweïshquah-kezheguk.

¹⁹ Keöonje‐sahgahahmoog emuh anduhzhe‐mahoonjeëdeyung kah muh kedebandahgoozesewug emuh: kishpin muh debandahgoozewahpun emuh uhpena tahgeäunwahjewug keweedookoonungwahpun; kesahguhmooog dush ween, chekekandahgoozewaud ewh kuhkenuh anduhshewaud keweedookahwesenoowungwah.

²⁰ Kenuhwah dush ween kegepesegenuhmahgoowah owh Pahnezid, kuhya kekekandaunahwah kuhkenuh uhyeëen.

²¹ Kahween kegeöonje‐mahjebeühmoosenoonenim oonje kekanduhsewag dabwawin, oonje dush atuh kekanduhmag, kuhya kekanduhmag kewuhnemoowin chedebandahgwussenoog emuh dabwawining.

²² Ahwanan owh natuh‐kewuhnemood? kah nuh ween owh akedood, Jesus kahween Christ ahwese? Mesuh owh anti‐Christ, owh ahyahgoonwayanemaud enewh Wayoosemindjin kuhya enewh Wagwissemindjin.

²³ Ahwagwan owh ahyahgoonwayanemahgwan enewh Wagwissememindjin kahween oodahyahwahseen enewh Wayoosemindjin; owh dush duhyabwayanemaud enewh Wagwissemindjin oodahyahwaun kuhya enewh Wayoosememindjin.

²⁴ Mahnoo kegahkekishkahnahwah ewh kahnoonduhmag wuhyashkud; kishpin kekishkuhmag ewh wuhyashkud kahnoonduhmag, kegahkekishkahgoowaug owh Wagwisemind kuhya owh Wayoosemind.

²⁵ Me suh maunduh wahweendahmahgawin, kahwahweenduhmuhweyummingid kahgega‐bemahdezewin.

²⁶ Oonoo uhyeëen kedoozhebeühmoonenim, debahje-mugwah egewh wahpukkawenenagoog.

²⁷ Kayahbe suh kekekishkahnahwah ewh kahpeseegenuhmahgooyagoobun, kah dush kemuhnazesenahwah ahweyah chekekenooahmoonag; ewh dush kahpesegenuhmahgooyag mesuh kakenooahmahgooyag ahnooj gagoo, dabwamahgud suh ewh, kahween kuhkenuhwishkemahgussenoon, debishkoo dush kahezhekekenooähmahgooyag oo‐oo, mesuh kaminjemanduhmag.

²⁸ Noongoom dush ahbenoojewedoog, ahyahyook emuh weyowing Jesus; uhpe dush pahnahgoozid chesoongedaäyung, cheähgujjeesewung dush anahsuhmuhbid uhpe tagwishing.

²⁹ Kishpin kekanduhmag ewh menoo‐ezhewabezid kekekandahnahwah anduhshid andoodung quuhyuk‐ezhewabezewin ween keöonje‐neegid.