HEBREWUN 7 - Ottawa New Testament Penteteuch and Psalms 1874

¹ Wah‐owh suh Melchisedec Saleming duhzhe keche‐oogemah, oosahsahgewejega‐wenenemun owh kache‐ishpandahgoozid Kesha Muhnedoo, owh kahnuhgishkahwaud enewh Abrahamun piskahbenid kahnesahnid enewh keche‐oogemaun, keshahwanemaud edush.

² Mesuh enewh Abraham kahmeenaud enewh titheün oonje kuhkenuh ooduhyeemun; netum anekuhnootahming oodezhenekahzoowin, owh oogemahkundung ewh quuhyuk‐ezhewabezewin, menuhwah dush Saleming duhzhe keche‐oogemah (mesuh ahnekuhnootuhming, Owh kache‐oogemahkundung pezaunewawin).

³ Kahween keöoyoosese, kah kahya keögeese, kah kuhya kekekanemahse kahoondahdezid, kahween kemahjesinsenene ookezhegudoomun, kah kuhya keïshquahsasenene oobemahdezewin; keëzheähyah debishkoo kahezheahyaud Kesha Muhnedoo Oogwissun; kahgenig sahsahgejega‐wenenewe.

⁴ Benuh nahnahguhdahwanduhmook kahahpeetandahgoozid mahbuh enene kahmenegood enewh Abrahamun kooseminahbun enewh titheün oonje kuhkenuh menik kahmukkummaud enewh kahmahmauzheähpun.

⁵ Kagate edush egewh wagwissemegoojig enewh Leviün, wadahpenungig ewh keche‐sahsahgewejega‐weneneahnookewin, enahwug cheöodahpenuhmoowahwaud enewh ahnishenahban enewh titheün debishkoo akedoomahguk ewh tebahkoonegawin, mesuh enewh tebenuhwa wejekewaëwaun ahnuhween goo keöondahdezenid emuh ootuhtuhgwahguning owh Abraham.

⁶ Owh dush ween pukkaun kahoondahdezid oogemeenegoon enewh titheün enewh Abrahamun, kuhya oogeshahwanemaun enewh kahdebanduhmenid enewh wahweendahmahgawinun.

⁷ Kagate suh owh noondaush anandahgoozid ooshahwanemegoon enewh kache‐ahpetandahgoozenejin.

⁸ Oomah dush egewh enenewug naboojig oodoodahpenahnahwah enewh titheün; ewede dush owh bemahdeze anahjemind oodoodahpenaunun.

⁹ Oo‐oo suh nindekid, Kuhya owh Levi, wadahpenung enewh titheün, oogetebaheganun enewh titheün emuh oweyowing owh Abraham.

¹⁰ Kayahbe mah keähyah emuh ootuhtuhgwahgunening enewh oosun, uhpe Melchizedec kenuhgishkahwaud enewh.

¹¹ Kishpin ewh quuhyuk‐ezhewabezeëgoozewin kepeöonjeemahgukebun emuh oosahsahgewejega‐wenenewewinewaung egewh wagwissemegoojig enewh Leviün (me muh emuh kahoondenuhmoowaud egewh ahnishenahbag ewh tebahkoonegawin), ahneeshwin kahnunduhwandahgwuk menuhwah pakahnezid sahsahgewejega‐wenene chepuhsegweed, Melchizedec kahezhesahsahgewejega‐wenenewid, kahween dush Aaroning ezhesahsahgewejega‐wenenewe, këenahse.

¹² Kishpin dush aunjechegahdag ewh sahsahgewejega‐wenenewewin, ahbetakummig tahaunjechegahda ewh tebahkoonegawin.

¹³ Owh dush ween oo‐oo kahenind kedebandahgooze emuh pukkaun ootootaming, kahween ahweyah menik dabandahgoozejig emuh oogebuhmeetunse ewh sahsahgewejegun‐ahbik.

¹⁴ Kekandahgwud suh ween owh Tabenemenung keoondahdezid emuh Judahing; kahween Moses oogeënahseen oo‐oo azheweenzoonejin chesahsahgewechega‐wenenewenid.

¹⁵ Keche wahsuh suh ahwahshema puhgukkandahgwud, oonje ewh wepuhsegweed menuhwah pazhik sahsahgewejega‐wenene, debishkoo kahezhesahsahgewejega‐wenenewid Melchizedec.

¹⁶ Owh azheähnoonind, kahween debishkoo anandahgwuk ewh weyause kuhgeqwawin, debishkoo atuh azhemushkahwezemahguk ewh kahgega‐bemahdezewin.

¹⁷ Oo‐oo mahween enahjemoo, Keen kahgenig kesahsahgewejega‐wenenewh debishkoo kahezhesahsahgewejega‐wenenewid owh Melchisedec.

¹⁸ Kekuhsebeëgahda suh ewh kuhgeqwawin kuhyet ayahgebun oonje shahgwewemahguk kuhya ningood enahbuttussenook.

¹⁹ Kah suh ween tebahkoonegawining oonje kezhechegahdasenoon gagoo; pechegahdag atuh nahwuj wanesheshing ahpanemoowin oonje kezhechegahda gagoo; ewh pashoo wanje‐naunzekahwung Kesha‐Muhnedoo.

²⁰ Kahween dush kesahsahgewejega‐weneneweähse pwah‐mushkahwe‐wahweenduhmoowind:

²¹ (Ahnind gooshah kahween kemushkahwe‐wahweenduhmahwahsewug uhpe kesahsahgewejega‐weneneweïndwah; mahbuh atuh oogemushkahwe‐wahweenduhmahgoon enewh oo‐oo agoojin, owh Tabaningad kemushkahwe‐wahweendahmahga, kah dush tahahnezhetunse, Kahgenig kesahsahgewejega‐wenenewh debishkoo kahezhesahsahgewejega‐wenenewid Melchisedec:)

²² Me suh wanje‐kekandahgoozid Jesus keähnoonind cheguhnooduhmahga‐wenenewid emuh nahwuj wanesheshing wahweendahmahgawining.

²³ Oogoo dush sahsahgewejega‐wenenewug bahtuhyeïnwug; kah muh puggedenuhmahwahsewug kahgenig cheähyahwaud oonje neboowaud.

²⁴ Wah‐owh dush kahgenig ahyaud kaöonje‐qwakese-chegahdahgasenenig oosahsahgewejega‐wenenewewin.

²⁵ Mesuh wanje‐kushketood ahpeche wahweenga chebemahjeäud kuhkenuh enewh pahnaunzekahwahnid Kesha‐Muhnedoon ween oonje, kahgenig gooshah bemahdeze cheguhnooduhmoowaud enewh.

²⁶ Kagate suh goo kenunduhwandahgwud oo‐oo doowah keche‐sahsahgewejega‐wenene cheähyahwung, pahnezid, maje‐doodahgasig, wahnezesig, wahdookahwahsig enewh maje‐ezhewabezenejin, ahwahshema ashpandahgoozid dush ween enewh keche‐kezhigoon:

²⁷ Owh nanduhwanduhgoozesig anduhsoo‐kezhegudenig azhenunduhwandahgoozewaud oogoo keche‐sahsahgejega‐wenenewug, chesahsahgewejegad netum oonje tebenuhwa oomujje‐ezhewabezewinun, nahguj edush oonje oomujje‐ezhewabezewinene enewh ahnishenahban; me suh oo‐oo ahbeting keëzhechegad, uhpe kahpuggedenung tebenuhwa weyow.

²⁸ Emuh muh tebahkoonegawining, naneenuhmezejig enenewug keche‐sahsahgewejega‐weneneweähwug, mushkahwe‐wahweendahmahgawining atuh kahoozhechegahdag kahishquah‐meegewang ewh tebahkoonegawin keöonje‐keche‐sahsahgewejega‐weneneweäh owh Wagwissemind, kahgenig kasahsahgewejega‐wenenewid.