HEBREWUN 12 - Ottawa New Testament Penteteuch and Psalms 1874

¹ Benuh dush, kekanduhmung kewetuhyeëe nebahwewaud keche nebewah nuhyahnahguhduhwahbuhmenungoog, umba wabenundah kuhkenuh uhyeëen quasegwungin, kuhya ewh mujje‐ezhewabezewin natuh‐oondummeëgooyung, kuhya aunwahjeedah chepemebuhtooyung ewh kuhgwajekunedewin anahsuhmuhyeëe kahahtahmahgooyung.

² Guhnuhwahbuhmung Jesus owh kahoozhetood kuhya kahkezhetood kedabwayanduhmoowinenaun; owh oonje ewh moojegezewin anahsuhmuhyeëe kahahtahmahwindebun, keöodahpenuhmahzood ewh ahzhedayahtikoo‐kooduggetoowin, kebahbahmanduhsig ewh ahgujjewin, noongoom dush nuhmuhduhbid emuh ookechenekaunewunenig oodoogemah‐wuhbewin owh Kesha‐Muhnedoo.

³ Nahnahgahduhwanemik suh owh kahkeche‐kooduggandung oonje keähzhedakahgood enewh maje‐ezhewabezenejin, cheöonje‐ahnezhetunsewag kuhya cheäunwanjegasewag emuh kedenanduhmoowinewaung.

⁴ Kahween muhshe kegeöonjegahtuhmahgooseem kemisqueemewah, megahduhmag ewh mujje‐ezhewabezewin.

⁵ Ahzhuh dush kegewuhnandahnahwah ewh kuhgequawin, wanejahnesemegooyag azhekuhgekemegooyag, Ningwis, kagoo neshebahpenuhdunkan oopuhzhunzhaöowawin owh Tabaningad, kagoo kuhya ahnezheetunkan uhpe naneebekemikin:

⁶ Enewh suhyahgeähjin owh Tabaningad oopuhzhunzhawaun, kuhya oopukkittawaun kuhkenuh enewh wagwissejin wadahpenahjin.

⁷ Kishpin puhzhunzhaöogooyag, wagwissemindjig andoodahwindwah kedoodahgoowah Kesha‐Muhnedoo; ahwanan owh wagwissemind kapuhzhunzhaöogoosig enewh oosun?

⁸ Kishpin dush puhzhunzhaöogoosewag, azhepuhzhunzhaöondwah kuhkenuh egewh wanejahnesemindjig, kemenechahgunug kedahwim, kahween kedoogwissemegooseem.

⁹ Menuhwah dush kegeähyahwahnahnig egewh koosenahnig emuh keweyausenahning egewh kahpuhzhunzhaöonungoog, kuhya kegekechetwahwanemahnahnig: Kah nuh ween ahwahshema kegahnuhittuhwahsenaun owh Wayoosemegood enewh kejechaugoonahnin, cheöonje‐bemahdezeyung?

¹⁰ Wanebik kegepuhzhunzhaöogoonahnig oogoo, wenuhwah keënanduhmoowaud oonje; ween dush ween cheoonje‐menoo‐ahyahyung, cheöonje‐meenegooyung oopeenezewin.

¹¹ Kah dush egewh noongoom magwah pashunzhaöonjig oominwanduhsenahwah oopuhzhunzhaöogoowinewah, oonuhneenuhwandahnahwah suh: Bahnemah dush ween tahoonjegin emuh ewh menoo‐ezhewabezewine‐meenewewin cheöonje‐pezaun‐bemahdezing cheöondezewaud egewh pazhunzhaöondjig.

¹² Me dush kaöonje‐ombenuhmag enewh ooneenjemaun uhyakooze‐ahgoojingin, kuhya enewh shuhyahgwewemahgukkin kedigoomaun;

¹³ Kuhya quuhyukoomootook enewh meekaunsun anahsuhmuhyeëe wahuhnetuhkookeeyag, koonemah tahgepuhka‐nahzhahwah owh chuhyahoosad; ahwahshema tahgeöonesheshin noojemooïndebun.

¹⁴ Noopenuhduhmook ewh pezaune‐weejindewin chepezaune‐weejewagwah kuhkenuh enenewug, kuhya quuhyuk‐ezhewabezewin, ewh ahweyah ahyahsig kahween oogahwahbuhmahseen enewh Tabaninganejin:

¹⁵ Ahyaungwahmezik ahweyah enene chenooda‐ahnezheetunsig weekoojetood ewh ooshahwanjegawin Kesha‐Muhnedoo; koonemah gagoo wesuggezewine‐oojebik tahgesuhgukkeemahgud cheöondummeëgooyagoobun, nebewah cheöonje‐weeneëgoowahpun enewh;

¹⁶ Cheähyahsig dush ahweyah pazhigwahdezid, gamuh ahweyah nashepahpenoodung ewh ahnuhmeähwin debishkoo kahezhechegagoobunan Esau, owh kahahtahwahgad ewh oosuhseekezewine‐enandahgoozewin oonje ewh menik ningooding kahwesinid.

¹⁷ Kekekandaum mahween nahguj uhpe nanduhwanduhmoogoobunan ewh shahwandahgoozewine‐nahbishkahgawin, kewabenah; kah muh ningooche oogemekunseen ewh aundahkoonegawin, ahnoo ween kekeche‐nunduhwandung kemuhwid.

¹⁸ Kah suh kenuhwah kegepenaunzekunsenahwah ewh wahjewh kataungenegahdagoobun, kuhya kahduhnahketag iskootang, kah kuhya kepenaunzekunseem emuh anduhzhe muhkudda‐wahnuhqwuk kuhya kahkushke‐tebekuk kuhya kekeche‐wesugahnemuk,

¹⁹ Kuhya kahduhzhe muhtwawag ewh pootahjegun, kuhya kahduhzhe muhtwa‐kekedoong; ewh kekedoowin kahnoondungig oogepahgoosandahnahwah menuhwah ewh ekedoowin cheëzhekuhnoonahsewindwah:

²⁰ (Kah muh oogekushketoosenahwah chemenootuhmoowaud ewh kahkuhgekemindwah, Pooch ahwahkaun kishpin ketaungenung ewh wahjewh, tahpemwahsinuhah gamuh tahpuhzhebuhwah ewh shemahgun;

²¹ Apeeche dush kekootahmegwud ewh kahwahbunduhmoowaud pooch owh Moses oo‐oo keëkedood, Nekechesagiz kuhya nenuhningishkah:)

²² Kenuhwah dush kegepeöodittahnahwah Zion wahjew, kuhya oodoodanow owh Bamahdezid Kesha‐Muhnedoo, keche‐kezhegoong duhzhe Jerusalem, kuhya kegepenaunzekahwahwaug nebewah mahyahwunjeëdejig angenug.

²³ Kuhya anduhzhe mahwunjeëdewaud egewh dabandahgoozejig emuh, oodahnuhmeä‐weguhmigoowaung egewh kahnetum‐neegejig wazhebeëgahzoojig ewede keche‐kezhegoong, kuhya Kesha‐Muhnedoo katebahkoonaud kuhkenuh enewh bamahdezenejin, kuhya enewh oojechaugoowaun egewh quuhyuk‐azhewabezejig, kahkeche‐shahwandahgoozejig.

²⁴ Kuhya Jesus ganooduhmahgad emuh ooshke‐wahweendahmahdewining, kuhya ewh misque saswabeguhunjegang, ahwahshema menoo‐kekedoomahguk dush ween Abel oomisqueem.

²⁵ Ahyaungwahmezik cheähgoonwatahwahsewag owh kahkedood. Kishpin mahween ahbetakummig kekooduggeïndwah egewh kahahgoonwatahwahjig enewh kahkekedoonejin oomah uhkeeng, ahwahshema kegahoonje‐kooduggeëgoomin kishpin bezinduhwahsewung owh keche‐kezhegoong wanje‐kekedood.

²⁶ Ewh oodinwawin kahoonje‐nuhningishkahmahgudenig ewh uhkee: noongoom dush kewahweendahmahga, oo‐oo keëkedood, Kayahbe ningooding kahween atuh chewenuhningishkahbetooyaun ewh uhkee, mahmahwe kuhya ewh kezhik.

²⁷ Oo‐oo dush ekedoowin, Kayahbe ningooding oonje ekedoom weëkoonegahdag enewh uhyeëen naningishkah-mahgukkin, debishkoo enewh uhyeëen kahoozhechegahdagin, enewh dush uhyeëen kaneeningishkahmahgussenoogin cheïshkoonegahdag,

²⁸ Benuh dush, kenuhwind wadahpenuhmung ewh oogemahwewin kaneeningishkahmahgussenook, mahnoo nundahwandundah ewh shahwanjegawin, wawane chebuhmeetuhwung Kesha‐Muhnedoo kechetwahwanemung kuhya quuhyuk koosung.

²⁹ Ewh gooshah ishkoota chuhyahgezooëwamahguk enandahgooze owh keKesha‐Muhnedoomenaun.