III. JOHN 1 - Ottawa New Testament Penteteuch and Psalms 1874

¹ Owh katezid oomahjebeühmahwaun enewh suhyahgemindjin Gaiusun, neen suhyahgeüg emuh dabwawining.

² Suhyahgeënaun, kekeche‐nunduhwanemin ahwahshema kuhkenuh uhyeëen chemenoo‐ahyahyun kuhya chemenoo‐bemahdezeyun, debishkoo azhemenoo‐bemahdezid kejechaug.

³ Ningekeche‐bahpenandum uhpe kepetuhgwishenoowaud egewh wejekewaëmaug, kepedebahdooduhmoowaud ewh dabwawin kakishkuhmun, debishkoo kuhya keen azhebemoosayun emuh dabwawining.

⁴ Kahween nindahyaunseen gagoo nahwuj kache‐ahpeetandahgwuk moojegezewin dush ween noonduhmaun bemoosawaud nenejahnesug emuh dabwawining.

⁵ Suhyahgeënaun, wawane kedezhechega nuhmunj andoodahwahwudwahwan egewh wejekewaëmaug kuhya egewh mahyahdahwezejig;

⁶ Mesuh egewh dabahjemikig azhekeshawahdezeyun anahsuhmewaud egewh anuhmeähjig: kishpin azhenunduhwanemik Kesha‐Muhnedoo azheweedookahwudwah uhnepahbahmahdezewaud kegahmenoochega.

⁷ Oonje mahween ewh oodezhenekahzoowin kesahguhumoowaud, keöodahpenuhmahwahsigwah kagoo enewh mayuggezenejin.

⁸ Kenundahwandahgoozemin dush ween cheöodahpenungwah oogoo denoowug, cheöonje‐weedookahzooyung emuh dabwawining.

⁹ Ningemahjebeühmahwaug egewh anuhmeähjig: kah dush ween Diotrephes manwandung chenegaunandahgoozid emuh anduhzhe‐ahyahwaud, nepeendegunegoosemin.

¹⁰ Kishpin dush ezhahyaun ewede, ningahmequanduhmoowah enewh oodezhechegawinun azhechegad, mujje‐duhzhemenung mujje‐kekedoowinun: kah dush oonuhanduhseen ewh, kahween ween oopeendegunahseen enewh wejekewaëmaun, kuhya ookenahahmahwaun enewh wahpeendegunahnepun, kuhya ahnuhmeä‐weguhmigoong oodoonje‐sahgeje‐wabenaun.

¹¹ Suhyahgeënaun kagoo noopenuhdunkan ewh mujje‐uhyeewish, ewh atuh wanesheshing. Owh manoo‐ezhechegad Kesha‐Muhnedoong keöonje‐neege: owh dush majeëzhechegad kahween oogewahbuhmahseen Kesha‐Muhnedoon.

¹² Demetrius oomenoo‐duhzhemegoon kuhkenuh enewh bamahdezenejin, kuhya ewh dabwawin: aahe kuhya nenuhwind nemenoo‐duhzhemahnaun: kekekandahnahwah dush ween chedabwamahguk nindebahjemoowinenaun.

¹³ Nebewah ningeähyaunun wahoozhebeëgayaunbaun, kahween noongoom ahyooyaun ewh oozhebeëgun‐ahboo, kuhya oozhebeëgun‐ahtik kegahezhebeühmoosenoon:

¹⁴ Nindahpanim wuhyebuh chewahbuhmenaun, medush cheguhnoonindeyung meche‐wahbundeyung, Mahnoo pezaunewawin kegahahyaun. Keduhnuhmikahgoog neeje‐kewaënahnig. Ahnuhmekow egewh kejekewaënahnig azhenekahzoowaud ezheweenudwah.