GENESIS 39 - Ottawa New Testament Penteteuch and Psalms 1874

¹ Joseph dush keëzhewenah emuh Egypting; Potiphar dush, oomenesenoo‐oogemahmun owh Pharaoh, oogekishpenuhnaun oonje ooneenjewaung egewh Ishmaelitug kahezhewenahjig ewede Egypting.

² Jehovah dush oogeweejewaun Josephun, keshahwandahgooze dush owh enene; kuhya keähyah emuh oowegewaumening enewh oodoogemahmun Egypting duhzhe‐enenewun.

³ Kewahbunduhmoon dush oodoogemahmun ewh weejewegood Jehovahun, kuhya keweedookahgood enewh Jehovahun chemenoo‐ezhewabudenig kuhkenuh oodahnookewinun.

⁴ Joseph dush oogeminwanemegoon enewh oodoogemahmun, kuhya oogebuhmeetuhwaun: oogeähnoonegoon dush cheguhnuhwandung kuhkenuh anegookwahnig oowegewaum, kuhya oogepuggedenuhmahgoon kuhkenuh ooduhyeemun.

⁵ Kepuggummeähyahmahgud dush uhpe kahahnoonegood Joseph enewh oodoogemahmun cheguhnuhwandung oowegewaum, kuhya kuhkenuh ooduhyeemun, Jehovah oogeshahwandaun oowegewaumene enewh Egypting duhzhe enenewun oonje owh Joseph; Jehovah dush oogeshahwandaunun kuhkenuh oodahnookeewinun emuh wegewauming, kuhya emuh ketegauning.

⁶ Oogepuggedenuhmoowaun dush Josephun kuhkenuh ooduhyeemun; kah dush oogekekanduhseen gagoo ooduhyeemun, mesuh atuh ewh menik kahezhewesenid. Joseph dush keminwahbuhmenahgooze, kuhya kequahnaujewe.

⁷ ¶ Kepuggummeähyahmahgud dush kahishquah‐ahyaug oonoo, Joseph oogenunduhwanemegoon enewh oodoogemun oowedegamahgunene; oo‐oo dush oogeëgoon, Wepameshin.

⁸ Keähgoonwatum dush, oo‐oo dush oogeënaun enewh oodoogemahmun oowedegamahgunene, Benuh nindoogemaum kahween ookekanduhseen gagoo ganuhwanduhmaun emuh wegewauming, ahnooj gagoo ooduhyeemun ningepuggedenuhmaug emuh neneenjeeng;

⁹ Kahween ahweyah ahwahshema keche‐ahpeetandahgoozese maunduh wegewauming neen dush ween; kah suh kuhya gagoo ningesahgetuhmahgoose keen atuh keyow, oowedegamahgunun mah kedow: ahneen dush kaëzhekushketooyaunbaun chedooduhmaun maunduh keche‐mujje‐ezhewabezewin, chemujje‐dooduhwuggebun dush Kesha‐Muhnedoo.

¹⁰ Kepuggummeähyahmahgud dush ahnahween goo owh equa keguhnoonaud Josephun anduhsookezheguk, kahween oogebezindahwahseen, chewepamegood, gamuh cheweejewegood.

¹¹ Kepuggummeähyahmahgud oo‐oo uhpe, Joseph kepeendegad emuh wegewauming chemeekindung oodahnookeewin; kah dush ahweyah enene ahbesegoobun emuh wegewauming.

¹² Owh dush equa oogenuhwahdenaun emuh oopeensekoowahgunening, oo‐oo dush oogeënaun, Wepameshin: Joseph dush oogenuhguhduhmoowaun oopeensekoowahgun emuh ooneenjening, keöozhemoo dush, kuhya kesahgejebuhtoo.

¹³ Kepuggummeähyahmahgud dush uhpe owh equa kahwahbuhmaud kenuhgudduhmahgood oodahgwewinene emuh ooneenjeeng, kuhya kesahgejebuhewanid.

¹⁴ Oogenundoomaun enewh enenewun dabandahgoozenejin emuh wegewauming, kuhya oogeguhnoonaun, oo‐oo keënaud, Benuh oogepeendigahnaun Hebrew‐enenewun chebahpenoodoonung; ningepenaunzekaug chewepamid, ningekeche‐pepaug edush:

¹⁵ Uhpe dush kahnoonduhwid pepahgeyaun, ningenuhguh-duhmaug oodahgwewin, keöozhemoo dush, kuhya kesahgejebuhtoo.

¹⁶ Ningooche dush oogeähtoon ewh ahgwewin, nahnauzh kekewanid oodoogemahmun.

¹⁷ Oogeguhnoonaun dush oo‐oo keënaud, Owh Hebrew buhmeetahgun kahpeendiguhnud emuh andahyung, ningepenaunzekaug webahpenoooduhwid:

¹⁸ Uhpe dush ahyahshequawug kuhya pahpahgewug, ningenuhguduhmaug oopeensekoowahgun, kuhya kesahgejebuhewa.

¹⁹ Uhpe dush oodoogemahmun, kahnoonduhmenid oonoo oodekedoowinene enewh oowedegamahgunun, kahezheguhnoonegood, oo‐oo keëgood, Mesuh oo‐oo kahdooduhwid kebuhmeetahgun; kekeche‐nishkahdezewun.

²⁰ Joseph dush oogetuhkoonegoon enewh oodoogemahmun, kuhya oogeähsigoon emuh kebahquahoode‐weguhmigoong, kahduzhekebahquahegahzoonid enewh keche‐öogemah kahkebahquahwahjin: kekebahquahegahzoo dush emuh.

²¹ ¶ Jehovah dush oogeweejewaun Josephun, kuhya oogeshahwanemaun, kuhya keënahkoonega cheminwanemegood enewh ganuhwanduhmenejin kebahquahoode‐weguhmig.

²² Kuhya owh ganuhwandung kebahquahoode‐weguhmig oogepuggedenuhmahwaun Josephun kuhkenuh enewh kabahquahegahzoonejin emuh kebahquahoode‐weguhmigoong; nuhmunj edush kahezhecheganegwan emuh, ween kaëzhechega.

²³ Owh ganuhwandung kebahquahoode‐weguhmig kahween oogebuhbahmanduhseen gagoo kahguhnuhwanduhmenid Josephun; Jehovah mah oogeweejewaun, nuhmunj edush kahenuhnookenegwan, Jehovah keënahkoonega chemenoo-ëzhewabudenig.