HEBREWUN 9 - Ottawa New Testament Penteteuch and Psalms 1874

¹ Benuh dush kagate keduhgoomahgudoon emuh netum kekindewining enewh ahnuhmeähwine‐ezhechegawinun, kuhya oomah uhkeeng duhzhe kechetwah‐ahnuhmeä‐weguhmig.

² Keoözhechegahda mahween ewh puhpuhgeewuhyaune‐ahnuhmeä‐weguhmig, ewh natumesing wegewaum emuh keduhgoomahguk ewh wahsuhkoonanjegun‐ahbik kuhya uhdoopoowin kuhya ewh wahbundahewawine‐buhquazhegun; mesuh oo‐oo kachetwahwandahgwuk ahnuhmeä‐weguhmig azhenekahdag.

³ Menuhwah dush peenjuhyeëeng agoodag ewh menuhwah pazhik kebuhgoojegun, ewh ahnuhmeä‐weguhmig mahyahmahwe‐kechetwahwandahgwuk azhenekahdag;

⁴ Me emuh keähtag ewh oozahwah‐shooneyah ooquazegun‐ahbik, kuhya ewh kekindewine‐ahtahsoowin kuhkenuh anegookwaug wazahwah‐shooneyahkahchegahdag, peenjuhyeëe dush keähtag ewh oozahwah‐shooneyah ahkeekoons manna keähtag emuh, kuhya ookebeensemun owh Aaron kahsahgebuggezenid, kuhya enewh ahsineen emuh keöozhebeëgahdag ewh kekindewin.

⁵ Oogejuhyeëe dush egewh Cherubim pazhegandahgoozejig oogeähgahwahtashkahnahwah ewh shahwanjegawuhbewin; oonoo uhyeëen kahween kekushketoosemin noongoom chewahweenga‐duhzhindahmaung.

⁶ Uhpe dush oonoo uhyeëen wahwazhechegahdagin, moonzhug peendegawug egewh sahsahgewejega‐wenenewug emuh ewh natumesing ahnuhmeä‐weguhmigoong; ahnookeetuhmoowaud ewh oobuhmeetahgoowin owh Kesha‐Muhnedoo.

⁷ Emuh dush ween menuhwah pazhik ahnuhmeä‐weguhmigoong ahbeting atuh anduhsoo kekenoonoowin peendega owh keche‐sahsahgewejega‐wenene nazhekawezid uhnegegezid ewh misque ewh sahsahgewetood oonje ween tebenuhwa, kuhya oonje ookuhkebahdezewinewaun ahnishenahbag.

⁸ Owh Kache‐peenezid Oojechaug weëkedood oo‐oo, Muhshe kekanjegahdasenook ewh meekun paundegamook emuh mahyahmahwe kechetwah‐ahnuhmeä‐weguhmigoong, magwah keduhgoomahguk ewh netum puhpuhgeewuhyaune‐weguhmig.

⁹ Kekenoowahjechegun suh ahwun oo‐oo nahnauzh egoo noongoom, emuh sahsahgewechegahdag enewh meegewawinun kuhya enewh sahsahgewejegunun, enewh kashkeäwezemahgussenoogin owh mahkindung wahweenga chemenoo‐ezhewabezeïnd emuh ookekanindezoowining;

¹⁰ Meejim kuhya menequawinun, kuhya ahnooj doowun kesebeginegawinun, kuhya weyausewe‐ezhetwahwinun ahwunoon, kahezhekahgaunzoomindwah chemeekinduhmoowaud nahnauzh debishkoosag cheäunjesing ahnooj gagoo.

¹¹ Owh dush Christ kahtuhgwishing keche‐sahsahgewejega‐wenenewid chemeekindung enewh wanesheshingin uhyeëen kapuhgumme‐ahyaugin, oonje ewh ahwahshema ashpandahgwudenig kuhya ahwahshema wanesheshinenig puhpuhgeewuhyaune‐weguhmig, ewh ooneenjemaung kahoonje‐oozhechegahdasenook, me suh weëkedoong, kahween oomah uhkeeng keduhzhe‐oozhechegahdasenoon;

¹² Ahbeting kepeendega emuh mahyahmahwe‐keche‐ahpeetandahgwuk, kahween ewh meezahboozoog oomisqueemewah, kah kuhya pezhekeensug oomisqueemewah, ween atuh tebenuhwa oomisqueem oogeähyoon kahoonje‐peendegad emuh mahyahmahwe‐kechetwahwandahgwuk ahnuhmeä‐weguhmigoong, kahkushketuhmoonenung ewh kahgega‐bemahjeëgoowin.

¹³ Kishpin mahween ewh oomisqueemewah egewh ahyahba‐pezhekewug kuhya mesahboozoog, kuhya ewh pezhekeense‐pingwee seeguhunduhwindwah egewh wahnezejig, keöonje‐peenezewaud ewh weyausewe‐peenezewin,

¹⁴ Keche ahwahshema dush ween oomisqueem owh Christ; owh oonje keweedookahgood enewh kuhyahgega‐bemahdezenejin Keche‐Oojechaugwun kepuggedenuhmoowaud enewh Kesha‐Muhnedoon ewh ooweyow kuhnuhga wahnussenoog, kaënandahgwuk chepeenetuhmahgooyag kekekanindezoowinewah oonje enewh neboowine‐ahnookeewinun, chebuhmeetuhwag owh bamahdezid Kesha‐Muhnedoo?

¹⁵ Mesuh wanje‐guhnoodahmahga‐wenenewid emuh ooshke‐kekindewining, ewh neboowin wanje‐ekoonegahdag enewh mujje‐ezhewabezewinun emuh netum kekindewining kahahtagin, egewh nandoomindjig cheöonje‐oodahpenuhmoowaud ewh wahweendahmahgawin ewh chekahgega‐debandahsoowaud:

¹⁶ Kishpin ahyaug ewh tebandahsoowine‐wahweendahmahgawin nundahwandahgwud cheähyahnig ooneboowin owh kahoozhetood ewh tebandahsoowine‐wahweendahmahgawin.

¹⁷ Kushkeäwezemahgud suh ewh debandahsoowine-wahweendahmahgawin kahneboowaud egewh enenewug; kah dush ningood enahbuttussenoon magwah bemahdezid owh kahoozhetood.

¹⁸ Benuh dush, kahween ewh netum wahweendahmahdewin pukkaun keëzhekechetwahwechegahdasenoon, misqueeng suh atuh.

¹⁹ Uhpe dush Moses kahtebahjemootahwaud enewh ahnishenahban kuhkenuh enewh kuhgequawinun debishkoo kahenahkoonegang, oogeöodahpenaun ewh pezhekeense misque, kuhya mesahboozoo‐misque, mahmahwe nebee, kuhya masquaug mahnishtahneshe‐pewuy, kuhya hyssop, oogeseguhundaun dush ewh muzzeneëgun kuhya mahmahwe oogeseguhundahwaun kuhkenuh enewh ahnishenahban,

²⁰ Oo‐oo keëkedood, Mesuh ewh misque dabandahgwuk emuh kekindewining kahenenag owh Kesha‐Muhnedoo cheguhnuhwanduhmag.

²¹ Kuhya dush oogeseguhundaun ewh ahnuhmeä‐weguhmig kuhya kuhkenuh oonahgunun dabandahgwukkin emuh sahsahgewejegawining misque keähyood

²² Gagah dush kuhkenuh uhyeëen peenechegahdanoon emuh tebahkoonegawining misque ahyoong; kishpin dush misque oonjegahtoosing kahween tahahbwayanjegaseem

²³ Kenundahwandahgwud, cheähyoong oonoo cheöonje‐peenetoong enewh uhyeëen kahezhenahgwukkin debishkoo azhenahgwuk keche‐kezhegoong duhzhe uhyeëen; enewh dush keche‐kezhegoong duhzhe uhyeëen chepeenechegahdag keöonje‐nundahwandahgwudoon ahwahshema ashpandahgwukkin sahsahgewejegunun dush ween oonoo.

²⁴ Kah mahween Christ kepeendegase emuh ahnuhmeä‐weguhmigoong ooneenjemaung kahoonje‐oozhechegahdag, ewh kahezhechegahdag debishkoo azhenahgwuk ewh quuhyuk uhyeëe; emuh atuh keche‐kezhegoong kahpeendegad noongoom chenahgoozid emuh anahsuhmuhbid Kesha‐Muhnedoo kenuhwind oonje;

²⁵ Kahween kuhya nuhningim chepuggedenedezood, debishkoo owh keche‐sahsahgewechega‐wenene anduhsoo kekenoonoowin ahbeting peendegad emuh kechetwah‐ahnuhmeä‐weguhmigoong uhnegegezid ewh pakaunuk misque;

²⁶ Kishpin mahween oo‐oo azhewabukebun tahgenundahwandahgooze nuhningim chekootuggandung pahahkoo‐oozhechegahdag ewh uhkee: noongoom suh gagah weïshquah‐uhkeewung ahbeting kepenahgooze cheëkoonung mujje‐ezhewabezewin oonje kesahsahgewetood tebenuhwa weyow.

²⁷ Debishkoo suh azheënahkoonegahzoowaud enenewug ahbeting cheneboowaud, ishquauj edush chetebahkoonegang:

²⁸ Me suh nahsaub owh Christ ahbeting kepuggedenegahzoo chepemoonduhmoowaud nebewah bamahdezenejin oomujje‐ezhewabezewinene; egewh dush nanduhwahbuhmahjig, menuhwah ahbeting oogahwahbahmahwaun penahgoozenid pemoonduhsenig mujje‐ezhewabezewin cheöonje‐shahwandahgoozing.