HEBREWUN 10 - Ottawa New Testament Penteteuch and Psalms 1874

¹ Emuh muh tebahkoonegawining duhgoomahgud ewh kekenoowahjechegun wanje‐kekenoowahduk enewh wanesheshingin kagetuhgwishenoomahgukkin, kah dush ween ahpeche ezhenahgwussenoon, kah wekah enewh sahsahgewejegunun anduhsoo‐kekenoonoowin azhesahsahgewejegang tahkushketoomahgussenoon chetamenoo‐ezhewabezeïndwah egewh pahnaunzekungig,

² Kishpin mahween kushketoomahgukebun kah nuh ween tahgeïshquah‐sahsahgewejegaseem? egewh mahween anuhmeähjig ahzhuh kahkeseebegenindjig kahween menuhwah dahgekekanindezoosewug chemujje‐ezhewabezewaud.

³ Oonoo dush ween sahsahgewejegunun wazhetoowahjin oomequandahnahwah enewh mujje‐ezhewabezewinun anduhsoo kekenoonoowin.

⁴ Kahwasah pezheke‐misque kuhya mesahboozoo‐misque tahoonje‐wabenegahdasenoon mujje‐ezhewabezewinun.

⁵ Mesuh dush ewh oonje‐ekedood uhpe tagwishing oomah uhkeeng, Sahsahgewejegun kuhya meegewawin kahween kenunduhwanduhse, ewh suh atuh weyowemah kegewahwazhetuhmow:

⁶ Enewh chuhyahgezegahdagin sahsahgewejegunun kuhya enewh sahsahgewejegunun oonje mujje‐ezhewabezewinun kahween kegeminwanduhsenun.

⁷ Me dush oo‐oo keëkedooyaun, Benuh, nepeöonje‐tuhgwishin (emuh keche‐muzzeneëguning oozhebeëgahda duhzhemegooyaun) cheëzhechegayaun ewh ananduhmun O Kesha‐Muhnedoo.

⁸ Uhpe dush netum keëkedood, Sahsahgewejegun, kuhya meegewawin, kuhya chuhyahgezegahdagin sahsahgewejegunun, kuhya meegewawinun oonje ewh mujje‐ezhewabezewin kahween kegenundahwanduhsenun, kah kuhya kegeminwanduhsenun; ewh chemeegewang akedoomahguk ewh tebahkoonegawin;

⁹ Me dush uhpe oo‐oo keëkedood, Benuh, nepeöonje‐ezhah cheëzhechegayaun ewh ananduhmun, O Kesha‐Muhnedoo. Oodekoonaun ewh natumesing, cheöonjeminjemoosetood ewh menuhwah pazhik

¹⁰ Me suh oo‐oo enanduhmoowin wanje‐peneëgooyung oonje ahpena ahbeting, Jesus Christ kesahsahgewetood ewh weyow.

¹¹ Kuhkenuh egewh sahsahgewechega‐wenenewug nebahwewug anduhsoo‐kezhegudenig kuhya nuhningim oosahsahgewetoonahwah nahsaub sahsahgewejegunun, enewh wekah kaënandahgwussenoogin cheëkoowabenegahdag mujje‐ezhewabezewinun:

¹² Wah‐owh dush, kahpuggedenenung pazhik sahsahgewejegun kahgenig kaduhgoomahguk, kenuhmuhduhbe emuh ookechenekaung Kesha‐Muhnedoo:

¹³ Me dush uhpe beetood chetuhtuhkookahnaud enewh mahgahnegoojin.

¹⁴ Ahbeting muh kesahsahgewejegad, me dush kahgenig wanje‐bemahjeäud kuhkenuh enewh manoo‐ezhewabezeïndjin

¹⁵ Mesuh dush kuhya owh Keche‐Oojechaug azhewahweenduhmoonenung: oo‐oo mahween netum kahekedood,

¹⁶ Mesuh maunduh ewh kekindewin kaöozhetoomahwugwah uhpe keïshquahsag oonoo kezhegudoon, ekedoo owh Tabaningad, Ningahahtuhwaug netebahkoonegawinun emuh oodaëwaung, kuhya emuh oodenanduhmoowinewaung ningahoozhebeühmahwaug enewh;

¹⁷ Kah dush menuhwah ningahmequanduhmoowahseeg oomujje‐ezhewabezewenewaun kuhya oomujje‐ezhechegawinewaun.

¹⁸ Kahwabenegahdag oonoo, kahween kayahbe duhgoomahgussenoon sahsahgewejegawin oonje mujje‐ezhewabezewin.

¹⁹ Benuh dush, kekandahmung nejekewaëdoog chepuggedenahmahgooyung emuh soongedaäwining cheëzhepuhpeendegayung emuh ewh mahyahmahwe‐keche‐ahpeetandahgwuk ahnuhmeä‐weguhmigoong, Jesus oomisqueem oonje.

²⁰ Ooshke‐meekunaung kahgega‐bemahdezewining anenuhmook, ewh kahoozhetoomoonenung, emuh shahbooyeëe ewh kebuhgoojegun, me suh tebenuhwa weyaus;

²¹ Kuhya ahyahwung keche‐sahsahgewejega‐wenene wagemahkundung ewh oowegewaum Kesha‐Muhnedoo;

²² Umba penaunzekundah emuh quuhyuk oodaëmaung, emuh dabwayanduhmoowine‐ahpanemoowining keche‐ahpanemooyung, peeneëgooyung emuh kedaënahning oonje mujje‐kekanindezoowin, kuhya peeneëgooyung emuh keyowenaung pahnahguhmeeg nebee ahyoong

²³ Umba minjemandundah ewh wahweendahmahgawin kahezhewahweenduhmung ewh dabwayanduhmoowin kuhnuhga ahnezheetunsewung; (ahyaungwahmeze gooshah owh kahwahweenduhmahgad;)

²⁴ Umba suh muhmequanindedah cheähyaungwahmindeyung chesahgeëdeyung kuhya chemeekinduhmung enewh wanesheshingin ahnookeewinun:

²⁵ Kahween kegahpoonetoosemin ewh kemahwunjeëdewinenaun ahnind azhewabezewaud; chekuhnoonindeyung suh goo mamashquaud; mamwach dush oonje kekanduhmag pashoo peähyahmahguk ewh kezhegud.

²⁶ Kishpin mahween oonjedah mujje‐ezhechegayung kenuhwind kahoodahpenuhmung ewh kekandahsoowin wanje‐kekanduhmung ewh dabwawin, kahween duhgoomahgussenoon menuhwah pazhik sahsahgewejegun oonje enewh mujje‐ezhewabezewinun;

²⁷ Mesuh atuh chekuhgwahnesugge‐nundahwahbunduhmung ewh tebahkoonegawin, kuhya ewh ashkoota‐wandahgwuk nishkahdezewin, ewh kaähmoogoowaud egewh mahgahdungig ahnuhmeähwin.

²⁸ Owh kahnishwahnahjetood Moses ootebahkoonegawin, kishpin kahbahtahmegood enewh neezh gamuh neswe bamahdezenejin, keneboo, kah dush keshahwanemahse:

²⁹ Kah nuh ween kedenanduhseem ahwahshema cheënandahgoozid chekuhgwahnesugge‐kootuggetood owh kahtuhtuhkookahnaud enewh Kesha‐Muhnedoo oogwissun, kuhya enandung ningood cheënandahgwussenook ewh kekindewine‐misque, ewh kahpeeneëgood, kuhya kahmujje‐doodahwaud enewh shawanjeganejin Oojechaugoomaun?

³⁰ Kekekanemahnaun suh oo‐oo kahekedood, Neen netebandaun ewh nahnahquewin, neen ningahtebahahmahga, ekedoo owh Tabaningad. Menuhwah dush owh Tabaningad oogahtebahkoonaun enewh oodahnishenahbamun.

³¹ Kagate kuhgwahnesugge‐nuhnezahnandahgwud chepungeshingebun emuh ooninjeeng owh Bamahdezid Kesha‐Muhnedoo

³² Mequanduhmook dush enewh kuhyet kezhegudoon, uhpe wuhyashkud kahwahsashkahgooyag emuh kedenanduhmoowinewaung, kekeche‐megahnegooyag enewh kooduggetoowinun;

³³ Ewh mezheshuh keühchegahzooyag anahsuhmenid enewh ahnishenahban cheneshebahpeëgooyag kuhya chekooduggeëgooyag; menuhwah dush ewh keweedookahwagwah egewh oo‐oo kahuhyindoodahwindjig.

³⁴ Kegeweedookahwim suh magwah kekebahquahegahzooyaun, kegemoojegezim dush uhpe kahmuhkummegooyag enewh ketebenuhwawezewinewah, kekekanduhmag ewh ahyahmag ewede keche‐kezhegoong nahwuj wanesheshing kuhya kahgenig kaduhgoomahguk tebenuhwawezewin.

³⁵ Kagoo wabenunkagoon kedahpanemoowinewah, ewh kaöonje‐tebahahmahgooyag ewh keche‐tebahahmahgoowin.

³⁶ Kenunduhwandahgoozim gooshah shuhsheebanduhmoowin cheähyahmag, uhpe dush kedooduhmag ewh oodenanduhmoowin Kesha‐Muhnedoo, cheoödahpenuhmag ewh kahwahweenduhmahgooyagoobun.

³⁷ Keche‐wuhyebah suh tahtuhgwishin owh wahtuhgwishing, kah dush kinooäzh tahoondandese.

³⁸ Dabwayanduhmoowining suh tahoonje‐bemahdeze owh quuhyuk‐azhewabezid: kishpin dush ahzhasad, kahween ninjechaug oogahminwanemahseen enewh.

³⁹ Kahween kenuhwind kedezhewabezesemin debishkoo azhewabezewaud egewh ahyahnezheetungig chenishwahnahdezewaud; kedezhewabezemin atuh debishkoo azhewabezewaud egewh duhyabwayandungig cheöonje‐bemahdezenid oojechaugoowaun.