I. CORINTHIANUN 15 - Ottawa New Testament Penteteuch and Psalms 1874

¹ Menuhwah dush, nejekewaëdoog, kewahweenduhmoonenim ewh minwahjemoowin kahkuhgekemenuhgoogebun, ewh kahoodahpenuhmag, kuhya emuh anduhzhe‐nebahweyag;

² Mesuh kuhya ewh wanje‐bemahjeëgooyag, kishpin minjemanduhduhmag enewh kahkuhgekemenenuhgoogebun, kishpin ahneshah kedabwayanduhsewagwan.

³ Ewh suh ahpeche netum kegepuggedenuhmoonenim ewh neen kahmeenegooyaun, owh Christ kenebood kemujje‐ezhewabezewinenahnin oonje, debishkoo ekedoomahguk enewh kechetwah‐oozhebeëgunun;

⁴ Kuhya emuh chebaguhmigoong keähsind, nasuhgoonuhgudenig dush keähbejebaud, debishkoo akedoomahguk enewh kechetwah‐oozhebeëgunun:

⁵ Kewahbuhmegood enewh Cephasun, me pe dush enewh matahswe‐ahshe‐neezhenejin;

⁶ Bahnemah nahguj, oogewahbuhmegoon ahwahshema kahnaunwaukoozenejin wejekewaëmaun mahmahwe; egewh dush gagah kuhkenuh noongoom kayahbe bemahdezewug, ahnind dush ahzhuh kenebahwug.

⁷ Menuhwah dush nahguj, oogewahbuhmegoon enewh Jamesun; me pe kuhkenuh enewh Apostleün.

⁸ Ahpeche dush isquauj kuhya neen ningewahbuhmah, debiskoo ahweyah nahgid chepwah oojechesanig.

⁹ Ahpeche muh noondaush nindahpeetandahgooz dush ween apeetandahgoozewaud kuhkenuh egewh Apostleüg, kah suh dush nintaähpeetandahgoozese Apostle cheëzheweenegooyaunbaun, ningekooduggetoon muh oodahnuhmeähwin owh Kesha‐Muhnedoo.

¹⁰ Oonje ewh ooshahwanjegawin owh Kesha‐Muhnedoo nindezheähyah noongoom azheähyahyaun: kuhya dush ewh ooshahwanjegawin kahmeenegooyaun kahween keäunwawezemahgussenoon; ahwahshema suh ningekeche‐ahnooke dush ween kuhkenuh wenuhwah; kahween ahnahwe neen tebenuhwa, ewh suh ween Kesha‐Muhnedoo ooshahwanjegawine‐weedookahgawin kahweejewegooyaun.

¹¹ Benuh dush mesuhwah neen ahweyaun gamuh wenuhwah ahwewaud, me oo‐oo azhekuhgequayaung nenuhwind kuhya dush kenuhwah oo‐oo kahezhedabwayanduhmag.

¹² Kishpin dush enahjemind owh Christ ewh keähbejebaud oonje neboong, ahneeshwin ahnind kenuhwah ekedooyag, kahween gagoo ahbejebahwin duhgoomahgussenoon?

¹³ Kishpin duhgoomahgussenook ewh ahbejebahwin, kahween keähbejebahse owh Christ:

¹⁴ Kishpin dush keähbejebahsig owh Christ, kah ningood enahbuttussenoon nekuhgequawinenaun, kah kuhya ningood enahbuttussenoon kedabwayanduhmoowinewah.

¹⁵ Menungakah, kuhya nenuhwind nindezhekekanemegoomin kekuhkenuhwishke‐wahjemungid owh Kesha‐Muhnedoo ewh keähbejebahaud enewh Christun: kah muh oogeähbejebahahseen, kishpin kagate ahbejebahsigwah naboojig.

¹⁶ Kishpin muh ahbejebahsigwah egewh naboojig kahween keähbejebahahse owh Christ:

¹⁷ Kishpin dush keähbejebahahsewind owh Christ, kah ningood enahbuttussenoon kedabwayanduhmoowinewah; kayahbe kedahyaum emuh kemujje‐ezhewabezewinewaung.

¹⁸ Egewh dush kahnebahjig emuh Christing kebahnahdezewug.

¹⁹ Kishpin oomah atuh bemahdezewining ahpanemooyaung owh Christ, nenuhwind nemahmahwe‐ketemahgezemin anduhshewaud kuhkenuh enenewug.

²⁰ Ahzhuh dush ween keähbejebah owh Christ, kuhya keëzheähyah debishkoo owh netum sagukkenegahzood anduhshewaud egewh kahnebahjig.

²¹ Ewh dush oonje owh enene ketuhgwishenoomahguk ewh neboowin, mesuh goo kuhya oonje owh enene ketuhgwishenoomahguk ahbejebahwin.

²² Adam wanje‐neboowaud kuhkenuh, me suh kuhya owh Christ kaöonje‐bemahdezewaud kuhkenuh.

²³ Kuhkenuh egewh enenewug tebenuhwa azhetebandahgoozewaud; Christ suh netum sagukkenegahzood; me pe dush egewh dabandahgoozejig emuh Christing uhpe tagwishing.

²⁴ Me dush cheïshquah‐uhkeewung, uhpe pagedenuhmahwaud oogemahwewin enewh Kesha‐Muhnedoon Wayoosemindjin; uhpe dush kemahmaunzhetood kuhkenuh enahkoonegawin kuhya kuhkenuh oogemahkundahgawin kuhya kushkeäwezewin.

²⁵ Ween muh nundahwandahgooze cheöogemahwid, peenish egoo ahnahmesit keähsaud kuhkenuh mahgahnegoojin.

²⁶ Owh ishquauj kabahnahjeïnd mahgahzood me suh ewh neboowin.

²⁷ Kuhkenuh mahween uhyeëen ahnahmesit oogahahtoonun. Uhpe dush oo‐oo akedood, kuhkenuh uhyeëen kemahmauzhechegahdanewun, kekandahgwud suh ewh owh kahmahmahzhetahmahwaud kuhkenuh uhyeëen, kahween ween kemahmahzheëgoozese.

²⁸ Uhpe dush kemahmauzhechegahdanig kuhkenuh enewh uhyeëen, me dush ewh uhpe owh Wagwissemind chetebanemegood enewh kahmahmauzhetahmahgoojin kuhkenuh enewh uhyeëen, ween dush owh Kesha‐Muhndoo chekeche‐tebandahsood.

²⁹ Kishpin dush oo‐oo ezhewabussenook, ahneen kaezhechegawaud egewh kahbaptizooïndjig oonje ewh neboong, kishpin egewh naboojig kuhnuhga ahbejebahsigwah? ahneeshwin dush baptizooïndwah oonje ewh neboong?

³⁰ Ahneeshwin dush kuhya anduhsoo tebahegunag nebahweyung emuh nuhneezahnezewining?

³¹ Kagate ninkekid oonje ewh kedoonahnegoozewinewah ayahmaun emuh Christ Jesusing Tabanemenung, nenib suh andussoo‐kezheguk.

³² Kishpin anahdezewaud enenewug kemegahnugwah egewh ahwaseeyug emuh Ephesusing, wagoonan dush wandezeyaun, kishpin ahbejebahsigwah naboojig? umba wesenedah kuhya menequadah; wahbung muh keneboomin.

³³ Kagoo wuhyazhindezookagoon: mujje‐guhnoonindewin oonje bahnahjechegahda ewh menoo‐ezhewabezewin.

³⁴ Ezhekooshkooseyook emuh quuhyuk‐ezhewabezewining, kagoo dush mujje‐ezhechegakagoon; ahnind muh kahween ookekanemahsewaun enewh Kesha‐Muhnedoon: cheähgujjeëgooyag oo‐oo nindoonje‐ekid.

³⁵ Ahweyah dush ween oo‐oo tahekedoo, Ahneen azheahbejebahindwah egewh naboojig? Ahneen kuhya azheöoweyowewaud uhpe ahyahbejebahwahjin?

³⁶ Keen kakebahdezeyun, ewh suh ween kategahduhmun kahween sahgukkeemahgussenoon, me atuh kaneboomahguk.

³⁷ Ewh dush kategahduhmun, kahween kepuggedenunseen ewh weyowemah pecheenug kanetuhwuggemahguk, me atuh pezheshigoo‐menekaunewung, koonemah baquazhegunoowunoogwan, gamuh pakaunudoogwan:

³⁸ Kesha‐Muhnedoo dush ooweyowetoon ewh suh azheminwandung, kuhya anduhshing menekaun ewh tebenuhwa azheweyowemahguk.

³⁹ Kuhkenuh weyaus kahween nahsaub ahwunsenoon: pazhigwun suh goo enene‐weyaus, pukkaun menuhwah ezheweyausewewug ahwaseeyug, pukkaun kuhya egewh gegooyug, kuhya dush pukkaunud ewh penase‐weyaus.

⁴⁰ Ahyahmahgudoon kuhya keezhegoong duhzhe‐weyowemaun, kuhya oomah uhkeeng duhzhe weyowemaun: egewh kezhegoong duhzhe weyowemaug pazhigwun pezhegandahgoozewin, kuhya uhkeeng duhzhe weyowemaug pazhikwun ewh pakahnuk peshegandahgoozewin.

⁴¹ Pazhikwunene suh ewh oopezhegandahgoozewin kezhike‐keezis, kuhya pukkaun ezheähyahne oopezhegandahgoozewin owh tebike‐kezis, kuhya pukkaunudene oopezhegandahgoozewinewah ahnungoog: papukkaun suh ezhepezhegandahgoozewug egewh ahnungoog.

⁴² Me suh nahsaub azheähyahnig oodahbejebahwinewah naboojig. Puggedenegahzoo emuh bahnahdezewining, ahbejebah dush wekah chebahnahdezesig:

⁴³ Puggedenegahzoo emuh dahbussandahgoozewining, ahbejebahah dush emuh pezhegandahgoozewining: puhgedenegahzoo emuh shahgwewewining, ahbejebahah dush emuh mushkahwezewining.

⁴⁴ Puggedenegahzoo weyausewe‐weyowemah, ahbejebahah dush oojechaugoowe‐weyowemah. Ahyahmahgud suh weyausewe‐weyowemah kuhya dush ahyahmahgud oojechaugoowe‐weyowemah.

⁴⁵ Debishkoo goo azhebeëgahdag, Owh netum enene Adam keëzheäh oojechaug bamahdezid, owh dush ishquauj Adam keëzheäh oojechaugoomah bamahjeëwad.

⁴⁶ Kahween gooshah netum keähyahsenoon ewh wajechaugwandahgwuk, ewh suh atuh weyausemaung anandahgwuk; bahnemah dush ween owh wajechaugwandahgwuk.

⁴⁷ Owh netum enene uhkeeng keöonjee uhkeewandahgooze dush: owh dush pazhik enene mesuh owh Tabaningad keche‐kezhegoong wanjeed.

⁴⁸ Azheähyaud owh akeewandahgoozid, me nahsaub azheähyahwaud egewh akeewandahgoozejig: kuhya dush azheähyaud owh keche‐kezhegoong wanjeed, me suh kuhya nahsaub azheähyahwaud egewh dabandahgoozejig ewede keche‐kezhegoong.

⁴⁹ Kahezheähyahyung dush oodezhenahgoozewin owh akeewandahgoozid, me suh kuhya kaëzheähyahyung oodezhenahgoozewin owh keche‐kezhegoong kahoonjeed.

⁵⁰ Oo‐oo dush nindekid, nejekewaëdoog, ewh weyausemah kuhya misque kah suh kushketoomahgussenoon chetebandahsoomahguk Kesha‐Muhnedoo oodoogemahwewin; kah kuhya ewh natuh‐bahnahduk tahtebandahsoomahgussenoon ewh natuh‐bahnahdussenook.

⁵¹ Benuh, kewahbunduhenim ewh mamaundahwuk; Kahween kuhkenuh kegahnebahsemin, kuhkenuh kegahdaunjeëgoomin.

⁵² Shasekah, ningoo‐puhsungahbing, uhpe ishquauj pootahjegang: tahmuhtwawamahgud ewh pootahjegun, kuhya dush egewh naboojig tahahbejebahahwug wekah chebahnahdezesigwah, kenuhwind kegahdaunjeëgoomin.

⁵³ Oo‐oo mahween natuh‐bahnahdussenook nundahwandahgwud chepesekung ewh kabahnahdussenook, kuhya oo‐oo natuh‐neboomahguk chepesekung ewh natuh‐neboomahgussenook.

⁵⁴ Uhpe dush oo‐oo natuh‐bahnahduk kepesekung ewh natuh‐bahnahdussenook, kuhya oo‐oo natuh‐neboomahguk kepesekung ewh natuh‐neboomahgussenook, me dush ewh uhpe chedebishkoosag ewh ekedoowin wazhebeëgahdag, Neboowin kekoonjegahda emuh mahmauzhetwahwining.

⁵⁵ Oh neboowin, ahneende ewh keshemahgun? Oh chebaguhmig, ahneende ewh kemahmauzhetwahwin?

⁵⁶ Oshemahgun ewh neboowin me suh ewh mujje‐ezhewabezewin; kuhya wanje‐mushkahwezemahguk mujje‐ezhewabezewin me suh ewh tebahkoonegawin.

⁵⁷ Tahmahmooyahwahmah suh owh Kesha‐Muhnedoo, mahnenung ewh mahmauzhetwahwin oonje owh Tabanemenung Jesus Christ.

⁵⁸ Tuhguh dush, suhyahgeënenuhgoog nejekewaëdoog, aungwahmezik, soongekahbahwik, moonzhug chekeche-ahnookeetuhwag owh Tabaningad, kekekandahnahwah gooshah ahneshah ahnookeetahwahsewag owh Tabaningad.