GENESIS 31 - Ottawa New Testament Penteteuch and Psalms 1874

¹ Oogenoondaunun dush oodekedoowinene Laban oogwissun, oo‐oo keëkedoonid, Jacob oogemuhkundwan kuhkenuh koosenaun ootebenuhwawezewin; mesuh koosenaun ooduhyeeming kahoondinung kuhkenuh maunduh ookechetwahwezewin.

² Jacob dush oogewahbundaun oodangwuhy owh Laban, kah dush keëzhenahgwussenene debishkoo kuhyet azhenahgwudenegebun.

³ Jehovah dush oo‐oo oogeënaun enewh Jacobun, Ezhekewan emuh ooduhkeemewaung koosebuneeg, kuhya kedenuhwamahgunug; kegahuhneweejewin dush.

⁴ Jacob dush keähnookee chenundoomemind Rachelun kuhya Leahun cheëzhahnid emuh mushkoodang anduhzhe ahyahnid mahnishtahnishun ganuhwanemahjin.

⁵ Oo‐oo dush oogeëenaun, Newahbundaun koosewah oodangwuhy ezhenahgwussenenig ganuhwahbuhmejin debishkoo kuhyet azhenahgwudenegebun; owh dush ween waKesha‐Muhnedoowemegood noosun ningeweejewig.

⁶ Kekekandahnahwah suh ewh apeecheweyaun kebuhmeetuhwug koosewah.

⁷ Ningewahyazhemig dush koosewah, kuhya oogequakesitoon netebahahmahgoowin metahching; kah dush oogepuggedenahmahgooseen Kesha‐Muhnedoon ningood chemujje‐doodahwid.

⁸ Kishpin oo‐oo kahekedoogwan, Egewh katuggezejig kegahtebahahmahgoo; kuhkenuh ahwahkaunug oogenegeähwaun katuggezenejin: kishpin dush oo‐oo kahekedoogwan, Egewh buhyapashezejig kegahtebahahmahgoo; mesuh kuhkenuh ahwahkaunug kenegeähwaud buhyapashezenejin.

⁹ Mesuh Kesha‐Muhnedoo kahezhemuhkummaud koosewaun ooduhyeëmene, ningemenig dush.

¹⁰ Kepuggummeähyahmahgud dush uhpe anjegoowaud egewh ahwahkaunug, ningeöombishkinzhegwan, kuhya ningewahbunjega emuh enahbunduhmoowining, benuh dush egewh ahyahba‐mahnishtahnishug kahquaushquunoodahwahjig ahwahkaunun kebapashezewug, keketuggezewug, kuhya kewuhwahbishkezewug.

¹¹ Ningekuhnoonig dush Jehovah oodangenemun emuh enahbunduhmoowining, oo‐oo keëzhid, Jacob: Oo‐oo dush ningeëkid, Benuh oomah nindahyah.

¹² Oo‐oo dush keëkedoo, oombishkinzhegwanin enahbin edush, bapashezewug, ketuggezewug, kuhya wuhwahbishkezewug, kuhkenuh ahyahba‐mahnishtahnishug quuhyaushkoonoodahwahjig enewh ahwahkaunun: ningewahbundaun mah kuhkenuh andoodook Laban.

¹³ Neen suh nindow Betheling duhzhe Kesha‐Muhnedoo, ewede kahduhzheseegenuhmun pemeda emuh ahsineeng, kuhya kahduhzhewahweenduhmahweyun ewh wahweendahmahgawin: puhsegween dush, mahjaun oonje maunduh uhkeeng, ezhekewan edush emuh anduhnuhkeewaud kedenuhwamahgunug.

¹⁴ Rachel dush kuhya Leah oogenuhquatuhwahwaun oo‐oo keënahwaud, Kayahbe nuh netebandahmin gagoo emuh noosenaun oowegewauming?

¹⁵ Kahnahween nemuhyugganemegoosenaun? kahnuhween kuhya oogeähtahwasenun neyowenahnin? kahnuhween kuhya oogebahnahjeähseen neshooneyahmenaun?

¹⁶ Kuhkenuh suh ewh tebenuhwawezewin Kesha‐Muhnedoo kahmukkummaud noosenaun, mesuh ewh nenuhwind ninduhyeemenaun, kuhya ooduhyeemewah nenejahnesenahnig: benuh, dush, kuhkenuh menik Kesha‐Muhnedoo kahenik, ezhechegan.

¹⁷ ¶ Jacob dush keöonishkah, kuhya oogepemoondahaun enewh oowedegamahgunun kuhya enewh oonejahnissun emuh oopequunauning enewh paquahwegunenejin;

¹⁸ Kuhya oogemahjenaun kuhkenuh enewh oodahwahkaunun, kuhya kuhkenuh ooduhyeemun kahooduhyeemejin, enewh ahwahkaunun kahkushkeähjin, kahoondenahjin emuh Padan‐araming, weëzhaud emuh Canaan uhkeeng anduhzhe ahyahnid oosun Isaacun.

¹⁹ Laban dush oogeähwemoozhwaun enewh oomahnishtahnishemun: Rachel dush oogekeemoodenahbuhneen enewh muhzeneneen oosun dabanemahpuneen.

²⁰ Jacob dush oogewuhyazhemaun Labanun Syriaing duhzhe‐enenewun ewh keweenduhmahwahsig wemahjaud.

²¹ Medush keöozhemood kegegezid kuhkenuh ooduhyeemun; kepuhsegwe dush, kuhya oogeähzhahwahaun seebe, keënahbe dush ewede enuhkuhkayah Gilead wahjewing.

²² Nasoogoonuhgudenig dush keweenduhmahwah Laban ewh keöozhemoonid Jacobun.

²³ Oogeweejewegoon dush enewh wekahnesun, kuhya neezhwahsoogoon kebemoosa kenoosoonawaud oogeühdemahwaun dush emuh Gilead wahjewing.

²⁴ Kesha‐Muhnedoo dush oogenaunzekahwaun Labanun Syriaing duhzhe enenewun emuh enahbunduhmoowining tabekuddenig, oo‐oo dush keënaud, Aungwahmezin cheënahsewud Jacob wanesheshing gamah kuhya mahyahnahduk.

²⁵ ¶ Laban dush oogeühdemaun Jacobun. Jacob dush kekuhbashegoobun emuh wahjewing: Laban dush oogeweeje-kuhbashemaun enewh wekahnissun emuh Gilead wahjewing.

²⁶ Laban dush oo‐oo oogeënaun Jacobun, Wagoonash kahoonjeëzhechegayun, kekemeyun, kuhya kemahjewenudwah nindahnissug, debishkoo takoonindjig ewh ahzhuhwashk uhyoong?

²⁷ Wagoonash keemooj kahoonjeöozhemooyun keweenduhmahwesewun; kedahgemahjenahzhahoon emuh moojegezewining, kuhya nuhguhmoowining, tawaëguning, kuhya muhtwawacheguning?

²⁸ Kah kuhya kegepuhgedenuhmahwese cheöojeemugwah ningwissug kuhya nindahnisug? kegekuhkebahjechega ewh keëzhechegayun.

²⁹ Kushkeäwezemahgud neneenj chemujjedoodoonaumbaun; tebikoong dush ningeguhnoonig koos oo‐Kesha‐Muhnedoomun, oo‐oo keëzhid, Aungwahmezin cheënahsewud Jacob wanesheshing gamah kuhya mahyahnahduk.

³⁰ Noongoom dush ahpeche kedenandum chemahjahyun, Oonje ahpeche nundahwanduhmun cheëzhahyun emuh koos oowegewauming, wagoonash edush kahoonjekeemoodemeyun nemuhnedoomug?

³¹ Jacob dush oogenuhquatuhwaun oo‐oo keënaud Labanun, Ningesagiz suh: oo‐oo mah ningeëkid, Koonemah nindahmuh-kummig enewh oodahnissun.

³² Owh kamekummowud enewh kemuhnedoomug kahween tahbemahdezese: anahsuhmewaud kekahnesenahnig nunduhkekandun kishpin gagoo keduhyeem atagwan emuh anduhzhe ahyahyaun, oodahpinun dush. Jacob mah kahween oogekekanduhseen Rachelun kekemoodenid enewh.

³³ Laban dush kepeendega emuh Jacob oowegewauming, kuhya emuh Leah oowegewauming, kuhya emuh oowegewaumewaung egewh neezh buhmeetahgun‐equawug; kah dush oegemekahwahseen. Me dush kesahgahung emuh Leah oowegewauming, kepeendega dush emuh Rachel oowegewauming.

³⁴ Rachel dush oogeöodahpenahbuneen enewh muzzeneneneen, kuhya oogeähsahpuneen emuh ahtanig papegwahwegung‐uhyeëen, keähgweduhbe dush emuh. Laban dush kenundahwahbe anegookwaug ewh wegewaum, kah dush oogemekahwahseen.

³⁵ Oo‐oo dush oogeënaun enewh oosun, Kagoo ningahwuhsittahwanemegoose nindoogemaum oonje kushketoosewaun chepuhsegweyaun emuh anahsuhmeyun; nindezheähyah mah azheähyahwaud equawug. Kenundahwahbe dush, kah dush oogemekahwahseen enewh muhzeneneen.

³⁶ ¶ Me dush uhpe kenishkahdezid Jacob, kuhya kenuhnebekemaud Labanun: Jacob dush oogeguhnoonaun Labanun, oo‐oo keënaud, Wagoonan suh nemujje‐ezhechegawin? Wagoonan nekuhkebahjechegawin ewh anegook kenoosoonaöoyun?

³⁷ Ahnahwe kenundooneëgayun emuh ahtagin kuhkenuh ninduhyeëmun, wagoonash kahmekuhmun anduhchingin enewh keduhyeemun dabandahgwukkin emuh kewegewauming? ahtoon oomah anahsuhmewaud nekahnisug kuhya kekahnisug, kegahtebahkoonegoonahnig edush.

³⁸ Nishtuhnuh duhsoo‐pepoon akoo‐weejewinaun; egewh kenoozha‐mahnishtahnishemug kuhya kenoozha‐mesahboozoog kahween keähnuhwawezesewug wenegeähwuhsoowaud, kah kuhya ningeäumwahseeg kedahyahba‐mahnishtahnishemug.

³⁹ Kahween kegepeetuhmoosenoon egewh kahnesegoojig enewh ahwaseyun; neen suh ningewuhneäug; kegenundahwanim chemeeninaun, kishpin kahkeemoodemegoowaunan kezheguk, gamah kuhya tebikuk.

⁴⁰ Mesuh oo‐oo kahezheähyahyaun; kahzhegukkin ningewesuhgahkiz oonje kezhahtag, kuhya tabekukin ningewesuhguj; kuhya ningenuhguhnegoon nenebahwin.

⁴¹ Mesuh nishtuhnah duhsoo‐pepoon kahezheähyahyaun emuh kewegewauming; metausoo‐pepoon ahshe newin kegebuhmeetoon oonje kedahwahkaunug: metahching dush kegequakesittoon netebahahmahgoowin.

⁴² Kishpin suh weejewesigoobun noos oo‐Kesha‐Muhnedoomun, Abraham oo‐Kesha‐Muhnedoomun, enewh Isaac quasahjin, kagate pezheshig kedahgeëzhemahjenahzhuh. Kesha‐Muhnedoo oogewahbundaun nekooduggetoowin kuhya anuhnookeemahguk neneenjeen, mesuh tebikoong kahoonjenuhneebikemik.

⁴³ ¶ Laban dush oogenuhquatuhwaun Jacobun, oo‐oo keënaud Jacobun, Nindahnisug suh oogoo wadahnesemindjig, kuhya nenejahnisug oogoo wanejahnesemindjig, kuhya nindoowahkahnug oogoo ahwahkaunug, kuhkenuh wuhyahbunduhmun, neen netebandahnun: ahneen dush noongoom kezheguk kadoodahwugwah oogoo nindahnisug gamah kuhya enewh oonejahnesewaun kahnegeähwahjin?

⁴⁴ Umba‐suhnoo, oozhetoodah wahweendahmahdewin, neen kuhya keen; chekekandahgoozeyung neen kuhya keen.

⁴⁵ Jacob dush oogeöodahpenaun ahsineen oogepuddukkeshemaun dush chekekenoowahjechegunewenid.

⁴⁶ Jacob dush oo‐oo oogeënaun enewh wekahnissun, Mahwunjeïk ahsineeg; oogeöodahpenahwaun dush ahsineen, keöoqueshemahwaud dush: kewesenewug dush emuh keöoqueshemahwaud.

⁴⁷ Laban dush oogeëzhenekahdaun Jegar‐Sahadutha; Jacob dush Galeed oogeëzhenekahdaun.

⁴⁸ Laban dush oo‐oo keëkedoo, Oo‐oo wakoosing kekenoowahjechegun tahahwun nesahwahyeëe uhyahyung keen kuhya neen noongoom kezheguk. Mesuh Galeed kahoonjeëzhenekahdag;

⁴⁹ Kuhya Mizpah: oo‐oo mah keëkedoo, Kegahahkahwahbuhmigoonaun Jehovah, uhpe wahsuh ahyahyun kuhya dush neen wahsuh ningooje ahyahyaun.

⁵⁰ Kishpin kooduggeüdwah nindahnisug, kuhya kishpin oodahpenudwah bakahnezejig equawug oogoo dush ween nindahnisug, kahween ahweyah enene keweejewegoosenaun; benuh kekekanemegoonaun Kesha‐Muhnedoo azhewabezeyung keen kuhya neen.

⁵¹ Laban dush oo‐oo oogeënaun enewh Jacobun, Benuh maunduh waquissing, kuhya mahbuh nesuhwuhyeëe paduhkeshing ahsin kahuhsug uhyahyung neen kuhya keen;

⁵² Benuh maunduh waquesing, kuhya mahbuh paddukkeshing ahsin, tahoonjekekekenoowahdud, ewh wekah chepahzhedahunsewaun oo‐oo waquissing chenaunzekoonaun, kuhya keen chepahzhedahunsewun oo‐oo waquissing kuhya mahbuh paduhkeshing ahsin chenaunzekahweyun, chemujje‐doodahdeyung.

⁵³ Kegahdebahkoonegoonaun oo‐Kesha‐Muhnedoomun Abraham, kuhya oo Kesha‐Muhnedoomun owh Nahor, oo Kesha‐Muhnedoomewaun enewh oosewahbuneen. Jacob dush kemushkahwe‐wahweendahmahga ketuhgooweenaud enewh oosun Isaac quasahjin.

⁵⁴ Jacob dush kesahsahgewejega emuh wahjewing, kuhya oogenundoomaun enewh wekahnisun chepeäumwahnid buhquazhegunun: me dush keäumwahnid buhquazhegunun, kuhpa tebik dush keähyahwug emuh wahjewing.

⁵⁵ Keche kekezhab dush Laban keöonishkah, kuhya oogeöojeemaun enewh oogwissun kuhya enewh oodahnissun, kuhya oogeshahwanemaun; Laban dush keühnemahjah, keëzhah dush emuh anduhnuhkeed.