I. CORINTHIANUN 7 - Ottawa New Testament Penteteuch and Psalms 1874

¹ Enewh dush ween uhyeëen kahpeejebeühmahweyagoon: Tahoonisheshin owh enene wetaungenahsig enewh equawun.

² Ewh dush ween, oonje peshigwahdezewinun, anduhshid enene oogahahyahwaun tebenuhwa wewun, kuhya anduhshid equa oogahahyahwaun tebenuhwa oonahbamun.

³ Enene oogahdoodahwaun enewh wewun kadoodahwemindebun kuhya equa oogahdoodahwaun enewh oonahbamun kadoodahwemindebun.

⁴ Kahween owh equa ootebanduhseen tebenuhwa weyow, oonahbamun atuh ootebanemegoon: kuhya dush enene kahween ootebanduhseen tebenuhwa weyow, wewun atuh ootebanemegoon.

⁵ Kagoo keemoodekagoon mamashquaud, kishpin atuh nuhyazh mahmahwe enanduhmag wanebik, cheöonje‐puggenedezooyag emuh keëquishemoowining kuhya ahnuhmeähwining; nayaub dush menuhwah wedegandeyook, koonemah kedahgekuhgwatebanemegoowah owh mujje‐muhnedoo chewepezhigwahdezeyag.

⁶ Puggedenegoowin oo‐oo nindoonje‐ekid, kahween kuhgequawin ahwunsenoon.

⁷ Nindahminwandum kishpin kuhkenuh enenewug azheähyahwahpun debishkoo neen azheähyaun. Anduhshid suh enene oomeenegoon enewh Kesha‐Muhnedoon tebenuhwa oomeenegoowin, pazhik oo‐oo ezheähyahne oomeenegoowin, pakahnezid puhkaun ezheähyahne.

⁸ Nindenaug dush pwahyah‐weedegandejig kuhya egewh shegaug, Tahoonesheshinene kishpin azheähyahwaud debishkoo neen azheähyahyaun.

⁹ Kishpin dush kushketoosigwah chepwah‐wedegawaud tahweedegawug: nahwuj muh tahoonesheshine cheweedegangawahpun dush ween chechahgezoong.

¹⁰ Egewh dush wahdegandejig nindenaug, kahween neen, owh suh Tabaningad, Kahween owh equa oogahnuhguhnahseen enewh oonahbamun:

¹¹ Kishpin dush wemahjaud, kahween tahweedegase, gamuh nayaub oogahnaunzekahwaun oonahbamun: kahween kuhya enene oogahwabenahseen enewh wewun.

¹² Ahnind dush nindenaug neen, kahween owh Tabaningad: Kishpin wejekewaëmah ahyahwaud enewh equawun duhyabwayanduhsenegoon, enanduhmenid cheweedegamegood, kahween oogahwabenahseen.

¹³ Kuhya owh equa ayahwaud enewh enenewun duhyabwayanduhsenegoon, kishpin enanduhmenid cheweedegamegood, kahween oogahnuhguhnahseen enewh oonahbamun.

¹⁴ Owh muh duhyabwayanduhsig enene oonje peeneze enewh wewun, kuhya owh duhyabwayanduhsig equa oonje peeneze enewh oonahbamun: kishpin oo‐oo keëzhewabussenoogebun tahgeweenezewug kenejahnesewaug; noongoom dush peenezewug.

¹⁵ Kishpin dush ween owh duhyabwayanduhsig wemahjaud, mahnoo tahmahjah. Owh wejekewaëmah gamuh oodahwamahemah kahween debandahgoozese oo‐oo azhewabukkin: emuh suh pezaunewawining kegeëzhenundoomegoonaun owh Kesha‐Muhnedoo.

¹⁶ Ahneen dush Oh equa wanahbameyun, azhekekanduhmun, koonemah kedahbemahjeäh kenahbam? kuhya ahneen azhekekanduhmun, keen aneneweyun, koonemah kedahbemahjeäh keweesh?

¹⁷ Debishkoo owh Kesha‐Muhnedoo kahezhemuhmeenaud kuhkenuh anduhshenid enewh enenewun, debishkoo owh Tabaningad kahezhenundoomaud kuhkenuh anduhshenid enewh enenewun, me suh kaëzhebemoosanid. Mesuh nahsaub anahkoonegayaun tebe anduhzhe ahyahwahgwan egewh anuhmeähjig.

¹⁸ Ahweyah nuh enene nundoomah kahkekenoowahje-kishkezhegahzood? kahween oogahwabenunseen ookekenoowahje‐kishkezhegahzoowin. Ahweyah nuh nundoomah pwah‐kekenoowahje‐kishkezhegahzood? kahween tahkekenoowahje‐kishkezhwahse.

¹⁹ Kah ningood ahpeetandahgwussenoon ewh kekenoowahje‐kishkezhegahzoowin, kuhya kah ningood ahpeetandahgwussenoon pwah‐kekenoowahje‐kishkezhegahzoowin, ewh suh atuh guhnuhwanduhming ookuhgequawinun owh Kesha‐Muhnedoo.

²⁰ Kuhkenuh egewh enenewug tahezheähyahwug emuh nahsaub nundoomegoowining kahezhenundoomindwah.

²¹ Kegenundoomegoo nuh magwah buhmeetahguneweyun? kagoo bahbahmandunkan: kishpin dush kushketooyun chepuhgedenegooyun, ahwahshema ahbujjetoon.

²² Owh muh nandoomegood enewh Tabaninganejin, magwah buhmeetahgunewid, oopuggedenegoon enewh Tabaninganejin: owh dush nandoomind magwah tebanindezood, oodoobuhmeetahgunemegoon enewh Christun.

²³ Kekishpenuhnegoom ewh enuhginzoowin; kagoo kegahbuhmeetahgunemegoosewaug egewh enenewug.

²⁴ Nejekewaëdoog, anduhshid enene azhenundoomind, me suh kaëzheähyaud emuh anahsuhmid owh Kesha‐Muhnedoo.

²⁵ Kaëzhewabezewaud egewh kegaungooquawug kahween gagoo nindegoose owh Tabaningad: pooch kegahwahweenduhmoonenim enanduhmaun, neen kahshahwanemid owh Tabaningad cheäungwahmezeyaun.

²⁶ Nindenandum tahoonisheshinene noongoom magwah kootuggeëgooyag, nindekid tahoonesheshinene enene oo‐oo cheëzheähyahpun.

²⁷ Ahzhuh nuh keweedegamah equa? kagoo nunduhwandunkan chepwah‐wedegayun. Kishpin dush wedegamahsewudan equa? kagoo nunduhwanemahkan equa.

²⁸ Kishpin dush wedegayun kahween kegemujje‐ezhechegase: kishpin dush kuhya wedegad kegaungooqua kahween kemujje‐ezhechegase. Ahnahwe dush ween oogoo tahkootuggetoowug emuh weyahsemaung: neshahgwanim dush cheweenduhmoonenuhgoogebun.

²⁹ Oo‐oo suh nindekid, nejekewaëdoog, tuhquahmah-gudoon kebemahdezewinenahnin: nundahwandahgwud dush, egewh wahwejig cheëzheähyahwahpun debishkoo egewh wahwesigoog;

³⁰ Egewh dush mawejig, debishkoo mawesigoog cheezheähyahwahpun; kuhya egewh mwahjegezejig, debishkoo egewh mwahjegezesigoog; egewh kaushpenuhjegajig, debishkoo egewh waduhyeemesigoog;

³¹ Egewh dush ayoojig maunduh uhkee, pukkaun cheenahbujjetoosigwah; tahishquahsamahgud muh noongoom azhenahgwuk maunduh uhkee.

³² Kenunduhwanemenim muh cheähpeche‐bahbahman-duhsewag gagoo. Owh suh wahwesig oobahbahmandaun enewh uhyeëen tabandungin owh Tabaningad, kaëzheminwanemegood enewh Tabaninganejin:

³³ Owh dush wahwid oobahbahmandaunun oomah uhkeeng duhzhe uhyeëen, kaëzheminwanemegood enewh wewun.

³⁴ Pukkaun dush ezhewabeze owh wanahbamid equa kuhya owh kegaungooqua. Owh kegaungooqua oobahbahmandaunun enewh tabandungin owh Tabaningad, cheöonjepeenezid emuh weyowing kuhya emuh oojechaugoong: owh dush wanahbamid equa oobahbahmandaunun oomah uhkeeng duhzhe uhyeëen, kaëzheminwanemegood enewh oonahbamun.

³⁵ Oo‐oo dush nindoonje‐kekid cheöondezeyag kenuhwah; kahween kewepuggedenuhmoosenoonim nuhgwahgun, ewh atuh manwahbuhmenahgwuk, cheöonje‐buhmeetuhwag owh Tabaningad kuhnuhga gagoo nundoomeëgoosewag.

³⁶ Kishpin ahweyah enene enandung mujje‐doodahwaud enewh ookegaungooquamun, kishpin equang ahzhuh ketaähpeetezenid, kuhya azhenundahwandahgwuk, mahnoo enandung tahdoodum, kahween mujje‐ezhechegase: mahnoo tahweedegandewug.

³⁷ Owh dush ween swaungekahbahwid emuh oodaïng, nunduhwandahgoozesig, kushketood dush ween tebenuhwa azhenunduhwandung cheëzhechegad, kuhya kahenahkoonegad emuh oodaïng weguhnuhwanemaud enewh ookegaunooquamun, menoochega.

³⁸ Me dush owh pagedenaud chewedeganid menoochega; owh dush pagedenahsig chewedeganepun ahwahshema menoojega.

³⁹ Owh equa tebandahgooze oonje ewh tebahkoonegawin, menik kabemahdezenid oonahbamun; kishpin dush neboonid enewh oonahbamun, puggedenegahzoo cheweedegamaud enewh wahweedegamahjin; emuh atuh oodezhetwahwining owh Tabanemenung.

⁴⁰ Nahwuj suh tahmenoo‐ahyah kishpin nezheka ahyaud, neen nindenandum: kuhya nindenandum ahyahwug enewh Oojechaugwun Kesha‐Muhnedoo.