GENESIS 37 - Ottawa New Testament Penteteuch and Psalms 1874

¹ Jacob dush keduhnuhkee emuh uhkeeng kahduhzhe‐muhyuggezenid oosun, Cananing duhzhe uhkeeng.

² Mesuh oo‐oo kahezhewabezid Jacob. Joseph, kahmetahso‐pepoon‐uhgezid ahshe neezhwahswe, oogeähshummaun oosun oomahnishtahnishemene nahdahmahwaud enewh wekahnesun; owh dush quewezanse oogeweejewaun Bilhah oogwissun, kuhya enewh oogwissun owh Zilpah oosun oowedegamahgunun: Joseph dush oogebedahjemootuhwaun enewh oosun azhe‐mujje‐ezhewabezenid wekahnesun.

³ Israel dush ahwahshema oogesahgeäun Josephun kuhkenuh dush ween oonejahnesun, kenegewun mah uhpe kahkenkaud; oogeöozhetuhmoowaun dush ahnooj anuhdetanig puhpeensekoowahgun.

⁴ Uhpe dush wekahnesun kakanduhmenid ewh ween ahwahshema kesahgeëgood oosewaun kuhkenuh dush ween wekahnesun, oogesheenganemahwaun, kah dush oogekushketoosenahwah bakah cheguhnoonahwaud.

⁵ ¶ Joseph dush gagoo keënahbundum, oogeweenduhmoowaun dush wekahnesun: ahwahshema dush oogesheenganemegoon enewh.

⁶ Oo‐oo dush oogeënaun, Bezinduhmook, kepuhgoosanemenim, maunduh enahbunduhmoowin kahenahbunduhmaun:

⁷ Benuh kegetuhkoobetoomin buhquazhegunushk emuh ketegauning, benuh dush ewh neen kahduhkoobetooyaun kepuhsegwemahgud, kuhya keqwuhyukookahbahwemahgud; enewh dush kenuhwah kahtuhkoobetooyag kewetuhyeëe kenebuhwemahgudoon, kuhya oogeshahgushketahnahwah ewh neen kahtuhkoobetooyaun.

⁸ Oo‐oo dush oogeëgoon enewh wekahnesun, Kagate enuh kegahoogemahkundahwememim? gamah kagate enuh kegahdebanememim? Ashkum dush oogesheenganemahwaun oonje oodenahbunduhmoowinun, kuhya oonje oodekedoowinun.

⁹ ¶ Keënahbundum dush menuhwah pazhik enahbunduhmoowin, oogeweenduhmoowaun dush wekahnesun, oo‐oo keëkedood, Benuh ningeënahbundum menuhwah pazhik enahbunduhmoowin; benuh dush ningeshahgushketahgoog keezis kuhya tebike‐keezis kuhya egewh metauswe ahshe pazhig ahnungoog.

¹⁰ Oogeweenduhmoowaun dush oosun, kuhya wekahnesun: oogenuhneebikemegoon dush enewh oosun, oo‐oo keëgood, Wagoonash maunduh enahbunduhmoowin kahenahbunduhmun? Kagate enuh kegahbeshahgushketahgoo neen kuhya keguh kuhya kekahnesug.

¹¹ Oogekeshahwanemegoon dush enewh wekahnesun; oosun dush ween keguhnuhwanduhmoon ewh ekedoowin.

¹² ¶ Wekahnesun dush kemahjahwun weähshummahnid oosewaun oomahnishtahnishemene ewede Shecheming.

¹³ Israel dush oo‐oo oogeënaun Josephun, Kahnuhween kekahnesug oodahshummahsewaun mahnishtahnishun ewede Shecheming? umba kegahezhenahzhahoon ewede ahyahwaud. Oo‐oo dush keëkedoowun, Oomah suh nindahyah.

¹⁴ Oo‐oo dush oogeënaun, Ezhaun kepahgoosanemin, uhwekekanim chemenoo‐bemahdezewahgwan kekahnesug, kuhya egewh mahnishtahnishug; peweenduhmooweshekun dush. Mesuh kemahjaud Joseph oonje emuh pahsuddenaug Hebroning, ketuhgwishin dush emuh Shecheming.

¹⁵ ¶ Oogemekahgoon dush pazhig enenewun, benuh dush wuhneshenoobun emuh ketegauning: oogekuhgwajemegoon dush enewh enenewun, oo‐oo keëgood, Wagoonan nandoonaühmun?

¹⁶ Oo‐oo dush keëkedoo, Nenundoonawaug nekahnesug: weenduhmooweshin kepahgoosanemin, ahneende anduhzhe ahshummahwuhsoowaud?

¹⁷ Owh dush enene oo‐oo keëkedoo, Oomah keöonjemahjahwug; ningenoonduhwaug suh oo‐oo keëkedoowaud, Umba Dothaning ezhahdah. Joseph dush oogenoopenahnaun enewh wekahnesun, oogemekahwaun dush ewede Dothaning.

¹⁸ Uhpe dush wahsuh kahoonzahbuhmahwaud, chepwah pashoo peähyahnid emuh ahyahwaud, kekuhnoonindewug chenesahwaud.

¹⁹ Oo‐oo dush keëdewug, Mesuh mahbuh natuh‐enahbundung pahtahsuhmoosad.

²⁰ Umba suh nesahdah, kuhya apuhgenahdah ningooche wahnekauning, kegahekedoomin dush, Oogeähmoogoon mujje‐ahwaseün; kegahwahbundahmin dush chetebishkoosanegwan oodenahbunduhmoowinun.

²¹ Reuben dush oogenoonduhwaun, kuhya oogekediskenaun oonje ooneenjening; oo‐oo dush keëkedoo, Kagoo nesahsedah.

²² Reuben dush oo‐oo oogeënaun, Kagoo oonjegahtuhmah-wahkagoon oomisqueem, ahpuggenik atuh oomah wahnekauning puhgwuhduhkummig anduhgoog, kagoo kuhya taungenahkagoon; wekediskenaud oonje ooneenjewaung, kuhya wepuggedenuhmahwaud menuhwah enewh oosene.

²³ ¶ Kepuggummeähyahmahgud dush uhpe Joseph tagwishing emuh uhyahnid enewh wekahnesun, oogekesekoonegoon oopuhpeensekahwahgun, ewh ahnooj anuhdetag puhpeensekahwahgun kahahgwid;

²⁴ Kuhya oogeöodahpenahwaun, kuhya oogeähpuggenahwaun emuh wahnekauning: kah dush gagoo keühyahsenoon emuh wahnekauning, kahween kenebeekahsenoon.

²⁵ Kenuhmuhduhbewug dush chewesinewaud; keöombishkinzhegwanewug dush keënahbewaud, benuh dush kepetahsuhmoosawug ahnind Ishmaelitug Gileading wanjebahjig oogeähyahwahwaun dush paquahwegunenejin pahmoonduhmenid menoomahgoojegunun kuhya mushkekeen, ezhewetoonid ewede Egypting.

²⁶ Judah dush oo‐oo oogeënaun enewh wekahnesun, Wagoonan kaöondezeyungoobun kishpin nesung kekahnisenaun, kuhya kahdooyung oomisqueem?

²⁷ Umba ahtahmahdahnig weyow egewh Ishmaelitug, kagoo dush gagoo doodahwahsedah; kekahnisenaun mah ahwe kuhya keyausenaun. Kenuhquatuhmoon dush wekahnisun.

²⁸ Kepemoosawug dush Midianitug ahtahwa‐wenenewug; Oogeöombahbeginahwaun dush Josephun oonje wahnekauning, kuhya oogeähtahmahwaun enewh Ishmaelitun Joseph weyow neezhtuhnuh‐duswahbik shooneyah ketebahahmahwahwug: Egypting dush oogeëzhewenahwaun Josephun.

²⁹ ¶ Reuben dush kepiskahbe keëzhaud dush emuh wahnekauning; kah dush Joseph keähyahse emuh wahnekauning; oogepeegoobetoonun dush oodahgwewinun.

³⁰ Oogenaunzekahwaun dush wekahnisun, oo‐oo dush oogeënaun, Kahween ahyahse owh ahbenooje; neen dush, ahneende kaëzhahyaun?

³¹ Oogeöodahpenahnahwah dush Joseph oopeensekoowahgun, kuhya oogenesahwaun mesahboozoonsun, kuhya oogegin-dahbeginahnahwah ewh peensekoowahgun emuh misqueeng;

³² Keähnookeewug dush oosewaun chepeetuhwemind ewh ahnooj anuhdetamahguk puhpeensekoowahgun; oo‐oo dush keëkedoowug, Ningemekahnaun suh maunduh: nunduhkekandun kegwis oopeensekoowahgun cheähwunoogwan gamuh kuhya goo kah.

³³ Oogenesettuhwenaun dush, oo‐oo dush keëkedoo, Kagate ningwis oopeensekoowahgun ahwun; oogeähmoogoodooganun mujje‐ahwaseeün, ahbetakummig kepesebenahdoog owh Joseph.

³⁴ Jacob dush kepeegookoonuhyabenedezoo, kuhya oogepesekaun mushkemoodegin nesuhyeëe weyowing, kuhya oogemuhwemaun enewh oogwissun nebewah dussoogoon.

³⁵ Kuhkenuh dush oogwissun kuhya kuhkenuh oodahnissun kepuhsegwewun wemenoo‐däëgood; keähgoonwatum dush chemenoo‐daäïnd; oo‐oo dush keëkedoo, Ningahezhah emuh chebaguhmigoong anduhzhe‐ahyaud ningwis nuhneenuhwanduhmaun. Mesun oosun kahezhemuhwemegood.

³⁶ Egewh dush Midianitug oogeähtahwanahwaun Josephun emuh Egypting Potipharun kahahtahmahwahjin, pazhig Pharaoh oodoogemaunsemun, oomenesenoo‐oogemahmun.