HEBREWUN 11 - Ottawa New Testament Penteteuch and Psalms 1874

¹ Benuh dush, dabwayanduhmoowin ahwun ewh wanje‐quuhyukwanduhmung enewh uhyeëen apanemooyung, kuhya wanje‐dabwatuhmung enewh uhyeëen wuhyahbuhmenahgwussenoogin.

² Me suh oo‐oo kahoonje‐menoo‐duhzhemindwah egewh katezejig.

³ Dabwayanduhmoowin suh wanje‐kekanduhmung enewh uhkeen keöonje‐oozhechegahdag emuh oodekedoowining owh Kesha‐Muhnedoo, enewh dush uhyeëen wahyahbuhmenahgwukkin kahween keöonje‐oozhechegahdasenoon emuh enewh uhyeëen nuhyahgwukkin.

⁴ Dabwayanduhmoowin suh Abel kahoonje‐meenaud enewh Kesha‐Muhnedoo nahwuj manwandahgwudenig sahsahgewejegun dush ween Cain, mesuh ewh kahoonje‐enahjemind chequuhyuk‐ezhewabezeëgoozid, Kesha‐Muhnedoo kedebahdoodung enewh oomeegewawinun; oonje dush ewh ahnahween goo kenebood kayahbe kekedoo.

⁵ Dabwayanduhmoowin suh Enoch kahoonje‐mahjewejegahzood cheöonje‐wahbundunsig neboowin; kah dush kemekahwahse, Kesha‐Muhnedoo muh oogemahjewenaun: chepwah mahjewejegahzood, keënahjemah ewh keminwanemegood enewh Kesha‐Muhnedoon.

⁶ Kah ween ahweyah oogahminwanemegooseen enewh Kesha‐Muhnedoon kishpin ahyaunsig dabwayanduhmoowin: owh mahween pahnaunzekahwaud enewh Kesha‐Muhnedoon nundahwandahgooze chedabwayanemaud ahyahnid, kuhya cheshahwanemahnid enewh wahweenga nandoonaëgoojin.

⁷ Dabwayanduhmoowin suh Noah kezhah kahwahweendahmahgood Kesha‐Muhnedoon enewh uhyeëen muhshe kahwahbunduhsingin, kesagezid kahoonje‐oozhetood ewh keche‐nahbequaun cheöonje‐bemahjeïndwah kuhkenuh dabandahgoozejig emuh oowegewauming; me suh oo‐oo keëzhechegad kahoonje‐nahneboondung uhkee, kuhya kahoonje‐debandung ewh quuhyuk‐ezhewahbezeëgoozewin wanjeemahguk emuh dabwayanduhmoowining.

⁸ Dabwayanduhmoowin suh kahoonje‐dabwatung Abraham uhpe kahnundoomind chesahgahung cheëzhaud dush emuh uhkeeng nahguj kapuggeduhnuhmoowindebun cheöoduhkeemid; kesahgahum dush ahnuhween goo kekanduhsig tebe wahezhahgoobunan.

⁹ Dabwayanduhmoowin suh kahoonje‐pahbahkuhbashid emuh wahweendahmahgawine‐uhkeeng, debishkoo mayugguk duhnuhkeewining, emuh puhpuggeewuhyauneguhmigoong keweeje‐kuhbashemaud enewh Isaacun kuhya enewh Jacobun mahmahwe kahdebandahsoonejin ewh nahsaub wahweendahmahgawin:

¹⁰ Oogenunduhwahbundaun gooshah ewh keche‐oodanah kahuhyeenjesechegahdag, mesuh Kesha‐Muhnedoo kahoozhetood kuhya kahooshegad.

¹¹ Dabwayanduhmoowin suh kahoonje‐mushkahwezeind Sarah cheünjekood, kenegeäud dush enewh ahbenoojeen uhpe ahzhuh kahkeche‐kekaud, oonje kedabwatuhwaud enewh kahwahweenduhmahgoojin.

¹² Emuh dush pazhik weyowemaung tahnuhsug naboongin kahenandahgwuk keöondahdezewug ahnishenahbag asheenoojig debishkoo ashenoowaud egewh kezhikoong duhzhe ahnungoog, kuhya azhebahtuheyenuk ewh nagow emuh cheegeebeeg mesuh azhebahtuhyeënoowaud.

¹³ Kuhkenuh oogoo keneboowug magwah kedabwayanduhmoowaud, keöodahpenunsigwah enewh kahwahweenduhmoowindwahpun, wahsuh atuh keöonzahbunduhmoowaud, keähnahmikahmoowaud dush kuhya kedabwayanduhmoowaud, kuhya dush mezheshuh keëkedoowaud ewh kemahyahdahwezewaud kuhya kebahbahmahdezewaud oomah uhkeeng.

¹⁴ Egewh dush oo‐oo akedoojig wahweenga enahjindezoowug ewh undoonaühmoowaud ewh duhnuhkeewin.

¹⁵ Kagate dush, kishpin kebahbahmanduhmoowahpun ewh duhnuhkeewin kahoonjebahwaud, tahgekushkeöowug nayaub chekewawahpun.

¹⁶ Noongoom dush ween oonunduhwandahnahwah ahwahshema wanesheshing duhnuhkeewin, mesuh ewh keche‐kezhegoong duhzhe duhnuhkeewin: me dush Kesha‐Muhnedoo wanje‐ahgujjesig ooKesha‐Muhnedoomewaun cheezhenekahnind: keche‐oodanah mahween oogewahwazhetuhmoowaun.

¹⁷ Dabwayanduhmoowin suh Abraham uhpe kahkuhgwajeïnd, kahoonje‐puggedenuhmoowaud enewh Kesha‐Muhnedoon enewh Isaacun; kuhya owh kahwahweenduhmahwindebun oogepuggedenahmoowaun Kesha‐Muhnedoon enewh puhyazhegoonejin oogwissun,

¹⁸ Wah‐owh suh oo‐oo kahenindebun, Emuh Isaacing tahezhenekahnahwug egewh kenejahnesug kaühneähyahneka‐bemahdezejig:

¹⁹ Keënanemaud enewh Kesha‐Muhnedoon chekushketoonid nayaub cheöonishkahbenahnid oonje neboowining; me emuh tahnuhsug keöonje‐oondahpenaud.

²⁰ Dabwayanduhmoowin suh owh Isaac kahoonje‐shahwanemaud enewh Jacobun kuhya enewh Esauün keduhzhindung enewh uhyeëen wahpuggumeahyahmahgukkin.

²¹ Dabwayanduhmoowin suh owh Jacob, kahoonje‐shahwanemaud nuhyazh enewh oogwissun owh Joseph, uhpe gagah zhuhyegwah wahuhneneboogoobunan; kuhya keähnuhmeäh emuh oogejuhyeëe oosuhkuhooning.

²² Dabwayanduhmoowin suh owh Joseph, uhpe nabood, kahoonje‐duhzhindung ewh oonejahnesun owh Israel weühnemahjahnid, kuhya keënahkoonega kadooduhmenid enewh ookunun.

²³ Dabwayanduhmoowin suh owh Moses, uhpe kahnegid, nesoo kezis kahoonje‐kahnegood enewh oonekeëgoon, uhpe kahkekanemegood enewh chequahnauj‐ahbenoojeëwid: kah dush oogekootunsenahwah oodenahkoonegawin owh Keche‐oogemah.

²⁴ Dabwayanduhmoowin owh Moses uhpe kahnetahwuggid, kahoonje‐ahgoonwatung wahezhenekahnindebun Pharoah oodahnun oogwissinene;

²⁵ Ahwahshema keminwandung cheweeje‐kooduggetoomaud enewh oodahnishenahbamun Kesha‐Muhnedoo, dush ween wanebik cheëzhemoojegezepun enewh mujje‐ezhewabezewine‐moojegezewinun;

²⁶ Ahwahshema kekechetwahwandung ewh cheneshebahpenuhduhwind oonje enewh Christun dush ween enewh tebenuhwawezewinun emuh Egypting anduhgoogin: oogenunduhwandaun gooshah ewh shahwandahgoozewine‐tebahahmahgoowin

²⁷ Dabwayanduhmoowin suh kahoonje‐nuhguhdung Egypt, kekootunsig ewh Keche‐oogemah oonishkahdezewin: keäunwahdandum muh, oonje kewahbuhmaud nahyahgoozesenejin.

²⁸ Dabwayanduhmoowin suh kahoonje‐guhnuhwandung ewh kuhbekoosa‐wekoondewin, kuhya ewh misque kesuhswabeguhundahgangin, cheöonje‐taungenegoosigwah enewh kahnesahnejin enewh netum‐moozhahnun.

²⁹ Dabwayanduhmoowin suh kahoonje‐ahzhahwuh-gaumaöosawaud ewh Misquahgumme‐kechegumme kepangwahkummegahnig: ewh ahnoo wahezhechegawahpun egewh Egyptiänug keduhpenawug emuh nebeeng.

³⁰ Dabwayanduhmoowin suh kahoonje‐kahwesamahguk Jerichoïng duhzhe wahkahegunun kahkewetaushkahegahdag neezhwahswe kezhegudoon.

³¹ Dabwayanduhmoowin suh Rahab pazhegwahdezegoobunan equa kahoonje‐bahnahdezesig uhpe kahbahnahdezewaud egewh kahdabwayanduhsigoog, uhpe keshawahdezewining kahezheöodahpenaud enewh nanduhwahtoonejin.

³² Wagoonan dush menuhwah kaëkedooyaun? kahween nindahtakushketoose chedebahjemugebun Gideon, kuhya Barak, kuhya Samson, kuhya Jephtha, kuhya David, kuhya Samuel, kuhya egewh aunwahjega‐wenenewug:

³³ Oogoo oonje ewh dabwayanduhmoowin kahmahmauzhetoojig enewh oogemahwewinun, keähnooketuhmoowaud ewh quuhyuk‐ezhewabezewin, keöodahpenuhmoowaud enewh wahweendahmahgoowinun, kekebahquuhuhmoowahwaud enewh mezhebesheen oodoonene,

³⁴ Keähtaühmoowaud ewh kache‐mushkahwahnig ishkoota, keöozhinduhmoowaud dush enewh ahzhahwashkoon, ahnuhween goo keshahgwewewaud kemushkahwezeähwug, ashkum kesoongedaäwug emuh megahdewining, keöozhemooähwaud enewh muhyahdahwezenejin shemahgunishun.

³⁵ Equawug nayaub keöodahpenahwaud enewh oonejahnesewaun kahneboopuneen ewh keähbejebahnid: ahnind dush ween kekookuggeähwug, kah dush keënanduhsewug chepuggedenindwahpun; cheöonje‐oodahpenuhmoowaud nahwuj wanesheshinenig ahbejebahwin:

³⁶ Ahnind dush oogekekandahnahwah neshebahpenuhdahgoowinun, kuhya puhzhunzhaöogoowinun, kuhya minjemahpenegoowinun, kuhya kebahquahoogoowin:

³⁷ Kepemwuhsinahahwug, ketaushkeboonahwug, kekuhgwatebanemahwug, ahzhahwashkoong keöonje‐nesahwug, kepahbahduhnezewug ahgweewaud enewh mahnishtahnishe‐wuhyaunun kuhya enewh mezahboozoo‐wuhyaunun: kemuhnazewaud ahnooj gagoo, keketemahgezewaud, kekooduggetoowaud;

³⁸ (Kahween keähpeetandahgwussenene ewh uhkee chegeduhnuhkeewahpun emuh:) kepahbahduhnezewug emuh buhgwuhduhkummig, kuhya emuh wahjewing, kuhya emuh wahweembahzhebikahnig, kuhya emuh wahweembahzhebikahnig, kuhya emuh wahweembuhkummegaug uhkee.

³⁹ Oogoo dush kuhkenuh kahmenoo‐duhzhemindwah oonje ewh dabwayanduhmoowin, kahween oogeöodahpenunsenahwah ewh wahweendahmahgawin:

⁴⁰ Kesha‐Muhnedoo kemeenenung ewh nahwuj wanesheshinguhyeëe, cheähpeche‐shahwandahgoozesigwah wenuhwah, chepwah ahyahyung kenuhwind.