II. PETER 2 - Ottawa New Testament Penteteuch and Psalms 1874

¹ Keähyahwug dush ween ekoo kuhkenuhwishke‐aunwahjega‐wenenewug emuh kahduhzhe‐ahyahwaud egewh ahnishenahbag, debishkoo kaëzheähyahwaud kuhkenuhwishke‐kakenooahmahgajig emuh anduhzhe‐ahyahyag, keemooj kapeetoojig enewh kuhkenuhwishke‐kekooähmahgawinun kaöonje‐nishwuhnahdezing ahgoonwatahwahwaud enewh Tabaninganejin kahkishpenuhnegoowahjin, peetuhmahzoowaud ewh nishwuhnahdezewin, kazhetena chenishwuhnahdezewaud.

² Nebewah dush oogahnoopenuhdoonahwah oomujje‐meekunahwaun; me suh kaöonje‐mujje‐duhzhinchegahdag ewh dabwawine‐meekun.

³ Oonje dush nunduhwanduhmoowaud tebenuhwawezewin kegahbahbahwuhyazhemegoowaug wuhyazhingawine ekedoowinun ahyoowaud: maweshah suh pahahkoo‐nebahmahgussenoonig ootebahkoonegoowinewaun, kuhya pahahkoo‐nebahmahgussenoonig ewh oonahneboomegoowinewaun.

⁴ Kishpin muh Kesha‐Muhnedoo kahshahwanemahsig enewh angenun kahmujje‐ezhecheganejin, kahezheneeswabenaud dush ween emuh mujje‐ishkootang puhsuhkishkezewine‐tuhkoobezoowining, cheguhnuhwanemindwah nahnauzh egoo tebahkoonewa‐kezheguk;

⁵ Kah dush oogeshahwanduhseen kata uhkee, kebemahjeäud dush enewh Noahun kuhya neeshwahswe ahnind, menoo‐ezhewabezewine kuhgequa‐wenenewun, keënahkoonegad dush ween chemooskuhunenig ooduhkeemewaun egewh maje‐ezhewabezejig.

⁶ Keënahkoonega dush ween chechahgahketanig enewh oodanuhwun Sodom kuhya Gomorrha, keëkedood dush ween chebahnahdudenig chekekenoowahbunduhmoowaud egewh menuhwah kamujje‐bemahdezejig;

⁷ Oogebemahjeäun dush quuhyuk‐azhewabezenejin Lotun kahwuhsittuhwanduhmenid oomujje‐ezhewabezewinene enewh maje‐ezhewabezenejin:

⁸ (Owh muh quuhyuk‐azhewabezid enene keweeje‐duhnuhkeemaud enewh, kuhya kewahbuhmaud kuhya kenoondahwaud kemegooshkahdanduhmoon quuhyuk‐azhewabezenejin oojechaugwun anduhsoo kezhegudenig oonje oomujje ezhewabezewinewaun.)

⁹ Owh Tabaningad ookekandaun kaëzheëkoonaud enewh manoo‐ezhewabezenejin emuh oonje kuhgwatebaningawining, kuhya kaëzheguhnuhwanemaud enewh maje‐ezhewabezenejin nahnauzh tebahkoonewa‐kezheguk chekooduggeëmind:

¹⁰ Mamwach enewh anoosanejin emuh weyausemaung emuh weenezewine‐mujje‐nunduhwanduhmoowining, kuhya nashepahpenooduhmenejin enewh oogemahwandahgoozewinun. Kechetwahwanemoowug suh oogoo, kuhya ananduhmoowaud ezhewabezewug, kahween ookootunsenahwaun wemujje‐duhzhinduhmoowaud enewh negaun‐andah goozewinun.

¹¹ Pooch egewh angenug ahnoo ween goo nahwuj mushkahwezewaud kahween oomujje‐duhzhemahsewaun enewh anahsuhmid owh Tabaningad.

¹² Oogoo dush ween debishkoo nabwahkahsegoog kuhya kakanjegasegoog ahwaseeyug kahoonje‐oozheïndjig chekeöosanindwah kuhya chenesindwah, oomujje‐duhzhindahnahwah enewh uhyeëen nasittootunsigwahnin: kagate ahpeche tahbahnahdezewug emuh tebenuhwa ookuhgwahnesuggandahgoozewinewaung;

¹³ Tahtebahuhmahgoozewug suh mujje‐ezhewabezewine‐tebahuhmahgoozewin, oonje minwanduhmoowaud oombege‐wekoongawaud magwah kezhegudenig. Ketuggezewinun kuhya wenezewinun ezheähyahwug, wuhyazhingawaud oonje oonahnegoozewaud magwah weedoopuhmenagwah:

¹⁴ Mooshkenamahgudene ewh peshegwahdezewin emuh ooshkinzhegoowaung, kah dush kushkeöomahgussenene ooshkinzhegoowaun chepoonetoong ewh mujje‐ezhewabezewin; wuhyazhemahwaud enewh swaungekahbahwesenegoon oojechaugoomaun; Ahpeche oonundahwandahnahwah enewh tebenuhwawezewinun emuh oodaëwaung; kagwahnesuggandahgoozejig wanejahnesemindjig ahwewug.

¹⁵ Egewh kahoonje‐pukkajig emuh quuhyuk meekunaung kewuneshenoog dush kenahguhdoowaud oomeekun owh Balaam oogwissun owh Bosor, owh kahsahgetood enewh mujje‐ezhewabezewine‐tebahahmahgoozewinun:

¹⁶ Kenuhneebikemah dush ween oonje oomujje‐ezhewabezewin: owh natuh‐kekedoosig mamaungesha enene inwawining keïnwad oogekenahahmahwahdaun ewh ookuhkebahdezewin owh aunwahjega‐wenene.

¹⁷ Oondahebaunun nabeekahsenoogin ahwewug, enewh ahnuhquudoon kazheähsenoogin oonje keche‐nooding; me suh egewh kaähpuggenindjig emuh akoo‐pesuhgish‐tebekuk kahgenig cheähyahwaud emuh.

¹⁸ Uhpe dush muhmequahzoowine‐ekedoowinun azhekezhewawahjin, tahnuhsug ookeöosanahwaun ahyoowaud weyause‐mujje‐nunduhwanduhmoowinun, kuhya peshegwahdezewin, enewh kahtaöozhemoopuneen oonje oonahnezahnezewinene enewh wanishenenejin.

¹⁹ Magwah wahweenduhmoowahwaud ewh tebanindezoowin, wenuhwah tebenuhwa debandahgoozewug emuh nishwuhnahjekummegezewining: ahwagwanun muh shahgoojeëgoogwan enene, mesuh enewh bahmeetahwahjin.

²⁰ Kishpin muh ahzhuh kahoozhinduhmoowaud enewh nishewahnahduhkummegezewinun ayahmahgukkin oomah uhkeeng emuh mujje‐nunduhwandahmoowining wanjebahmahgukkin oonje kepuhguk‐kanemahwaud enewh Tabaninganejin kuhya Bamahjeëwanejin Jesus Christ, menuhwah beswahbegishinoowaud emuh kuhya mahmahzheïndwah, ishquauj azhewabezewaud nahwuj kuhgwahnesuggandahgoozewug dush ween netum.

²¹ Ahwahshema muh tahgeöonesheshenene chegepuhguk‐kanduhsigwahpun ewh quuhyuk‐ezhewabezewine meekun, ahnoo dush ween kahpuhgukkanduhmoowaud ewh kachetwahwandahgwuk kuhgequawin kahmeenindwahpun chegeöonje‐pukkawahpun.

²² Keëzheähyahwug dush ween debishkoo akedoomahguk ewh duhyabwamahguk nebwahkahwine‐ekedoowin Owh uhnemoosh nayaub oopenaunzekaun oosheguhgoowawin kuhya owh kookoosh kahkesebegenind menuhwah ahwetetebejeshemoonood emuh weenejishkeewuhgaug.