GENESIS 30 - Ottawa New Testament Penteteuch and Psalms 1874

¹ Uhpe dush Rachel kahwahbundung ewh kenegetuhmoowahsig Jacobun enewh ahbenoojeün Rachel oogegahwanemaun enewh oomissaün; oo‐oo dush keënaud Jacobun, Meezheshin ahbenoojeüg, kishpin meezhesewun ningahnib

² Jacob dush oogenishkanemaun enewh Rachelun: oo‐oo dush keëkedoo, Kesha‐Muhnedoong enuh neen nindenandahgooz, me suh owh kahenahkoonegad cheöonejahnesesewun?

³ Oo‐oo dush keëkedoowun, Benuh oomah ahyah nebuhmeetahgun‐equam Bilhah, wepam suh owh; oogahahyahwaun dush ahbenoojeün kanuhmuhdahbenejin emuh necheengwuning, cheöonejahneseyaun dush, ween oonje.

⁴ Oogemeenaun dush oobuhmeetahgun‐equamun Bilhahun chewedegamahnid: Jacob dush oogewepamaun enewh.

⁵ Bilhah dush keünjegoo, kuhya oogenegetuhmoowaun Jacobun quewezansun.

⁶ Rachel dush oo‐oo keëkedoo, ningetebahkoonig Kesha‐Muhnedoo, kuhya ningebezindaug, ningemeenig dush kaöogwisseyaun: me suh Dan kahoonjeëzhenekahnaud.

⁷ Bilhah dush oobuhmeetahgun‐equamun owh Rachel menuhwah keünjegoo, kuhya oogenegetuhmahwaun Jacobun menuhwah pahzig quewezansun.

⁸ Rachel dush oo‐oo keëkedoo, Ningekeche‐kuhgwajewahwah nemissa, ningemahmauzheäh dush. Naphtahli dush oogeëzhenekahnaun.

⁹ Uhpe Leah kahwahbundung kepoone‐negeähwuhsood, oogeöo‐dahpenaun Zilpahun oobuhmeetahgun‐equamun, oogemeenaun dush enewh Jacobun cheweedegamahnid.

¹⁰ Zilpah dush Leah oobuhmeetahgun‐equamun oogenegetuhmoowaun Jacobun quewezansun.

¹¹ Leah dush oo‐oo keëkedoo, Pebahtuhyenoowug suh: Gad dush oogeëzhenekahnaun.

¹² Zilpah dush Leah oobuhmeetahgun‐equamun oogenegetuhmoowaun Jacobun menuhwah pazhig quewezansun.

¹³ Leah dush oo‐oo keëkedoo, Neshahwandahgooz shahwandahgooze mah ningahegoog egewh wadahnesemindjig: Asher dush oogeëzhenekahnaun.

¹⁴ ¶ Reuben dush keëzhah uhpe koo kaushkezhoond buhquazhegunushk, oogemekaunun dush mandrakun emuh mushkootang, oogepeetuhwaun dush enewh oogeen Leahun. Rachel dush oo‐oo oogeënaun Leahun Meezheshin kepahgoosanemin ahnind kegwis oomandrakemun.

¹⁵ Oo‐oo dush oogeëgoon, Ahgahsandahgwud nuh ewh kemuhkuhmeyun nenahbam? kewemuhkum nuh kuhya ningwis oomandrakemun? Rachel dush oo‐oo keëkedoo, Kegahwepamig suh dush noongoom tebekuk oonje kegwis oomandrakemun.

¹⁶ Jacob dush ketuhgwishin wanahgooshenig ketegauning keöonjebaud, Leah dush kesahgahum wenahquashkahwaud, oo‐oo dush keëkedoo, Kegahpeendigow suh; kegekishpenuhnin suh enewh ningwis oomandrakemun. Oogewepamaun dush ewh tebekuk.

¹⁷ Kesha‐Muhnedoo dush oogebezinduhwaun enewh Leahun, keünjegoo dush, kuhya oogenegetuhmoowaun Jacobun enewh quewezansun me nahning.

¹⁸ Leah dush oo‐oo keëkedoo, Kesha‐Muhnedoo ningemeenig netebahahmahgoowin, oonje kemeenug newedegamahgun nebuhmeetahga‐equamun; Issachar dush oogeëzhenekahnaun.

¹⁹ Menuhwah dush Leah keünjegoo, kuhya oogenegetuhmoowaun Jacobun menuhwah pazhig quewezansun, me ningoodwahching.

²⁰ Leah dush oo‐oo keëkedoo, Kesha‐Muhnedoo ningemeenig keche‐meegewawin; zhuhyegwah dush ningahweedegamig newedegamahgun, oonje kenegetuhmahwug ningoodwahswe quewezansun: Zebulun dush oogeëzhenekahnaun.

²¹ Bahmah dush oogeähyahwaun equazansun, Dinah dush oogeëzhenekahnaun.

²² ¶ Kesha‐Muhnedoo dush oogemequanemaun Rachelun, Kesha‐Muhnedoo kuhya oogebezinduhwaun, kuhya oogenesahkoonuhmoowaun puhyowene.

²³ Keünjegoo dush, kuhya oogeähyahwaun quewezansun; oo‐oo dush keëkedoo, Kesha‐Muhnedoo ningeëkoonuhmaug nedahbussanemegoowin:

²⁴ Joseph dush oogeëzhenekahnaun enewh; oo‐oo dush keëkedood, Menuhwah pazhig quewezansun ningahmeenig Jehovah.

²⁵ ¶ Kepuggummeähyahmahgud dush uhpe Rachel kahnegeäud Josephun, Jacob oo‐oo oogeënaun Labanun, Mahjenahzhahooshin, cheëzhahyaun tebenuhwa ninduhkeem, kuhya emuh kahoondahdezeyaun.

²⁶ Meezheshin nindequamug kuhya nenejahnesug, egewh kahoonjebuhmeetoonaun, kuhya puggedeneshin: kekekandaun mah nebuhmeetahgawin kahezhebuhmeetoonaun.

²⁷ Laban dush oo‐oo oogeënaun, Kepahgoosanemin, kishpin kahmekahmoowaunan minwandahgoozewin emuh anahsuhmeyun, oomah duhnezin; ninkekandaun mah Jehovah keshahwanemid keen oonje.

²⁸ Oo‐oo dush keëkedoo, Weenduhmooweshin ewh katebahahmoonaun, kegahtebahuhmoon dush.

²⁹ Oo‐oo dush oogeënaun, Kekekanim kahezhebuhmeetoonaun, kuhya kahezheähyahwaud kedoowahkahnug kahguhnuhwanemugig.

³⁰ Punge suh atuh kegeähyahwahbuneeg chebwah tuhgwishenaun, noongoom dush keche‐bahtuhyenoowug kedahyahahmug; kegeshahwanemig kuhya Jehovah pahahkoo tuhgwishenaun: ahneen suh dush uhpe kaöondenuhmoowugwah gagoo egewh ahyahjig emuh neen tebenuhwa newegewauming?

³¹ Oo‐oo dush keëkedoo, Wagoonash katebahahmoonaun? Jacob dush oo‐oo keëkedoo, Kahween gagoo kegahtebahahmahwese: kishpin oo‐oo wahdoodahwewunan, menuhwah ningahahshummaug kuhya ningahguhnuhwanemaug kemahnishtahnishemug.

³² Ningahshahbooshkahwaug kuhkenuh kemahnishtahnishemug noongoom kezheguk, ningooche dush ningahahsaug egewh katuhgezejig pezhekewug, kuhya kuhkenuh egewh wazahwezejig mahnishtahnishug kuhya egewh katuggezejig mesahboozoog; mesuh oogoo katebahahmahweyun.

³³ Me suh chekuhnoodahmahgooyaun tebenuhwa nemenoo‐ezhewabezewin bahmah, uhpe katebahahmahgooyaun ahnahsuhmeyun: kuhkenuh katuggezesigoog mesahboozoog, kuhya wahzahwezesigoog mahnishtahnishug, oogekemoodenun enewh ningahenanemegoo.

³⁴ Laban dush oo‐oo keëkedoo, Benuh nindenandum cheëzhewabuk debishkoo akedooyun.

³⁵ Ewh dush kezheguk ningooche oogeähsaun enewh buhyapashezenejin kuhya katuggezenejin ahyahba‐mesahboozoon, kuhya kuhkenuh enewh katugezenejin equa‐mesahboozoon, kuhya kuhkenuh enewh punge wahyahbishkezenejin, kuhya kuhkenuh enewh wazahwezenejin mahnishtahnishun, oogemeenaun dush enewh oogwissun.

³⁶ Nesoogoon dush kebemoosa ningooche dush keduhneze kenuhguhnaud enewh Jacobun: Jacob dush oogeähshummaun ahnind Laban oomahnishtahnishemun.

³⁷ ¶ Jacob dush oogeöodahpenaun ahzaude‐metigoonsun, ashkahquudenig, kuhya enewh puhgaunemeezhe‐metigoonsun, kuhya keche‐ahzhahwamine‐metigoonsun; kuhya oogechegunahgaquahahnun enewh chewahwahbishkezenid enewh metigoonsun.

³⁸ Oogeähtoonun dush enewh metigoonsun kahchegunahgaquahungin emuh anahsummegahbuhwenid enewh mahnishtahnishun emuh nebekaug uhtanig enewh ahtoobaunun uhpe buhmenequanid enewh mahnishtahnishun, cheünjegoonid dush uhpe buhmenequanid.

³⁹ Egewh dush mahnishtahnishug keünjegoowug emuh anahsuhmesing enewh metigoonsun, oogenegeähwaun dush uhwahkaunun buhyapashezenejin, kuhya katuhgezenejin.

⁴⁰ Jacob dush oogepuhkagahbuhweäun enewh mahnishtahnisheensun, oogeëzhegahbuhweäun dush enewh mahnishtahnishun cheguhnuhwahbuhmahnid enewh buhyapashezenid, kuhya kuhkenuh enewh wazahwezenid oomahnishtahnishemun Laban; oogepuhkagahbuhweäun kuhya enewh ween tebenuhwa oomahnishtahnishemun, kahween dush oogeduhgoogahbuhweähseen emuh uhyahnid Laban ooduhwahkaunun.

⁴¹ Kepuhgummeähyahmuhgud dush uhpe koo kahunjegoonejin enewh ahwuhkaunun nuhwuj mashkuhwezenejin, Jacob keähtood enewh metigoonsun emuh anahsuhmishkinzhegwanid enewh ahwuhkaunun emuh nebekaunig, cheünjegoonid dush magwa‐metigoonsing.

⁴² Uhpe dush uhkoo nahnuhmezenid enewh uhwuhkaunun, kahween oogepenahseen: Laban suh dush oogetebanemaun enewh nuhwuj nanuhmezenejin, Jacob dush enewh nuhwuj mashkuhwezenejin.

⁴³ Owh dush enene ashkum kekechtwahweze, nebewah kuhya ahwuhkaunun oogeähyahwaun, kuhya buhmeetahgunequan, kuhya buhmeetahga‐enenewun, kuhya baquahwegunenejin, kuhya mamaungeshayun.