GENESIS 26 - Ottawa New Testament Penteteuch and Psalms 1874

¹ Kepukkuddakummegud dush emuh uhkeeng, kahishquahpukkuddakummeguk ewh netum kepuhkudda-kummeguk uhpe bamahdezid Abraham. Isaac dush oogeëzhahnun Abimelechun oodoogemahmewaun egewh Philistinug emuh Geraring duhzhe uhkeeng.

² Oogewahbuhmaun dush enewh Jehovahun, oo‐oo keëgood, Kagoo ezhahkan ewede Egypting; duhnuhkeen emuh uhkeeng kawahbundahenaun:

³ Pahbahduhnuhkeen oomah uhkeeng, kegahweejewin dush, kuhya kegahshahwanemin; keen mah, kuhya kenejahnesug kegahmeenenim kuhkenuh oonoo uhkeen, kuhya ningahezhechega ewh kahmushkahwewahweenduhmahwugebun Abraham koosebun;

⁴ Kuhya ningahmeshenooäug kenejahnesug cheëshenoowaud debishkoo ashenoowaud gezhigoong duhzhe ahnungoog, kuhya ningahmeenaug kenejahnesug kuhkenuh oonoo uhkeen; Keen edush kaöonejahneseyun tahoonjeshahwandahgoozewug ahnooj azheweenzoojig ahnishenahbag oomah uhkeeng;

⁵ Oonje Abraham kebezindung nindinwawin, kuhya keguhnuhwandung nekuhgaundwawin, nekuhgequawinun, nindenahkoonegawinun, kuhya netebahkoonegawinun.

⁶ ¶ Isaac dush keduhnuhkee emuh Geraring:

⁷ Ewede dush uhkeeng duhzhe ahnishenahbag oogekuhgwajemahwaun duhzhemahwaud oowedegamahgunun: oo‐oo dush keëkedoo, Nindahwamah suh mahbuh: kesageze mah oo‐oo cheëkedood, Newedegamahgun ahwe; koonemah, keëkedoo, nindahnesigoog egewh ewede uhkeeng duhzhe enenewug oonje Rebekah; quuhnaujewebun mah.

⁸ Kepuggummeähyahmahgud suh uhpe kenooazh anduhnuhkeed ewede, emuh wahsacheguning keöonzahbid Abimelech Philistinug oodoogemahmewaun, kewahbuhmaud Isaacun weejooduhmenoomaud Rebekahun oowedegamahgunene.

⁹ Abimelech dush oogenundoomaun Isaacun, oo‐oo keënaud, Benuh kagate kewedegamahgun ahwe mahbuh; wagoonash dush kahoonjeëkedooyun, Nindahwamah ahwe? Isaac dush oo‐oo oogeënaun, Oonje suh keëkedooyaun, Koonemah nindahnib oonje mahbuh equa.

¹⁰ Abimelech dush oo‐oo keëkedoo, Wagoonash suh oo‐oo kahdoodahweyaung? wanepuzh kewedegamahgun oodahgewepamegoon pazhig enewh ahnishenahban, keen dush kedahgepeetuhwemin ewh mujje‐ezhewabezewin.

¹¹ Abimelech dush oogeäungwahmemaun kuhkenuh enewh oodahnishenahbamun, oo‐oo keënaud, Ahwagwan ketaungenahgwan oonoo enenewun gamuh oowedegamahgunene, ahbetakummig tahnesah.

¹² Isaac dush keketega ewede uhkeeng, kuhya ewh nahsaub neebing oogesuhgukkenaun ningoodwauk duching menik: oogeshahwanemegoon dush Jehovahun.

¹³ Ashkum dush kekechetwahweze owh enene, kuhya ashkum nebewah tebenuhwawezewin oogeähyaun nahnauzh egoo kekeche‐twahwezid.

¹⁴ Oogedebanemaun mah mahnishtahnishun kuhya pezhekewun, kuhya kekeche‐bahtuhyenoowun oobuhmeetahgunun: oogekeshahwanemegoon dush enewh Philistinun.

¹⁵ Kuhkenuh mah enewh oondahebaunun kahwahnekahduhmenepun oosebuneen oobuhmeetahgunene, uhpe bamahdezenid enewh oosebuneen Abrahamun, egewh Philistinug oogekebahahnahwah, kemooshkinuhtoowaud emuh uhkee.

¹⁶ Abimelech dush oo‐oo oogeënaun enewh Isaacun, Mahjaun oonje ninduhkeemenaung; ahwahshema mah keen kemushkahwiz nenuhwind dush ween.

¹⁷ ¶ Isaac dush ewede keöonjemahjah, keöozhega dush emuh Geraring akoo pahsuddenaug.

¹⁸ Menuhwah dush Isaac oogewahnekahdaunun enewh oondahebaunun, kahwahnekahdagebuneen magwah kebemahdezenid oosebuneen Abrahamun; egewh mah Philistinug oogekebahahnahwah kahneboonid enewh Abrahamun: oogeezhenekahdaunun dush debishkoo oosebuneen kahezhenekahduhmenepun enewh.

¹⁹ Oobuhmeetahgunun dush owh Isaac kewahnekawun emuh pahsuddenaug, kuhya oogemekaunahwah emuh tuhkib uhpena wanjejewung nebe.

²⁰ Egewh dush ganuhwanemahjig enewh Geraring duhzhe pezhekewun oogemegahnahwaun enewh ganuhwanemahnejin Isaac oopezhekemun, oo‐oo keëkedoowaud, Nenuhwind suh nedebandahnaun ewh nebe: Esek dush oogeëzhenekahdaun ewh oondahebaun; oonje kemegahnegood enewh.

²¹ Menuhwah dush pazhig oondahebaun oogewahnekahdaunahwah, ewh dush kuhya keöonjemegahdewug; Sitnah dush ewh oogeëzhenekahdaun.

²² Ewede dush keöonjekooze, kuhya oogewahnekahdaun menuhwah pazhig oondahebaun; kah dush kemegahdesewug oonje ewh: Rehoboth dush oogeëzhenekahdaun ewh; oo‐oo dush keëkedoo, zhuhyegwah mah ningetahwahbetahmahgoonaun Jehovah, ningahmeshenoomin dush emuh uhkeeng.

²³ Ewede dush keöonjemahjah keëzhah dush emuh Beershebaïng.

²⁴ Oogewahbuhmaun dush Jehovahun ewh tebekuk, oo‐oo dush keëgood, Ne‐Kesha‐Muhnedoowemik owh Abraham koosebun: kagoo sagezekan, keweejewin mah, kuhya kegahshahwanemin, kuhya ningahmeshenooäug kenejahnesug oonje nebuhmeetahgun Abraham.

²⁵ Oogeöozhetoon dush sahsahgewejegun‐ahbik ewede, kuhya oogenuhnaundoomaun Jehovahun, kuhya keöozhega emuh: oobuhmeetahgunun dush owh Isaac oogewahnekahdahnahwah oondahebaun emuh.

²⁶ ¶ Me dush kepenaunzekahgood Abimelechun oonje Geraring, kuhya Ahuzzathun pazhig oowejekewaün, kuhya Phicolun ookeche‐menesenoo‐oogemahmun.

²⁷ Isaac dush oo‐oo oogeënaun, Ahnishwin penaunzekahweyag, kekanduhmag sheenganemeyag, kuhya kemahjenauzhahooyag oonje keduhkeemewaung?

²⁸ Oo‐oo dush keëkedoowug, Ningewahbundahmin suh kagate weedookook owh Jehovah: oo‐oo dush ningeëkedoomin, Mahnoo kegahmushkahwe‐wahweendahmahdemin, nenuhwind kuhya keen, mahnoo dush oozhetoodah ewh wahweendahmahdewin;

²⁹ Keen kuhnuhga chemujjedoodahwesewaung, debishkoo kahezhemujjedoodahgoosewun, kemenoo‐doodahgooyun atuh, kuhya kemahjenahzhahoogooyun emuh pezaunezewining; noongoom suh keshahwanemig owh Jehovah.

³⁰ Oogeöozhetuhmahwaun dush wekoongawin, kewesenewug dush kuhya kemenequawug.

³¹ Keche‐kekezhab dush keöonishkahwug, kuhya kemushkahwe‐wahweendahmahdewug: Isaac dush oogemahjenahzhahwaun, mesuh kenuhguhnegood enewh emuh pezaunezewining.

³² Kepuggummeähyah dush nahsaub ewh kezheguk, kepeëzhahwun Isaac oobuhmeetahgunun, oogeweendahmahgoon dush ewh kewahnekahduhmenid oondahebaun, oo‐oo dush keëgood, Ningemekahmin suh nebe.

³³ Shebah dush oogeëzhenekahdaun: mesuh Beersheba wanjeëzhenekahdag ewh oodanah nahnauzh egoo noongoom kezheguk.

³⁴ ¶ Esau dush kenemeduhnuh‐duhsoo‐pepoon‐uhgeze uhpe wahdegamaud Judithun oodaunun Beeri owh Hittite, kuhya Bashemathun oodahnun Elon owh Hittite.

³⁵ Mesuh oonoo kahoonjekushkanduhmoowaud Isaac kuhya Rebekah.